གཅན་འོད་འབར།

ང་ལ་མིག་ཆུ་མི་འདུག

ཧང་སང་མདོག་གིས་གནམ་གྱི་སྤྲིན་པ་དེ་ཚོར་མིག་ལོག་ཅིག་བལྟས་ཤིང་།
ཧོན་འཐོར་ཚུལ་གྱིས་ས་ཡི་མེ་ཏོག་དེ་ཚོར་ཁ་རྡུང་ཞིག་བཏང་མོད།
གང་ལྟར་གསོ་ཐབས་བྲལ་བའི་ཁེར་རྐྱང་གི་སེམས་པ་དེ།
སྔར་བཞིན་སྐྱིད་པོ་ཞིག་མ་རེད་ལ།
སོས་ཐབས་མེད་པའི་དྲན་གདུང་གི་རྨ་ཁ་དེ་ཡང།
སྔར་བཞིན་བདེ་མོ་ཞིག་མ་རེད།
ཡང་སྙིང་ང་ལ་ཚོར་བ་མི་འདུག་ལ།
མིག་ཆུ་ཡང་མི་འདུག་སྟེ།
མིག་ཟུང་གི་གཡས་གཡོན་དང་།
ཡིད་སེམས་ཀྱི་རྒྱབ་མདུན་ཡོད་ཚད།
རྡོ་བའི་སེམས་དང་།
གྲི་ཡི་སྙིང། དུག་གི་ལྕེ་དང་།
ཚེར་མའི་མིག་ཏག་ཏག་ཡིན་པ་ལས།
གསེར་མདོག་གི་རྨི་ལམ་དེའི་ངོགས་ཀྱི་འཛུམ་མདངས་དྲོན་མོའི་ᫍ᫞་᫙᫥་དེ་མ་རེད་ལ།
དྭངས་གཙང་གི་རེ་འདུན་དེའི་རྒྱབ་ཀྱི་དགོད་སྒྲ་སྙན་མོའི་ᨵསུང་སྐད་དེ་ཡང་མ་རེད།

ང་ལ་དངོས་ནས་མིག་ཆུ་མི་འདུག

མེ་ལྕེས་དཀྲོགས་པའི་ལྷིང་འཇགས་ཀྱི་གྲོང་ཚོ་དེ།
ཉི་ནུབ་ཀྱི་མཚམས་སྤྲིན་དེའི་འོག་ན།
ཟུངས་ཁྲག་ལྟ་བུའི་དམར་མདངས་ཀྱི་ཁ་དོག་ཅིག་རྒྱས་མོད།
ཐག་རིང་ནས་ཡོང་ཞིང་ཐག་རིང་ལ་བཞུད་འགྲོ་བའི་ལམ་འགྲོ་བ་དེ་ཚོའི་དབུགས་རིང་ཞིག་གི་སྐྱེལ་མ་དང་།
རེ་འདུན་ཞིག་གི་སྟོང་བཤད་རྗེས་ནས།
སྙིང་རྗེ་བའི་གྲོང་ཚོ་དང་གྲོང་མི་དེ་དག
སླར་ཡང་དམར་ལྷེམ་ལྷེམ་གྱི་མེ་ལྕེར་འཐིམ་པར་མཐོང་དུས།
ཐག་རིང་གི་གྲོང་ཚོ་དེའི་དམར་མདོག་གི་མཁའ་དབུགས་དང།
གྲོང་མི་ཚོའི་སྐྱ་མདོག་གི་ངོ་གདོང་བསམ་ན།
མིག་ཆུའི་མཚོ་མོ་སྐམ་ནས་བཞུར་རྒྱུན་ཆད་ཡོང་ལ།
བཟོད་པའི་འཁྱག་རི་ཞུ་ནས་ཚོར་བ་སྐམ་ཡོང།
འདི་ལྟར། གུ་དོག་པའི་གྲོང་ཚོའི་མདུན་ལམ་དང།
རྒྱ་ཆུང་བའི་གྲོང་མིའི་ལས་དབང་བསམ་ན།
ང་ལ་དངོས་ནས་མིག་ཆུ་མི་འདུག
དངོས་ནས་མིག་ཆུ་མི་འདུག
༢༠༡༢།༦།༣