ངས་འདི་ལྟར་འདོད།

རེབ་ཐོག་མདའ།
སྨྱུག་གུ་ལག་ཏུ་བཟུང་བའི་བསམ་བློའི་སྦུག་ན།།
དབྱངས་ཅན་ལྷ་མོའི་འཛུམ་ཆུང་ལྷུག་ལྷུག་བཞད་ན།།
དེབ་ཆུང་མིག་གིས་འཚོ་བའི་ཉིན་མཚན་བར་ནས།།
མི་སེམས་རྨང་ནས་འཕྲོག་པའི་རྩོམ་ཞིག་འབྲི་འདོད།།

རིག་གནས་ཆེ་ཆུང་གཞུང་ལ་རྒྱུས་མངའ་ཟབ་པས།།
འཇམ་དབྱངས་དགྱེས་པའི་བློ་དེ་ཅུང་ཙམ་སྩལ་ན།།
ཚ་བོ་ཚ་མོའི་མི་རབས་རྗེས་མ་ཞིག་ལ།།
སེམས་པ་དྲོན་མོ་ཞིག་གི་ལག་རྗེས་འཇོག་འདོད།།

ཕྱི་ནང་སྐད་རིགས་རྟོགས་པའི་རྣམ་དཔྱོད་ཡོད་ན།།
ཕྱི་ཡི་རིག་གཞུང་རང་རིགས་སྡེ་ལ་བསུས་ནས།།
ཕྱི་ནང་མི་རིགས་རྒྱུད་ལ་ཀ་ཁའི་ས་བོན།།
རང་གི་ནུས་པས་ཅུང་ཙམ་འཇོག་ན་བསམ་ཡོད།།

ཉིན་མཚན་འདུ་ལ་བྲེལ་བའི་འཚོ་བའི་ཀློང་ན།།
རང་གཞན་ཀུན་ལ་ཕན་པའི་བདེ་བ་ཡོད་ན།།
རྒྱུ་འབྲས་ཐོད་ལ་བཀོད་པའི་གནམ་གྱི་བཀའ་ཆད།།
འཁོར་བའི་གྲོང་ཚོ་འདི་ནས་འཁུར་དགོས་མི་འདུག།

བུ་མོའི་སྙིང་ལ་བརྐོས་པའི་རི་མོའི་རྒྱབ་ན།།
ལྷད་མེད་བརྕེ་བ་ཞིག་གི་ཁ་དོག་ཡོད་ན།།
མི་ཚེ་ཐུང་ཐུང་འདི་ཡི་ལོ་ཟླའི་འཁོར་སྐྱོད།།
ཀྱག་ཀྱོག་མི་ཚེའི་མདུད་པ་གཅིག་ཏུ་རྒྱག་བསམ།།

དུས་བཞིའི་སྣེ་མོར་བབས་པའི་འཚོ་བའི་ཀློང་ན།།
དྲང་མོའི་ངག་ལ་བཅོལ་བའི་སེམས་ཞིག་ཡོད་ན།།
ཞེན་པ་དཀར་པོའི་ལག་ཟུང་གཅིག་ཏུ་སྦྲེལ་ནས།།
ཕྲག་དོག་དུག་གི་མདའ་ཁ་གཞན་ལ་གཏད་ན།།

ངོ་གདོང་མཆི་མས་བརླན་པའི་མིག་ཆུའི་རྗེས་ན།།
དམ་བཅའ་མནའ་ཡིས་མནན་པའི་ཚིག་རྔ་དེ་ན།།
རང་དབང་ཁོར་ཡུག་ཞིག་གི་བསམ་བློ་ཡོད་ན།།
ན་ཟུག་རུམ་གང་འཁུར་བཞིན་འཛུམ་ཀྱིས་བསུས་ཆོག།

རི་དང་གཙང་པོ་བརྒལ་བའི་ལས་དབང་སྣེ་ནས།།
ཕ་ས་ཕ་ཡུལ་བོར་བའི་ན་ཟུག་ལྕི་ཡང་།།
དུས་ཀྱི་འཁོར་ལོས་བསྐོར་བའི་ཉིན་མཚན་བར་ནས།།

རིག་པའི་གནས་ལ་བརྩོན་བཞིན་འཚོ་ན་བསམ་ཡོད།།

མཁས་པའི་ཆོ་ལོའི་མིང་གི་རྒྱན་དེ་མི་མཁོ།།
རྒྱུ་འབྱོར་ལོངས་སྤྱོད་འཛོམས་པའི་ཤོམ་དེ་མི་དགོས།།
རང་ལ་ཡོད་པའི་མི་ཚེ་ཐུང་ཐུང་འདི་ལ།།
རང་གཞན་ཀུན་ལ་ཕན་པའི་དོན་ཅིག་འཁྱོངས་ན།།

དཀོན་མཆོག་རྣམ་གསུམ་ཕན་ནས་སྐྱབས་གཞན་མི་མཁོ།།
རྒྱལ་བ་ཡབ་སྲས་གཉིས་ལས་མགོན་གཞན་མི་དགོས།།
བོད་པ་གཙང་མ་ལས་ལྷག་བརྕེ་བ་མི་མཁོ།།
དེབ་དང་སྨྱུ་གུ་མ་གཏོགས་འགྲོག་རོགས་མི་མཁོ།།

དགྲ་ཞེས་སྡང་བའི་སེམས་ལ་ན་ཟུག་མི་མཁོ།།
གྲོགས་ཞེས་དུངས་པའི་སེམས་ཀྱི་བསླུ་འདོད་མི་མཁོ།།
གང་ཡང་མི་མཁོ་ང་ནི་འཚོ་བའི་ཀློང་ནས།།
ཉམ་ཆུང་འཚོ་བ་ཞིག་གིས་དེ་བས་ཆོག་ག།
ཕྱི་ལོ ༢༠༡༣ ལོའི་ཟླ ༦ ཚེས ༡༨ ཉིན་དཔེ་མཛོད་ནས་བྲིས།