“ཆེས་མཐའ་མཇུག་གི་སློབ་ཁྲིད།”

ཆབ་མདོ་ངག་ཕུན།

དེ་ཡང་ཕྱི་ལོ་༡༩༤༩ལོར་བོད་ཆོས་ལྡན་གྱི་ཞིང་ཁམས་སུ་ཤར་ཕྱོགས་ཁྱིམ་མཚེས་རྒྱལ་ཁབ་རྒྱ་མི་དམར་པོ་དྲག་པོའི་བཙན་འཛུལ་བྱས་ཤིང་། ཉེས་མེད་བོད་མི་ཉམ་ཆུང་མང་པོ་ཞིག་དམར་བཏང་། ཆེས་རིན་ཐང་བྲལ་བའི་གནའ་བོའི་དགོན་རྙིང་དུ་མ་ཞིག་གཏོར་བཤིག་བཏང་བ་སོགས་ཀྱི་བོད་མི་རྣམས་ལ་དཀའ་སྡུག་ཚད་མེད་མྱོང་དགོས་བྱུང་། དེ་འདྲའི་གནས་སྟངས་ཤིག་གི་འོག་ལ་གེག་པ་ཞེས་པའི་གྲོང་གསེབ་གཅིག་ལ་གཞུང་གི་སློབ་གྲྭ་ཞིག་བཙུགས་ཡོད། སློབ་གྲྭ་དེར་གྲོང་གསེབ་གཡས་གཡོན་ནས་ཕྲུ་གུ་རྣམས་བསྡུས་ནས་སློབ་གསོ་སྤྲད་ཀྱི་ཡོད་ཅིང་། སློབ་གྲྭ་དེར་བོད་རིགས་དགེ་རྒན་གཅིག་ལས་མེད་ཅིང་།  བོད་རིགས་དགེ་རྒན་གྱི་མིང་ལ་བློ་བརྟན་ཟེར། ཁོང་ནི་རང་བཞིན་གྱི་ངག་འཇམ་ལ། སེམས་ཤུགས་དང་ལྷག་བསམ་ཧ་ལས་པ་ཡོད་པ་མ་ཟད། སོ་སོའི་མི་རིགས་ཀྱི་སྐད་ཡིག་ལ་ཧ་ཅང་གདེང་འཇོག་དང་གཅེས་འཛིན་བྱེད་ཀྱི་ཡོད།

བློ་བརྟན་སློབ་གྲྭ་དེར་དགེ་རྒན་གྱི་སློབ་ཁྲིད་གནང་ནས་མི་ལོ་ཉེར་ལྔ་ཙམ་ཕྱིན་ཡོད་ཅིང་། དེའི་རིང་ལ་སོ་སོའི་སྐད་ཡིག་གི་ཐོག་ལ་རང་ནུས་ཡོད་ཚད་བཏོན་ནས་སློབ་ཁྲིད་གནང་གི་ཡོད་ལ།  དཀའ་ངལ་མང་པོ་ཞིག་ལ་གདོང་ལེན་བྱེད་དགོས་བྱུང་ཡོད་ནའང་ཞུམ་པར་མེད་པའི་མདུན་བསྐྱོད་གནང་ཡོད། སློབ་ཕྲུག་དང་ཕ་མ་ཚོས་དགེན་བློ་བརྟན་ལ་གུས་བཀུར་དང་ཆ་འཇོག་ཆེན་པོ་གནང་གི་ཡོད་ཅིང་།  དེར་བརྟེན་སློབ་གྲྭའི་འགོ་ཁྲིད་ཚོའི་བྱ་ཐབས་རྙེད་ཀྱི་མེད། ལྷག་པར་དགེ་རྒན་བློ་བརྟན་གྱིས་བློ་རྩེ་གཅིག་ཏུ་གཏད་ནས་སློབ་ཕྲུག་རྣམས་ལ་སོ་སོའི་མི་རིགས་ཀྱི་སྐད་ཡིག་གཙོ་འདོན་སློབ་ཁྲིད་བྱེད་ཀྱི་ཡོད།  སློབ་ཕྲུག་རྣམས་ལ་ཕན་ཐོགས་ཀྱང་རླབས་ཆེན་བྱུང་དང་འབྱུང་བཞིན་ཡོད་ནའང་བོད་དགེའི་བློ་བརྟན་གྱི་སློབ་ཁྲིད་བྱེད་སྟངས་དེར་འགྱུར་བ་གཏོང་དགོས་ཚུལ་སློབ་སྤྱིས་བརྗོད།  དེ་ལ་བོད་དགེ་བློ་བརྟན་གྱིས་”གྲངས་ཉུང་མི་རིགས་རྣམས་ལ་སོ་སོའི་སྐད་ཡིག་ལ་ལྟ་ཀློག་སྦྱོང་བྱེད་ཆོག་པའི་རྩ་ཁྲིམས་ནང་འཁོད་ཡོད་ལུགས་བརྗོད་”པས།  འབྲེལ་ཡོད་སློབ་སྤྱི་ཅི་ལབ་མེད་པར་གྱུར་ནས་གནས་སྐབས་རིང་ལ་འཇོག་དགོས་བྱུང་བ་རེད།

དེ་ནས་ཉིན་གཅིག་དགེན་བློ་བརྟན་གྱིས་སློབ་ཕྲུག་རྣམས་ལ་བོད་བཙན་པོའི་སྐབས་ཀྱི་བོད་དམག་དང་རྒྱ་དམག་འཐབ་སྟེ་རྒྱ་དམག་ཕམ་སྟེ་རྒྱ་ཡི་རྒྱལ་པོ་ཡང་རྒྱལ་ས་ནས་བྲོས་དགོས་བྱུང་སྐད་སོགས་འགྲེལ་བཤད་སྐྱོན་གནང་བ་སོགས་ཀྱི་སློབ་ཕྲུག་རྣམས་བསམ་བློ་གཏོང་དགོས་པ་བཟོས། ཉིན་གཅིག་ཞོགས་པ་སློབ་གྲྭ་ཡར་ཚུགས་པ་དང་། སློབ་སྤྱིས་”བློ་བརྟན་རང་ལས་ཁུངས་ལ་འཁྱུག་ཙམ་རིང་ཡོང་”དགོས་ཚུལ་བརྗོད། བློ་བརྟན་གྱི་དོན་དག་གང་ཞིག་ཡོད་པ་ཡིན་ནམ་སྙམ་སྟེ་སློབ་སྤྱིའི་མདུན་དུ་བཅར་མ་ཐག་སློབ་སྤྱི་རྒྱ་མི་དེས་མི་འདོད་པའི་རྣམ་འགྱུར་ཞིག་བཏོན་ནས་”ཁྱོད་རང་གི་སློབ་ཕྲུག་ལ་སློབ་གསོ་སྤྲད་སྟངས་ནོར་འཁྲུལ་ཆེན་པོ་ཞིག་བཟོ་བཞིན་འདུག  །ཀྲུང་དབྱངས་ཀྱི་ལྟ་བ་དང་ལངས་ཕྱོགས་དང་མ་མཐུན་པའི་བོད་ཀྱི་ལོ་རྒྱུས་འགྲེལ་བཤད་བརྒྱག་གི་ཡོད་ཚུལ་ཕྱི་ནང་ཀུན་ལ་བཤད་བཞིན་འདུག །དོན་མེད་ང་ཚོར་དཀའ་ངལ་འཕྲད་བཞིན་འདུག་”ཅེས་བརྗོད་པ་དང་། གཏམ་དེ་དགེན་བློ་བརྟན་གྱི་གོ་མ་ཐག་ཕྲན་བུ་མ་བདེ་བ་བྱུང་ནའང་གུས་ཞབས་དང་དང་བཅས་ཏེ་”ངས་སློབ་ཁྲིད་བྱེད་སྟངས་དེ་དག་ཀྲུང་དབྱང་གི་ལྟ་བ་དང་ལངས་ཕྱོགས་དང་མཐུན་གྱི་ཡོད་པ་ལས། རྒྱལ་ཁབ་ཀྱི་རྩ་ཁྲིམས་དང་མ་མཐུན་པའི་སློབ་ཁྲིད་གཏན་ནས་བྱེད་ཀྱི་མེད།  ངས་སློབ་གྲྭ་ནང་ལ་བོད་བཙན་པོའི་རྒྱལ་རབས་ནང་དུ་གང་འཁོད་ཡོད་པ་དེ་བཤད་པ་ལས་དེར་སོ་སོའི་རྟོག་བཟོ་བྱས་པའི་ཚིག་ན་གཅིག་ཀྱང་མེད་ལ། རྫུན་གཏམ་གཏན་ནས་བཤད་ཀྱི་མེད་ལ། བཤད་མྱོང་དེ་ལས་ཀྱང་མེད།  བཤད་རྒྱུ་འདོད་པ་ཡང་མེད། བཤད་དགོས་པའི་རྒྱུ་མཚན་ཡང་མ་མཐོང་། བོད་བཙན་པོའི་ལོ་རྒྱུས་ནང་དུ་ཡག་སྡུག་གཉིས་ཀ་གང་འཁོད་པ་དེ་དག་གསར་སྐྱེས་ཚོར་ཤེས་པར་བཟོ་དགོས་པ་དེ་ནི་ཧ་ཅང་གལ་ཆེ་རང་བཞིན་འགྱུར་འདུག་སྙམ།   དེ་དག་ནི་མི་སུ་འདྲ་ཞིག་སྦས་དགོས་དྲན་ནའང་”ཉི་ཤར་སྦར་མོས་མི་ཁེབས་”ཞེས་པའི་དཔེ་ལྟར་ལོ་རྒྱུས་དངོས་ཡོད་སྦས་བསྐུང་བྱ་ཐབས་རྩ་བ་རང་ནས་ཡོད་མ་རེད་”ཅེས་བཤད།  དེ་ནས་སློབ་སྤྱི་དེ་ཧ་ཅང་ཁྲོ་ཉམས་དང་བཅས་ཏེ་ཞབས་སྟེགས་ནས་ལངས་ཏེ་”ད་ནས་བཟུང་སྟེ་བོད་ཀྱི་སྐད་ཡིག་སློབ་ཁྲིད་མཚམས་འཇོག་བྱེད་ཀྱི་ཡིན་ནམ། ཡན་ན་སློབ་གྲྭ་འདི་ནས་རྩ་དགོངས་ཞུ་ནས་འགྲོ་གི་ཡིན་དེ་གཉིས་གང་ཞིག་འདེམས་ཀྱི་ཡིན་མིན་རང་གི་བསམ་བློ་གཏང་ནས་ཐག་གཅོད་བྱེད་དགོས་ཟེར་བ་དང་། དེ་བཞིན་བོད་ཀྱི་སྐད་ཡིག་འདི་ནི་ཧ་ཅང་རྗེས་ལུས་སྐད་ཡིག་གཅིག་ཡིན་ན་དེ་སློབ་ཁྲིད་བྱས་ནས་ཕན་ཐོགས་ཅི་ཞིག་ཡོད། ཆེས་རྗེས་ལུས་ཐེབས་ཟིན་པས་སྐད་ཡིག་ཡིན་པས་དུས་རབས་ཀྱི་རྗེས་ཟིན་གྱི་མ་རེད་”ཅེས་དང་།  དེ་ལ་བོད་དགེ་བློ་བརྟན་ཡང་ཁོང་ཁྲོ་དང་ཡིད་སྐྱོ་བའི་ངང་ཚུལ་གྱི་ཐོགས་ནས་”ཁྱོད་ཀྱི་བཤད་པ་དེ་བདེན་པ་མ་རེད་ཟེར་གྱི་མེད། ཡིན་ནའང་ང་ཚོའི་བོད་མི་རིགས་ཀྱི་སྐད་ཡིག་འདི་ཉིད་དེང་རབས་དང་མཐུན་པའི་མདུན་བསྐྱོད་བྱེད་སའི་ཁོར་ཡུག་མ་བྱུང་བ་རེད་མ་གཏོགས་སྐད་ཡིག་རྗེས་ལུས་རྩ་བ་རང་ནས་མ་རེད། དང་ཐོག་མི་རིགས་སུ་འདྲ་ཡིན་ནའང་སྐད་ཡིག་ཕུན་སུམ་ཚོགས་པ་ཞིག་ཡིན་གྱི་མ་རེད།  འཛམ་གླིང་གི་གནས་སྟངས་འཕོ་འགྱུར་དང་བསྟུན་ནས་སྐད་ཡིག་འཕེལ་རྒྱས་བཏང་བ་ཞིག་ལས་རང་བཞིན་གྱིས་སྐད་ཡིག་འཕེལ་རྒྱས་བྱུང་བ་སྐད་ཡིག་གཅིག་ཀྱང་ཡོད་ཀྱི་མ་རེད་སྙམ་”ཞེས་གནས་ལུགས་དང་རྒྱུ་མཚན་བགྲང་ནའང་ཆུ་ནང་རྡོ་གཡུག་པ་ལྟར་ཕན་ཐོགས་ཅི་ཡང་མ་བྱུང་།

གང་ལྟར་སློབ་སྤྱི་རྒྱ་དཔོན་དེས་”ཁྱོད་ཀྱི་གོང་རིམ་གྱི་བཀའ་ལ་རྩི་འཇོག་བྱེད་ནས་བོད་ཀྱི་སྐད་ཡིག་ཁྲིད་མཚམས་འཇོག་ནས་སློབ་གྲྭ་ནང་སྡོད་ཀྱི་ཡིན་ནམ། ཡང་ན་སློབ་ཁོངས་ནས་རྩ་དགོངས་ལ་འགྲོ་གི་ཡིན་རང་གི་བསམ་བློ་བཏང་ནས་སང་ཉིན་ལན་འཁུར་ཤོག་”ཟེར།  དེ་ནས་དགེན་བློ་བརྟན་གྱིས་འདི་ཡིན་ལན་ཅི་ཡང་མ་བཏབ་སྟེ་མགོ་བོ་སྒུར་ནས་ལས་ཁུངས་ནས་ཕྱི་རོལ་ལ་ཐོན་ཕྱིན།   མཁའ་དབྱིངས་ལ་སྤྲིན་པ་ལྕང་ལོ་ཙམ་ཞིག་མེད་པར་མདངས་མ་གྱུར་ཞིང་། སློབ་གྲྭའི་གཡས་གཡོན་ཁོར་ཡུག་འཇམ་ཐིང་ངེར་གྱུར་ལ། སློབ་ཕྲུག་རྣམས་ངོ་གདོང་ལ་རྔུལ་ནག་འཕྱུར་རེ་གྱུར་ནས་སུན་སྣང་སྐྱེ་བའི་རྣམ་པར་མངོན། རིམ་གྱི་སློབ་གྲྭ་ཚོགས་བརྡ་བཏང་བ་དང་བསྟུན་སློབ་དགེ་བློ་བརྟན་ཡང་སློབ་ཁང་ཕྱིན་ནས་སློབ་ཁྲིད་གནང་ཡང་སེམས་ཁམས་སྟོངས་ལྷང་ལྷང་གྱུར་པ་དང་།  ཡི་གེ་ཡང་ཡག་པོ་ཞིག་མིག་གིས་མི་མཐོང་བ་གྱུར་ཏེ་མགོ་ཡུལ་འཁོར་ནས་ལན་མང་སར་འགྱེལ་གྲབ་བྱས་ཀྱང་ཨུ་ཚུགས་རྒྱབ་སྟེ་སློབ་ཁྲིད་མཐའ་སྐྱོང་གནང་་། སློབ་ཕྲུག་རྣམས་ཀྱིས་མཐོང་སྟེ་ལམ་སེང་ལངས་ཏེ་དགེ་ལགས་སྐྱོར་གྲབ་བྱེད་སྐབས་དགེན་བློ་བརྟན་གྱིས་”ང་ལ་སེམས་ཁྲལ་མ་བྱེད། ཁྱོད་རང་ཚོས་ནག་སྤང་སྟེང་གི་ཡི་གེ་ཆ་ཚང་ཤུས་དགོས་”ཟེར།  སློབ་ཕྲུག་རྣམས་ཀྱི་དགེ་ལགས་ཀྱི་བཀའ་ལྟར་ཆ་ཚང་བཤུས།  དེ་ནས་སློབ་གྲྭ་གྲོལ་བརྡ་བཏང་བ་དང་སློབ་ཕྲུག་རྣམས་ཀྱི་དཔེ་ཁུག་རྒྱབ་ཏུ་འཁུར་སོ་སོའི་ནང་ལ་ལོག ཕྱི་ཉིན་ནམ་སྐྱ་མདའ་གཏོང་བ་དང་དགེན་བློ་བརྟན་མལ་ས་ནས་ལངས་ཏེ་ཤིང་སྐས་ཐོག་ནས་ཁང་ཐོག་ལ་འཛེགས་ཏེ་ཕྱིའི་ཡུལ་ལྗོངས་ལ་བྱ་ར་བྱས་ཤིང་། ཁོར་ཡུག་གི་བཀོད་ལེགས་མཛེས་སྡུག་ལྡན་ཞིང་རང་བཞིན་མེད་པའི་སེམས་ལ་བདེ་སྣང་ཞིག་ཀྱང་དབང་མེད་དུ་སྟེར་བ་དང་བསྟུན་དབུགས་རིང་ཞིག་ཀྱང་རང་བཞིན་མེད་དུ་ཤོར།  རིམ་གྱིས་ལྗོན་ཤིང་གི་གསེང་ནས་བྱ་བྱེའུ་ཚོགས་ཀྱི་སྐད་སྙན་སྣ་ཚོགས་སྒྲོག་འོང་བ་དང་། དགེན་བློ་བཟང་གི་སེམས་ནང་ལ་བྱ་བྱེའུ་འདི་ཚོ་ཡིན་ན་སྐྱིད་པ་ལ་ཨང་། ཁོ་ཚོའི་སེམས་ནང་དཀའ་སྡུག་གང་ཡང་ཡོད་ཀྱི་མ་རེད། ང་ཡང་བྱ་ལུས་ཞིག་བླངས་ཡོད་པ་ཡིན་ན་ད་ལྟ་སེམས་ནང་གི་དཀའ་སྡུག་འདི་དག་མྱོང་དགོས་པ་ཞིག་མ་རེད་སྙམ་པའི་སེམས་ནང་ལ་སུན་སྣང་ཞིག་སྐྱེས།

དེ་ནས་ཁ་སྐོར་ནས་ཤིང་སྐས་མར་འབབ་སྟེ་ཞོགས་ཇ་བསྐོལ་ཏེ་འཐུང་།   དེ་དག་ཚར་རྗེས་དཔེ་ཁུག་འཁྱེར་ནས་སློབ་ཁྲིད་ལ་ཕྱིན།  དེ་ཉིན་ནི་མཁའ་དབྱིངས་ལ་སྤྲིན་ནག་འཁྲིགས་ཤིང་།  གྲང་ལྷང་ལྷང་རླུང་བུ་རྒྱབ་བཞིན་མཆིས་ལ།  ནམ་མཁའི་ལྷ་མོས་ཀྱང་དགེན་བློ་བརྟན་ལ་སེམས་གསོའི་གདུང་སེམས་མཉམ་སྐྱེད་བྱེད་པར་མཚོན།  དགེན་བློ་བརྟན་གྱིས་སློབ་ཁང་སྒོ་ཕྱེས།  སློབ་ཕྲུག་གཅིག་གིས་འཛིན་ཁང་གཙང་མར་གད་ཕྱེས་བྱས་ཤིང་ནག་སྤང་གཙང་མར་ཕྱེས།  དེ་ཉིན་ནི་དགེན་བློ་བརྟན་དུས་རྒྱུན་དང་ཁྱོན་ནས་མ་འདྲ་བ་ཞལ་རས་ལ་སྐྱོ་ཉམས་ཀྱི་རྣམ་པར་མངོན་ལ། དེ་ལས་ཀྱང་བློ་ཕྲུག་རྣམས་ལ་བརྩེ་བས་གཟིགས་ཤིང་དབུགས་རིང་ཞིག་ཀྱང་དབང་མེད་ཤོར།  དགེན་བློ་བརྟན་ནི་དུས་རྒྱུན་ཞལ་རས་འཛུམ་མདངས་སྟོན་པ་ལས་སློབ་ཕྲུག་རྣམས་ལ་དོན་མེད་ཀྱིས་གདོང་ནག་པོ་ཁྱོན་ནས་བཏོན་མྱོང་མེད་ལ།  སློབ་ཕྲུག་རྣམས་སོ་སོའི་ཤ་ལས་མཆེད་པའི་བུ་ཕྲུག་ནང་བཞིན་བྱམས་པོ་གནང་གི་ཡོད་པས།  སློབ་ཕྲུག་ཚོས་ཀྱང་དགེན་ལགས་ཞེས་རྩི་འཇོག་དང་གུས་བཀུར་ཚད་མེད་ཞུ་གི་ཡོད། དེ་ནས་སློབ་ཕྲུག་རྣམས་སོ་སོའི་རྐུབ་སྟེགས་ཐོག་འཁོད་པ་དང་བསྟུན་དགེན་བློ་བརྟན་ཞབས་སྟེགས་ནས་བཞེངས་ཏེ་ས་སྨྱུག་ལག་པས་འཛིན་ནས་ནག་པང་གི་སྟེང་ལ་”ཆེས་མཐའ་མཇུག་གི་སློབ་ཁྲིད་”ཅེས་བྲིས་ཤིང་། སློབ་ཕྲུག་རྣམས་ཀྱིས་”ཆེས་མཐའ་མཇུག་གི་སློབ་ཁྲིད་”ཅེས་ཚིག་རྐང་དྲུག་དེ་མཐོང་མ་ཐག་འཛིན་ཁང་སྐབས་གཅིག་གི་རིང་ལ་ཁུལ་སིམ་མེར་གྱུར་ཅིང་། ཕྱི་རོལ་ནས་བྱ་བྱེའུ་སྐད་ལས་གོ་རྒྱུ་མེད།  དེ་ནས་དགེན་བློ་བརྟན་གྱིས་སློབ་ཕྲུག་རྣམས་ལ་ཁ་མར་ལྷོག་ནས་ཞལ་རས་འཛུམ་འཛུམ་མདངས་བཏོན་ཁུལ་མཛད་ནའང་དགེན་ལགས་ཀྱི་ཁོག་ལ་ནམ་ཡང་བརྗེད་ཐབས་བྲལ་བའི་དཀའ་སྡུག་ཅིག་སྦས་ཡོད་པར་མངོན།

དགེན་བློ་བརྟན་གྱིས་སློབ་ཕྲུག་རྣམས་ལ་གསུང་དོན། “དེ་རིང་ངས་སློབ་པའི་ཆེས་མཐའ་མཇུག་གི་སློབ་ཁྲིད་ཞིག་རེད། དེར་བརྟེན་རྣམ་པ་ཚོས་ཡག་པོ་བྱས་ནས་ཉན་སེམས་ལ་ཞོག་ཨང་།  དེ་ཡང་ང་ཚོའི་མི་རིགས་འདི་ནི་ཆེས་ལོ་རྒྱུས་ཡུན་རིང་ལྡན་ཞིང་། ཤེས་རིག་ཕུན་སུམ་ཚོགས་པའི་མི་རིགས་ཤིག་ཡིན། ཡིན་ནའང་འཛམ་གླིང་འཕོ་འགྱུར་དང་མཐུན་པའི་ང་ཚོ་མདུན་བསྐྱོད་མ་ཐུབ་པ་ནི་ང་ཚོའི་མི་རབས་ཀྱི་མ་འཇོན་པ་ཞིག་ཡིན་པ་ལས་སྔོན་བྱོན་ལོ་པཎ་བཀའ་དྲིན་ཅན་རྣམས་ཀྱི་ནོར་འཕྲུལ་ག་ལ་ཡིན། ང་ཚོའི་གཅེས་ནོར་འདི་དག་རྒྱུན་གནས་ཐུབ་མིན་ནི་གངས་ལྗོངས་ཀྱི་བུ་ཕྲུག་ཁྱོད་ཚོའི་ལག་ཏུ་ཡོད། ཁྱོད་ཚོར་སྦྱོང་འདོད་ཚོར་ཤུགས་དྲག་པོ་ཡོད་ན་སུ་ཞིག་གིས་བཀག་འགོག་མི་ཐུབ་ཅིང་།  ས་གཞི་གཤིན་པའི་ཐོག་ལ་མེ་ཏོག་གི་ས་བོན་སྐྱེ་མིན་རྣམ་པ་ཚོའི་སེམས་ཤུགས་དང་འདུན་པར་རག་ལས་ཡོད། རྣམ་པ་ཚོས་སྟོན་ཏོག་འདི་ཉིད་སྐྱེ་བ་ཙམ་དུ་མ་ཟད།  གངས་ལྗོངས་ཆོས་ལྡན་གྱི་ཞིང་ལ་གནས་དགོས་དྲན་ན། འདི་ཉིད་བདག་གཅེས་དང་བཀོལ་སྤྱོད་མང་ཙམ་བྱེད་དགོས་པ་ཞིག་ལས།  འདི་ཉིད་བཀོལ་སྤྱོད་མ་བྱས་ཚེ་ས་བོན་གྱི་འབྲས་བུ་ཇི་ལྟར་ལེགས་ཀྱང་ཆུ་ལུད་སོགས་ཀྱི་གསོ་སྐྱོང་མ་བྱས་ཚེ་མཐའ་མ་མེད་པ་འགྱུར་རྒྱུ་ཡིན་པར་བརྗོད་ག་ལ་དགོས། ང་ཚོའི་མེས་དབོན་བཀའ་དྲིན་ཅན་རྣམས་ཀྱི་མི་རྒྱུ་ལོངས་སྤྱོད་དང་བཅས་པ་བློས་བཏང་གནང་ནས་གསར་བཏོད་མཛད་པའི་སྐད་ཡིག་འདི་ཉིད་གཅེས་འཛིན་དང་བདག་གཅེས་བྱེད་དགོས།  མི་རིགས་སུ་འདྲ་ཞིག་ཡིན་ནའང་མི་རིགས་འདི་ཉིད་དབྱེ་བ་ཕྱེ་ས་ནི་མི་རིགས་སོ་སོའི་སྐད་ཡིག་ཡིན་པ་ལྟར་ང་ཚོའི་སྐད་ཡིག་གཅེས་འཛིན་གྱི་བཀོལ་སྤྱོད་མང་ཙམ་གནང་རྒྱུ་གལ་ཆེ་རང་བཞིན་ལྡན་ཡོད།  ལྷག་པར་ན་གཞོན་ཁྱོད་རང་ཚོའི་ང་ཚོ་བོད་མི་རིགས་ཀྱི་སྐད་ཡིག་ནང་ལ་གཞན་གྱི་སྐད་ཡིག་བསྲེས་ལྷད་ཁྱོན་ནས་གཏོང་མི་ཉེས། བོད་མི་ནང་ཁུལ་ཕན་ཚུན་ཕྲད་སྐབས་ངེས་པར་བོད་ཀྱི་སྐད་ཡིག་བེད་སྤྱོད་བྱེད་དགོས། དེ་དག་ནི་ངའི་རེ་བ་ཉག་ཅིག་ཡིན་ལ། དེ་རིང་ངས་ཁྱོད་ཚོར་”ཆེས་མཐའ་མཇུག་གི་སློབ་ཁྲིད་”དེ་རེད་ཅེས་བརྗོད་དེ་མིག་ཆུ་སར་ཟགས། སློབ་མ་ཚོ་ལའང་དགེན་བློ་བརྟན་གྱི་ཡིད་ཐང་ཆད་པ་དང་།  སྐྱོ་བའི་རྣམ་འགྱུར་བཅས་མཐོང་དུས་སློབ་མ་ཚོ་ཡང་མིག་ཆུ་ཁེངས་ཤིང་གནས།  དུས་དེ་ནས་བཟུང་སྟེ་ནག་པང་སྟེང་ལ་ཀ་མེད་སུམ་ཅུ་མཐོང་རྒྱུ་མེད་ལ། དབྱངས་བཞིའི་སྒྲ་དབྱངས་དེ་ལས་ཀྱང་ཐོས་རྒྱུ་མེད་པ་གྱུར་བ་རེད། ཉིན་མ་དེ་ནས་བཟུང་སྟེ་མི་རིགས་གཞན་ཞིག་གི་སྐད་ཡིག་ཉན་འདོད་མེད་བཞིན་བཙན་དབང་གིས་སློབ་ཕྲུག་ཚོའི་ཉན་དགོས་ཐུག་དུས་ལུས་སེམས་ལ་ཧ་ཅང་གི་དཀའ་སྡུག་མནར་གྱི་ཡོད་ཀྱང་ལས་དབང་གི་མི་ཉན་ཀ་མེད་རེད།