སྐར་རྩིས་པ། ལ་སྟོད་ཤེལ་དཀར་ལྷ་དབང་ཚེ་རིང་།
ཨོཾསྭསྟི། རྗེ་བཙུན་འཇམ་དཔལ་དབྱངས་ལ་ཕྱག་འཚལ་ལོ། །ཞེས་མཆོད་པར་བརྗོད་ནས་འདིར་བཤད་གཞི་གཙོ་བོ་ནི། ངན་པ་དགུ་འཛོམས་ཀྱི་སྐོར་ཏེ། དེ་ཡང་དང་པོ་ཡོངས་གྲགས་བོད་ཟླ་༡༡ ཚེས་༦ ཉིན་ནི་བོད་མིའི་སྤྱི་ཚོགས་ནང་དུས་ཚོད་ངན་པ་དགུ་འཛོམས་ཞེས་ཡོངས་སུ་གྲགས་ཤིང་། རང་རེ་བོད་མི་རྣམས་ཀྱིས་དེ་ཉིན་གལ་ཆེའི་ལས་མ་བྱེད་པར་དུས་ཚོད་ངན་པ་ཞིག་ཏུ་ངོས་འཛིན་གྱིས། དེ་ལ་ཁྱད་གསོད་ཆེད་དུ་ནང་དུ་དགའ་ཉེ་ངོ་འཛོམས་ཐོག་སྤྲོ་སྐྱིད་གཏོང་བ་དང་།
སང་ཉིན་དེར་ངན་པའི་ལྡོག་ཕྱོགས་བཟང་པོ་བཅུ་འཛོམས་ཞེས་ངན་པ་ལས་ལྷག་པའི་བཟང་པོར་ངོས་བཟུང་ནས་མུ་མཐུད་སྤྲོ་སྐྱིད་གཏོང་བ་དང་། དེ་ལ་དམངས་ཀྱི་ངག་སྒྲོས་སུ་ཁྱེད་ངན་པ་དགུ་འཛོམས་ན། ང་བཟང་པོ་བཅུ་འཛོམས་ཞེས་ཤོད་སྲོལ་ཡོད།
གཉིས་པ་རྩིས་རིག་པའི་ངོས་ནས་བཤད་ན། ངན་པ་དགུ་འཛོམས་ཞེས་པ་ནི་ལོ་གཅིག་ནང་ཟླ་བ་བཅུ་གཉིས་ཡོད་ཁོངས་ནས་བོད་ཟླ་༡༡ ཚེས་༦ ཉིན་ཡིན་པ་དང་། ཟླ་བ་དེ་ཡང་ནག་རྩིས་ལུགས་ཁོ་ནའི་ཟླ་བའི་ཐོག་མ་དཔྱིད་ཟླ་ར་བ་སྟེ་སྟག་གི་ཟླ་བའི་ཚེས་༦ ཉིན། ཉི་མ་ནག་ཆེན་ཞེས་པ་དེ་ཡིན་ལ།དེ་ལོའི་ཐོག་མ་སོང་བས་ངན་ཆེ་བར་གསུངས་པ་ལས་གཞན་ད་དུང་ཡང་ཟླ་བ་རེ་རེ་ལ་ཉི་ནག་རེ་འཆར་བས་ལོ་གཅིག་ནང་ཉི་ནག་བཅུ་གཉིས་ཡོད།
གསུམ་པ་དེ་ལྟར་རྒྱུ་མཚན་མདོར་བསྡུས་ཤིག་ཞུས་ན། སྡེ་སྲིད་སངས་རྒྱས་རྒྱ་མཚོའི་གསུང་རྩིས་གཞུང་བཻ་དཀར་ནང་ལེའུ་༣༡ པ་ས་བདག་ལེའུའི་ནང་ཚེས་ལ་རྒྱུ་བའི་ས་བདག་བསྟན། དེ་ལ་རྩ་ཚིག་ཏུ། ཉི་མ་ནག་ཆེན་ཞེས་གྲགས་པ། །ཡ་བདུད་རྡོ་རྗེ་གློག་ཕྲེང་དང་། །ས་སྲིན་འབར་མ་བྱ་བ་ལ། །བུ་ནི་རཱ་ཧུ་ལ་ཞེས་དང་། །བུ་མོ་འབྲོག་སྲིང་ཆུ་སྲིན་གདོང་། །དེ་འོག་སྟག་སྲིང་ཟོར་གདོང་དང་། །དེ་འོག་ཀོང་སྲིང་བ་ལང་གདོང་། །ཆུང་བ་བམ་སྲིང་འདྲེ་གདོང་བཞི། །ཞེས་ནག་རྩིས་རང་ལུགས་སུ་བྱུང་བའི་ཐོག་མར་སྲིད་པ་ཆགས་པའི་དུས་སུ་སྲིད་པའི་ལྷ་ཆེན་སྡེ་བརྒྱད་རིམ་བཞིན་བྱུང་བའི་སྐབས་གོང་འཁོད་ས་བདག་ཕ་ཡ་བདུད་རྡོ་རྗེ་དང་། མ་ས་སྲིན་འབར་མ་གཉིས་འདུས་པ་ལས་བུ་ཚ་མིང་སྲིང་ལྔ་བྱུང་བའི་ཁོངས་ནས། བུ་ཆེ་བ་རཱ་ཧུས་རི་རབ་ལ། གཡས་བསྐོར་གྱིས་བུ་མོ་ཆུང་བ་བམ་སྲིད་འཚོལ་དུ་ཕྱིན་པར། བམ་སྲིང་གཡོན་སྐོར་བས། དཔྱིད་རའི་ཚེས་བདུན་ཉིན་མནོལ་ཤོར་དུས། ཞེས་ཁོང་སྤུན་གཉིས་དཔྱིད་ར་སྟེ་སྟག་གི་ཟླ་བའམ། ཡོངས་གྲགས་བོད་ཟླ་༡༡ ཚེས་༧ ཉིན་ཕན་ཚུན་སྤུན་ངོ་མ་ཆོད་པར་མནོལ་ཤོར་ཞེས་པར། འདོད་པ་སྤྱད་པས་མནོལ་བཙོག་དེས་རྐྱེན་བྱས་ནས་འབྲས་བུའི་ཐ་སྙད་དུ། ངན་པ་དགུ་འཛོམས་ཞེས། འོག་རླུང་སྟེང་དང་སྟེང་རླུང་འོག །ཐད་རླུང་འཁྱུག་ཅིང་འབྱུང་ལྔ་འཁྲུགས་པས་ན། །བཙན་དུག་ལྟ་བུའི་ཉི་མ་འཆར་ཞེས། །རྣམ་པ་དགུ་རུ་འདྲེན་ན་ཡང་། །ཡང་དག་དོན་གྱི་སྙིང་པོ་རུ། །ངན་པའི་མང་ཚིག་དགུ་ཉིད་དམ། །ངན་པ་ཐ་ཆད་མིང་དུ་འདོད། །ཅེས་གནམ་སའི་རླུང་དང་། འབྱུང་ལྔ་འཁྲུགས་ཤིང་བཙན་དུག་ལྟ་བུའི་ཉི་མ་སྟེ་སྐྱེ་བོ་ཀུན་ལ་གནོད་པའི་ཉི་མ་འམ་ཚེས་གྲངས་དེ་འཆར་བ་ཡིན་ཞིང་། རྒྱུ་མཚན་དེ་འདྲར་བརྟེན་ངན་པ་གྲངས་དགུ་རུ་ངོས་འཛིན་རྒྱུ་མིན་པར། ངན་པའི་ནང་ནས་ངན་པ་སྡུག་ཤོས་སམ་ངན་པ་མང་པོ་ཚོགས་པའི་ཉི་མ་ཡིན་ཞེས་པའི་དོན་ཡིན།
བཞི་པ་དེ་ལ་དངོས་བསྟན་ཚེས་༧ ཡིན་ཡང་ཚེས་༦ ལ་རྩི་དགོས་པ་ཚེས་གྲངས་ཀྱི་འགྲོ་ཚུལ་ལས་ལོ་མང་ཆེ་བར་ཚེས་༦ གི་སྔ་ཕྱི་ཆུ་ཚོད་གང་ཡིན་ཞིག་ནས་ཚེས་༧ གྱི་དེའི་ཚད་ཙམ་བར་འཆར་ཡུན་ཉིན་ཞག་༡ གི་རིང་ངམ་རགས་རྩིས་སུ་ལག་འཁོར་ཆུ་ཚོད་༢༤ ཙམ་གྱི་ཚད་ཡིན། དེ་བཞིན་གོང་འཁོད་རཱ་ཧུ་དང་བམ་སྲིང་གཉིས་འདུས་པས་བམ་སྲིང་ལ་མངལ་ཆགས་ནས། ཟླ་༡༢ ཚེས་༡༤ གྲོད་ཐུམ་སྐྱེས། དེ་ནས་བོད་ཟླ་༡ ཚེས་༢༡ ལ་གྲོད་པ་དེ་རྡོལ། དེ་བཞིན་བོད་ཟླ་༢ ཚེས་༨ ལ་སྟག་སྲིང་དང་མནོལ། ཟླ་༣ པའི་ཚེས་༡༦ ལ་ཁྲག་གྲོད་སྐྱེས། དེ་ཟླ་༤ ཚེས་༢༤ ལ་རྡོལ། ཟླ་བ་༥ ཚེས་༩ ལ་ཀོང་སྲིང་དང་མནོལ། ཟླ་༦ ཚེས་༡༨ ལ་ལྕགས་གྲོད་སྐྱེས།ཟླ་༧ པའི་ཚེས་༢༧ ལ་དེ་རྡོལ། ཟླ་༨ཚེས་༡༠ ལ་སླར་ཡང་བམ་སྲིང་དང་མནོལ། ཟླ་༩ ཚེས་༢༠ལ་ཆུ་གྲོད་སྐྱེས། ཟླ་༡༠ པའི་ཚེས་༣༠ ལ་དེ་རྡོལ་བ་བཅས་ཚེས་གྲངས་དེ་ཚོར་ཟླ་བ་སོ་སོའི་ཉི་ནག་འཁེལ་བ་ཡིན།
ཚེས་གྲངས་དེ་དག་གི་ནང་ནས་བོད་ཟླ་༡༡ ཚེས་དྲུག་བདུན་བར་ཉིན་མཚན་གཅིག་གི་རིང་ལ་ས་བདག་ངན་པ་ཉི་མ་ནག་ཆེན་དང་། དེ་མིན་པའི་ས་བདག་ངན་པ་གཞན་བརྒྱད་པོ་བཅས་མཉམ་དུ་འཁེལ་རྒྱུ་ཡིན་པའི་དུས་ཚོད་ངན་ཤོས་ཤིག་ཡིན།
ལྔ་པ་དེ་ལ་གཞུང་ནང་བཤད་པ་ལྟར་དེ་ཉིན་སྤང་བྱ་ནི། གཤིན་སོན་བྱ་ལས་དང། ཁྱད་པར་ནོར་རྫས་ཕྱིར་གཏོང་དང་། །དབང་རབ་བག་མ་མཁར་ལས་དང་། །དགེ་བཤེས་ཆེ་འདོན་དུར་གཏབ་ཚོང་། །དགེ་ལས་དཀར་པོའི་ཕྱོགས་མི་བྱ། །ཞེས་ངན་པའི་ཐབས་ལ་འདི་དང་བསྟུན་དགོས་ཤིང་།དམིགས་བསལ་ཟླ་འབྲས་ལྟར་འཛེམས་པ་གཅེས་སོ།།
ཚེས་སྤྱི་དང་བྱེ་བྲག་ཟླ་བ་སོ་སོའི་ཟླ་བཤད་ནང་འཁོད་པ་བཞིན་འཛེམས་དགོས་ལས། འོན་ཀྱང་ཉི་ནག་རྣམས་ལ་གལ་ཆེའི་ལས་མི་བྱེད་ཐབས་མེད་བྱུང་ན། དེའི་སྔོན་ལ་དེ་བཟློག་ཐབས་སུ་མདུང་གི་རྩེ་མོར་གཡག་རྔ་ནག་པོ་དང་། ཤིང་སྣ་ལྔ། དར་དཀར་པོ། ཁྱི་ནག་པོའི་སྤུ། རྩིད་པ་བཅས་བཏགས་ཏེ། མདུང་གི་རྐེད་པ་ལ་སྦྲ་ཚལ་བཏགས། དེ་ཉིན་ཞག་ལ་འཆར་བའི་ལོ་རྟགས་གང་ཡིན་དེའི་ཕྱོགས་སུ་འཛུགས་ཤིང་རང་གི་ལས་དོན་རྣམས་གྲུབ་མཚམས་ཕྱིར་བསྡུ་དགོས་པ་དང་། འོན་ཏེ་རྣམ་རྟོག་མི་བྱེད་མཁན་དང་། ཡང་རྣམ་རྟོག་ཡེ་ནས་མི་ཤེས་མཁན་སོགས་ལ་གནོད་པ་མེད་ཅེས་བརྗོད་དཀའ་བའོ།། །།
ཕྱི་ལོ་༡༩༩༩ ལོར་སྨན་རྩིས་ཁང་གིས་དཔར་བསྐྲུན་ཞུས་པ་《སྨན་རྩིས་དུས་དེབ།
འདོན་ཐེངས་ལྔ་པ།》ནས་ཟུར་འདོན་ཞུས།
ཡི་གེ་དག་པ་ཀློག་པར་འབྱུང་བ་ལ་དགའ་འོས ལ་དྭགས་ལ་ངན་པ་དགུ་འཛོམས་ལདོ་སྣང་མེད་ཀྱང་། གཙང་དུ་ངན་པ་དགུ་འཛོམས་ཞེས་པ་ཐོས
་
“རྒྱུ་མཚན་དེ་འདྲར་བརྟེན་ངན་པ་གྲངས་དགུ་རུ་ངོས་འཛིན་རྒྱུ་མིན་པར། ངན་པའི་ནང་ནས་ངན་པ་སྡུག་ཤོས་སམ་ངན་པ་མང་པོ་ཚོགས་པའི་ཉི་མ་ཡིན་ཞེས་པའི་དོན་ཡིན།” འདི་བདེན་པ་ཡིན་འདུག དག་ཡིག་ཟ་མ་ཏོག་ན།
་
གོས་དགབ་དགའ་བ་གྲངས་ཀྱི་དགུ
མང་ཚིག་དགུ་དང་དབྱིབས་དགུ་བ།
་
ཞེས་མཆིས་སོ།
ངན་པ་དགུ་འཛོམས་སྤྱི་ཚེས་གང་རེད་འདུག ང་ལ་ལོ་ཐོ་མེད་སྟབས་ཤེས་མ་སོང་། །
¨འོན་ཏེ་རྣམ་རྟོག་མི་བྱེད་མཁན་དང་། ཡང་རྣམ་རྟོག་ཡེ་ནས་མི་ཤེས་མཁན་སོགས་ལ་གནོད་པ་མེད་ཅེས་བརྗོད་དཀའ་བའོ¨འདིའི་ཤུགས་ནས་རྣམ་རྟོག་ཡོད་པ་ཚོར་གནོད་པ་ཡོང་ངེས་པ་བསྟན་འདུག
རྣམ་རྟོག་མ་བྱས་ན་གནོད་པ་འབྱུང་མིན་ཐེ་ཚོམ་རེད།
གོང་གི་ལྷ་སྒྲུང་འདིའི་བསྟན་དོན་ལྟར་ན་ཉི་མ་ནག་ཆེན་ཟེར་བ་འདི་བོད་ཀྱི་ས་བདག་ཙམ་མིན་པར་འཛམ་གླིང་གི་ས་བདག་ཅིག་རེད། དེས་ན་དེའི་གནོད་ཡུལ་དེ་ཡང་བོད་གཅིག་པུ་ཡིན་དགོས་དོན་མེད།
ངན་པ་དགུ་འཛོམས་ཀྱི་ཉིན་མོ་ལ་བཟང་ངན་གང་དག་འབྱུང་གི་ཡོད་པའི་བརྟག་དཔྱད་ཞིབ་འཇུག་གི་སྙན་ཐོ་ཕུལ་མཁན་སུ་ཡང་བྱུང་མེད། དེ་བས་འདི་ལ་ཡིད་ཆེས་དགོས་དོན་མི་འདུག
ཚང་མས་ཡར་མར་ལ་ཅིག་འདྲི་རོགས། ཁ་སང་ཆག་སྒོ་བྱུང་སོང་བ་གང་དག་འདུག དེ་རིང་བཟང་པོ་བཅུ་ལ་བཀྲ་ཤིས་པ་བྱུང་སོང་བ་གང་དག་འདུག
¨ཁ་སྨྲས་གླེང་གཞིའི་ཟས་མི་ཟ། རྒྱལ་བའི་གསུང་མི་སྒྲོག བྱང་གི་ཕྱོགས་སུ་རྟ་མི་རྒྱུགས།¨ ཁོས་ཡོངས་གྲགས་ཀྱི་འཛེམ་བྱ་འདིའི་སྐོར་ཅི་ཡང་གླེང་མི་འདུག
གོ་ཐོས་ལ་བོན་པོའི་རིག་གཞུང་དུ་གོང་གསལ་གཏམ་རྒྱུད་དང་མཐུན་པ་ཞིག་ཡོད་ཚོད། གལ་ཏེ་དེ་ལྟར་ན།
འདི་བོན་ལུགས་ཀྱི་གདོད་མའི་དམངས་སྲོལ་ཞིག་ཡིན་མིན་ལ་ཡང་བརྟག་པར་འོས།
མདོར་ན་གོང་གི་ངོ་སྤྲོད་དེས་དོགས་པ་མང་དུ་བཏང་སོང།
ཧ་ཧ་ཧ་་ཁ་སང་རེད། དེ་རིང་བཟང་པོ་བཅུའི་ཉིན་རེད།
ངན་དགུ་འཇོམས་ལ། ཡིད་ཆེས་མེད་པས། མི་འཇིགས་ལ། བཟང་པོ་བཅུ་འཛོམས་ལ་ཡང་། ཡིད་ཆེས་མེད་པས། རེ་བ་བཟང་པོ་ཡང་མེད་དོ།། །།
སྔར་གྱི་གཏམ་བརྒྱུད་ལ། ཡིད་ཆེས་རྩ་བ་ནས་མེད་པ་ཡང་མིན་ཡང་། སྔར་གྱི་ལུགས་སྲོལ་རྒྱུན་ལྟར་ན། སྔར་ཚར་ཅིག་བྱུང་བ་ཙམ་གྱིས། ཚེས་གསར་དུ་ཤར་ཚད་ལ། ངན་པ་དགུ་འཛོམས་ཉིན་ཞེས། དེའི་ཉིན་དགེ་བའམ་ཡག་པོ་བྱས་ན། དགེ་བར་རམ། ཡག་པོ་མི་འོངས་པ་དགེ་སྡིག་ལ་རྨོངས་པ་དང་། དེའི་ཉིན་སྡིག་པ་བྱས་ན་འབྲས་བུ་མེད་པ་ལྟ་བུས་རྨོངས་དད་ཀྱིས། བཏང་སྙོམས་ཀྱི་ཆེད་དུ་གླིང་ཁ་གཏོང་བ་ཡང་། ཡར་རྒྱས་ལ་གནོད་པས། དེའི་དགོང་སེང་སྤྲད་པ་ལ་ཡང་ངོ་རྒོལ་ཡོད་ལགས།
དགེ་བ།
ངན་པ་དགུ་འཛོམས་ཉིན་གྱི་ཀུན་སློང་དགེ་སེམས་གཉིད་དཀར་འདི། །
ངན་པ་དགུ་འཛོམས་རྐྱེན་གྱིས་སྡིག་པ་ཡིན་པར་སུ་ཡིས་གསུངས། །
སྡིག་པ།
བཟང་པོ་བཅུ་འཛོམས་ཉིན་གྱི་ཀུན་སློང་སྡིག་སེམས་གཉིད་ནག་འདི། །
བཟང་པོ་བཅུ་འཛོམས་རྐྱེན་གྱིས་དགེ་སེམས་ཡིན་པར་སུ་ཡིས་གསུངས། །
དེས་ན།
ངན་པ་དགུ་འཛོམས་རེད་ཅེས་རྣམ་རྟོག་ངན་པ་བྱ་མི་རུང་། །
བཟང་པོ་བཅུ་འཛོམས་རེད་ཅེས་བཟང་བའི་རེ་བའང་བྱ་མི་རུང་། །
ལ་སྟོད་ཤེལ་དཀར་ལྷ་དབང་ཚེ་རིང་ལགས་ཀྱིས་གསུངས་པ་དེ་ལྷ་སྒྲུང་ཞིག་རེད། དོན་ངོ་མར་ཉི་ནག་ངོས་འཛིན་དང་རྩི་སྟངས་སོགས་དེ་འདྲ་མ་རེད།
གནད་དོན་གཙོ་བོ་ལོ་འཛིན་ཚུལ་གྱི་ཐོག་ན་ཡོད། བོད་ཟླ་ ༡༡ པ་ལོ་མགོར་སྟག་ལ་འཛིན་པ་རྒྱ་རྩིས་རྙིང་པའི་ལུགས་རེད། རྒྱ་རྩིས་གསར་མའི་ལུགས་ལ་ལོ་མགོ་བོད་ ༡༢ པ་སྟག་ལ་འཛིན་དགོས། དེ་ནི་རྩིས་གཞུང་ཁག་ཏུ། བཅུ་གཉིས་རྒྱལ་ཟླ་དཔྱིད་ར་སྟག ཞེས་དང་། དེ་བཞིན། ང་ལ་མ་འདྲི་རྒྱལ་ཟླར་དྲིས། ཞེས་གསུངས་པ་སོགས་ཀྱིས་གསལ་བར་བསྟན་ཡོད།
ངན་དགུ་བརྩི་ཚུལ་ནི། བོད་ཟླ་དང་པོའི་བཅུ་གསུམ་སྟག་ནས་བཟུང་།། ཞག་མ་ཉེར་བརྒྱད་གཉིས་པའི་བཅུ་གཅིག་རྟ།། སོགས་གསུངས་པ་ལྟར། བོད་ཟླ་དང་པོའི་ཚེས་ ༡༣ ངན་དགུ་འཛོམས་ཡིན། དེ་ནས་བརྩིས་པའི་ཞག་ཉེར་བརྒྱད་པ་ཡང་ངན་དགུ་ཡིན། དེས་རིགས་འགྲེ། བོད་ཟླ་ ༡ པོ་སྤྱིར་བཏང་གི་ལོ་མགོ་ཡིན་པའི་དབང་དུ་བྱས་ནས་དེ་ལྟར་བརྩིས་པ་རེད། མདོར་ན་ཞག་ ༢༨ རེའི་མཚམས་སུ་ངན་དགུ་རེ་ཡོད།
ངན་དགུ་ཟེར་བ་ལ་གྲངས་བརྩི་རྒྱུ་ཡོད། རྒྱ་རྩིས་ཀྱི་གཞུང་ཁག་ཏུ། ཚེ་ཐུང་བ། ནག་འོང་བ། མི་ཁས་ཉེན་པ། ནོར་ཟད་པ། དགྲ་སྡང་བ། འཇིགས་སྐྲག་འོང་བ། དོན་མི་འགྲུབ་པ། རྒྱལ་བོའི་བཀའ་ཆད་ཕོག་པ། བོར་སྟོར་བྱུང་བ་བཅས་ཡིན། འདི་ལ་བཤད་རྒྱུ་མང་ཡང་དུས་ཚོད་མེད།
དངིས་པོ་མ་བརྟགས་པ་ཉམས་དགའི་སྣང་བཙན་དུ་དེ་ཡང་རེ་དོག་གི་རྣམ་རྟོག་ཤུག་འཛིན་ཅན་ལ་དེ་བཞིན་དུ་བྱུང་སྲིད། སྐབས་བོད་ཀྱི་རྩིས་ལའང་སྣ་ཚོགས་པ་ཡོད་པས་མཚུར་རྩིས་ཅན་པོ་ནི་ཧོར་ལུགས་ཚེས་གྲངས
ལས་ཉིན་གཅིག་སྔ་བས་ན་ངན་པ་དགུ་འཛོམ་དེ་འང་འཇའ་ལྟར་ཡལ་ཏོ
ད་དུང་ངན་པ་དགུ་འཛོམས་ངོ་སྤྲོད་བྱེད་མཁན་འདི་ཚོས་དངོས་གནས་རྩ་ཆེའི་དུས་ཚོད་ཅིག་ཟུད་ཟས་དུ་བཏང་འདུག དགེ་ལས་དཀར་པོའི་ཕྱོགས་མི་བྱ།། ཞེས་པ་འདི་ལ་གླང་དར་རམ་གོང་བྲན་ཏང་གི་ཁྱབ་བསྒྲགས་ཀྱི་གཡའ་འདུག
སྐར་རྩིས་ནས་འགྲེལ་བའི་བཟང་ངན་དགུ་འཛོམས་ཡོད་ན་བརྒྱད་འཛོམས་དང་བདུན་འཛོམས་ནི་དེ་བས་ཡོད། དེ་དག་ལ་འགྲེལ་བ་འདྲ་ཡོད་ན། དེ་དག་སྐབས་བྱ་ཆོག་མི་ཆོག་གི་དབྱེ་མཚམས་འདྲ་ཨེ་ཡོད་དམ། ངས་བལྟས་ན་བཟང་པོ་བཅུ་དང་ངན་པ་བརྒྱ་གང་ཡིན་དང་། གང་ཡོང་སོ་སོའི་བྱས་བྱེད་ཉག་ཅིག་ཁོ་ནར་རག་ལུས་པ་ལུང་རིག་གིས་གྲུབ་སྙམ་མོ། དེ་འདྲ་སོང་ང་ལ་ངན་པ་དགུ་འཛོམས་མེད་དོ། ཧ་ཧ་ཧ་ཧཧཧཧཧ
བསམ་པ་བཟང་ན་ས་དང་ལམ་ཡང་བཟང་། །བསམ་པ་ངན་ན་ས་དང་ལམ་ཡང་ངན། །
དྲ་བདག་ནས་གཙོས་མཁས་དབང་ལྷན་རྒྱས་ལ་མཚམས་འདྲིས་དང་སྦྲགས་་་་་ངན་པ་དགུ་འཛོམས་ཞེས་པའི་ཚིག་བཞི་ཐོག་ལ་བགྲོ་གླེང་གནང་བར་བསྔག་བརྗོད་ཡོད་་་ད་དུང་ཤེས་རབ་ཀྱི་རྣམ་དཔྱད་རྩལ་དུ་བཏོན་ཏེ་་་བློ་ཟུར་བོར་གནས་ཏེ་མུ་ཐུད་དུ་ཞིབ་འཇུག་གནང་རོགས་ཞེས་འབོད་སྐུལ་གྲངས་མེད་མཆིས