གཞུང་པ་ཚེ་དབང་བསོད་ནམས།
སྤྱི་ལོ་ ༡༩༥༩ ལོར་རྒྱ་མིའི་བོད་བཙན་བཟུང་བྱས་ནས་༧ གོང་ས་མཆོག་གི་དབུ་ཁྲིད་འོག་ཁོང་གི་བཀའ་ཤག་ལྷན་རྒྱས་དང་ཞི་བའི་མི་མང་ཁྲི་ཚོ་བརྒྱད་ལྷག་ཙམ་བཅས་རྒྱ་བལ་འབྲུག་གསུམ་ནང་བཙན་བྱོལ་དུ་འབྱོར་མ་ཐག་སྤྱི་ལོ་ ༡༩༦༠ སྤྱི་ཟླ་བ ༢ པའི་ཚེས་ ༣ དང་ས་ཕག་ཟླ་བ་ ༡༢ པའི་ཚེས་ ༧ ཉིན་གནས་མཆོག་རྡོ་རྗེ་གདན་དུ་སྤྱི་ནོར་༧ གོང་ས་༧ སྐྱབས་མགོན་ཆེན་པོ་མཆོག་ལ་བཙན་བྱོལ་བོད་མིའི་གནས་ཡུལ་ས་ཁུལ་ཡོངས་ནས་སེར་སྐྱ་མི་མང་ཚང་འཛོམས་ཀྱིས་བརྟན་བཞུགས་བསྟར་འབུལ་དང་འབྲེལ། ༧གོང་ས་༧ སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་འོག་མདུན་སྐྱོད་བྱ་རྒྱུའི་དམ་བཅའ་མནའ་གན་མཐུ་མོ་ཆེ་འབུལ་ལམ་ཞུས། ༧ གོང་ས་མཆོག་གིས་རླབས་ཆེན་གྱི་མཛད་འཕྲིན་འོག་ཆོལ་གསུམ་ཆོས་ལུགས་དང་བཅས་པའི་སྐུ་ཚབ་འདུ་བསྐོང་གིས་བཙན་བྱོལ་སྤྱི་ཚོགས་ནང་མང་གཙོའི་སྒྲིག་འཛུགས་བཙུགས་ནས་བཙན་བྱོལ་སྤྱི་ཚོགས་འདི་མང་གཙོ་ཁྲིམས་ཀྱི་དབང་བསྒྱུར་འོག་འགྲོ་བཞིན་པའི་སྐབས་འདིར་སྤྱི་འཐུས་སྐབས་བཅུ་དྲུག་དང་། བཀའ་ཤག་སྐབས་བཅོ་ལྔ་གཉིས་ཀྱིས་ལས་དུས་སུ་ཁྲིམས་འགལ་གྱིས་གྲོས་ཆོད་ཡིག་ཆ་ཨང་ ༣༩ ཟེར་བའི་འོག་ནས་ཆེས་མཐོའི་ཁྲིམས་ཞིབ་པ་ཆ་ཚང་འཕོ་འགྱུར་བཏང་བ་ནས་བཙན་བྱོལ་སྤྱི་ཚོགས་ནང་ཕྱོགས་གཏོགས་ཆབ་སྲིད་ལ་འགན་འཁུར་ནས་ཆོལ་ཁ་དང་། ལུང་ཚན། ཚོགས་སྐྱིད་སོགས་ཀྱི་མིང་གི་འོག་སྤྱི་ཚོགས་དྲ་རྒྱ་ངོ་དེབ་དང་སྙན་འཕྲིན་སོགས་བེད་སྤྱད་ནས་བོད་མི་ནང་ཁུལ་ལ་ཟུར་ཟའི་ཚིག་ངན་བེད་སྤྱོད་ཀྱིས་བཙན་བྱོལ་བོད་མིའི་སྒྲིག་འཛུགས་ཀྱི་ནུས་པ་ལ་ཉམས་ཆགས་གཏོང་རྒྱུ་དང་བོད་མི་ནང་ཁུལ་ལ་བསམ་བློའི་འགལ་ཟླ་བཟོ་རྒྱུ་དང་། དབུས་བོད་མིའི་སྒྲིག་འཛུགས་དང་མི་མང་བར་ཡིད་ཆེས་འགྱངས་ཐག་རིང་དུ་གཏོང་ཐབས་སོགས་དགྲ་དགའ་གཉེན་སྡུག་གིས་བྱེད་བབས་འདིའི་ང་ཚོའི་དམིགས་ཡུལ་བོད་དོན་བདེན་མཐའ་སེལ་ཐབས་ལ་ཕན་རྒྱུའི་ཚབ་ལ་གནོད་སྐྱོན་འགྲོ་སྲིད་པ་ནས་དགྲ་དགའ་གཉེན་སྡུག་གི་བྱ་སྤྱོད་ལ་སོང་བཙན་བྱོལ་སྤྱི་ཚོགས་ནང་ཡོད་པའི་ཆོལ་ཁ་དང་། ལུང་ཚན། ཚོགས་སྐྱིད་སོགས་དང་མི་སྒེར་བཅས་ནས་༧ གོང་ས་མཆོག་གིས་ཆོས་སྲིད་ཀྱི་བླངས་དོར་ལམ་སྟོན་བཀའ་སློབ་གང་ཕེབས་པ་རྣམས་ལ་སློབ་སྦྱོང་བྱས་ནས་བོད་མི་ནང་ཁུལ་མཐུན་ལམ་རྡོག་རྩ་གཅིག་ཏུ་སྒྲིལ་ནས་བོད་དོན་བདེན་མཐའ་སེལ་ཐབས་ལ་དབུས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་ལམ་སྟོན་འོག་ཆོལ་གསུམ་བོད་རིགས་མི་མང་སྐྱིད་ན་སྐྱིད་མཉམ་དང་སྡུག་ན་སྡུག་མཉམ་བྱས་ནས་མདུན་སྐྱོད་བྱ་དགོས་པ་དེ་ད་ལྟའི་ང་ཚོ་བོད་མི་རིགས་ཀྱིས་ལས་དབང་དུ་འཕྲད་པའི་དཀའ་ངལ་སེལ་ཐུབ་པའི་འགན་འཁུར་དགོས་པ་དེ་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་ཆེ་ཤོས་དེ་ཡིན་པའི་ངོ་སྤྲོད་ཡང་ཞུ་འདོད་བྱུང་ལ་ང་ཚོ་ནི་ས་ཆ་ལག་ཐིལ་ཙམ་ཡང་མེད་པའི་མི་རིགས་ཞིག་མིའི་ལུང་པའི་ནང་སྐྱབས་བཅོལ་ནས་སྡོད་རྒྱུ་བྱུང་བ་འདི་ཡང་གསལ་པོར་བཤད་ན་༧ གོང་ས་མཆོག་གི་ཐུགས་རྗེ་བཀའ་དྲིན་ཁོ་ནར་བྱུང་བ་ནི་སྤྱི་ལོ་ ༡༩༥༩ ལོར་ཀ་རྡོར་སྒང་གསུམ་ཁུལ་དུ་དེ་སྔོན་ནས་འབྱོར་བའི་བོད་མི་ཚོ་ཡང་ཕར་བོད་ལ་སློག་རྒྱུའི་རྒྱ་གར་གཞུང་གི་སྐད་ཆ་འགྲོ་བཞིན་པའི་སྐབས་༧ གོང་ས་མཆོག་བོད་ནས་རྒྱ་གར་ས་མཚམས་ཆུ་དངས་མོར་༧ཞབས་སོར་འཁོད་པའི་གནས་ཚུལ་དབྱིན་ཇིའི་གསར་འགྱུར་སྦི་སྦི་སི་ནས་གསལ་བསྒྲགས་གནང་སྐབས་བོད་མི་བོད་ལ་སློག་རྒྱུའི་སྐད་ཆ་དེ་ཡང་གཞི་ནས་ཡལ་ནས་ང་ཚོ་རྒྱ་བལ་འབྲུག་གསུམ་ནང་གཞིས་ཆགས་ནས་ཡུལ་མི་དང་འདྲ་མཉམ་གྱིས་ཐོབ་ཐང་ས་ཞིང་འདེབས་ལས་དང་ཚོང་ལས་སོགས་ཕ་ཡུལ་གཉིས་པ་ལྟབུ་བྱས་ནས་མི་ཡུལ་དུ་རང་དབང་གི་ཐོག་ནས་བདེ་སྐྱིད་ཀྱིས་འཚོ་བ་གཉེར་རྒྱུ་དང་། ཨ་རིས་མཚོན་པའི་ནུབ་ཕྱོགས་ཡར་ཐོན་ལུང་པའི་ནང་བོད་མི་བཙན་བྱོལ་བ་ལུང་པ་དེ་དག་གི་མི་ཁུངས་ལག་ཁྱེར་བླངས་ནས་སྒེར་གྱི་འཚོ་བ་ལ་རྒྱས་སྤྲོས་བྱ་རྒྱུ་དང་། ཆབ་སྲིད་བརྩོན་པའི་མིང་གི་འོག་ཏུ་ཨོ་གླིང་ལ་གནས་སྤོས་བྱ་རྒྱུ་དེ་ཚོ་ཚང་མ་༧ གོང་ས་མཆོག་གིས་རླབས་ཆེན་གྱི་མཛད་འཕྲིན་ཁོ་ནའི་འོག་དབུས་བོད་མིའི་སྒྲིག་འཛུགས་ཀྱི་ལམ་སྟོན་དང་སྲིད་བྱུས་འོག་ནས་བྱུང་བ་ནས་ང་ཚོ་བོད་མི་ཆེ་འབྲིང་ཆུང་གསུམ་ཚང་མས་ཚེ་འདི་དང་ཕྱི་མ། ལས་རྒྱུ་དང་འབྲས་བུ་ཁས་ལེན་མཁན་ཚོའི་ངེས་པར་དུ་ཤེས་པའི་ཐོག་ནས་ང་ཚོ་རང་བཙན་ཡོད་པའི་མི་རིགས་ལ་དཔེ་བླངས་ནས་སྤྱི་ཚོགས་དྲ་རྒྱ། ༼ Social Media ༽ དང་ངོ་དེབ། ༼ Face Book ༽ སྙན་ཐུང་། ༼ YouTube ༽ སོགས་བཟོས་ནས་ཁ་དམག་རྒྱག་རྒྱུ་དང་རང་མིང་བསྒྲགས་ཐབས་སུ་མཐོ་ཙམ་དམའ་ཙམ་དང་བདེན་ལ་མི་བདེན་པའི་སྤྱི་ཚོགས་འཁྲུགས་རྒྱུའི་གནས་ཚུལ་རིགས་དུས་ནམ་ཡང་སྤེལ་མི་ཉན་པའི་ཁ་བརྡ་སློབ་གསོ་ཞུ་འདོད་བྱུང་།