རྒྱལ་སྟོན་དུས་ཆེན་ཉིན་ལ་ཕུལ། བོད་འབྱོར་རྩོམ་་་་་་ལྷམ་ཀོག
ཉི་མ་འདི་ཚོར་སྤྲིན་པ་དེ་ཡང་ནད་པ་ཞིག་དང་མཚུངས་ཤིང
སྐེ་བསྒགས་ནས་གཞན་གྱིས་རྡུང་གིན་ཡོད་པ་དང་འདྲ
ཉི་མ་འདི་ཚོར་མེ་ལོང་དེ་ཡང་སླ་ང་བཞིན་ནག་རོག་གེར་སོང་ཞིང
ཅི་ཡང་འཆར་རྒྱུ་མི་འདུག་པའི་རྒན་པོ་ལོང་བ་དེ་དང་མཐུན་འདུག
ཉི་མ་འདི་ཚོར་མགོ་ཐོག་ན་བརྐྱངས་པའི་སྤྲིན་པ་དེ་ཡང་ཡོམ་སྣང་འདུག་ལ
རྐང་བའི་འོག་གི་ས་གཞི་འདི་ཡང་དངངས་སྙམ་སྐྱེས
ཉི་མ་འདིའི་སྟེང་ལ་ད་དུང་ཉི་མ་འདི་འདྲ་ཞིག་ཡོད་ཚེ
འཇིག་རྟེན་འདི་ནས་སྡོད་འདོད་སྐྱེས་པའི་མི་གཅིག་ཀྱང་ཡོད་མི་སྲིད་ལ
མི་གཅིག་ཡོད་པའི་དབང་དུ་བཏང་ན་དེ་ནི་ཀླད་རྩ་མི་ཚང་བ་ཞིག་ཡིན་ངེས
ངས་ཉི་མ་འདི་ལྟག་ཀ་ནས་དེད་དེ་མདུན་དུ་ཕུད་འདོད་ཀྱང
དེ་ནི་ངས་དུས་ཚོད་ལྟར་དུ་འདང་བརྒྱབས་པ་ལྟ་བུ་ཞིག་མ་ཡིན་པར
ཤིན་ཏུ་དཀའ་མོ་ཞིག་རེད
གལ་ཏེ་དེ་ལྟའི་ཤེད་ཤུགས་འདྲ་ཡོད་པའི་བསམ་བློ་བཏང་རུང
ལོ་རྒྱུས་འདྲ་ཆག་པོ་ཞིག་གིས་ལྟག་པར་འཐེན་ནས་ཐབས་ཤེས་ཁྱོན་ནས་མི་འདུག
གང་ལྟར་ཉི་མ་འདི་ཚོར
ངས་བསམ་བློ་བཏང་བཏང་བའི་མཐའ་མར
ཀླད་པའི་སྐྲ་ལོ་བྱིལ་ནས་མགོ་བོ་སྤྲེལ་རྒན་ཞིག་གི་འཕོངས་ཚོས་དང་འདྲ་ཡང
སྤུ་ཉག་གཅིག་ལུས་ཡོད་པ་ནི་ལྷ་སའི་ཇོ་བོ་རེད
ད་དུང་ཇོ་བོའི་མདུན་གྱི་རྡོག་སྒྲ་རྩུབ་མོ་དེ་དང་མ་ཎིའི་དབྱངས་རྟ་དེ་དག་རེད
འདི་ལ་སྙན་ངག་ཞེས་བའི་ཆོ་ལོ་ངའི་ཁ་ནས་ཐལ་སོང་། སྙན་མོ་འདུག ནང་དོན་འདུག སྒྱུ་རྩལ་འདུག