བློ་བཟང་རིན་ཆེན།
སྔོན་གླེང་།
<<ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་>>ཅེས་པའི་དཔེ་དེབ་འདི་ལ་ཀློག་འགོ་བརྩམས་ནས་ཟླ་བ་དྲུག་ལྷག་སོང་ནའང་ཆ་ཚང་ཀློག་པ་ལྟ་ཞོག་ལེའུ་དང་པོ་ལས་ཀློག་མ་ཐུབ། དེ་རིང་སེམས་ཤུགས་བསྐྱེད་དེ་སྔར་གྱི་ཀློག་མཚམས་ནས་བཀླགས་པ་ཡིན། ཁོ་བོའི་བསམ་པ་
ལ། འུ་ཅག་གིས་སྔོན་བྱོན་སྐྱེས་བུ་དམ་པ་རྣམས་ཀྱིས་དཀའ་སྤྱད་གནང་བ་བཞིན། བཀའ་བསྟན་ཡོད་དོ་ཅོག་དང་། རིས་མེད་ཀྱི་ལེགས་བཤད། ལོ་རྒྱུས།བྱུང་རབས་སོགས་ལ་མཇལ་མ་ནུས་ཀྱང་། འུ་ཅག་གི་མིག་མདུན་ན་ཡོད་པའི་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་ལྗགས་རྩོམ་དག་ལ་ངེས་པར་མཇལ་དགོས་སྙམ། ལྗགས་རྩོམ་དེ་དག་གིས་འུ་ཅག་ལ་ནང་ཆོས་ཀྱི་གོ་བ་ཡང་དག་པ་ཞིག་སྤྲོད་པར་མ་ཟད། དུས་རབས་ཀྱི་ཁ་ཕྱོགས་དང་མི་ཚེའི་དོན་སྙིང་། ཐ་ན་ཉིན་གཅིག་གི་བསམ་བློའི་འཁྱེར་སོ་དང་ཀུན་སྤྱོད་ཀྱི་ཚད་གཞི་སོགས་མཇུབ་མོ་རི་སྟོན་བྱས་ཡོད། དེའི་ཕྱིར། འུ་ཅག་གིས་ངེས་པར་ཉིན་རེའི་ཁ་ཟས་བསྟེན་པ་བཞིན་ལྗགས་རྩོམ་དེ་དག་རང་གི་ཉེ་འགྲམ་ལ་བཞག་ནས་དཔེ་ཀློག་གི་གོམ་པ་བསྟེན་རྒྱུ་ཧ་ཅང་གལ་ཆེའོ་སྙམ།
དེ་རིང་གནས་གཤིས་ལེགས་ཤིང་སེམས་ཁམས་དྭངས་འདུག མ་ཟད་རེས་གཟའ་ཟླ་བའི་གུང་སང་ཡང་ཡིན་པས་སྟབས་ཁེལ་བ་ཞིག་རེད། འདི་འདྲའི་དཔེ་ཀློག་གི་གོ་སྐབས་ཡག་པོ་ཞིག་ལ་དཔེ་ཀློག་མི་བྱེད་པ་ནི་སེམས་ལ་གདོན་ཞུགས་པ་མིན་ནམ་སྙམ་ནས། སྔར་གྱི་དཔེ་ཀློག་གི་མཚམས་ནས་བཀླགས་ཏེ་བཀླགས་བྱང་ཞིག་གཤམ་ལ་འབྲི་བའི་འཕེན་པ་བཏང་།
ང་ཚོས་རང་ཉིད་ལ་ལྟ་ཚུལ།
ང་ཚོས་རང་ཉིད་ལ་ལྟ་ཚུལ་ཞེས་པའི་ལེ་ཚན་ནང་དུ་གཙོ་བོ་འགྲོ་བ་མི་གཅིག་གྱུར་ཡོང་བའི་ཐབས་ལམ་སྐོར་ནས་ཁ་གསལ་གོ་བདེ་ཞིག་གསུང་བཞིན་འདུག དེ་ཡང་སྤྱིར་གནོད་ཀྱི་འཇིག་རྟེན་དང་། བཅུད་ཀྱི་འཇིག་རྟེན་འགྲོ་བ་མི་ལྟ་བུ་འགྲུབ་བྱེད་ཀྱི་རྩ་བའི་རྫས་གཉིས་ལ་སྤུས་ཀའི་ཆ་ནས་ཁྱད་པར་གང་ཡང་མེད། གཉིས་ཀ་ཤིན་ཏུ་ཕྲ་བའི་རྡུལ་ཕྲན་དུ་མ་འདུས་པ་ལས་གྲུབ་པ་ཤ་སྟག་གོ ། དེང་དུས་ཚན་རིག་པས་འཇིག་རྟེན་ཁམས་ཀྱི་དངོས་པོ་ཡོད་དོ་ཅོག་རྫོགས་མཐའ་མེད་པར་བསྐྱར་སྐོར་རྒྱག་གི་ཡོད་པར་མ་ཟད། ཐ་ན་ངོ་ཚོའི་གཟུགས་ཕུང་ནང་གི་རྡུལ་ཕྲན་དེ་ཉིད་སྐབས་ཤིག་ན་ཧ་ཅང་རྒྱང་ཐག་རིང་བའི་རྒྱུ་སྐར་རྣམས་ཀྱི་ཁོངས་སུ་གཏོགས་པའི་ལྟ་ཚུལ་འཛིན་གྱི་ཡོད་པ་གསུངས་འདུག མཚམས་འདིར་སླེབ་དུས་རྒྱ་གར་གྱི་སྲིད་བློན་ནེ་རོ་མཆོག་གིས་<<ཡབ་ཀྱིས་བུ་མོར་སྤྲངས་པའི་འཕྲིན་>>གྱི་ནང་ལ་འདིའི་སྐོར་ལ་ཞིབ་འབྲི་བྱས་པ་ཡིད་ལ་དྲན་ནས། སྔར་གྱི་དཔེ་ཀློག་གིས་འདི་ལ་ཁ་གསབ་བྱས་ན་ཕན་སུམ་ཇེ་ཚོགས་སུ་འགྲོ་བར་སྙམ།
དེ་ལྟར་འགྲོ་བ་མི་དང་རྩི་ཤིང་སོགས་གཞི་རྩའི་འགྲུབ་བྱེད་ཀྱི་རྫས་རྡུལ་ཆུང་ཆུང་རེ་ལས་གྲུབ་པ་འདྲ་ཡང་། འགྲོ་བ་མི་རྣམས་སྐྱེས་ལྡན་གྱི་རྩི་ཤིང་དང་མི་འདྲ་བར་སྡུག་བསྔལ་ཚོར་ཞིང་བདེ་བ་མྱོང་གི་ཡོད། སྤྱིར་སེམས་ཅན་ཐམས་ཅད་བདེ་བ་གཉེར་ཞིང་སྡུག་བསྔལ་ལས་གཡོལ་ཐབས་འཚོལ་བ་འདྲ་ནའང་། འགྲོ་བ་མི་རྣམས་ཁྱི་དང་ཞི་མི་སོགས་སེམས་ཅན་གཞན་དང་མི་འདྲ་བར།དབང་ཤེས་ཀྱིས་མྱོང་ཚོར་བདེ་བ་དེས་ཚིམ་གྱི་མེད་པ་གསལ་པོ་རེད། དེ་ནི་འགྲོ་བ་མི་རྣམས་ལོ་ངོ་སྟོང་ཕྲག་མང་པའི་རིང་། རྙོག་འཛིང་ཆེ་བའི་དཀའ་སྡུག་སྣ་ཚོགས་ཤིག་བརྒྱུད་དེ་འཕེལ་རྒྱས་སོང་བའི་གྲུབ་དོན་ཞིག་རེད། འདིས་སེམས་ཅན་གཞན་དང་བསྡུར་ན་འགྲོ་བ་མིའི་ཀླད་པའི་བཟོ་དབྱིབས་ཆེ་བ་
མངོན་ཞིང་། མིའི་མདུན་མའི་ཀླད་ཤུན་སེམས་ཅན་གཞན་དང་བསྡུར་ན་རྦད་དེ་འཕེལ་བསྐྱེད་ཆེན་པོ་ཕྱིན་ཡོད་པར་གསུངས།
མ་གཞི་ང་ཚོ་ཚང་མའི་རྒྱུན་ལྡན་འཚོ་བའི་ནང་ལ། ཕོ་མོའི་དབྱེ་བའི་ཐོག་ནས་ང་རང་བུད་མེད་ཅིག་གམ། ཡང་ན་ཆོས་ལུགས་དེ་དང་དེའི་རྗེས་འབྲང་ཡིན་པ། རིགས་རྒྱུད་དེ་དང་དེའི་ཁོངས་ཡིན་པ། ད་དུང་རང་རིགས་ལ་མཚོན་ན་བཙན་བྱོལ་ནང་གི་ཆོལ་ནད་ལྟ་བའི་ལྟ་སྟངས་མང་པོ་ཞིག་ཡོད། དེ་དག་གིས་ང་ཚོས་རེ་བ་ཅི་ཞིག་བཅིངས་མིན་མ་ལྟོས་པར། ང་ཚོས་མི་གཞན་པར་བརྩི་འཇོག་བྱེད་སྟངས་ཐེ་བའི་རང་གི་ཀུན་སྤྱོད་ལ་ཤུགས་རྐྱེན་སྦྱིན་གྱི་ཡོད་པ་གསུངས་ཡོད། དེ་ལྟར་ཕོ་མོ་དབྱེ་འབྱེད་དང་། རིགས་རྒྱུད་དབྱེ་འབྱེད་སོགས་ཀྱི་ལྟ་ཚུལ་མང་པོ་ཞིག་གིས་སྤྱི་ཚོགས་ལ་སྡུག་བསྔལ་སྦྱིན་གྱི་ཡོད་པ་གསལ་པོ་ཡིན་དུས། དེ་འདྲའི་དཀའ་ངལ་ལས་གྲོལ་ཐབས་སུ་མི་སུ་ཞིག་ཡིན་ཡང། རང་རང་གི་ངོ་བོ་མི་འདྲ་བ་རེ་ཡོད། དེ་ལ་བརྟེན་ནས་འུ་ཅག་གིས་བཟང་སྤྱོད་ལ་འཇུག་ཕྱིར་བཅོས་མ་མིན་པའི་ཡོངས་ཁྱབ་ཀྱི་ཐབས་ལམ་ཞིག་ཡར་རྒྱས་གཏོང་དགོས།
ཐབས་ལམ་དེ་ནི་ས་སྒང་གོ་ལ་ཟླུམ་པོ་འདིའི་སྟེང་གི་མི་འབོར་དུང་ཕྱིར་བདུན་ཅུ་ལྷག་པོ་འགྲོ་བ་མི་ཡིན་པ་གཅིག་མཚུངས་སུ་ལྟ་བ་དང་། ཐམས་ཅད་བདེ་བ་འདོད་ཅིང་སྡུག་བསྔལ་མི་འདོད་པ་གཅིག་མཚུངས་སུ་ལྟ་བ་དེ་རེད། ལྟ་ཚུལ་འདིས་འགྲོ་བ་མི་གཅིག་སྒྲིལ་བཟོ་ཞིང་། གདུང་སེམས་མཉམ་བསྐྱེད་དང་། གཅིག་ཕན་གཅིག་གྲོགས། འཛམ་གླིང་ཞི་བདེ་བསྐྲུན་པར་ནུས་པར་སྔ་ཕྱིའི་གསུང་གི་སྤྱི་སྡོམ་ཡིན་པར་ཡིད་ལ་ཆོངས།
2021/4/5 བློ་བཟང་རིན་ཆེན་གྱིས་བྲིས།