ལྗང་བུ།
ཧ་ཅང་ཐག་རིང་ཐག་རིང་གི་ས་ནས
དྲ་ངོས་ཀྱི་གསར་འགྱུར་རེ་རེ་ཀློག་གིན
ངའི་སེམས་ལ་ན་ཟུག་སྐྱེ་བའི་ཚོར་བ་ཡང་མི་འདུག
ཆག་སྒོ་དེ་སླེབས་པ་མགྱོགས་དྲག་པས
ངའི་མིག་ལ་མཆི་མ་འཁོར་བའི་བརླན་གཤེར་ཡང་མི་འདུག
སྡུག་བསྔལ་དེ་ལྕི་ཐལ་བས
སྐད་ཅིག་མ་དེ་ལ
ཁྱོད་ཀྱིས་ཇི་ལྟར་སྨྲེ་སྔག་འདོན་པ་དེ
ང་ཡིས་ཐོས་ཐབས་བྲལ་མོད་ཉམས་སུ་མྱོང་ཐུབ
ཁྱོད་ཀྱིས་ཇི་ལྟར་སྐྱབས་འཇུག་ཞུ་བ་དེ
ང་ཡིས་མཐོང་ཐབས་བྲལ་མོད་ཚོད་དཔག་ཞུ་ཐུབ
ང་ཡིས་མཐོང་ཐུབ་པ་ནི
ཁྱོད་ཀྱིས་གཉེན་ཉེ་འཚོལ་བའི་མུན་ནག་ཁྲོད་ཀྱི་མིག་ཟུང་དེ་ཡིན
ང་ཡིས་ཐོས་པ་འབའ་ཞིག་ནི
ང་རང་གཉིས་ཀྱི་སྙིང་ཁམས་ཀྱི་འཕར་རྩ་མགྱོགས་པོ
སྐད་སྒྲ་མེད་པའི་ངང་བར་མེད་དུ་མཉམ་ལྡིང་བྱེད་ཀྱིན་པ་དེ་ཡིན
ཁྱོད་ཕྱིན་སོང
ང་བཞག་སོང
ཚོར་བ་ཡོད་ཚད་ང་རང་གཉིས་ཀྱིས་ཕྱེད་ཕྱེད་ཁུར་ན་ཅི་འདྲ་འདུག
ཁྱོད་ཚོ་ཕྱིན་སོང
ང་ཚོ་བཞག་སོང
གང་ལྟར་དོན་དག་བྱུང་སོང
དེ་ནི་བདག་གི་སྨྲ་ལྕེ་གཅོད་བྱེད་རེད
༢༠༡༠ལོའི་ཟླ༤པའི་ཚེས་༡༧ཉིན་སྐྱེ་རྒུའི་ས་ཡོམ་རྗེས་ཀྱི་ཉིན་གསུམ་པར་དབྱིན་ཇིའི་དབེན་ཙར་ཞེས་པའི་གྲོང་རྡལ་ཞིག་ཏུ་བྲིས།
ངའི་ཕ་ཡུལ་གྱི་འབྲོག་པ་བསོད་ནམས་ཀྱིས།།
སྐྱེ་དགུ་མདོའི་ས་ཡོམ་ལ་དམིགས་ནས་ལུག་བརྒྱ་ཕུལ་བ་རེད་ཟེར་ནས་སྐད་གྲགས་གླིང་ང་བཞག་འདུག
ངའི་ཕ་ཡུལ་གྱི་སྙན་ངག་པ་སྐད་གྲགས་ཅནལྗང་བུས།
སྐྱེ་དགུ་མདོའི་ས་ཡོམ་ལ་དམིགས་ནས་སྙན་ངག་ཚིག་གཅིག་མ་གཏོགས་ཕུལ་ཐུབ་མི་འདུག་ཨང་།
ངའི་སེམས་ཁྲལ་ནི།
བསོད་ནམས་ཀྱི་ལུག་བརྒྱ་བོའི་ཤ་ཁྲག་དེ། མི་བུ་སུ་འདྲ་ཞིག་གི་གསོལ་ཚིགས་སུ་གྱུར་འགྲོ་ན་བསམ།
ངའི་ཡིད་ཆེས་ནི།
ལྗང་བུ་ཡི་སྙན་ངག་རྡོག་མ་འདི། ཡུལ་ཤུལ་འབིས་ཁོག་གི་བྲག་རྐོས་རི་མོ་དེ་དག་བཞིན་དུས་ནས་དུས་སུ་རྗེས་རབས་པ་ཚོས་གྱེར་རྒྱུ་ལོས་ཡིན་སྙམ་བྱུང་།