གཅིག ཆང་ས་དྲ་བའི་བྱུང་རིམ།
བཀུར་འོས་པའི་ཀློག་མཁན་རྣམ་པ། ཚང་མས་ཤེས་གསལ་ལྟར། ད་ལོའི་ཟླ་ ༤ ཚེས་ ༢༠ ཉིན་གཞོན་ནུའི་འགྱུར་ཁུགས་དྲ་བ་ཤར་གཏོང་བྱས་ཤིང་། སྐབས་དེར་ངེད་དྲ་བའི་རྩོམ་སྒྲིག་པས་འདི་ལྟར་བརྗོད་ཡོད་དེ། “གཞོན་ནུའི་འགྱུར་ཁུགས་དྲ་ཚིགས་ནི་སྤྱིར་བཏང་ནས་ཚོད་ལྟ་བྱེད་ཀྱིན་པའི་དྲ་ཚིགས་ཤིག་ཡིན་མོད། ངེད་རྩོམ་སྒྲིག་ཁང་གིས་འབད་འབུངས་དང་ཧུར་ཐག་སྒོས་དྲ་ཚིགས་འདི་སྒེར་གཉེར་དྲ་ཚིགས་ཤིག་ལས་བྱེས་འབྱོར་བོད་མིའི་སྤྱི་ཚོགས་ལ་གལ་ཆེའི་ནུས་པ་འདོན་ཐུབ་པའི་དྲ་ཚིགས་ཤིག་ཏུ་འགྱུར་རྒྱུར་རེ་བ་འཆང་བཞིན་པ་དང་། དེ་ལྟ་བུའི་དྲ་ཚིགས་ཤིག་ཆགས་ཉིན་ད་ལྟའི་དྲ་ངོས་ལས་ཚད་ལྡན་གྱི་དྲ་ངོས་ཤིག་ཏུ་བརྗེ་སྤོར་བྱས་ཀྱང་ཆོག་པས་དེ་ནི་ད་ལྟའི་རྨི་ལམ་ཐན་ཐུན་དང་རེ་བ་རབ་རིབ་ཙམ་ཡིན།” ཞེས་ཟེར་མྱོང་།
འདས་པའི་ཟླ་ངོ་འདི་ཚོར་ངེད་རྩོམ་སྒྲིག་ཚན་ཆུང་གིས་དྲ་བའི་ལས་དོན་གཙོ་སྒྲུབ་བྱས་པ་དང་མཉམ་དུ། གཞོན་ནུའི་འགྱུར་ཁུགས་དམིགས་བསལ་འདོན་ཐེངས་ཚགས་པར་ཡང་དཔར་སྐྲུན་འགྲེམས་སྤེལ་བྱས་པས། ངེད་ཅག་ལ་འཛམ་གླིང་གི་རྒྱལ་ཁབ་སོ་སོ་ན་ཡོད་པའི་ཀློག་མཁན་མང་བོས་ལས་དོན་འདིར་བསྟོད་བསྔགས་དང་མུ་མཐུད་མཇུག་སྐྱོང་དགོས་པའི་རེ་སྐུལ་ནན་གྱིས་བྱས། དེ་ནི་ངེད་རྩོམ་སྒྲིག་ཚན་ཆུང་ལ་མཚོན་ན་སྔར་བས་ཀྱང་གོམ་གང་མདུན་སྤོ་བྱེད་པར་སྐུལ་འདེད་བཏང་བ་དང་མཉམ་དུ། ང་ཚོའི་ལས་དོན་འདིར་རྒྱབ་སྐྱོར་བྱེད་མཁན་གང་མང་ཡོད་པ་ཚོར་བྱུང་ལ། འདིས་སྤྱི་ཚོགས་ལ་གལ་ཆེའི་ནུས་པ་ཐོན་བཞིན་པའང་ཚོར་བྱུང་། དེར་བརྟེན་ང་ཚོ་མུ་མཐུད་དེ་དུས་རབས་རིང་བཞིན་གྱི་ལམ་ཁ་ཞིག་ཏུ་བསྐྱོད་རྒྱུར་སྟ་གོན་བྱས་པ་ཡིན།
ད་ལྟ་ངེད་དྲ་བས་དངོས་སུ་དྲ་བ་འདི་བཞིན་ཚད་ལྡན་གྱི་དྲ་བ་ཞིག་ཏུ་བཟོས་གྲུབ་ཅིང་། དྲ་བྱང་ལའང་ཆང་ས་དྲ་བ་ (www.changsa.net) ཞེས་མིང་བསྒྱུར་བྱས་ཡོད། དེ་ལྟར་མིང་བསྒྱུར་བྱེད་དོན་ཡང་ང་ཚོས་དམིགས་ཡུལ་ཁ་གསལ་བ་དང་གོ་བདེ་བ། ཀློག་མཁན་ལ་རྒན་གཞོན་དང་མཐོ་དམན། ཡིག་རྨོངས་ཡིན་མིན་ལ་ཁྱད་མེད་པར་ཀུན་གྱི་སེམས་སུ་འཇགས་སླ་བ། ད་ལྟའི་སྤྱི་ཚོགས་ཀྱི་ཁ་ཚ་དགོས་གཏུག་གི་སྟོང་ཆ་ཞིག་ཁ་སྐོང་བྱ་རྒྱུ་བཅས་ལ་དམིགས་པས་ཡིན། དཔེར་ན། དྲ་བ་གསར་བ་འདིའི་དཀར་ཆག་གཙོ་བོའི་ནང་དུ་རྩོམ་རིག་དང་འཁྲིག་གཏམ། གླེང་སྟེགས། ལ་གཞས། སྣ་ཚོགས། ཚེ་གྲོགས་འཚོལ་བ། ལུས་རྩེད། ཀློག་འཕྲིན་སོགས་ཆེད་བསྒྲིགས་བྱས་ཏེ། ད་ལྟའི་བོད་ཕྱི་ནང་གི་དྲ་རྒྱ་ཚང་མས་སྙེག་གིན་པའི་ལམ་ཁ་ལས་ལོགས་སུ་བུད་པ་དང་། ད་བར་ལྷག་ལུས་སུ་སོང་བའི་བོད་ཀྱི་སྐད་ཡིག་སྟེང་དང་སྤྱི་ཚོགས་ཀྱི་དགོས་མཁོ་བཅས་ཀྱི་སྟོང་ཆ་འགའ་ཁ་གསབ་བྱས་པ་ཡིན།
གཉིས། དམིགས་འདུན་ཆེ་ཁག
༡ ༽ ང་ཚོས་ཁས་ལེན་རུང་ཆོག་གི མི་ལེན་རུང་ཆོག་གི གང་ལྟར་མིའི་སྤྱི་ཚོགས་ནི་སྣ་མང་རིག་གནས་ཀྱིས་གྲུབ་པ་ཞིག་ཡིན་དགོས་ལ། སྣ་མང་རིག་གནས་དང་ལྷན་དུ་གནས་ཐུབ་པའི་སྐད་ཡིག་ནི་ད་གཟོད་ཚེ་སྲོག་རྒྱུན་རིང་གནས་ཐུབ་པའི་སྐད་ཡིག་དེ་ཡིན་པས་ན། འུ་ཅག་བོད་མི་རིགས་ཀྱི་སྐད་ཡིག་ཀྱང་སྣ་མང་རིག་གནས་ཀྱི་རྨང་ཐག་ལ་འཇུ་ཐུབ་པ་དང་། སྐད་ཡིག་གིས་སྤྱི་ཚོགས་ལ་ཞབས་འདེགས་སྒྲུབ་པ་དང་སྤྱི་ཚོགས་ཀྱིས་སྐད་ཡིག་བཀོལ་སྤྱོད་བྱེད་པའི་གཅིག་ལ་གཅིག་བརྟེན་དང་། གཅིག་ཡོད་ན་གཅིག་འཚོ་ཐུབ་པའི་གནས་ལུགས་དེ་བརྙེད་དགོས། དེར་བརྟེན་ངེད་ཆང་ས་དྲ་བ་གསར་དུ་བྱུང་བ་དེས་བོད་ཀྱི་སྐད་ཡིག་སྟེང་གི་ད་བར་ལྷག་ལུས་སུ་སོང་བའི་སྟོང་ཆ་ཆེན་པོ་ཞིག་བསྐོངས་པ་དང་མཉམ་དུ། དེང་གི་ན་གཞོན་རྣམས་བོད་ཡིག་ལ་མི་དགའ་བའི་སྡུག་སྐད་འདོན་པའི་དུས་རབས་མཇུག་སྒྲིལ་ཐུབ་པ་དང་། ན་གཞོན་རྣམས་ཀྱིས་ནམ་ནམ་ཞར་ཞར་ལ་ཆོས་དང་སྲིད། སྙན་ངག་མཁྲེགས་པོ་དག་ཀློག་སྟེ་བོད་ཡིག་ཟེར་དུས་མགོ་ན་བའི་སྐལ་བའང་མཇུག་བསྡུ་ཐུབ་པར་སྙམ་པའི་སྤོབས་སེམས་ཤིག་ཁུར་ཡོད།
༢ ༽ ད་ལྟ་བསྡད་ཀྱིན་བསྡད་ཀྱིན་བོད་མི་རིགས་ལ་མི་འབོར་གྱི་འཇིག་ཉེན་ཞིག་ཡོང་གི་ཡོད་ལ། དེ་ནི་རྒྱ་ནག་གི་འཆར་ལྡན་བུ་སྐྱེས་སྲིད་ཇུས་ལས་ཀྱང་དུས་རབས་འདིའི་མིའི་བསམ་བློར་འགྱུར་བ་ཐེབས་ཏེ། བུ་ཕྲུག་མང་ན་དཀའ་ཁག་ཆེ་བ་དང་བཟའ་ཚང་གཅིག་ལ་ཁེན་ས་རྟེན་སའི་བུ་ཕྲུག་གཅིག་གི་ཆོག་པའི་བསམ་བློ་དེ་ཡིན་ཐོག སྐྱབས་བཅོལ་གྱི་འཚོ་བའི་མནར་གཅོད་འོག་ཏུ་བྱེས་སྡོད་བོད་མི་འབུམ་གཅིག་ཙམ་པོ་ཡང་། འཛམ་གླིང་གི་ཤར་ལྷོ་ནུབ་བྱང་གང་སར་འཐོར་ནས་ཡོད་ལ་འཚོ་བ་དང་ཁོར་ཡུག གནས་བབ། ལས་ཀ་བཅས་ཀྱི་དབང་གིས་ཕན་ཚུན་ལ་འབྲེལ་འདྲེས་དང་འགྲོགས་འདྲེས་བྱེད་པའི་གོ་སྐབས་ཕྲ་བས་ན། ང་ཚོས་མི་འབོར་གྱི་འཇིག་ཉེན་ལ་ཁྲ་ཆུང་མིག་གིས་བལྟས་བལྟས་སུ་སྡོད་མ་བཟོད་པར། མ་མཐར་ཡང་ལོ་གཅིག་གི་ནང་དུ་བཟའ་ཚང་གཉིས་གསུམ་རེ་ཕན་ཚུན་ལ་ངོ་སྤྲོད་བྱེད་ཐུབ་ནའང་། དེ་ནི་རྒྱལ་ཁ་ཞིག་ཏུ་བརྩི་འདོད་པས་ཚེ་གྲོགས་འཚོལ་བའམ། གཉེན་སྒྲིག་ཁང་ཞེས་པ་གོ་སྒྲིག་བྱས་པ་ཡིན།
༣ ༽ ཡང་བོད་ཕྱི་ནང་གཉིས་ན་དེང་སྐབས་བཟའ་འཐོར་དུ་འགྲོ་བའི་ན་གཞོན་ཇེ་མང་དུ་འགྲོ་བ་ལས་ཇེ་ཉུང་དུ་འགྲོ་གིན་མེད་མོད། དེའི་སྐོར་ལ་ཞིབ་དཔྱོད་དང་དེའི་མཇུག་འབྲས་ལ་མནོ་བསམ་གཏོང་མཁན་ནི་བྱུང་མེད་ཚོད་རེད། ངེད་དྲས་བས་བཟའ་འཁོན་སྐོར་གྱི་ལམ་རིམ་ཞེས་པ་ཞིག་ཆེད་བསྒྲིགས་བྱས་ཏེ། བཟའ་ཟླ་ཕོ་མོའི་ནང་ཁུལ་དུ་བཟའ་འཁོན་བྱུང་སྐབས་ངེད་དྲ་བར་ཡིག་ཐོག་ནས་དྲི་བ་དྲིས་ན་དེ་ལ་ལན་འདེབས་རྒྱུའི་ལས་རིམ་ཞིག་བསྒྲིགས་པ་ཡིན་ལ། དེ་ལྟར་བྱས་པས་བཟའ་འཁོན་ཇེ་ཉུང་དང་བཟའ་འཐོར་ཇེ་ཉུང་དུ་འགྲོ་སྲིད་པའི་སྟོང་བསམ་ཞིག་ཀྱང་བཅངས་ཡོད། ཡང་གཅིག་བཤད་ན་འདིའི་རིགས་བོད་ཀྱི་སྐད་ཡིག་སྟེང་དང་བོད་མིའི་སྤྱི་ཚོགས་ཁྲོད་བྱུང་མེད་པ་ཙམ་ལས་སྔོན་ཐོན་མི་རིགས་ཚང་མར་འདུག་པས་ང་ཚོ་ཡང་གོམ་གམ་མདུན་སྤོ་བྱས་ན་འགྲིག
༤ ༽ ང་ཚོས་ལུས་རྩེད་ལེ་ཚན་ཞིག་གོ་སྒྲིག་བྱས་ཡོད་ཅིང་། ད་ལྟའི་བར་བོད་རིགས་གཞོན་སྐྱེས་མང་བོ་ཞིག་བོད་ཡིག་ལ་མི་དགའ་བའི་རྒྱུ་མཚན་ཕུགས་དེད་ན་ཁོང་ཚོ་ལ་ཁོང་ཚོའི་ཀློག་ན་འདོད་པ་དང་། ཁོང་ཚོའི་དགའ་ཕྱོགས་ལྟར་གྱི་བོད་ཡིག་གི་དྲ་དེབ་ཚགས་གསུམ་ཉུང་བས་རེད་འདུག་ལ། གལ་སྲིད་དེང་སྐབས་ཀྱི་གཞོན་སྐྱེས་རྣམས་ཀྱིས་ཆེས་དགའ་མོས་བྱེད་པའི་རྐང་རྩེད་སྤོ་ལོ་རྩེད་མཁན་བྷེ་ཁེམ་དང་རོ་ནུའི། རོ་ནལ་ཌོ ལྟ་བུ་དག་དང་ལག་རྩེད་སྤོ་ལོ་རྩེད་མཁན་ཀོ་བྷེ་བྷུ་རན་དང་རྗེམ་སུ། རྗོར་ཌན། ཨེ་ཝར་སོན་ལྟ་བུ་སོགས་ཀྱི་ལོ་རྒྱུས་དང་། འཛམ་གླིང་གི་རྩེད་མོ་གྲགས་ཅན་ཨོ་ལིམ་པིག་དང་རྒྱལ་སྤྱིའི་རྐང་རྩེད་སྤོ་ལོའི་རྩེད་འགྲན། ཨ་རིའི་ཨེམ་བྷེའི་ཨེ། རྒྱ་གར་གྱི་དབྱུག་རྩེད་སྤོ་ལོ་སོགས་རྒྱལ་སྤྱི་རང་བཞིན་གྱི་རྩེད་མོ་དག་དང་མཉམ་དུ་བྱེས་སྡོད་བོད་མིའི་ས་གནས་ཁག་ཏུ་ལོ་ལྟར་རྩེད་འགྲན་བྱེད་ཀྱིན་པའི་རྐང་རྩེད་སྤོ་ལོའི་འགྲན་བསྡུར་དང་། ལག་རྩེད་སྤོ་ལོའི་འགྲན་བསྡུར་རིགས་བོད་ཡིག་ཏུ་བསྡབ་སྟེ་དྲ་དེབ་ཚགས་གསུམ་གཉེར་ཐུབ་ན་དགེ་མཚན་བླ་ལྷག་ཏུ་མཐོང་གི་ཡོད་ལ། འདིས་ཀྱང་བོད་ཀྱི་སྐད་ཡིག་འདི་བཞིན་མར་དམའ་སར་བབས་ཏེ་དུས་རབས་འདིའི་གཞོན་སྐྱེས་རྣམས་དང་ཁ་ཐག་ཇེ་ཉེར་བཏང་བ་ཞིག་ཏུ་མི་བརྩི་རང་བརྩི་ཡིན།
༥ ༽ དེ་བཞིན་ང་ཚོས་འབད་བརྩོན་ཡུན་རིང་བྱས་མཐར་ངེད་དྲ་བའི་སྟེང་དུ་གླེང་སྟེགས་ཤིག་བསྐྲུན་ཐུབ་པ་བྱུང་ཡོད་ལ། དེའི་ནང་དུ་གཙོ་བོ་སྤྱི་ཚོགས་འཚོ་བའི་སྐྱེས་ཕོ་མོ་རྣམས་ཀྱིས་རང་རང་གི་ཉིན་རེའི་འཚོ་བ་དང་། བཟའ་ཟླའི་རྒྱུན་ཤེས་སྐོར། བཟའ་ཚང་མཆམ་མཐུན་སྐོར། ན་གཞོན་རྣམས་ཀྱི་བརྩེ་དུང་སྐོར་སོགས་གླེང་རྒྱུ་ལས་ཆོས་དང་སྲིད། སྤྱི་ཚོགས་ཀྱི་རྩོད་ཉོག་རིགས་གླེང་འཇུག་གི་མིན། དེ་ལ་ནང་དོན་གཞན་ཅི་ཡང་མེད་པར་ཆོས་དང་སྲིད། སྤྱི་ཚོགས་ཀྱི་ཉོག་འཛིང་བཅས་ཀྱི་སྐོར་ནས་ང་ཚོ་ལ་གླེང་སྟེགས་སམ་དྲ་རྒྱ་མང་བོ་ཡོད་པས་དེས་འཐུས་པ་བྱས་ཡོད།
༦ ༽ དེ་མིན་རྩོམ་རིག་དང་ལ་གཞས། འཁྲིག་གཏམ། ཀློག་འཕྲིན་སོགས་ཀྱང་ངེད་དྲ་བས་ལས་དོན་གལ་ཆེའི་རིགས་ཡིན་ལ། ལེ་ཚན་འདི་དག་ཐད་ཀར་ཀློག་མཁན་དང་། རྩོམ་པ་པོ་དག་དང་འབྲེལ་བ་དམ་ཟབ་ཡོད་དེ་ཀློག་མཁན་དང་རྩོམ་པ་པོ་རྣམས་ཀྱི་རྒྱབ་རོགས་མེད་ཚེ་ངེད་ཅག་ལ་སེམས་ཤུགས་ཡོད་ཀྱང་ཟུངས་ཤུགས་མེད་པའི་དཀའ་ངལ་འབྱུང་སྲིད་ལ། མདུན་ལམ་ཡོད་ཀྱང་རྒྱབ་རོགས་མེད་པའི་དཀའ་ངལ་འཕྲད་སྲིད་པས་ན། ད་གཟོད་ང་ཚོའི་ལས་དོན་ཆེ་མ་ཆུང་གསུམ་གང་ཡིན་རུང་ཀློག་མཁན་དང་རྩོམ་པ་པོ་དག་གལ་ཆེན་དུ་འཛིན་གི་ཡོད་པར་མ་ཟད། ཁོང་ཚོ་ཡོད་པས་ན་ང་ཚོ་ཡང་འདི་ལྟར་བགྲོད་ལམ་གསར་བ་ཞིག་ཏུ་བསྐྱོད་མགོ་བརྩམས་པ་ཡིན།
གསུམ། མཇུག་གི་སྐད་ཆ་ཚིག་འགའ།
ད་ལྟ་སྤྱི་ཚོགས་ནང་ངེད་ཅག་གི་ལས་དོན་འདིར་ལྡོག་ཕྱོགས་ནས་ལྟ་མཁན་ཡང་མང་དག་ཅིག་ཡོད་པར་མ་ཟད། འདས་པའི་ཟླ་ངོ་འདི་ཚོར་ངེད་ཚོར་དངོས་ཤུགས་བརྒྱུད་གསུམ་ནས་གནོན་ཤུགས་ཀྱང་སྣ་ཚོགས་བྱས་བྱུང་། ཡིན་ནའང་། ང་ཚོས་གུ་ཡངས་དང་དཀྱེལ་ཡངས་ཀྱི་སྒོ་ནས་ཁོང་ཚོའི་བསམ་ཚུལ་ལ་བརྩི་བཀུར་བྱེད་ཀྱིན་ཡོད། གཅིག་བྱས་ན་ང་ཚོས་མདུན་སྐྱོད་འདི་བོད་སྤྱི་ཚོགས་ལ་མཚོན་ན་ཧ་ཅང་གི་གློ་བུར་བ་ཞིག་ཡིན་སྲིད་ལ། མང་མང་ཞིག་ལ་ང་ཚོས་འགུལ་སྐྱོད་འདིས་ཕོག་ཐུག་ཀྱང་བཟོས་ཡོད་སྲིད་མོད། ང་ཚོ་དུས་རབས་ཀྱིས་འདེད་ཀྱིན་པ་དང་ང་ཚོ་ཡང་དུས་རབས་ཀྱི་འགྱུར་འགྲོས་དང་བསྟུན་ནས་མདུན་སྐྱོད་བྱེད་དགོས་པས་ན། ལས་དོན་འདིའི་རིགས་ང་ཚོས་འགོ་མ་བརྩམས་ཀྱང་ནམ་ཞིག་གཞན་ཞིག་གི་འགོ་རྩོམ་གི་རེད། གང་ལྟར་ང་ཚོས་སྤྱི་ཚོགས་ཀྱི་ལབ་གླེང་བཟང་ངན་གཉི་ག་དང་ངེད་ཅག་གི་ལས་དོན་འདིའི་དགེ་སྐྱོན་གཉི་ག ད་ལྟ་དང་གཞུག་ཕྱོགས་ཏེ་འཕྲལ་ཕུགས་གཉི་ལ་བསམ་བློ་ཞིབ་མོར་བཏང་རྗེས། ད་ནས་བཟུང་ངེད་དྲ་བར་ཞུགས་མཁན་ལ་བེད་སྤྱོད་སྒྲིག་གཞི་ཚུན་ཆད་བཟོས་ཡོད་ལ། རྒྱལ་སྤྱིའི་ཁྲིམས་དང་མཐུན་པའི་སྒོ་ནས་དང་མདུན་སྐྱོད་ཀྱི་གོམ་པ་བརྟན་པོའི་ངང་ནས། ཡང་ན་ཐུང་མོང་གི་འདོད་བློ་ཁེངས་པ་ཞིག་གི་ཕྱོགས་སུ་འབད་བརྩོན་བྱས་དང་བྱེད་མུས་ཡིན།
ཡིན་ནའང་། འཇིག་རྟེན་གྱི་བྱ་བ་གང་ཞིག་ཡིན་རུང་ལེགས་ཉེས་གཉིས་ཡོད་པ་ལྟར་སྤྱི་ཚོགས་ཀྱི་མི་རྣམས་ལའང་བསམ་ཚུལ་བཟང་ངན་གཉི་ག་ཡོད་ཆོག་པས། ང་ཚོའི་ལས་དོན་ལ་རྒྱབ་སྐྱོར་བྱེད་མཁན་དང་ལྡོག་ཕྱོགས་ནས་ལྟ་མཁན་གཉིས་བསྡུར་ན་རྒྱབ་སྐྱོར་བྱེད་མཁན་མང་བ་མིག་མཐོང་ལག་ཟིན་ཏུ་གྱུར་ཡོད་པས། ང་ཚོ་མུ་མཐུད་དེ་མདུན་སྐྱོད་བྱ་རྒྱུ་ལས་ཕྱིར་ནུར་མི་བྱེད་པའི་དམ་བཅའ་བརྟན་པོ་བཅངས་ཡོད། །
ངེད་རྩོམ་སྒྲིག་ཚན་ཆུང་གིས་ཕྱི་ལོ་ ༢༠༡༡ ལོའི་ཟླ་ ༩ ཚེས་ ༡ ཉིན།
གསར་འགྱུར་ལ་གཟིགས་ན་འབྲེལ་ཐག་འདིར་ནོན།
དྲ་གྲོགས་ལགས། འབྲེལ་ཐག་འདིར་ནོན་ཟེར་བ་གང་ཞིག་ལ་གནོད་དགོས་རེད། ཕལ་ཆེར་དེ་ན་ལྟད་མ་འདྲ་ཞིག་ཡོད་ས་རེད། ཧཧཧ
ཁོ་བོའི་རེ་བ་ལ། ཆང་ས་དྲ་རྒྱ་འདིའི་བརྒྱུད་ནས་བོད་མིའི་སྤྱི་ཚོགས་ནང་དུ་འབྲེལ་འཐུད་འགྱུར་བྱེད་ཅིག་ཏུ་གྱུར་པ་ལས་འགལ་ཟླ་འགྲོ་གཞི་དང་འབྲེལ་མཐུད་གཅོད་བྱེད་གཅིག་ཏུ་མི་འགྱུར་བའི་རེ་བ་ཡོད། འདི་ནི་གཙོ་བོ་རྩོམ་སྒྲིག་པ་རྣམས་ཀྱི་དྲང་པོ་དང་ཕྱོགས་ལྷུང་མེད་པ། ལྷག་བསམ་རྣམ་དག་གི་ཕྱག་ལས་ལ་རག་པ་ཡིན། མ་གཏོགས་གཞིས་ཆགས་ནས་འཚར་ལོངས་བྱུང་བ་རྣམས་ཀྱི་གྲ་མི་འགྲིག་པའི་གནས་སྟངས་ཤ་སྟག་གིས་བཀང་བ་ཡིན་ན་ཁ་ཕྱོགས་གང་འདྲ་ཞིག་ཏུ་འགྱུར་གྱི་ཡོད་མེད་བལྟ་དགོས། དཔེར་ན། ཨ་རིག་འགྱུར་མེད་ཀྱི་སྔ་ཕྱི་རྩོམ་མང་ཆེ་བ་ནི་དེ་འདྲའི་རིགས་ཤ་སྟག་འདྲ་ཞིག་མཐོང་གིན་འདུག འདི་ནི་གཟབ་དགོས་པའི་གནད་དོན་ཞིག་ཡིན།
བོད་ཡིག་ལ་དགའ་བའི་གཞོན་སྐྱེས་ཚོ། བོད་ཡིག་སྤྱི་ཚོགས་ལ་ཐིམ་སུ་འཇུག་འདོད་པའི་གཞོན་སྐྱེས་ཚོ། བོིད་ཡིག་གི་ཁྱབ་ཁོང་མཐའ་མེད་དུ་སྤེལ་འདོད་པའི་གཞོན་སྐྱེས་ཚོ། བོད་ཡིག་གི་བེད་སྤྱོད་གོང་མཐོར་གཏོང་འདོད་པའི་གཞོན་སྐྱེས་ཚོ། གནའ་དེང་ཟུང་གི་ཤེས་ཡོན་ལ་འཇུག་པའི་གཞོན་སྐྱེས་ཚོ། ཁྱོད་ཚོའི་བྱ་བཞག་རྣམ་པར་རྒྱལ་བར་སྨོན། ཁྱེད་ཚོས་མདུན་ལམ་འོད་དང་ལྡན་པར་སྨོན། དུས་དང་རནམ་པ་ཀུན་ཏུ་འདི་ཕྱོགས་ཀྱི་གཞོན་སྐྱེས་ཚོའི་ངོས་ནས་རྒྱབ་སྐྱོར་གཙང་མ་ཡོད་དོ།།