ཐ་སྙད་བེད་སྤྱོད་ནོར་བ།

སྐྱོ་བྲག་དགའ་དབང་།

 
བོད་སྤྱི་པའི་ཐ་སྙད་རང་ངོས་ནས་བསྟན་དོན་མི་འདྲ་བ་ཡིན་ནའང་། དིང་སང་གང་ཟག་འགའ་རེས་བེད་སྤྱོད་བྱེད་པ་ན་གཅིག་ཏུ་འཁྲུལ་བ་ཅན་ཆེས་མང་བར་སྣང་སྟེ། དཔེར་ན། ལོ་རྒྱུས་དང་འབྲེལ་ཆེ་བའི་ཐ་སྙད་དེ། སྤྱིར་བོད་པ་རང་གི་ཐ་སྙད་ལྟར་ན། དངོས་སུ་བྱུང་མྱོང་བའི་འདས་དོན་བརྗོད་པ་ལ་ལོ་རྒྱུས་དང། དངོས་སུ་བྱུང་བའི་འདས་དོན་མིན་ན་ཡང་ཡིན་པ་ལྟར་བཅོས་པ་ལ་སྒྲུང་ཟེར།
དེ་ལ་ཡང་དངོས་བྱུང་གི་ལོ་རྒྱུས་ཡིན་པ་གང་ཞིག་ལ། རང་ཉིད་འཁོར་བ་ལས་གཏན་དུ་ཐར་པའི་བྱུང་བ་བརྗོད་པ་ལ་རྣམ་ཐར། རང་ཙམ་དུ་མ་ཟད་གཞན་པའང་འཁོར་བ་ལས་གཏན་དུ་ཐར་པའི་མཛད་ཕྲིན་བསྐྱངས་པར་བརྗོད་པ་ལ་མཛད་རྣམ། ཆོས་ཉམས་སུ་བླངས་པའི་ཡོན་ཏན་སྐྱེ་ཚུལ་བརྗོད་པ་ལ་རྟོགས་བརྗོད། རིགས་དང་ངོ་བོ་དང་ནུས་པ་དམིགས་བསལ་བ་ཡོད་རབས་བརྗོད་པ་ལ་ཆེ་བརྗོད། འདས་དོན་གྱི་གནས་ཚུལ་ཙམ་བརྗོད་པ་ལ་བྱུང་བ་བརྗོད་པ། བྱུང་མྱོང་བའི་གནས་ཚུལ་གྱི་རིམ་པ་མང་པོ་ཞིག་བརྗོད་པ་ལ་བྱུང་རབས། རྒྱལ་པོ་ན་རིམ་གྱི་བྱུང་བ་བརྗོད་པ་ལ་རྒྱལ་རབས། དམ་པའི་ཆོས་ཀྱི་བྱུང་ཚུལ་བཤད་པ་ལ་ཆོས་བྱུང་། སྐྱེ་བ་མང་པོར་གཞན་དོན་དུ་ཕེབས་པའི་བྱུང་བ་བརྗོད་པ་ལ་སྐྱེས་རབས་སོགས་ཟེར་ཞིང་།

དངོས་བྱུང་གི་ལོ་རྒྱུས་མིན་ན་ཡང་ཡིན་པ་ལྟར་བཅོས་པའི་སྒྲུང་ཡིན་པ་གང་ཞིག་ལ། དངོས་ཡོད་ཀྱི་གནས་ཚུལ་གཞི་ལ་བཞག་སྟེ་གང་ཟག་ག་གེ་མོ་དང་ཆེ་གེ་མོའི་ལོ་རྒྱུས་ཡིན་པ་ལྟར་བཅོས་ནས་བྲིས་པ་ལ་བརྩམས་སྒྲུང་། དངོས་ཡོད་ཀྱི་གནས་ཚུལ་ལས་བརྒལ་བ་རྟོག་འཆར་གྱི་ངོ་བོར་བྲིས་པ་ལ་རྟོག་སྒྲུང་། མི་ལས་འདས་པའི་ལྷའི་བྱུང་རབས་བཤད་པ་ལ་ལྷ་སྒྲུང་། མི་ལས་གཞན་པ་འདྲེ་ཡི་བྱུང་རབས་བཤད་པ་ལ་འདྲེ་སྒྲུང་སོགས་ཟེར་གྱིན་ཡོད།
དེ་ལྟར་ན་ལོ་རྒྱུས་ནི་དངོས་དོན་དང་། སྒྲུང་ནི་བཅོས་པ་ཡིན་ལ། ལོ་རྒྱུས་ནི་སྤྱི་དང་། རྣམ་ཐར་ནི་བྱེ་བྲག་ཡིན་པ་སོགས་ཐ་སྙད་རང་ངོས་ཀྱི་བསྟན་དོན་མི་འདྲ་བ་ཡིན་ནའང་། དིང་སང་ནི་ལོ་རྒྱུས་དང་སྒྲུང་གཅིག་ཏུ་འཁྲུལ་པ་དང་། ལོ་རྒྱུས་དང་རྣམ་ཐར་གཅིག་ཏུ་འཁྲུལ་པ་སོགས་བེད་སྤྱོད་ནོར་བར་བྱེད་པ་ཆེས་མང་ངོ་། །