བློ་བཟང་རིན་ཆེན།
སྔོན་གླེང་།
གཏམ་དཔེ་ལ། བསམ་པ་སྡེ་བར་ངན་ན། སྦྱོར་བ་རང་ལ་རྩུབ། ཟེར་བ་བཞིན། མདང་ནུབ་བློ་འཛིན་སྐབས་ངས་གྲོགས་པོ་ཞིག་ལ་ཞེད་སྣང་སློང་ཆེད། རྒྱབ་ལོགས་ནས་འཇབ་སྟེ་ཡར་མཆོང་སྐབས་ངའི་མགོ་ཡིས་ཆུ་སྒམ་ལ་བརྡབས་ཏེ་རྨ་ཁ་འབྲང་ཙམ་བཟོས་བྱུང་། དེ་རིང་རྨ་དེ་ལ་ཁག་བཞག་ནས་ཞོགས་ཉལ་བྱེད་པ་མང་དྲགས་ཏེ་ཉིན་གུང་ཡང་གཉིད་མི་སྤྲོ་བར་གྱུར། ངས་ཁུ་སིམ་སིམ་གྱི་ལྷིང་འཇགས་ལ་ཡིད་ཙམ་རོལ་དུས། བྱ་སྐད་བྱེའུའི་སྐད་ལས་ཅི་ཡང་མ་ཐོས། ངའི་བསམ་པར་ཁམས་ཚན་གཅིག་པ་རྣམས་རེ་ཞིག་བློ་འཛིན་དང་དཔེ་ཀློག་གི་ངལ་དུབ་ལ་ཡུབ་ནས། གཏུ་མིག་གཉིད་ཀྱི་ཞིང་ཁམས་སུ་ངལ་གསོ་ཐེངས་གཅིག་བྱེད་བཞིན་པའི་སྣང་བ་ཞིག་ངང་གིས་སྟེར་བྱུང་།
ངས་གོ་སྐབས་འདི་བརྒྱུད་ནས་༧གོང་ས་སྐྱབས་མགོན་མཆོག་གིས་ལྗགས་རྩོམ་གནང་བའི་<<ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་>> ཅེས་པའི་དཔེ་དེབ་དེའི་ཀློག་འཕྲོ་ནས་ཀློག་འདོད་བྱུང་སྟེ། ཆུ་ཚན་ཕོར་གང་བཟུང་ནས་ཁམས་ཚན་གྱི་ཡང་སྟེང་ལ་བུད། ངའི་མདུན་ཐད་དུ་ས་སྐྱའི་སློབ་གླིང་དུ་སྐྱེས་པའི་ཨམ་སྡོང་དང་ཙན་དན་གྱི་ལྗོན་ཤིང་རྣམས། ཡམ་ཡོམ་དུ་གར་དུ་རྩེན་བཞིན་མཆིས། ངས་དེ་དག་སྣང་བ་མ་བཞག་པར་ཆོས་ལུགས་དང་བཟང་སྤྱོད་ཅེས་པའི་ཚན་པ་འདི་ཀློག་འགོ་བརྩམས།
ཆོས་ལུགས་དང་བཟང་སྤྱོད།
ཚན་པ་འདིར་ཆོས་ལུགས་དང་བཟང་སྤྱོད་གཉིས་ལས་གང་ཞིག་གལ་ཆེན་ཡིན་མིན་སྐོར་ནས་དགོངས་ཚུལ་ལྷུག་བརྗོད་གནང་འདུག ང་རང་བོད་ལ་ཡོད་སྐབས་འཇིག་རྟེན་འདིའི་བདེ་སྐྱིད་ཀྱི་རྩ་བ་ཆོས་ལུགས་ཡིན་པའི་བསམ་ཚུལ་ཤུགས་རྐྱེན་ཆེན་ཡོད། མ་ཟད་བདག་གི་དགེ་བའི་བཤེས་གཉེན་བློ་བཟང་དགེ་ལེགས་ཀྱིས་ང་ཚོར་<< ལམ་རིམ་མྱུར་ལམ་>>དང་<<བདེ་ལམ།>><<འཇམ་དཔལ་ཞལ་ལུང་།>>སོགས་ཁྲིད་སྐབས། འཇིག་རྟེན་གྱི་མི་ཡོད་ཚད་ཀྱིས་ལམ་རིམ་འདི་དག་ལ་ཅུང་ཟད་བློ་སྦྱངས་ཤིང་། རྒྱུ་འབྲས་མན་ངག་བདུན་གྱི་གོ་བ་རེ་རག་ན། འཇིག་རྟེན་ལ་བསམ་སྦྱོར་ངན་པའི་མི་ངན་ཏིལ་ཙམ་ཡང་ཡོང་རྒྱུ་མ་རེད་བསམ་མྱོང་། ད་སྐབས་ཕྱི་མིག་ཅིག་ལྟ་དུས་དེ་ནི་ན་ཚོད་མ་སྨིན་པའི་ལྟ་ཚུལ་ཞིག་གམ། ཡང་ན་ལྷད་མ་འདྲེས་པའི་དྭངས་གཙང་གི་སེམས་ཁམས་ཤིག་ལས་ཅི་ཡང་མིན་པ་འདྲ།
འདི་ལྟར་ཕུགས་བསམ་ཞིག་ཞེ་ལ་ཐོགས་ནས། ཆོས་ལུགས་དང་རིགས་རུས་མི་གཅིག་པའི་ཡུལ་ལུང་ཞིག་ལ་རང་གིེས་གོམ་ཁ་ལྷོད་ཀྱིས་སྤོ་བཞིན། མཐོང་ཐོས་མྱོང་གསུམ་གཞི་ལ་བཞག་སྟེ་༧སྐུ་མདུན་གྱི་ལེགས་བཤད་དག་ལ་རིམ་གྱིས་མཇལ་དུས། ངས་སྔོན་ཆད་བསམ་པ་ལྟར་འཇིག་རྟེན་གྱི་བདེ་སྐྱིད་ཡོད་ཚད་ཆོས་ལུགས་ལ་ཐུག་ཅིང་། དེའང་ནང་ཆོས་ལ་ཐུག་ཡོད་པའི་བསམ་ཚུལ་ལ་འགྱུར་བ་ཞིག་མ་བཏང་ཐབས་མེད་དུ་གྱུར། སྔར་གྱི་བསམ་ཚུལ་ནི་ང་རང་ཆོས་ལུགས་པ་ཞིག་ཡིན་པ་དང་། དེའི་ནང་ནས་ནང་བསྟན་ཆོས་ལུགས་པ་ཞིག་ཡིན་པའི་རྨང་གཞི་བྱས་ཞིང་། ཡུལ་ལུང་གཞན་གྱི་རིག་གཞུང་དང་ཡུལ་སྲོལ་གོམས་གཤིས་ལ་རྒྱུས་ལོན་ཏིལ་ཙམ་མེད་པའི་བསམ་ཚུལ་སྤུ་སུད་དོག་པོ་ཞིག་ཡིན་པ་ངོ་འཕྲོད་བཞིན་འདུག
སྔར་གྱི་བསམ་ཚུལ་ལྟར་ན་བྱམས་པ་དང་སྙིང་རྗེ། བཟོད་པ་སོགས་ཐམས་ཅད་ནང་བསྟན་ལ་བརྟེན་ནས་བྱུང་བ་དང་འབྱུང་དགོས་པའི་བསམ་ཚུལ་ཡོད། ཚུལ་དེ་ལ་རང་གིས་རང་ལ་ཚ་འདྲི་བྱས་ཏེ། ཡེ་ཤུའི་ཆོས་ལུགས་པ་དང་ཆོས་ལུགས་གཞན་གྱི་རྗེས་འབྲང་བ་དག་ལ་བྱམས་བརྩེ་སོགས་མེད་པ་རེད་དམ། ད་དུང་ཆོས་ལུགས་ཀྱི་ཐ་སྙད་ཙམ་མི་ཤེས་པའི་བྱིས་པ་དག་ལ་བྱམས་བརྩེ་སོགས་མེད་པ་རེད་དམ། གླེན་ཞིང་ལྐུག་པའི་བྱ་དང་ཁྱི་སོགས་ལའང་བྱམས་བརྩེ་སོགས་མེད་པ་རེད་དམ། དེ་ནི་གཏན་མ་ཡིན་ཏེ། ཡེ་ཤུའི་ཆོས་ལུགས་པ་སོགས་ཆོས་ལུགས་གཞན་པའི་ནང་ལ་བྱམས་བརྩེ་དང་། གཞན་ཕན་གྱི་བདག་ཉིད་དུ་གྱུར་བའི་རླབས་ཆེན་གྱི་སྐྱེས་བུ་མང་དག་ཅིག་བྱུང་བ་ནི་བསྙོན་དུ་མེད་པ་ཞིག་རེད། མ་ཟད་ཆོས་ལུགས་ཅེས་པའི་ཐ་སྙད་ཙམ་ཡང་མི་ཤེས་པའི་བྱིས་པའི་ནང་ལ་བྱམས་པ་དང་སྙིང་རྗེ་ཆེ་ཞིང་། རང་གཤིས་བཟང་བའི་བྱིས་པ་ནི་ཡང་ཡང་མཐོང་དུ་ཡོད་པ་དེའོ།། མ་ཟད་སྲོག་ཆགས་དུད་འགྲོའི་ནང་ལའང་བྱམས་པ་དང་སྙིང་རྗེ་མངའ་བའི་སེམས་ཅན་མང་དག་ཅིག་མཐོང་དུ་ཡོད་པ་ལ་ནི་བསྙོན་པར་སུ་ཞིག་ནུས།
དེ་ལྟར་རིམ་གྱིས་བསམ་དུས། ཚན་པ་འདིར་༧གོང་ས་མཆོག་གིས་ཆོས་ལུགས་དང་བཟང་སྤྱོད་གཉིས་ཀྱི་གང་ཞིག་གལ་ཆེན་མིན་གསུང་སྐབས། “ང་ཚོར་ཇ་མེད་པར་གནས་ཐུབ་ཀྱང་། ཆུ་མེད་པར་གནས་མི་ཐུབ། དེ་ག་ནང་བཞིན་ང་ཚོ་ཐོག་མར་སྐྱེ་དུས་ནས་ཆོས་དང་འབྲེལ་བ་མེད་ཀྱང་། སྙིང་རྗེ་མི་དགོས་པའི་ཐོག་ནས་སྐྱེས་བསྡད་པ་ཞིག་མིན།”ཞེས། ཆེས་གོ་བདེ་ཞིང་དཔེ་བརྗོད་སླ་མོ་ཞིག་གི་ཐོག་ནས་བཟང་སྤྱོད་གལ་ཆེ་བར་གདམས་པ་རེད། འདིའི་སྐབས་ཀྱི་ང་ཚོ་ཞེས་པ་ནི་འགྲོ་བ་མི་སྤྱི་ལ་གོ་བ་ལས། གང་ཟག་བྱེ་བྲག་པ་ཞིག་དང་། ཚོགས་སྡེ་བྱེ་བྲག་པ་ཞིག་ལ་གོ་བ་གཏན་ནས་མིན་ནོ།།
ཏག་ཏག་རེད། ང་ཚོ་འགྲོ་བ་མི་རྣམས་ལ་ཆེས་མཁོ་བ་ནི། བྱམས་པ་དང་། སྙིང་རྗེ། བཟོད་སྲན། དཀྱེལ་ཡངས། ཆོག་ཤེས་སོགས་སེམས་ཀྱི་ཡོན་ཏན་རྣམས་རེད། ནང་ཆོས་ནི་དེ་དག་འགྲུབ་བྱེད་ཀྱི་ཐབས་ཀྱི་ཆ་ཤས་ཤིག་རེད། དེ་བཞིན་ཡེ་ཤུའི་ཆོས་ལུགས་སོགས། ཆོས་ལུགས་གཞན་དག་ཀྱང་སེམས་ཀྱི་བདེ་སྐྱིད་སྒྲུབ་པའི་ཐབས་ཀྱི་ཆ་ཤས་རེ་ལས་མ་འདས་པ་གཞི་ནས་རྟོགས་བཞིན་འདུག
ཆོས་ལུགས་ནི་སྨན་ཞིག་ཡིན་པའི་དབང་དུ་བཏང་ན། ང་ཚོ་ནི་ན་ཚ་མི་གཅིག་པའི་ནད་པ་ཤར་སྟག་རེད། ནང་ཆོས་ནི་མགོ་སྨན་ལྟ་བུའི་སྨན་བྱེ་བྲག་པ་ཞིག་ཡིན་པས། དེས་ནད་པ་ཐམས་ཅད་ལ་ཕན་དགོས་ཟེར་བ་ནི་དོན་དངོས་དང་མི་མཐུན་པའི་བཤད་ཡམས་ཤིག་ལས་མ་འདས་པ་རྟོགས་པ་གལ། དེ་ལྟར་བཤད་དུས། ཆོས་ལུགས་ནི་འདོར་བྱ་དང་ཉེ་བར་མི་མཁོ་བ་ཞིག་ཏུ་བསམ་པ་མིན་པར། ཆོས་ལུགས་ནི་ཉེ་བར་མཁོ་ཞིང་བདེ་སྐྱིད་སྒྲུབ་པའི་ཐབས་ལམ་ཞིག་ཡིན་པ་སྨོས་མེད་རེད། འོན་ཀྱང་ས་སྒང་འདིར་གནས་པའི་རིགས་རུས་ཀྱི་དབྱེ་བ་མེད་པར་འཇིན་རྟེན་ཀུན་ཁྱབ་ཀྱི་མནོ་བསམ་ཞིག་བཏང་ན། ཆོས་ལུགས་ལ་མ་བརྟེན་པའི་བཟང་སྤྱོད་ནི་ཆེས་གལ་ཆེ་ཤོས་སུ་གཟིགས་ཏེ་སྤྱི་ནོར་༧གོང་ས་སྐྱབས་མགོན་ཆེན་པོས་གསར་གཏོད་མཛད་པ་རེད།
གནད་ཀྱི་དོམ་པོ་མ་ཟིན་པ་འགས། རང་གི་རིག་གཞུང་གསེར་གྱི་ཉི་མ་འདྲ་བོ་བསྐྱུར་ནས། བཟང་སྤྱོད་ཅིག་འཚོལ་དུ་འགྲོ་བ་ནི་རྒྱལ་བ་ཚངས་དབྱངས་རྒྱ་མཚོས་“ནོར་བུ་རང་ལ་ཡོད་དུས།། ནོར་བུའི་ནོར་ཉམས་མ་ཆོད།། ནོར་བུ་གཞན་ལ་ཤོར་དུས།། སྙིང་རླུང་སྟོད་ལ་འཚང་བྱུང་།།” གསུངས་པ་ལ་མ་འདས་པར་སྙམ།
2020/8/28 ལ་བློ་བཟང་རིན་ཆེན་གྱིས་བྲིས།