ཉིན་དང་པོའི་གདུང་སེམས་མཉམ་བསྐྱེད་ཀྱི་ལས་འགུལ་ཆེན་མོ།

མཁོ་སྤྲོད་པ། རྨེའུ་དཀོན་རྒྱམ། 

ཕྱི་ལོ་ ༢༠༡༣ ཟླ་ ༡ ཚེས་ ༣༠ རེས་གཟའ་ལྷག་པ་ཉིན་རྒྱ་གར་རྒྱལ་ས་ལྡི་ལིར་བཀའ་སྤྱི་གཉིས་ཀྱིས་སྣེ་ཁྲིད་འོག 《བོད་མིའི་གདུང་སེམས་མཉམ་སྐྱེད་ཀྱི་ལས་འགུལ་ཆེན་མོ་》འགོ་འཛུགས་གནང་སོང་།

སྔ་དྲོའི་ཆུ་ཚོད་ ༡༢།༡༥ སྟེང་རྒྱ་གར་རྒྱལ་ས་ལྡི་ལི་གསར་པའི་Talktora Stadium ཚོགས་ཁང་ནང་དུ། རྒྱ་གར་གྱི་སྲིད་བློན་གཞོན་པ་ཟུར་པ་དང་བྷེ་རྗེ་པེའི་ཚོགས་པའི་གཞུང་འབྲེལ་སྐུ་ཚབ་སྐུ་ཞབས་L.K.Advani མཆོག་དང་། རྒྱ་གར་དབུས་གཞུང་གི་གྲོས་ཚོགས་འོག་མའི་འཐུས་མི་དང་ཀེང་རི་སིའི་(Priya Dutt) དང་། ཀང་རི་སིའི་ཆབ་སྲིད་མགོ་ཁྲིད་Dr. E. M Sudarsan Natchiappan  རྣམ་གཉིས་གཙོས།  ཨ་ཀཱ་ལིའི་སྤྱི་ཁྱབ་བློན་ཆེན་གཞོན་པ་སྐུ་ཞབས་Sukhbir Singh Badal ཇམ་མུ་ཀཱ་ཤི་མུར་མངའ་སྡེའི་ས་གནས་སྤྱི་མཐུན་ཚོགས་པའི་སྐུ་ཚབ་ Shri Hassan Khan བཅས་རྒྱ་གར་གྱི་ཆབ་སྲིད་ཚོགས་པ་ཁག་གི་གནད་ཡོད་མི་སྣ་ཁག དེ་བཞིན་སྲིད་སྐྱོང་བློ་སེང་གེ་མཆོག་གིས་གཙོས་པའི་བཀའ་བློན་རྣམ་པ། སྤྱི་འཐུས་ཚོགས་གཙོ་གཞོན་གཉིས་ཀྱིས་གཙོས་པའི་སྤྱི་འཐུས་རྣམ་པ། རྒྱ་བལ་འབྲུག་གསུམ་གྱི་ས་གནས་ཁག་ནས་ཕེབས་པའི་སེར་སྐྱ་མི་མང་ ༥༠༠༠ ་དང་། རྒྱ་གར་བོད་དོན་རྒྱབ་སྐྱོར་བ་ ༡༠༠༠ ལྷག་བཅས་ཁྱོན་མི་ ༦༠༠༠ ལྷག་འདུ་འཛོམས་བྱུང་། ནང་སྲིད་བཀའ་བློན་རྒྱ་རི་སྒྲོལ་མ་ལགས་ཀྱིས་མཛད་རིམ་ངོ་སྤྲོད་གནང་རྗེས། བོད་ཀྱི་ཟློས་གར་ཚོགས་པའི་ངོས་ནས་རྔ་རོལ་དང་བཅས་རྒྱ་གར་དང་བོད་ཀྱི་རྒྱལ་གླུ་བཏང་བ་དང་མཉམ་དུ་རྒྱལ་གཅེས་དཔའ་བོ་རྣམས་ལ་མྱ་ངན་གུས་འདུད་སྐར་མ་གཅིག་རིང་ཞུས་སོང་།

 

དེ་ནས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། བོད་ནང་ནས་བོད་མི་ ༩༩ རང་ལུས་མེར་བསྲེགས་གནང་བའི་རྒྱུ་རྐྱེན་དང་བརྒྱུད་རིམ། རྒྱ་གཞུང་གིས་ལོ་ངོ་ ༦༠ ལྷག་ལ་གདུག་རྩུབ་དྲག་སྤྱོད་ཆེན་པོའི་སྲིད་ཇུས་སོགས་ངོ་སྤྲོད་གནང་རྗེས། རྒྱ་གར་གཞུང་མང་སོགས་ཀྱིས་བོད་པའི་དཀའ་ངལ་དང་བོད་ཀྱི་ཁོར་ཡུག་གི་གནད་དོན་སོགས་ཀྱི་ཐད་ལ་རྒྱབ་སྐྱོར་གནང་རྒྱུའི་འབོད་སྐུལ་གནང་སོང་།

 

དེ་བཞིན་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས། བོད་ནང་གཞིས་བཞུགས་བོད་མི་རྣམས་ལ་རྒྱ་གཞུང་གིས་འདི་འདྲའི་ལས་འགུལ་སྤེལ་རྒྱུའི་གོ་སྐབས་ནམ་ཡང་སྤྲད་ཀྱི་མེད་ཀྱང་། རྒྱ་གར་ནི་མང་གཙོ་དང་རང་དབང་ཅན་གྱི་རྒྱལ་ཁབ་ཡང་དག་པ་ཞིག་ཡིན་པས་ང་ཚོར་ལས་འགུལ་སྤེལ་རྒྱུའི་བཀའ་འཁྲོལ་བསྩལ་བ་སོགས་ལ་བཀའ་དྲིན་རྗེས་དྲན་ཞུ་རྒྱུ་ཡིན། དེ་རིང་འདིར་ཕེབས་པའི་རྒྱ་གར་གྱི་དཔོན་རིགས་དང། མི་མང་རྣམས་གྷན་དྷི་སོགས་ཀྱི་རྒྱུན་མཐུན་པའི་སྐུ་ཚབ་མཚོན་གྱི་ཡོད་པར་ངོས་འཛིན་ཞུ་རྒྱུ། གཞན་(Dr Rajendra Prasad)ལགས་ནས་བོད་མིའི་སེམས་ཤུགས་མ་ཤི་ན་བོད་ཀྱི་གནད་དོན་མི་ཤི་སྐད་གསུང་པ་ལྟར་ང་ཚོ་ཡང་སེམས་ཤུགས་ཆགས་མེད་པ་དང་། རྒྱ་གར་གྱིས་བོད་ལ་རྒྱབ་སྐྱོར་དགོས་དོན། བོད་ཀྱི་ཁོར་ཡུག་ཇི་ལྟར་གལ་ཆེ་ཡིན་པ། རྒྱ་གར་དང་བོད་གཉིས་ཀྱི་བླ་སློབ་འབྲེལ་བའི་སྐོར། དེ་བཞིན་དུ་རྒྱ་གར་གཞུང་མང་གཉིས་ནས་བོད་དོན་ལ་རྒྱབ་སྐྱོར་གནང་རོགས་ཞེས་སོགས་གསུངས་སོང་།

དེ་རྗེས་བོད་ཀྱི་ཟློས་གར་ཚོགས་པས་ཆེད་བསྒྲིགས་གནང་བའི་རྒྱ་གར་གཞུང་མང་ལ་ཐུགས་རྗེ་ཆེ་ཞུའི་གླུ་གཞས་ཀྱི་བརྙན་འཁོར་གཟིགས་འབུལ་ཞུས།

 

དེ་ནས་རྒྱ་གར་གྱི་སྲིད་བློན་གཞོན་པ་ཟུར་པ་དང་བྷེ་རྗེ་པེའི་ཚོགས་པའི་གཞུང་འབྲེལ་སྐུ་ཚབ་སྐུ་ཞབས་L.K.Advani མཆོག་གིས། བོད་དོན་འཐབ་རྩོད་ཀྱི་རེ་བ་གཙོ་བོ་༸གོང་ས་མཆོག་ཡིན་པ་དང་། ༸གོང་ས་མཆོག་གིས་གཉིས་སྨན་དབུ་མའི་ལམ་གྱི་སྲིད་བྱུས་བཏོན་པ་དེ་བོད་དོན་ལ་ཐུགས་འཁུར་དང་འགན་འཁུར་གནང་བ་ཞིག་ཡིན་ཚུལ་དང་། རྒྱ་གར་ལ་མཚོན་ན་དེ་སྔོན་དཀའ་ངལ་ཆེན་པོ་ཡོད་ཀྱང་། ༡༩༥༠ ལོའི་ཕྱི་ཟླ་ ༡༡ པའི་ཚེས་ ༧ ཉིན་དེ་སྔོན་རྒྱ་གར་གྱི་ནང་སྲིད་བློན་ཆེན་སར་ཌར་པཱ་ཊེལ་ (Sardar Patel) མཆོག་གིས། བོད་དོན་ཐད་ཤོག་ངོས་བདུན་ཅན་གྱི་ཡི་གེ་ཞིག་སྲིད་བློན་ནེ་རུ་མཆོག་ལ་ཕུལ་ཏེ་བོད་དོན་ལ་རྒྱབ་སྐྱོར་གནང་ཡོད་སྐོར་དང་། ཡང་། འདས་པའི་དུས་རབས་ ༢༠ དེ་ནུབ་ཕྱོགས་པའི་དུས་རབས་ཆགས་ཡོད་ཀྱང་། མ་འོངས་པའི་དུས་རབས་ ༢༡ ཨེ་ཤ་ཡའི་དུས་རབས་ཆགས་ཡོད། ང་རང་ཉིད་ཀྱི་ངོས་ནས་དུས་རབས་འདི་རྒྱ་གར་གྱི་དུས་རབས་ཤིག་ཆགས་པའི་འདོད་པ་ཡོད། གལ་སྲིད་དེ་ལྟར་ཆགས་པ་ཡིན་ན། དུས་རབས་ཉེར་གཅིག་ནང་བོད་ཀྱི་དཀའ་རྙོག་འདི་སེལ་ཏེ། དུས་རབས་དེ་བོད་དང་རྒྱ་ནག་གི་དུས་རབས་ཤིག་ཏུ་འགྱུར་བར་རེ་བ་དང་སྨོན་ལམ་ཡོད་ཅེས་གསུང་བཤད་གནང་སོང་།

 

གཞན་ཡང་རྒྱ་གར་དབུས་གཞུང་གི་གྲོས་ཚོགས་འོག་མའི་འཐུས་མི་དང་ཀེང་རི་སིའི་Priya Dutt)་མཆོག་གིས། བོད་ཀྱི་གནས་སྟངས་ལ་གུས་བརྩི་དང་དམིགས་བསལ་རང་ལུས་མེར་བསྲེཊ་གནང་མཁན་  ༩༩ ལ་གུས་ཞབས་ཡོད་པ་དང་། ཁོང་གི་ཕ་སྐྱབས་བཅོལ་བ་ཞིག་ཡིན་པའི་ཆ་ནས་ཁོ་མོར་འཕྲད་པའི་དཀའ་སྡུག་གི་ཉམས་མྱོང་བརྒྱུད་བོད་དོན་ལ་རྒྱབ་སྐྱོར་དང་དོ་སྣང་ཆེན་པོ་བྱེད་ཀྱི་ཡོད་ཚུལ་དང་། མ་འོངས་པར་མོ་དང་མོའི་གྲོགས་པོ། ལས་རོགས་ཚོགས་པ་བཅས་ཀྱི་ངོས་ནས་རྒྱབ་སྐྱོར་གནང་རྒྱུ་ཡིན་པའི་གསུང་བཤད་གནང་སོང་།

 

ཇམ་མུ་ཀར་ཤི་མིར་མངའ་སྡེའི་གཞུང་འཛིན་ཚོགས་པའི་འཐུས་མི་Shri Hassan Khan) མཆོག་གིས།  རྒྱ་ནག་ལ་ཡིད་ཆེས་བྱེད་རྒྱུ་ཤིན་ཏུ་དཀའ་མོ་རེད། ཁྱེད་ཚོས་ལོ་མང་པོའི་རིང་སེམས་ཤུགས་མ་ཆག་པར་མངོན་འདོད་ཉར་བ་ཡིན་པས་ཉིན་ཞིག་ བོད་དོན་བདེན་མཐའ་གསལ་རྒྱུ་རེད། རྒྱ་གར་ནང་སྐྱེས་ཏེ་བོད་མཐོང་མ་མྱོང་མཁན་རྣམས་ཀྱིས་སྐད་ཡིག་སོགས་རྒྱུད་འཛིན་ཐུབ་པ་ནི་དགེ་མཚན་རེད། ཆོས་དང་རིག་གཞུང་གཅེས་ཉར་ཐུབ་པར་ཤིན་ཏུ་དགེ་མཚན་ཆེན་པོ་མཐོང་སོང་།  ང་དང་ངའི་མངའ་སྡེའི་མི་མང་རྣམས་ནས་རྒྱབ་སྐྱོར་ཡོད་ཅེས་སོགས་གསུངས་སོང་།

 

དེ་རྗེས་རྒྱ་གར་གྲོས་ཚོགས་གོང་མའི་འཐུས་མི་དང་ཀོང་རེ་སི་ཚོགས་པའི་གཞུང་འབྲེལ་ སྐུ་ཚབ་Dr S. Natchiappan) མཆོག་གིས། ང་ཚོས་བོད་དོན་ལ་རྒྱབ་སྐྱོར་ཡོད་པ་དང་། བོད་ནང་གི་འགྲོ་བ་མི་ཡི་ཐོབ་ཐང་གི་གནས་སྟངས་ལ་སེམས་འཚབ་ཡོད། ཁྱེད་རང་ཚོ་བོད་མི་ཚང་མ་གཅེན་གཅུང་ལ་བརྩི་བཞིན་ཡོད་པ་ལས་ཁྱིམ་མཚེས་དང་། སྐྱབས་བཅོལ་བ་སོགས་སུ་ངོས་འཛིན་ཞུ་ཡི་མེད། ཚོར་སྣང་དེ་ཡང་ང་ཚོའི་དབུ་ཁྲིད་དང་མི་མང་ལ་ཡོད་སྐོར་གསུངས་སོང་།

ལྡི་ལི་དོན་གཅོད་བཀའ་ཟུར་བསྟན་པ་ཚེ་རིང་མཆོག་གིས་ཐུགས་རྗེ་ཆེ་ཞུའི་གསུང་བཤད་གནང་བ་དང་མཉམ་དུ་ལས་འགུལ་ལ་མཉམ་ཞུགས་གནང་མཁན་ཡོངས་ནས་བདེན་ཚིག་སྨོན་ལམ་འུར་འདོན་གྱིས་ཉིན་དང་པོའི་མཛད་སྒོ་མཇུག་བསྒྲིལ་སོང་།