བློ་བཟང་རིན་ཆེན།
སྔོན་གླེང་།
གྲྭ་ཚང་གི་ལོ་འཁོར་རྩོད་རྒྱུགས་ལེགས་པར་གྲུབ་པས་དེ་རིང་དང་སང་ཉིན་གཉིས་ལ་གུང་སང་རེད། གོ་སྐབས་འདི་བཟུང་ནས་ངའི་གྲོགས་པོ་ཁ་ཤས་ཀྱི་མུ་འབྲེལ་གློག་བརྙན་ཞིག་ལ་ལྟ་བའི་འགོ་བཙུགས་ཏེ། ཟུར་ནས་ངས་བཤད་པའི་གཏམ་ལའང་ཉན་ལོང་མེད་པར་གྱུར་འདུག ང་ལ་ནི་དམིགས་བསལ་ལྟད་མོ་འདི་ལ་བལྟ་དགོས་བསམ་པ་གང་ཡང་མེད་པར་བོད་ཀྱི་གླུ་དབྱངས་རེ་ཉན་ནས་ཁུ་སིམ་མེར་བསྡད། ཞོར་དུ་<<ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་>>ཀྱི་ཀློག་འཕྲོ་ནས་ཚན་པ་གཅིག་བཀླགས་ཏེ་བརྗེད་ཐོ་ཞིག་འབྲི་བའི་ངལ་བ་བསྟེན་འདོད་བྱུང་།
གོ་ལ་གཅིག་གྱུར་ཁྲོད་ཀྱི་བཟོད་སྒོམ།
ཚན་པ་འདིར་སྔར་བཞིན་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སྐོར་ནས་གླེང་བཞིན་འདུག ༧ གོང་ས་མཆོག་གིས་ངོས་ནི་གནའ་བོའི་རྒྱ་གར་གྱི་སྲོལ་རྒྱུན་དང་དེང་རབས་བར་གྱི་ཕོ་ཉ་ཞིག་ཡིན་ཞིང་། ངོས་རང་གང་དུ་ཕྱིན་ཀྱང་འཚེ་བ་མེད་པའི་ལྟ་གྲུབ་དང་། ཆོས་ལུགས་མཐུན་སྒྲིལ་དགོས་པའི་གལ་ཆེའི་བསམ་ཚུལ་འདི་གཉིས་ནན་ཏན་བྱས་ནས་ཤོད་ཀྱི་ཡོད་ཀྱི་གསུངས་འདུག མ་ཟད་ཕྱོགས་གཅིག་ནས་ངོས་རང་རྒྱ་གར་གྱི་བུ་ཕྲུག་ཅིག་ཏུ་ངོས་འཛིན་བྱེད་ཀྱི་ཡོད། ཕྲུ་གུའི་གནས་སྐབས་ནས་བཟུང་ངོས་ཀྱི་སེམས་ཁམས་རྒྱ་གར་གྱི་རིག་གཞུང་གིས་གསོ་སྐྱོང་བྱས་ཤིང་། ལོ་དྲུག་ནས་བཟུང་གྲྭ་པ་ཞིག་གི་ངོ་བོར་སློབ་གཉེར་ཚུགས་ཏེ། ཀློག་འདོན་དང་བློ་འཛིན་བྱས་པའི་དཔེ་ཆ་མང་ཆེ་བ་ནི་རྒྱ་གར་གྱི་སློབ་དཔོན་རྣམས་ཀྱི་མཛད་པ་ཤ་སྟག་རེད། དེ་བཞིན་དར་མའི་འགོ་སྟོད་ནས་བཟུང་ངོས་ཀྱི་ལུས་པོའང་རྒྱ་གར་གྱི་འབྲས་དང་རྡ་ལིས་གསོ་སྐྱོང་བྱས་ཡོད། དེར་བརྟེན་རྒྱ་གར་ནས་བྱུང་བའི་ཆོས་དང་མ་འབྲེལ་བའི་རིང་ལུགས་ཀྱི་གོ་རྟོགས་འདི་མཉམ་སྤྱོད་དང་གོང་འཕེལ་གཏོང་བར་ངོས་རང་ཧ་ཅང་དགའ་བོ་ཡོད་ཅེས་གསུངས་འདུག
ཆོས་དང་མ་འབྲེལ་བའི་རིང་ལུགས་སམ་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་གོ་རྟོགས་སྤེལ་བ་དང་གོང་འཕེལ་བ་གཏོང་རྒྱུར་དགའ་བ་ནི་། ༧གོང་ས་མཆོག་སྐྱབས་མགོན་ཆེན་པོ་མཆོག་རྒྱ་གར་གྱི་རིག་གཞུང་ལ་དུང་ཞེན་ཆེ་བས་མིན་པར། ད་ལྟའི་དུས་འདི་གོ་ལ་གཅིག་གྱུར་དང་། རིག་གནས་སྣ་ཚོགས། ལྟ་བ་སྣ་མང་། ཆོས་ལུགས་ཐ་དད་སོགས་ཀྱི་མི་རྣམས་ཕན་ཚུན་འབྲེལ་འདྲེས་ཆེས་ཆེ་བའི་དུས་སྐབས་ཤིག་ཡིན་དུས། ཕན་ཚུན་གཉིས་མོས་ཀྱི་གུས་བརྩི་ཡོད་པའི་བདེ་སྐྱིད་འཚོལ་ལམ་ཞིག་དགོས་པ་ནི་ཛ་དྲག་གི་གནད་དོན་ཞིག་ལ་གྱུར་ཡོད་པས་ཡིན།
ད་ལྟའི་དུས་འདིར་བཟང་སྤྱོད་དང་། སེམས་ཀྱི་རིན་ཐང་། སྒེར་ཚུགས་སོགས་བཅོས་མིན་གྱི་ཡུན་གནས་ཐུབ་པའི་ཡོངས་ཁྱབ་ཀྱི་ཐབས་ལམ་ཞིག་འཚོལ་སྒྲུབ་བྱ་རྒྱུ་ནི་ཁ་ཚ་དགོས་གཏུགས་ཡིན་པ་སྨོས་མེད་རེད། འོན་ཀྱང་དེ་ནི་འགྲོ་བ་མིའི་རང་བཞིན་གཞི་རྩར་བཞག་ཅིང་། འགྲོ་བ་མིའི་ཉམས་མྱོང་དང་། ཕྱོགས་སུ་མ་ལྷུང་ཚན་རིག་གི་དཔྱད་འབྲས་བཅས་ལ་བརྟེན་པའི་ཆོས་ལུགས་ལ་མ་བརྟེན་པའི་བཟང་སྤྱོད་འདི་ལྟ་བུས། འཇིག་རྟེན་ཡོངས་ཁྱབ་ཀྱི་བདེ་སྐྱིད་གོང་འཕེལ་དང་ཡུན་གནས་བྱ་ཐུབ་པ་ལས། ཆོས་ལུགས་ཀྱི་ལྟ་ཚུལ་ལ་ཡིད་ཆེས་པའི་ཐོག་ནས་འཇིག་རྟེན་ཡོངས་ཁྱབ་ཀྱི་བཟང་སྤྱོད་ཀྱི་རྩ་བ་ཚུགས་དགོས་ཟེར་ན་གཏན་མི་སྲིད་པའི་དགོངས་ཚུལ་གནང་འདུག
2020/8/14ཉིན་བློ་བཟང་རིན་ཆེན་གྱིས་བྲིས།