གཡང་སྐྱབས་རྒྱལ།
“ཤར་ཕྱོགས་དམར། ཉི་མ་ཤར།་་་” གཞས་འདི་གོ་མྱོང་ངམ། གོ་མ་མྱོང་ན་ཟུར་གྱི་ཡུ་ཊུབ་ནས་གཟིགས་དང་། ངས་བོད་སྐད་ཐོག་ནས་གླུ་དབྱངས་འདི་བཙལ་བ་ཡིན། རྙེད་མ་བྱུང་།
གླུ་དབྱངས་འདི་བོད་ལ་སླེབས་དུས་བོད་མིས་མ་ཎི་གྱེར་གྱེར་བྱས་པ་རེད། ཉེ་ཆར་ ༡༠ པའི་ཚེས་ ༡༩ ཉིན་མདོ་སྨད་ཀྱི་སློབ་མས་སྐད་ཡིག་སྐོར་གྱི་སྐད་འབོད་དེ་བྱས་སྐབས་གླུ་དབྱངས་འདི་ངའི་སེམས་ལ་འཁོར་བྱུང་། གྲོང་གསེབ་ཀྱི་རྩིག་པ་རེ་རེའི་ངོས་ན་དམག་ཆས་གྱོན་པའི་མའོ་ཡི་པར་རིས་དང་། དེའི་གཤམ་དུ་རྩིག་ངོས་འཇམ་པོར་བརྡར་བའི་ངོས་སུ་བོད་ཡིག་དང་རྒྱ་ཡིག་གིས་ “མའོ་ཡི་གསུང་བཏུས་”བྲིས་ཡོད་པ་དྲན་བྱུང་། བོད་ཆས་རྙིང་ཧྲུལ་གོན་ཞིང་ལས་ཀས་ཨ་ཐང་ཆད་པའི་གྲོང་གསེབ་པ་ཚོས་རྒྱ་ཡིག་ཡིག་འབྲུ་གཅིག་ཀྱང་མི་ཤེས་ཀྱང་གླུ་དབྱངས་འདི་ཚོ་ཤར་ཤར་ལེན་པ་དྲན་བྱུང་། “ཤར་ཕྱོགས་དམར། ཉི་མ་ཤར།” ཉི་མ་མུ་མཐུད་ནས་ཤར།
སྐུ་ཞབས་པད་མ་འབུམ་གྱིས་རིག་གནས་གསར་བརྗེའི་སྐོར་ལ་བྲིས་པའི་སྨིན་དྲུག་སྐེ་འཁྱོག་ཏུ། “དང་པོ་མའོ་ཀྲུའུ་ཞིའི་གསུང་བཏུས་ཐོབ་དཀའ། རིམ་བཞིན་མའོ་ཀྲུའུ་ཞིའི་གསུང་བཏུས་མ་གཏོགས་དེབ་གཞན་ཐོབ་དཀའ།”ཞེས་བྲིས་འདུག མའོ་ཀྲུའུ་ཞིའི་གསུང་བཏུས་དེ་ཚོ་ནི་ངས་མཐོང་བའི་བོད་ཡིག་གི་དཔེ་ཆ་ཐོག་མ་དེ་ཚོ་ཡིན། རྒྱབ་ཐུམ་དམར་མོ་དེ་ཚོ་ནི་ཧ་ཅང་ཡིད་དུ་འོང་། ཤོག་ངོས་དང་པོ་ན་ཕྱི་གསལ་ནང་གསལ་ཅན་གྱི་ཤོག་གུ་ཞིག་གིས་བཀབ་པའི་འོག་ན་མའོ་ཀྲུའུ་ཞིའི་པར་ཡོད། “མའོ་ཀྲུའུ་ཞིའི་གསུང་བཏུས་” བོད་ཡིག་ནས་སློབ་སྦྱོང་བྱས་ཏེ་ “རིག་གནས་གསར་བརྗེ་”དང་ “ལམ་ཕྱོགས་སློབ་གསོ་”སོགས་ཀྱི་ལས་འགུལ་ནང་ “གསར་བརྗེའི་”ལས་དོན་བསྒྲུབས་པ་རེད། ཡང་ངའི་སེམས་ལ་ཉེ་ཆར་གྱི་སློབ་མ་ཚོའི་སྐད་འབོད་དེ་དྲན་བྱུང་། མའོ་ཀྲུའུ་ཞིའི་གསུང་རྩོམ་དང་རྫས་འགྱུར་རིག་པ་ལ་བོད་ཡིག་གི་ཐོག་ནས་སྦྱངས་ན་ཤེས་མི་ཤེས་ཀྱི་ཁྱད་པར་ཡོད་དམ།
ང་ལ་བསམ་བློའི་རྒྱབ་ལྗོངས་ཤིག་དགོས་པར་གྱུར། ང་ལ་རྒྱབ་ལྗོངས་མེད་པར་གྱུར། ཨུ་རུ་སུའི་སྐབས་སུའང་སྐད་ཡིག་ལ་རིགས་བཞི་བགར་ནས། ཁ་ཤས་ལ་གཞུང་གི་རྒྱབ་སྐྱོར་དང་རོགས་རམ་ཡོད་པ་དང་ཁ་ཤས་ལ་མེད་པ་བྱས་པ་མ་ཟད། མེད་པ་བྱས་པ་དེ་ཚོ་ནི་ཕལ་ཆེ་བ་ཆབ་སྲིད་ཀྱི་དགོས་དབང་གིས་རེད་ཅེས་བཤད། ༼ཞིབ་ཚགས་པོར་ཀློག་རྒྱུ་མ་བྱུང་ལ། དེའི་སྐོར་གྱི་དེབ་ཅིག་དྲ་བའི་འབྲེལ་ཐག་འདི་ན་ཡོད། ༽
ངའི་སེམས་ལ་དྲན་པ་གཅིག་ཡོད་པ་ནི་ངའི་གྲོགས་པོ་ཞིག་གི་གཏམ་དེ་རེད། དེ་ནི་ ༡༩༦༠ སྨད་ཙམ་ནས་ཁོང་གིས་ རྩིས་རིག་གི་སློབ་ཚན་ བོད་བསྒྱུར་བྱས་ཏེ་སློབ་ཁྲིད་བྱས་པའི་གཏམ་རྒྱུད་དེ་རེད། ཐོག་མར་བསྒྱུར་མ་ཐག་ སྣུམ་པར་ཞེས་པའི་འཕྲུལ་ཆས་དེ་བརྒྱུད་ནས་པར་དུ་བཏབ་པ་དང་། དེ་ནས་འཛིན་གྲྭ་ལ་འཁྱེར་ཏེ་སློབ་ཁྲིད་བྱས་པ་དེ་རེད། ང་སློབ་གྲྭ་ལ་འགྲོ་དུས་ ༡༩༧༥ ཙམ་ལ་ཡིན་པ་འདྲ། ང་ཚོ་ལ་རྒྱ་ཡིག་གི་འཛིན་གྲྭ་ལོས་ཡོད། དེ་ནི་རྒྱའི་སྐད་ཡིག་གི་འཛིན་གྲྭ་དེ་ཁོ་ན་རེད། སློབ་ཚན་གཞན་ཚང་མ་བོད་སྐད་དང་བོད་ཡིག་རེད། ད་དུང་རིམ་གྱིས་ བོད་ཀྱི་སྐད་ཡིག་འཛིན་གྲྭ་ལ། “ཙག་ཀྲ་”ཟེར་བ་ལྟ་བུའི་ཚིག་ཀྱང་ཐོན། དེ་ནི་ཨ་མདོ་སྐད་ལ་ “འབར་ཞུན་”ཟེར་བ་དེ་རེད། འདིའི་རྒྱུ་མཚན་ནི། “ལྗོངས་ཞིང་ལྔའི་མཉམ་སྒྲིག་སློབ་གཞི་” ཞེས་པའི་སྐད་ཡིག་གི་ཀློག་དེབ་བཏོན་ཏེ། བོད་སྐད་སྨྲ་བའི་ས་ཆ་ཚང་མར་སྐད་ཡིག་གི་ཀློག་དེབ་གཅིག་གྱུར་བཟོས་པ་ལས་བྱུང་བ་རེད། འདིའི་གྲས་ནི། “རྒྱལ་ཡོངས་བོད་ཡིག་སློབ་གཞི་ཞིབ་བཤེར་ཨུ་ཡོན་ལྷན་ཁང་གིས་གཏན་ལ་ཕབ་”ཅེས་བཀོད་འདུག
ད་ངས་སེམས་ལ་མ་ཤར་བ་ནི། “མཚོ་སྔོན་”མ་ཡིན་པའི་བོད་ཀྱི་ས་ཁུལ་གཞན་དག་རེད། “བོད་རང་སྐྱོང་ལྗོངས་”གཙོས་པའི་ས་ཁུལ་གཞན་དག་ཏུ་ དུས་ནམ་ཞིག་ནས་ཚུལ་ཇི་ལྟར་ སྐད་ཡིག་མ་ཡིན་པའི་བསླབ་གཞི་གཞན་རྣམས་རྒྱ་ཡིག་ནས་སློབ་མགོ་བརྩམས་པ་ཡིན་ནམ། ངས་མ་ཤེས། བཙལ་ཀྱང་མ་རྙེད། དྲིས་སྐབས་ ཧ་ཅང་སྔ་མོ་ཞིག་ནས་དེ་ལྟར་ཡིན་ལུགས་བརྗོད་བྱུང་། བྱས་ན་བདེན་པ་རེད། “ལྗོངས་ཞིང་ལྔའི་མཉམ་སྒྲིག་སློབ་གཞི་”ཞེས་པའི་ཁོངས་སུ་ བོད་ཡིག་གི་སློབ་དེབ་ས་རྒྱུས་དང་ལོ་རྒྱུས་སོགས་མེད་པ་རེད། “མཚོ་སྔོན་”དུ་ད་བར་དུ་གནས་ཐུབ་པ་དང་། ད་ཐེངས་བསྒྱུར་སྐབས་ཀྱང་དགེ་སློབ་དང་། ལས་བྱེད་པ་ཚོས་མི་འདོད་པའི་རྣམ་འགྱུར་ཆེན་པོ་སྟོན་པའམ་སྟོན་ཐུབ་པའི་རྒྱུ་མཚན་དེ་གང་ཡིན་ནམ།
དེང་རབས་དང་བོད་སྐད་གཉིས་མདུན་ཅོག་གཅིག་གི་སྟེང་བཞག་སྟེ་བསྡུར་བ་ཡིན་ན། བཤད་མི་དགོས་པ་ཞིག་ནི། བོད་སྐད་ཀྱིས་དེང་རབས་ཀྱི་རྗེས་མི་ཆོད་པ་དེ་རེད། འདི་ལ་དྲི་བ་ཁྱོན་ནས་མེད་པ་རེད། འོན་ཀྱང་རྗེས་ལུས་འདི་ བོད་མིས་ཆེད་དུ་གཉེར་ནས་རྗེས་ལུས་ཐེབས་བཅུག་པའམ། ཡང་ན་བོད་མིའི་རིག་རྩལ་གྱིས་མ་འདང་ནས་རྗེས་ལུས་ཐེབས་པ་ཞིག་མ་རེད། བཙན་བྱོལ་ནང་ཡང་བསླབ་གཞི་ཁག་བོད་ཡིག་ཏུ་བསྒྱུར་ཏེ་སློབ་བཞིན་ཡོད། བོད་མིའི་མི་འབོར་གྱི་བརྒྱ་ཆ་ ༣ ཅན་གྱི་སྤྱི་ཚོགས་ཤིག་ན་ཡང་བྱེད་ནུས་པའི་ནུས་པ་དེ་ཡོད་པ་རེད། ད་འགོག་རྐྱེན་གཅིག་ཡོད་པ་རེད། གཅིག་རང་གཅིག་ཡོད་པ་རེད། དེ་ནི་བོད་ཀྱི་སྐད་ཡིག་འདི་ལས་མེད་དང་ནུས་མེད་དུ་བཟོ་བའི་རྒྱ་ནག་གི་སྲིད་ཇུས་རེད། ང་ལ་གྲོགས་པོ་ཞིག་གིས་བཤད་དོན། ཁྱེད་ཀྱིས་ཁྲིམས་ཁང་དུ་ལས་ཀ་བྱེད་ན། སྙན་ཞུ་རྣམས་བོད་ཡིག་ཏུ་བྲིས་ཚེ། ཁྲིམས་དཔོན་རྒྱ་དཔོན་དེས་ “ངས་བོད་ཡིག་མི་ཤེས། རྒྱ་ཡིག་ལ་འཁྱེར་ཤོག”ཟེར་གི་རེད། བོད་མི་ལས་བྱེད་པས། “ངས་རྒྱ་ཡིག་མི་ཤེས། བོད་ཡིག་ལ་བྲིས་ནས་འཁྱེར་ཤོག་”ཅེས་བཤད་པའི་ཐོབ་ཐང་ཡོད་པ་མ་རེད། ཅེས་ཟེར། གནད་དོན་འདི་རེད། རྒྱ་ཡིག་གིས་སློབ་ཚན་གཞན་ཚང་མ་སློབ་ཁྲིད་བྱས་ཚེ། རྒྱ་མི་ཁྲི་ཕྲག་མང་པོའི་ལྟོ་གོས་རེད། བོད་ཡིག་གིས་འཁྲིད་ན། བོད་མི་རིགས་འདི་མུ་མཐུད་ནས་རྒྱའི་ཁྱིམ་ཚང་ཆེན་པོའི་ནང་ཐིམ་གྱི་མེད་པ་རེད། བོད་མི་ཚོས་ཀྱང་འདི་གསལ་པོར་ཤེས་ལ། རྒྱ་མི་ཚོས་ཀྱང་འདི་གསལ་པོར་ཤེས།
ཉེ་ཆར་ “མགོ་ལོག་བོད་རིགས་རང་སྐྱོང་ཁུལ་གྱི་བོད་ཀྱི་སྐད་ཡིག་བྱ་བའི་སྲོལ་ཡིག” ཅེས་པ་ཞིག་དྲ་ཐོག་ནས་རྙེད་བྱུང་། དེ་ཡང་། “མཚོ་སྔོན་ཞིང་ཆེན་མི་དམངས་སྲིད་གཞུང་གི་བོད་ཡིག་དྲ་བ།” ཞེས་པ་རྙེད་བྱུང་། དེའི་དོན་ཚན་སོ་དགུ་བའི་ནང་འདི་ལྟར་འཁོད་འདུག “རང་སྐྱོང་ཁུལ་གྱིས་བོད་ཀྱི་སྐད་ཡིག་གིས་རྩིས་རིག་དང་། དངོས་ཁམས། རྫས་འགྱུར། སྐྱེ་དངོས། ས་རྒྱུས་སོགས་སློབ་ཚན་སློབ་ཁྲིད་བྱེད་པའི་དགེ་རྒན་གྱི་དཔུང་སྡེར་མཐོང་ཆེན་དང་དེ་བརྟན་ཆགས་སུ་གཏོང་རྒྱུ་དང་། བོད་ཀྱི་སྐད་ཡིག་ལ་བྱང་ཆ་ཐོན་པའི་ངང་ནས་གོང་གསལ་སློབ་ཚན་སློབ་ཁྲིད་བྱེད་ཐུབ་པ་མ་ཟད། གྲུབ་འབྲས་ཁྱད་དུ་འཕགས་པའི་དགེ་རྒན་ལ་གཟེངས་བསྟོད་དང་བྱ་དགའ་རྒྱུ།” ཞེས་འཁོད་འདུག
འོན་ཀྱང་བོད་མིའི་འདོད་མོས་དེ་ལ་ཉི་མ་ནག་པོ་ཤར་ཡོད་པ་རེད། ཁ་དཔེར། “རྐུབ་ལ་ཉི་མ་ཤར།”ཟེར་བ་དེ་མ་རེད་དམ། ད་གནད་དོན་ནི། ཉི་མ་དམར་པོ་དེ་རེད། ཤར་ཕྱོགས་ནས་ཡོང་བའི་ཉི་མ་དམར་པོ་དེ་རེད།
བོད་སྡོད་བོད་སློབ་གཙོས་དགེ་རྒན་དང་སློབ་མ། ད་དུང་ལས་འཁྱུར་ངལ་གསོ་བ་སོགས་ཀྱིས་ད་ཐེངས་ཀྱི་རྒྱ་ནག་གི་སློབ་གསོའི་སྲིད་ཇུས་དེ་ལ་དངོས་ཤུགས་བརྒྱུད་གསུམ་ནས་ཤུགས་རྒྱག་བཞིན་ཡོད་པ་རེད། ཡིན་ཡང༌། བྱེས་ཀྱི་ཚོགས་པ་ཁག་དང་བོད་གཞུང་སོགས་ཀྱིས་རྒྱལ་སྤྱིའི་སྒང་ལ་ཁྱབ་བསྒྲགས་ཤུགས་ཆེན་བྱེད་དགོས་ནི་རེད་ལ། ཡིན་ཡང༌། བོད་གཞུང་ཁ་རོག་ཀེར་བསྡད་ཡོད་པ་འདྲ། གཞུང་ལ་ཁ་གྲག་རྒྱུའི་སེམས་ཡོད་ཀྱང་ངག་ཡོད་ནི་མ་རེད། དེ་ནི་གོང་ས་མཆོག་གིས་བོད་ཕྲུག་ཁྱིམ་སྡེ་ལོ་འཁོར་ལྔ་བཅུ་ལོན་པའི་མཛད་སྒོའི་སྟེང་གསུང་བཤད་དེ་རིང་ངས་མང་པོ་བཤད་རྒྱུ་མེད། བཤད་ནས་ཕན་ཐོགས་ཀྱང་གང་ཡང་མི་འདུག ལོ་འདི་འགའི་རིང་ལ་མང་པོ་བཤད་ཡོད། བཤད་པ་དག་ཡིག་ཉོག་གི་བཟོ་བྱས་ཏེ་བསྡད་ཚེ་དགོས་པ་གང་ཡང་མི་འདུག དེར་བརྟེན་ཚས་མས་མི་རེ་ངོ་རེའི་འདུ་ཤེས་དེ་ང་བོད་པ་ཡིན་བསམ་པའི་འདུ་ཤེས་ཡོད་པ་དང༌། དེའི་སྟེང་བོད་སྤྱིའི་འགན་ཁུར་ཞིག་ཁྱེར། གཞིས་ལུས་རྒྱ་ཆེའི་མི་མང་གིས་དཀའ་ངལ་དེ་ལྟ་བུ་ཞིག་གི་འོག་ནས་རང་དབང་ལུང་པར་ཡོད་མཁན་ཚོར་རེ་བ་རྒྱག་གི་ཡོད། ང་ཚོ་རེ་བ་རྒྱག་སའི་ཡུལ་ཆགས་ཡོད་བསམས་ཏེ་ཁ་མཁས་པོའི་ཐོག་ནས་ཚིག་སྐམ་པོ་བཤད་བསྡད་ན་ཕན་ཐོགས་གང་ཡང་མི་འདུག དོན་དག་ངོ་མའི་ཐོག་ནས་སྤྱི་སེམས་སྤྱི་ཁུར་བླངས་ཏེ་གཟབ་གཟབ་བྱེད་རོགས། གསུངས་ཡོད་ནི་རེད། འདི་བོད་མི་ཡོད་དོ་ཅོག་གིས་སེམས་སྟེང་ལ་ཉར་གནང་ཞུ་རྒྱུ་ཡིན།
གཡང་སྐྱབས་ཀྱིས་རྩོམ་ཡིག་དཔེ་མི་སྲིད་པའི་ཡག་པོ་བྲིས་འདུག
བོད་ཀྱི་སྐད་ཡིག་དངོས་གནས་མ་ཉམས་འཛིན་སྐྱོང་དགོས་ན། ལགས་རེད། རེད། རེད། ་་་་བོད་ཀྱི་སྐད་ཡིག་གིས་ རྩིས་རིག་དང་། དངོས་ཁམས། རྫས་འགྱུར། སྐྱེ་དངོས། ས་རྒྱུས་སོགས་སློབ་ཚན་སློབ་ཁྲིད་བྱེད་པའི་དགེ་རྒན་གྱི་དཔུང་སྡེར་མཐོང་ཆེན་་་་་་ བྱེད་དགོས། ལགས་མ་རེད་པེ།
ཉི་མ་དམར་པོ་ཞིག་མགོ་ཐོག་ནས་ཤར་བ་ནས། ང་ཚོ་ཆག་འཇིག་དམར་པོ་ཞིག་དང་ཁ་འབྲལ་མ་མྱོང་།
ཉི་མ་སེར་བོ་ཞིག་ལ་རེ་བའི་འདུན་པ་དེ། ལོ་ཟླ་རིམ་སོང་གིས་ཆེ་ནས་ཆེ་རུ་བསྐྱེད།
ཁོ་ཚོའི་རིག་གཞུང་ནང་། ཉི་མ་དམར་པོ་དེ་བདེ་སྐྱིད་ཀྱི་མཚོན་བྱེད་ཡིན་ནའང་། ངའི་རིག་གཞུང་ནང་། ཉི་མ་དམར་པོ་དེ། ཆག་འཇིག་གི་མཚོན་བྱེད་ཡིན། གཅིག་བྱས་ན། ཁོ་ཚོའི་ཚིག་མཛོད་ནང་། ཉི་མ་སེར་བོ་འདི་མེད་ལས་ཆེ། གལ་སྲིད་ཡོད་ནའང་། ཁོ་ཚོའི་མི་རིགས་ཀྱི་འདུ་ཤེས་ནང་། འདི་ཡག་སྡུག་ཅི་འདྲ་ཞིག་ཡིན་ནམ།
ང་ཚོ་ལ་མཚོན་ན། དགུང་གི་ཉི་མ་སེར་བོ་ཁོ་ན། ང་ཚོ་ལ་དྲོད་ཁོལ་དང་བདེ་སྐྱིད་སྟེར་མཁན་ཡིན།
ང་ཆུང་བའི་སྐབས་སུ། ཉི་མ་དམར་པོ་ཟེར་བའི་གཞས་ཚིག་འདི་ཡང་ཡང་སྐྱོར་མྱོང་། དགའ་འོས་པ་ཞིག་ནི། ངས་ཉི་མ་སེར་བོ་ཟེར་ནས་རྩ་ནས་སྐྱོར་མྱོང་མི་འདུག དེ་ཡང་། ཡིག་སྒྱུར་མཁན་དེས་ཉི་མ་སེར་བོ་དང་ཉི་མ་དམར་པོ་གཉིས་དང་འབྲེལ་བའི་མི་རིགས་ཀྱི་འདུ་ཤེས་འཛིན་སྟངས་ལ་དོ་སྣང་ཆེན་པོ་མ་བྱས་པར་བསྒྱུར་པ་ཡིན་ནམ་བསམ་བཞིན་དུ་ཉི་མ་དམར་བོ་ཞེས་ཐད་བསྒྱུར་བྱས་པ་ཅི་ཡིན་མི་ཤེས་ཀྱང་སྟབས་ལེགས་པོ་བྱུང་འདུག ད་ལྟ་བསམ་བློ་ཞིག་བཏང་ན། ཉི་མ་དེ་ནི་ཉི་མ་དམར་པོ་རང་ཞིག་རེད།
དབང་སྐྱབས་ལགས་ཀྱི་རྩོམ་དངོས་གནསཡག་པོ་དང་ ཀློག་བདེ་པོ་འདུག
ཉི་མ་དམར་པོའི་གཞས་དེ་ངས་ཀྱང་འབུམ་གཅིག་སག་དགོས་བྱུང
ཉི་མ་དམར་པོའི་འོད་ཟེར་ལ་རྟེན་ནས་རྒྱ་མི་མང་པོ་དེ་འདྲ་བོད་ལ་སླེབས།
མའོ་བདུད་རྒྱལ་གྱི་འདྲ་དཔརདེ་་ཁ་བརྡའི་ནང་ལ་ཡང་ཡང་ལྟ་འདོད་མེད། དགོངས་དག
ད་ངས་གཞས་ཚིག་དེ་དྲན་གསོས་སོང་
ཤརདྷ་ཕྱོགས་དམར་ ཉི་མ་ཤར་ ཀྲ་་་ུང་གོའི་ཕྱོགས་ནས་མོའོ་ཙེ་ཏུང་འཁྲུངས་
ཁོང་ནི་མི་དམངསདགོན་སྐྱབས་རེད་ ཨོ་ཧ་ཧས་ཡོ་ ཁོང་ནི་མི་དམངས་ཀྱི་དགོན་སྐྱབས་རེད་
གཞས་ཚིག་གཉིས་པ་དེ་དྲན་གསོས་ཀྱི་མིན་འདུག་
རིགས་གནས་གསར་རྗེའི་སྐབས་ལ་ལས་གྲ་ཁག་ལ་ཞོག་པ་ཡར་ལངསནས་མི་ཚང་མ་མཉམ་དུ་སྐད་ཤུགས་ཆེན་པོས་གཞས་དེ་གཏང་དགོསདུས་ ལྷ་ས་ནས་ཡོང་བའི་མི་རྒན་པ་ཁག་གཅིག་གི་གཞས་དྭངསདེ་རང་ལ་
གཞས་ཚིག་གཞན་ཞིག་སྐད་ཤུགས་ཆུང་ཆུང་ངངགཏང་གི་འདུག་ གཞསཚིག་དེ་ནི་
༼གངས་ཅན་ལྗོངས་ པད་དཀར་ཕྱར་ སེམ་ཅན་སྐྱེས་འགྲོ་ཡོངས་ཀྱི་སྐྱབས་གཅིག་པོ་
ཁོང་ནི་བོད་མིའི་དགོན་སྐྱབས་རེད་ སོ་ཡ་ལ་སོ་ ཁོང་ནི་བོད་མིའི་དགོན་སྐྱབས་རེད།༽
གོ་ཐོས་ལ་གཞས་ཚིག་དི་ ༡༩༥༩ ལོའི་གོང་རྩམ་ལ་ཡོངས་འཛིན་ཁྲི་ཕྱངས་རེན་པོ་ཆེས་བརྩོམ་གནང་པ་རེད་ཟེར་གྱི་འདུག
ཅི་བཤད་རུང་ང་ཚོའི་མི་རབས་འདི་དར་དམར་གྱི་འོག་ནས་འཚར་ལོངས་བྱུང་བ་རེད་ལ།
རྒྱ་མིའི་དར་དམར་གྱི་འོག་ནས་ཐར་མ་ཐག་བོད་ཀྱི་དར་དམར་གྱི་འོག་ལ་འཛུལ་དགོས་བྱུང་སོང་། བོད་ཀྱི་དར་དམར་ཤེས་ཀ། གྲྭ་པའི་གཟན་ཤམ། ཧཧཧཧུཧུཧུ
དར་དམར་ནི་རྒྱལ་ཁབ་ཀྱི་དོན་དུ་ཁྲག་དམར་འགྲོ་གྲོན་གཏོང་བའི་སྔོན་གཤེགས་དཔའ་བོ་དག་གི་མཛད་རྗེས་རྗེས་དྲན་དང་གུས་བསུ་མཚོན་བྱེད་ཁྲག་མདོག་ཅན་གྱི་དར་རྟགས་ཤིག་རེད།
ཨ་ལགས་དྲིན་ཆེ་གཟན་ཤམ་འདིས་རྒྱལ་ཁབ་དར་རྟགས་ཤིག་བསྟན་གྱི་འདུག་གམ།
ཨ་ཁུ་ཀླུ་སྨྱོན་ལགས་བོད་ཀྱི་དར་དམར་འོག་ཏུ་དཀའ་ཁག་དེ་འདྲ་ཡོད་ན། དར་དམར་དེ་ཕར་གཡུགས་བཞག་ན།
ཆབ་སྲིད་དང་ཆོས་ལུགས་ཀྱི་དར་དམར་དམར་པོ་འདི་གཉིས་ལ་འདྲ་ས་ཞིག་ཡོད་པ་ནི་དུས་ཚོད་ངེས་ཅན་ཞིག་ལ་མ་བསླེབས་བར་དུ་བར་གཡུགས་བཞག་ན་ཡང་ཚུར་འབྱར་ཡོང་བ་དེ་རེད།
དར་ཆ་དམར་པོ།
ང་ནི་མའོའི་རོ་སྒམ་སྒྲིབ་ཅན་དེ་ཕྱིར་བཏོན་ནས། དར་དམར་ཁྲག་ཅན་དེ་ཡང་། ཞི་དར་མཚོན་ཅན་དུ་དགོས་པ་ད་ལྟ་ནས་སེམས་གཏིང་ལ་བསམ་ཆར་སྟོན་དུས་རེ་སྒུག་བྱས་ནས་སྡོད་མཁན་ཞིག་ཡིན། མའོའི་ལྟ་ཕྱོགས་དང་། དར་དམར་ལ་འགྲམ་ཆུ་ལྡང་བ་ཚོར་དགོངས་འགལ་མེད་པ་དང་བཅས་ཞུ་རྒྱུ་ལགས།