ཆིག་ལབ་དཀར་པོ།

བདེ་ཆེན་སྒྲོལ་མ།

དྲིན་ལྡན་ཕ་ལོའི་བྱམས་བརྩེ་རྒྱང་ནས་བསྐྱུར།།

སྤུན་དང་ན་ཟླའི་འཛུམ་མདངས་རླུང་ལ་བསྐུར།།

དགུན་གྱི་ནམ་ཟླ་ལྟ་བུའི་ས་མཐའ་ནས།།

གངས་དཀར་སེམས་ཀྱི་དམ་བཅའ་འཇའ་བཞིན་བོར།།

ཤ་དང་ཚིལ་གྱི་འཚོ་བ་རྒྱབ་ཏུ་དོར།།

འབྲས་སྐྱ་ལྡ་ལིའི་བྲོ་བཅུད་མདུན་དུ་བསུས།།

ངན་ངོན་ཟས་ཀྱིས་འཚོ་ཐབས་དཀའ་ན་ཡང་།།

རིགས་ཞེན་གཙང་མ་ཞིག་གི་མདུན་ལམ་ཡིན།།

ཕྱུག་པོ་ཕྱུག་པོའི་ས་ན་སྨྲེ་ངག་དང་།།

དབུལ་བོ་དབུལ་བོའི་ས་ན་སྨྲེ་ངག་མང་།།

དབུལ་ཕྱུག་སྙོམས་དུ་མེད་པའི་རི་གྲོང་ནས།།

ཁེར་རྐྱང་ཆིག་ལབ་དཀར་པོ་ངང་གིས་ཤོར།།

ཡོད་པ་བརྒྱ་ཡི་མདུན་ལ་སླེབས་མྱོང་མེད།།

མེད་པོ་སྟོང་གི་རྒྱབ་ལ་ལྷག་མྱོང་མེད།།

གངས་ཅན་ཕ་ལོ་ཆེན་པོའི་སྐུ་དྲིན་ལ།།

མགོ་ནག་བོད་ཀྱི་ནམ་ཟླ་དྲོད་ཀྱིས་བཟུང་།།

སྤྲང་བོས་སྤྲང་བོར་འཕྱ་བའི་གླེན་རྟགས་དང་།།

མཁས་པས་མཁས་པར་དམོད་པའི་མཁས་རྟགས་སོགས།།

ཕྲག་དོག་ཁྲག་གིས་སྦག་པའི་གནམ་འོག་འདི།།

རྫུན་དང་ངོ་སོ་བྲིན་པའི་ཚོང་ར་ཞིག།

མི་ལོ་ལྔ་བཅུའི་རྒས་གཉེར་གདོང་ལ་གྱོན།།

ལག་ཡོང་མེད་པའི་ཁུག་མ་སྐེ་ལ་དཔྱངས།།

ནང་ལ་དཔའ་བའི་ཁྲག་གི་རི་མོ་རྣམས།།

དེ་རིང་མཐོང་དུས་ཨ་ཐང་རྦད་དེ་ཆད།།

ཕ་ལོས་བསྐུར་བའི་ཀོ་ལྷམ་རྐུ་ལ་ཤོར།།

གཞན་གྱིས་སྤྲད་པའི་རས་ལྷམ་རལ་ནས་ཐལ།།

ས་མཐའི་འཚོ་བའི་ཁ་བ་ཧ་ཅང་མཐུག།

ལྡོམ་པོ་བདག་གི་རྐང་བ་གང་དུ་འཇོག།

འབྱོར་བའི་ཁ་སྟབས་འགྲིག་པའི་སྐུ་སྲས་ཚོ།།

གཅིག་བཤར་གཉིས་བཤར་གཞན་སྐད་སློབ་ཏུ་ཐལ།།

ཅི་ཡང་མེད་པ་གསར་འབྱོར་སྤྲང་བོ་དག།

དབྱངས་གསལ་སོ་བཞིའི་རྗེས་ན་ཁྱི་བཞིན་འདུར།།

མཐོ་བོ་དཔོན་ལ་ངོ་སོ་མ་བྱས་ན།།

རྐང་པ་ཡོད་ཀྱང་གོག་ནས་འགྲོ་དགོས་ཤར།།

རྒྱུ་འབྱོར་དབང་དང་མགོ་འདྲེན་སྟོང་བའི་མི།།

མཁས་པ་ཡིན་ཡང་འགྲོ་ལམ་འདི་ན་མེད།།

བག་ཆགས་རྙིང་བའི་སྒྱུ་མ་ནང་ལ་བཤམས།།

ཚན་རྩལ་གསར་བའི་རྙི་ཆེན་མཐའ་ལ་བཙུགས།།

སྤྲེའུ་དང་འུག་པའི་འགྲོ་སྟངས་མི་ཤེས་མཁན།།

ལང་ནས་འགྲོ་བའི་གོ་སྐབས་ནམ་ཡང་མེད།།

སྐུ་ལྕམ་རྒྱག་པའི་སྐུ་ཤ་ཕག་ལྟར་རྒྱས།།

སྲས་མོ་གཡོག་གི་ངོ་གདོང་ཚོན་གྱིས་མཛེས།།

སྤྲང་བོའི་ཕྱུག་མདོག་ངོམས་པའི་རི་གྲོང་ན།།

རང་བྱུང་རང་གིས་གྲུབ་པ་གཅིག་ཀྱང་མེད།།