ཏོག་དབྱིབས་ནད་ཡམས་ཁྲོད་ཕ་བུ་གཉིས་ཀྱི་གླེང་མོལ།

བདེ་སྐྱིད།

(ཏོག་དབྱིབས་ནད་ཡམས་ཀྱི་རྐྱེན་པས་ཁྱིམ་ལ་ཕྲུ་གུ་དང་མཉམ་དུ་བཞུགས་མཁན་མང་བས། ལྷོད་སྡོད་ཀྱིས་དུས་ཚོད་བེད་མེད་དུ་མ་བཏང་པར་དཔེ་དེབ་མང་ཙམ་ཀློག་ཐུབ་པ་ཡིན་ན། རྐྱེན་ངན་གྲོགས་ཤར་ཡོང་ཐུབ།)

ཕྲུ་གུ། པཱ་ལགས། ཁྱེད་རང་ག་རེ་གནང་གི་ཡོད་པས།

པཱ་ལགས། ངས་བོད་ཡིག་དེབ་གཅིག་ཀློག་གི་ཡོད། ཁྱེད་རང་ག་རེ་བྱེད་ཀྱི་ཡོད་པས།

ཕྲུ་གུ། ངས་ཀྱང་བོད་ཡིག་དེབ་གཅིག་ཀློག་གི་ཡོད། པཱ་ལགས་ཁྱེད་རང་གིས་ཀློག་བཞིན་པའི་བོད་ཡིག་དེབ་ཀྱི་མིང་ལ་ག་རེ་རེད་པས། རྩོམ་པ་པོ་སུ་རེད།

པཱ་ལགས། ངས་གློག་བཞིན་པའི་དེབ་ཀྱི་མིང་ལ་ ( ངོས་ཀྱི་ཡུལ་དང་། ངོས་ཀྱི་མི་མང་། ) ཟེར་བ་དང་། དེབ་དེ་ནི་སྤྱི་ནོར་༧གོང་ས་༧སྐྱབས་མགོན་ཆེན་པོའི་མཛད་རྣམ་རེད། དེབ་འདི་ནི་ཨིན་ཡིག་ནང་དུ་ཡང་ཡོད། ཨིན་ཡིག་ཕྱག་དེབ་ཀྱི་མཚན་ལ་ ( My land and my people) རེད།

ཕྲུ་གུ། ཨ་ལས། ངས་ཀློག་བཞིན་པའི་དེབ་འདི་ཡང་སྤྱི་ནོར་༧གོང་ས་༧སྐྱབས་མགོན་རིན་པོ་ཆེའི་མཛད་རྣམ་ཕྱག་དེབ་རེད། ཕྱག་དེབ་འདིའི་མཚན་ལ་ (བཙན་བྱོལ་ནང་གི་རང་དབང་) ཟེར་།ཕྱག་དེབ་འདི་ཐོག་མར་ཨིན་ཡིག་ཐོག་བྲིས་གནང་ཡོད་པ་དང་། ཕྱག་དེབ་ཀྱི་ཨིན་ཡིག་གི་མཚན་ལ་ Freedom in Exile ཞུ་གི་འདུག

པཱ་ལགས། ཨ་ལས། བྱས་ན་ང་གཉིས་ཀྱིས་ཀློག་བཞིན་པའི་དེབ་གཉིས་ཀ་༧གོང་ས་མཆོག་གི་མཛད་རྣམ་རེད་འདུག་ག

ཕྲུ་གུ། རེད་འདུག ད་དུང་ང་གཉིས་ཀྱིས་ཀློག་བཞིན་པའི་དེབ་གཉིས་ཀ་བོད་ཡིག་དེབ་རེད་འདུག པཱ་ལགས་ཁྱེད་རང་གིས་ཟླ་བ་གཅིག་ལ་དེབ་ག་ཚོད་ཀློག་གི་ཡོད་པས།

པཱ་ལགས། ལས་ཀ་བྲེལ་བ་ཞེ་དྲག་མེད་སྐབས་དེབ་མང་པོ་ཀློག་ཐུབ་ཀྱི་འདུག ཡིན་ནའང་། ཟླ་བ་རྟག་པར་ཉུང་མཐར་དེབ་གསུམ་ཀློག་གི་ཡོད། དེབ་མང་པོ་ཀློག་པ་ཡིན་ན་སྐད་ཡིག་རང་བཞིན་གྱིས་ཡར་རྒྱས་འགྲོ་གི་རེད། མ་གཞི་ཁྱེད་རང་གིས་ཟླ་བ་གཅིག་ལ་དེབ་ག་ཚོད་ཀློག་གི་ཡོད་པས།

ཕྲུ་གུ། པཱ་ལགས། ངས་དེབ་མང་ཤོས་སློབ་གྲྭ་གུང་སེང་ཡིན་སྐབས་ཀློག་ཐུབ་ཀྱི་འདུག པཱ་ལགས་ཁྱེད་རང་གིས་མཁྱེན་གསལ་ལྟར། ང་རང་ཀེལ་གྷི་རི་སྤྱི་ཚོགས་དཔེ་མཛོད་ཁང་ལ་འགྲོ་རྒྱུར་དགའ་པོ་ཡོད། ངས་སློབ་དེབ་མ་ཡིན་པ་ང་རང་གིས་དགའ་མོས་ཆེ་བའི་དེབ་ཟླ་བ་རེ་ལ་དེབ་བཞི་ལས་མ་ཉུང་བ་ཀློག་གི་ཡོད། དེབ་ཀློག་ན་སྐྱིད་པོ་འདུག

པཱ་ལགས། དེབ་མང་པོ་ཀློག་ཐུབ་ན་ཧ་ཅང་ཡག་པོ་རེད། དེབ་ཀློག་རྒྱུའི་གོམས་གཤིས་མ་བརླག་པ་བྱེད་དགོས་རེད་ད།

ཕྲུ་གུ། ལགས་སོ། པཱ་ལགས།

པཱ་ལགས། མ་གཞི་ནས་ཁྱེད་རང་གིས་དེབ་གང་འདྲའི་རིགས་ཀློག་རྒྱུར་དགའ་པོ་ཡོད་པས། དཔེར་ཆ་བཞག་ན། སྒྲུང་དེབ་དང་། ཡང་ན་ལོ་རྒྱུས་དེབ་ལྟ་བུ་གང་འདྲ་ཀློག་རྒྱུར་དགའ་པོ་ཡོད།

ཕྲུ་གུ། པཱ་ལགས། ང་ཆུང་ཆུང་ཡིན་དུས་སྒྲུང་དེབ་ཀློག་རྒྱུར་དགའ་པོ་ཡོད། ཡིན་ནའང་། དེང་སྐབས་ང་རང་འཛམ་གླིང་གི་མི་སྣ་གྲགས་ཅན་གྱི་ལོ་རྒྱུས་དེབ་ཀློག་རྒྱུར་དགའ་པོ་ཡོད། ད་ལྟ་ངས་༧གོང་ས་མཆོག་གི་མཛད་རྣམ་ཀློག་གི་ཡོད། དེའི་སྔོན་ལ་ངས་ནོ་ཝེའི་ཞི་བདེའི་གཟེངས་རྟགས་བཞེས་མྱོང་མཁན་ཞིང་གཤེགས་ Nelson Mandela མཆོག་གི་སྐུ་ཚེའི་ལོ་རྒྱུས་ Long Walk to Freedom ཞེས་པའི་དེབ་ཐུག་པོ་ཤོག་གྲངས་མང་པོ་ཡོད་པ་དེ་ཆ་ཚང་ཞིབ་ཕྲ་བྱས་ནས་བཀླགས་པ་ཡིན། དེབ་ཐུག་པོ་ཡིན་ནའང་། ཧ་ཅང་སྙན་ པོ་དང་གནས་ཚུལ་མང་པོ་ཤེས་པས་མགྱོགས་པོ་བཀླགས་ཚར་སོང་།

པཱ་ལགས། རེད་རེད། དེབ་ཀློག་པ་ནི་གློག་བརྙན་བལྟས་པ་ནང་བཞིན་ཡོད་རེད་ལ། ཡང་སྐབས་རེ་དེབ་ཀློག་སྐབས་ཁྱེད་རང་ལ་དེབ་འབྲི་མཁན་གྱིས་སྐད་ཆ་བཤད་ཀྱི་ཡོད་པའི་ཚོར་སྣང་སླེབས་ཀྱི་རེད།

ཕྲུ་གུ། འདུག འཚམས་རེ་དེ་འདྲ་ཡོང་གི་འདུག

པཱ་ལགས། ཁྱེད་རང་གིས་དེབ་མང་པོ་མུ་མཐུད་ནས་ཀློག་པ་ཡིན་ན། མ་འོངས་པར་སྐད་ཡིག་ལ་དཀའ་ངལ་མི་ཡོང་བ་མ་ཚད། ཁྱེད་རང་རྩོམ་པ་པོ་ཞིག་ཆགས་ཐུབ་ཀྱི་རེད།

ཕྲུ་གུ། པཱ་ལགས། དེབ་མང་པོ་ཀློག་ན་རྩོམ་པ་པོ་གང་འདྲ་བྱས་ནས་ཆགས་ཐུབ་ཀྱི་རེད།

པཱ་ལགས། ད་ལྟ་ང་ཚོས་མཐོང་རྒྱུ་ཡོད་པའི་དེབ་འབྲི་མཁན་དང་། གསར་འགྱུར་འབྲི་མཁན་སྐད་གྲགས་ཆེན་པོ་ཚང་མ་དེབ་མང་པོ་ཀློག་མཁན་རེད། ཁྱེད་རང་གི་དེབ་དགའ་ཤོས་ཀྱི་རྩོམ་པ་པོའི་ལོ་རྒྱུས་ལ་དྲ་རྒྱའི་ཐོག་ནས་ལྟོས་དང་། ཁྱེད་རང་གིས་གསལ་པོ་ཤེས་ཀྱི་རེད།

ཕྲུ་གུ། པཱ་ལགས། ཁྱེད་རང་ད་ལྟ་ཀློག་བཞིན་པའི་དེབ་ཀློག་ཚར་ན་དེབ་ག་རེ་ཀློག་རྩིས་ཡོད་པས།

པཱ་ལགས། ད་ལྟ་ཁྱེད་རང་གིས་ཀློག་བཞིན་པའི་༧གོང་མཆོག་གི་མཛད་རྣམ་ (བཙན་བྱོལ་ནང་གི་རང་དབང་ Freedom in Exile ) ཞེས་པ་ཨིན་ཡིག་ཐོག་༧གོང་ས་མཆོག་དང་ལྷན་དུ་འབྲི་མཁན་རྩོམ་པ་པོ་ Alexander Norman གྱིས་ཉེ་ཆར་༧གོང་ས་མཆོག་གི་མཛད་རྣམ་ཕྱག་དེབ་གསར་པ་ THE DALAI LAMA An Extraordinary Life ཞེས་པ་འདོན་སྤེལ་བྱས་ཡོད་པ་དེ་ཀློག་རྩིས་ཡོད།

ཕྲུ་གུ། ཨ་ལས། བྱས་ན་པཱ་ལགས་ཀྱིསཕྱག་དེབ་དེ་ཀློག་ཚར་པ་དང་། ང་ལ་ཀློག་རྒྱུར་གནང་རོགས།

པཱ་ལགས། ཡིན་དང་ཡིན། །