ཅིའི་ཕྱིར་མི་རྒས་ཀྱི་ཡོད་དམ།

ཚེ་བརྟན་བཀྲ་ཤིས་ཀྱིས་དབྱིན་ཡིག་ནས་བསྒྱུར།

 
ལོ་རེ་རེ་བཞིན་མི་ཚང་མ་རྒས་ཀྱི་ཡོད། གོ་ལ་འདིའི་སྟེང་དུ་མི་ཚང་མས་རང་ཉིད་ཚེ་རིང་བོ་ཞིག་ཡོང་རྒྱུར་སྨོན་པ་མ་ཟད། སུ་ཞིག་གིས་ཀྱང་རང་ཉིད་རྒས་ན་མི་བསམ། འོན་ཀྱང་མིའི་རེ་འདོད་དེ་ནི་གང་གིས་ཀྱང་སྐང་མི་ནུས་པ་ཞིག་རེད། རྒས་པ་ནི་རང་བྱུང་གི་རྒྱུད་རིམ་ཞིག་ཡིན་པས། དེ་ནི་མི་ཐོག་མར་སྐྱེས་པ་ནས་རང་བཞིན་གྱིས་འགོ་བཙུགས་ཏེ་མི་ཚེ་ཡོངས་རྫོགས་ལ་མཚམས་མི་འཇོག

མི་འཚར་ལོང་བྱུང་པའི་སྐབས་སུ་རང་བྱུང་གི་འགྱུར་བ་དེ་གཟུགས་པོའི་ནང་དུ་འབྱུང་གི་ཡོད་པས། འགྱུར་ལྡོག་འདི་ནི་ཕྱིར་ཟློག་བྱེད་མི་ཐུབ་པ་མ་ཟད། མཚམས་འཇོག་ཀྱང་བྱེད་མི་ཐུབ་པ་ཞིག་རེད། ལོ་ན་རྒན་པ་ནི་རང་བྱུང་གི་འགྱུར་པའི་རྒྱུད་རིམ་མཐའ་མ་དེ་ཡིན།

ཁྱེད་ཀྱིས་ལོ་ན་རྒས་པ་ལ་བརྟེན་ནས་ལུས་ཕུང་གི་ནང་དུ་རང་བྱུང་འགྱུར་བ་ཅི་ཞིག་འགྲོ་གི་ཡོད་པ་ཤེས་ཀྱི་ཡོད་དམ། རང་བྱུང་གི་འགྱུར་འགྲོས་ནི་མི་རྒན་པ་དང་བྱིས་པ་གཉིས་བསྡུར་ན་བྱིས་པའི་གཟུགས་པོའི་ནང་དུ་ཧ་ཅང་མགྱོགས། གཟུགས་པོའི་འགྱུར་འགྲོས་དལ་བར་འགྲོ་བའི་སྐབས་སུ་མིའི་སྟོབས་ཤུགས་དང་ཚོར་བ་སྐྱེན་པོ་ཡང་ཇེ་ཞན་དུ་འགྱུར།འདི་ནི་གཟུགས་པའི་ནང་དུ་སྤྲི་དཀར་གྱི་ཚད་ཉུང་དུསོང་བའི་རྐྱེན་གྱིས་རེད།

འཇུ་ཁུའི་ནང་གི་འགྱུར་བ་དེས་ལོ་ཡི་ཚད་ལ་ཡང་ཤུགས་རྐྱེན་ཐེབས་ཀྱི་ཡོད། གཟུགས་པོའི་བྱེད་ལས་ཉུང་རུ་སོང་བ་དང་བསྟུན་ནས་མིའི་ལྗིད་ཚད་དང་མིག་གི་མཐོང་ཚད་ཡང་སྐྱོ་རུ་འགྲོ་མ་ཟད། སྐྲའི་ཁ་དོག་དཀར་པོར་གྱུར་ནས་མཐར་རིམ་བཞིན་མགོ་ནས་སྐྲ་ཤུད་འགྲོ།

དེ་དག་ཚང་མ་ནི་ལོ་རྒས་པའི་རྟགས་མཚན་རེད། ལོ་ན་རྒས་སྐབས་སུ། འགྱུར་བ་ནི་གཟུགས་པོའི་སྦུབས་ཕྲན་དང་ཕུང་གྲུབ་ནང་འབྱུང་གི་ཡོད། མཁལ་མ་དང། མཆིན་པ། རྒྱུ་མ་སོགས་ཀྱི་སྦུབས་ཕྲན་གྱི་ནུས་པ་ཡང་དེའི་སྐབས་སུ་ཇེ་ཞན་དུ་འགྲོ།

ཁྲག་རྩ་ཡུན་རིང་འགོར་ཚེ། ཁྲག་རྩས་ལུས་པོའི་ཆ་ཤས་ཡོད་ཚད་ལ་འདང་བའི་ཁྲག་དང་འཚོ་བཅུད་གཞན་རྣམས་སྐྱེལ་སྤེལ་བྱེད་མི་ཐུབ། དེའི་མཇུག་འབྲས་སུ་ལུས་པོ་མགྱོགས་པོར་རྒས་ཀྱི་ཡོད། ན་ཚོད་རྒས་བཞིན་པའི་སྐབས་སུ་མིག་གཉིས་དང་། རྣ་བ་གཉིས། པགས་པ། སོ། མེ་དྲོད་སོགས་ཚང་མ་ནུས་པ་ཆུང་དུ་འགྲོ་རུ་ཡོད་པ་མ་ཟད། ཁྲག་གི་རྒྱུ་ཚད་དེ་ཡང་རྒྱུན་ལྡན་མ་ཡིན་པར་གྱུར་བ་དང་། གཟུགས་པོའི་ནང་གི་དོན་ལྔ་སྣོད་དྲུག་གཙོས་གཟུགས་པོའི་ཆ་ཤས་དག་གིས་ཀྱང་ལས་ཀ་བྱེད་པའི་ཤུགས་ཆུང་རུ་སོང་ཏེ། མཐར་ཚེ་ཡི་འཕེན་པ་རྫོགས་འགྲོ།

མི་རེ་རེ་ཡི་ལོ་ཚོད་རྒས་སྟངས་མི་འདྲ་ན་ཡང་ཚང་མ་ལོ་ན་རྒས་པ་དེ་ལས་ནམ་ཡང་འདའ་ཐབས་མེད། འདི་ནི་རང་བྱུང་གི་འགྱུར་བ་ཡིན་པས་སུ་དང་གང་གིས་ཀྱང་ཟློག་མི་ཐུབ། གང་ལྟར་། ཟས་ཀྱི་འཚོ་བཅུད་ཅན་དང་། ཁོར་ཡུག་གཙང་མ། རྒྱུན་ལྡན་གྱི་ལུས་རྩལ་སོགས་ཀྱིས་རྒན་པ་ཚོར་གནོད་ཚབས་ཅན་གྱི་ཤུགས་རྐྱེན་དག་ཅུང་མེད་པར་བཟོ་ཐུབ།

[མཆན] Culmination  མཐར་ཐུག་གམ་ཡང་རྩེ།
biological change   རང་བྱུང་འགྱུར་བ།
biological process   རང་བྱུང་འགྱུར་འགྲོས།
nutrient    འཚོ་བཅུད།
Digestion   གཟུགས་པོའི་མེདྲོད།
deleterious   གནོད་ཚབས་ཆེ་བའི།