སྐལ་བཟང་ཚེ་རིང་།
ང་ནི་ནམ་རྒྱུན་ཕྱི་ལ་ཐོན་ནས་བཤད་ཐུབ་མཁན་ཞིག་མིན་ལ། ཁ་ཁུ་སིམ་མེར་སོ་སོའི་ལས་འགན་སྒྲུབ་དགོས་མཁན་གྱི་མི་ཞིག་ཡིན། ཡིན་ནའང་བར་ལམ་དྲྭ་ཐོག་བགྲོ་གླེང་ནང་ཆ་ཤས་བླངས་དགོས་བྱུང་བ་མ་ཟད། རྩོམ་ཡིག་ཐུང་ངུ་འདི་འདྲ་ཞིག་ཀྱང་སྤེལ་དགོས་བྱུང་སོང་། གང་ལགས་ཤེ་ན། ད་ལན་ཐེངས་གཅིག་འཕྱུག་སོང་ན་དངོས་གནས་ཕངས་པོ་ཡིན་པ་མ་ཟད། གོ་སྐབས་མང་པོ་ཞིག་ཤོར་ནས་བཅོས་དཀའ་བ་ཞིག་ཡོང་རྒྱུ་ཡིན་པ་སྨོས་མེད་རེད་འདུག དེས་ན་ད་ཆ་སྲིད་སྐྱོང་གི་སྔོན་འགྲོའི་འོས་བསྡུའི་དུས་ཚོད་ཇེ་ཉེར་འགྲོ་སྐབས་སེམས་ནང་དངངས་སྐྲག་དང་ཞེད་སྣང་ཞིག་ཤུགས་མ་ཐུབ་ཀྱིས་ཡོང་གི་འདུག དེའི་རྒྱུ་མཚན་ནི་བོད་མི་རྣམས་ཀྱིས་སྲིད་སྐྱོང་འོས་ཤོས་དེ་འདེམས་ཐུབ་མིན་དེ་རེད། ལྷག་པར་དུ་༧གོང་ས་༧སྐྱབས་མགོན་ཆེན་པོ་མཆོག་དགུང་ན་སྨིན་པ་དང་བོད་ནང་གི་གནས་སྟངས་ཉིན་རེ་ནས་ཉིན་རེ་ཛ་དྲག་ཏུ་འགྲོ་བཞིན་པའི་སྐབས་འདིར། ང་ཚོས་མང་གཙོ་སྦྱོང་བརྡར་བྱེད་ནས་སྡོད་རྒྱུའི་དུས་ཚོད་ཅིག་ག་ལ་ཡིན། ༧གོང་ས་མཆོག་སྐུ་འཚོ་གཞེས་སྐབས་སུ་བོད་དོན་འགྲིགས་ཆགས་ཤིག་མ་བྱུང་ན་བོད་ཀྱི་གནད་དོན་འཆི་རྒྱུ་ཡིན་པ་རིགས་པ་དང་རྒྱུ་མཚན་གྱིས་བསྒྲུབ་མི་དགོས་པར་དངོས་སུ་མཐོང་ཐུབ་རྒྱུ་ཞིག་རེད།
ད་བར་འདས་པའི་ལོ་བཅུའི་རིང་ང་ཚོས་དུས་ཚོད་མང་པོ་འཕྲོ་བརླག་བཏང་ཟིན་པ་རེད། ཞར་དང་ཞོར་གྱི་གནད་དོན་ཆུང་ཙག་རིགས་ལ་མགོ་བོ་རྨོངས་པའམ་རྨོངས་སུ་འཇུག་སྟེ་དོན་དམ་བོད་ཀྱི་རྩ་དོན་ཐོག་སྣང་མེད་སྐྱུར་འཇོག་གནང་ཡོད། གལ་ཏེ་དབུ་མའི་ལམ་གྱི་སྲིད་བྱུས་རྒྱུན་སྐྱོང་གནང་གི་ཡོད་ན་མཐར་བོད་རྒྱ་འབྲེལ་མོལ་ཐོག་མ་བབས་པར་དེ་ལས་གཞན་པའི་ལམ་ཞིག་གང་ན་ཡོད། དེ་ལྟར་ཆེ་ས་ནས་བོད་རྒྱ་འབྲེལ་མོལ་གང་ཡང་གནང་མ་ཐུབ་པ་མ་ཟད། གསང་བ་གསང་བ་ཞེས་པའི་མིང་ཁུར་ཆེན་པོ་ཞིག་གི་འོག་སྦས་ཏེ་ལབ་རྒྱུ་གླེང་རྒྱུ་མེད་པ་བཟོས་ཡོད། དེ་མིན་ཤེས་ཡོན་སྲིད་བྱུས་ལ་མཚོན་ནའང་ད་ལྟ་མིང་སྐམ་པོ་ཞིག་མ་གཏོགས་ནང་དོན་སྙིང་པོ་རྣམས་ལྷག་མེད་ཚོད་འདུག དེ་བཞིན་ཞིབ་འཇུག་ཡག་པོ་གནང་ན་བཙན་བྱོལ་བོད་གཞུང་གི་དཔལ་འབྱོར་གྱི་གནས་སྟངས་ཀྱང་ཡག་པོ་མེད་པ་མ་ཟད། ཕྱི་རྫིག་དང་ནང་སྟོང་གི་ལས་དོན་མང་པོའི་ཐོག་ཆུད་ཟོས་བཏང་ཡོད་ཚུལ་འདུག ལྷག་པར་དུ་དེ་སྔོན་བཙན་བྱོལ་བོད་མིའི་བཅའ་ཁྲིམས་གཏན་འབེབས་བྱས་པ་ནས་བཟུང་གང་ཟག་གི་དབང་སྒྱུར་ནས་ཁྲིམས་ཀྱི་དབང་སྒྱུར་དུ་ཤེད་ཀྱིས་བཅུག་པ་དེ་ད་ལྟ་ལྟག་ལོག་བརྒྱབས་ཏེ་ཁྲིམས་ཀྱི་དབང་སྒྱུར་ནས་གང་ཟག་གི་དབང་སྒྱུར་དུ་སོང་ཟིན་པར་བརྟེན། འཇོན་ཐང་ལ་ལྟོས་མེད་ཀྱིས་རང་གི་དགའ་ཉེ་ཕྱོགས་གཏོགས་རྣམས་མགོ་འདྲེན་གང་ཐུབ་ཀྱི་ལམ་སྲོལ་ངན་པ་ཞིག་གང་སར་ཁྱབ་ཡོད། གང་ལྟར་ང་ཚོ་ལ་འཛམ་གླིང་ནང་རྙེད་དཀའ་བའི་རླབས་ཆེན་གྱི་དབུ་ཁྲིད་དེ་འདྲ་ཞིག་ཡོད་ཀྱང་། འགོ་འཁྲིད་མཁན་ནས་བྱས་ཏེ་ང་ཚོ་མང་ཚོགས་བར་ཆོལ་ཁ་དང་ཆོས་ལུགས་ཀྱིས་དུག་ནད་ཀྱིས་ཟིན་ཏེ་མཐུན་འབྲེལ་ཆིག་བསྒྲིལ་མེད་པར་གྱུར་ཡོད། གལ་ཏེ་དེ་ཚོ་འགྱུར་བ་གཏོང་དགོས་ན་བོད་ཀྱི་གནད་དོན་ལ་ཕྱོགས་ཡོངས་ནས་གཟིགས་ཐུབ་མཁན་དང་། དྲང་ཚུགས་ལྡན་པ། ཁྲིམས་སྒྲིག་གི་དབང་སྒྱུར་ལ་མཐའ་གཅིག་ཏུ་ཡིད་ཆེས་བརྩི་བཀུར་ཡོད་མཁན་སྐུ་ངོ་འབྲོང་ཆུང་དངོས་གྲུབ་མཆོག་ལས་གཞན་སུ་ལའང་འོས་བབས་མེད།
སྤྱིར་ད་ལན་སྲིད་སྐྱོང་གི་འོས་མི་མང་པོ་ཕེབས་པར་དགའ་སྒོམ་བྱེད་ཆོག་པ་རེད། འོན་ཀྱང་གཅིག་མ་གཏོགས་དེ་དག་ཚང་མ་སོ་སོའི་ངོས་ནས་བཞེངས་པ་ཤ་སྟག་རེད། སྐུ་ངོ་འབྲོང་ཆུང་དངོས་གྲུབ་མཆོག་ནི་བསམ་ཤེས་ཅན་མང་པོས་བདམས་བདམས་སིག་སིག་བྱས་ཏེ་སྲིད་སྐྱོང་དུ་བཞེངས་དགོས་པའི་ཐུགས་རེ་ཆེན་པོ་གནང་བར་བརྟེན་ཁོང་ཚོ་དང་རྩ་བ་ནས་འདྲ་གི་མ་རེད། ང་ཚོའི་མི་ཚེའི་ནང་འཇོན་རྒྱུ་ཡོད་གཏང་རྒྱུ་ཡོད་ཟེར་མཁན་མང་པོ་མཐོང་ཟིན་པར་བརྟེན། ད་ཆ་དེ་དག་ལ་ཞེན་པའང་ལོག་ཡོང་གི་འདུག འོན་ཀྱང་དགའ་དགོས་པ་དང་སེམས་ཤུགས་འཕར་དགོས་པ་ཞིག་ལ། སྐུ་ངོ་དངོས་གྲུབ་མཆོག་གི་རྒྱབ་སྐྱོར་བ་རྣམས་ནི་ང་ཚོའི་སྤྱི་ཚོགས་ནང་གི་ཤེས་ཡོན་ཅན་དང་བསམ་ཤེས་ཅན་རྣམས་ཡིན་པ་མ་ཟད། གཞུང་ཞབས་ཟུར་པ་དང་ལས་ཐོག་ཕོན་ཆེའང་ཡོད་འདུག ཁོང་ཚོས་རྒྱབ་སྐྱོར་བྱེད་སྐབས་ཧ་ཅང་བཟང་སྤྱོད་ལྡན་པ་དང་། གཞན་ལ་དམའ་འབེབས་བརྙས་སྨོད་མི་བྱེད་པ། རིགས་པ་དང་རྒྱུ་མཚན་ལ་བརྟེན་པ་སོགས་མཐོང་དུས་རྒྱབ་སྐྱོར་བྱ་ཡུལ་དང་རྒྱབ་སྐྱོར་བྱེད་མཁན་རྣམས་བློ་སེམས་མཐུན་པ་མ་ཟད། དངོས་གནས་བོད་ཀྱི་གནད་དོན་ལ་བཟང་ཕྱོགས་ཀྱི་འགྱུར་བ་གཏོང་ཐུབ་པའི་ནུས་པ་ལྡན་འདུག་སྙམ་པ་ཡོང་གི་འདུག
ད་ལྟའི་སྲིད་སྐྱོང་གི་འོས་མི་གཞན་རྣམས་ལས་འགའ་ཞིག་ལ་སྙིང་རྗེའི་སྒོ་ནས་འོས་ཤོག་བླུག་ཐབས་གནང་བ་དང་། རེ་འགའ་ནི་ལོ་ཤས་ནང་བོད་དོན་འགྲིགས་འཇགས་ཀྱི་ཁ་ཕོ་སྒྲོགས་པའི་ཐོག་ནས་འོས་ཤོག་ཐོབ་ཐབས་གནང་བ། ཁ་ཤས་ནི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་བསྐྱར་བཅོས་ལ་བསྙད་དེ་འོས་ཤོག་ཐོབ་ཐབས་གནང་བ། འགའ་ཤས་ནི་དོན་གྱིས་སྟོང་པའི་མིང་སྐམ་པོ་རྣམས་གུང་བསྒྲིགས་ཏེ་འོས་ཤོག་ཐོབ་ཐབས་གནང་བ། གཅིག་ནི་སྣང་བ་སྐྱིད་སྐྱིད་ཚུལ་དུ་ལངས་པ་སོགས་འདྲ་མིན་སྣ་ཚོགས་རེད། གང་ལྟར་ཕལ་ཆེ་བ་ཚང་མ་གོ་སྐབས་ལ་ལྟོས་ཏེ་འགྱུར་ཆོག་ཆོག་ཤ་སྟག་རེད། འོན་ཀྱང་སྐུ་ངོ་དངོས་གྲུབ་མཆོག་ནི་གོང་དུ་ཞུས་པ་ལྟར་སྤྱི་ཚོགས་ཐོག་གི་གནད་ཡོད་མི་སྣ་མང་པོས་ཁ་ཞེ་གཉིས་མེད་ཀྱིས་རེ་སྐུལ་ཞུས་པར་རྒྱུ་མཚན་གཟིགས་ཏེ་སྲིད་སྐྱོང་གི་འོས་མིར་བཞེངས་རྒྱུར་རང་ཐག་རང་གཅོད་གནང་བ་ཞིག་རེད། དེ་བཞིན་ཁོང་ནི་སྐད་ཆ་སྙན་པོ་གསུང་མཁྱེན་མཁན་ཞིག་མིན་ལ། རྒྱུན་ལྡན་ནས་ངོ་ལྐོག་མེད་མཁན་ཞིག་རེད། ཁོང་ལ་བཅར་འདྲི་ཞུས་པ་ཁག་གི་བཀའ་ལན་རྣམས་ལ་གཟིགས་ན་མཁྱེན་རྒྱུ་རེད། དེའི་ནང་འཇོན་འཇོན་བཏང་བཏང་གི་བཀའ་མོལ་ཟུར་ལའང་མེད། སྐུ་ངོ་མཆོག་གི་ཡོན་ཏན་སྐོར་ལ་རྩོམ་པ་པོ་མང་པོས་གང་སར་བྲིས་ཟིན་པར་བརྟེན། འདིར་བསྐྱར་ཟློས་ཞུ་རྒྱུ་མིན།
མདོར་ན་ང་ཚོས་ཞབས་སྟེགས་ཀྱི་རྗེས་སུ་རང་རྒྱལ་གཞན་ཕམ་འགྲན་རྩོད་ནང་བཞུགས་མཁན་རྣམས་ལ་གོ་སྐབས་མ་ཕུལ་བར། ད་ལན་བོད་མིིའི་ཡོན་ཏན་ལྷན་སྐྱེས་སུ་ཡོད་ཅིང་ཞབས་སྟེགས་ལ་ཐུགས་སྣང་མེད་པར་ཞབས་འདེགས་ངོ་ལྐོག་མེད་པར་གནང་འདུན་ཡོད་མཁན་སྐུ་ངོ་དངོས་གྲུབ་མཆོག་ལ་གོ་སྐབས་འབུལ་ཐུབ་ན། རྗེས་སུ་ང་ཚོ་ཚང་མ་འགྱོད་པ་མེད་པར་ལྷོད་ཤིག་གེར་གནས་བཟོད་བདེ་བ་ཞིག་ཡོང་རྒྱུ་རེད། དེ་མིན་འདས་པའི་ལོ་བཅུ་བཞིན་ཚང་མ་སྟོང་ཟད་དུ་འགྲོ་རྒྱུ་ཉག་ཅིག་རེད། གལ་ཏེ་བོད་དོན་ལ་ཐུགས་ཁུར་ཕྲན་བུ་ཡོད་མཁན་ཞིག་ཡིན་ན་གནས་ཚུལ་རྣམས་ལ་བརྟག་དཔྱད་གནང་མ་ཐུབ་པ་གང་ཡང་མེད། དེ་ནི་གསང་བ་བསམ་གྱིས་མི་ཁྱབ་པའི་གནས་ཚུལ་ཞིག་ག་ནས་ཡིན། འོས་མི་རེ་རེའི་རྒྱབ་ལྗོངས་དང་། ལས་དོན་ཇི་བྱས། རྒྱུན་ལྡན་འགྲོ་འདུག་སྤྱོད་གསུམ། མི་ཚེ་སྐྱེལ་སྟངས་སོགས་ལ་ལམ་ཙམ་བལྟས་ན་ཤེས་ཐུབ་པ་ཡིན། འོན་ཀྱང་ཕྱོགས་ལྷུང་དང་འཐེན་འཁྱེར་གྱི་ནད་ཀྱིས་ཟིན་པ་རྣམས་ལ་འགྲེལ་བཤད་ཇི་ཙམ་བྱས་ཀྱང་ཕན་ཐོགས་མེད་པ་མ་ཟད། ད་དུང་འཐེན་འཁྱེར་གྱི་ནད་དེ་ལྕི་རུ་འགྲོ་རྒྱུ་རེད། ད་དུང་རྒྱུ་མཚན་དྲང་དགོས་ན་འབྲི་རྒྱུ་མང་དག་ཡོད་རུང་། དེ་ཙམ་ཞུས་ན་གོ་ཤེས་ཉན་ཤེས་ཐུབ་མཁན་རྣམས་ཀྱིས་མཁྱེན་རྟོགས་ཐུབ་རྒྱུ་ཡིན་པ་ཞུ་མ་དགོས། རྒྱུ་མཚན་དེ་དག་ལ་བརྟེན་ནས་ཧ་ཅང་ཉག་ཕྲ་བའི་དུས་ཚོད་འདིར་བློ་གཟུ་བོར་གནས་ཏེ་ང་ཚོས་བཀའ་ཟུར་འབྲོང་ཆུང་དངོས་གྲུབ་མཆོག་ལ་རེ་བ་ཞུ་བཞིན་པ་ལས། དེ་མིན་ཕྱོགས་ཞེན་ཕྱོགས་འཐེན་གྱི་གནས་ཚུལ་སྤུ་ཙམ་ཡང་མེད། མ་གཞི་ནས་དུས་ཚོད་ཛ་དྲག་ཅན་འདི་འདྲ་ལ་ཕྱོགས་ལྷུང་འཐེན་འཁྱེར་བྱེད་མཁན་ཡོད་ན་དེ་ཚོ་སྨྱོན་པ་མིན་ན་གང་རེད།
སྐལ་བཟང་ཚེ་རིང་གིས་ཕྱི་ལོ་ ༢༠༢༠ ཟླ་ ༡༢ ཚེས་ལ།
ལགས་སོ།། གོང་གི་གསལ་བཤད་ལ་རྒྱབ་སྐྱོར་དང་། བོད་མི་ཞེས་པ་མི་རིགས་ཤིག་ལྷག་དགོས་ན་བསམ་བློ་གཏོང་བའི་དུས་ལ་སླེབས་ཡོད། དེ་མིན་ཕྱིས་དྲགས་ཡོང་ངོ་།།
་་་་་་་་་་་་དགོས་ན་བོད་ཀྱི་གནད་དོན་ལ་ཕྱོགས་ཡོངས་ནས་གཟིགས་ཐུབ་མཁན་དང་། དྲང་ཚུགས་ལྡན་པ། ཁྲིམས་སྒྲིག་གི་དབང་སྒྱུར་ལ་མཐའ་གཅིག་ཏུ་ཡིད་ཆེས་བརྩི་བཀུར་ཡོད་མཁན་སྐུ་ངོ་འབྲོང་ཆུང་དངོས་གྲུབ་མཆོག་ལས་གཞན་སུ་ལའང་འོས་བབས་མེད། ་་་་་་་་་་་་་ ཟེར།
ཀ་ཕྲེང་སྤེན་པ་ཚེ་རིང་ཁྱོད་རང་ང་ཚོའི་སྲིད་སྐྱོང་ཡིན་གདའ།
་
ཀ་ཡེ་གསོན་དང་འོས་ཤོག་འཕེན་མཁན་ཚོ། །
ཁ་བ་ལྗོངས་ཀྱི་སྲིད་སྐྱོང་འོས་འདེམས་འདིར། །
ག་ཚད་བཤད་དང་སུ་ཞིག་འདེམས་བསམ་ཡང་། །
ང་ཚོའི་སྲིད་སྐྱོང་འོས་ཤོས་སྤེན་ཚེ་འདུག །
ཅ་མ་ཟིག་གི་མི་ལ་བཟོད་སྲན་བརྟན། །
ཆ་རྐྱེན་ཡོངས་རྫོགས་ཚང་བའི་སྲིད་སྐྱོང་ཞིག །
ཇ་ཆང་ཙམ་ལ་མགོ་བོ་མ་འཁོར་བར། །
ཉ་རྒྱས་ཟླ་བ་དེ་ནི་སྤེན་ཚེ་ལགས། །
ཏྰ་ལའི་བླ་མའི་ཐུགས་དགོངས་སྒྲུབ་ལ་མཁས། །
ཐ་ཤལ་རྒྱ་ཁྱིར་སྐྱོན་འཛུགས་བྱེད་ལ་མཁས། །
ད་ལན་སྲིད་སྐྱོང་རྩོད་མེད་བསྐོ་འདོད་ན། །
ན་ཚོད་མ་རྒས་སྤེན་ཚེ་མཆོག་ཉིད་དོ། །
པ་ཕ་བཟང་པོའི་སེམས་གཤིས་ཁྱོད་ལ་འཇགས། །
ཕ་དང་བུ་ཡི་ལས་འགན་ཁྱོད་ཀྱིས་ཤེས། །
བ་གླང་འདྲ་བའི་རྒྱ་མིར་ཁྱོད་ཀྱིས་རྩོད། །
མ་ཉེས་ཁ་ཡོགས་རྒྱལ་མཁན་སྲིད་སྐྱོང་དགོས། །
ཙ་རིའི་གནས་སྐོར་ལམ་ཆེན་དབུ་མའི་ལམ། །
ཚ་ངར་ཆེན་པོས་བོད་དོན་སྒྲུབ་ལ་མཁས། །
ཛ་དྲག་ལས་བྱེད་བོད་རྒྱ་འབྲེལ་མོལ་མོལ། །
ཝ་སྐྱེས་རང་བཙན་རྩོད་མཁན་ཐེར་འདོན་མཛད། །
ཞྭ་ལྟར་བཀུར་འོས་སྲིད་སྐྱོང་ཚོགས་ཟུར་དགོས། །
ཟ་མཁས་སྤྱོད་མཁས་མི་གཤིས་ཡ་རབས་དགོས། །
འ་ཅག་ལྷ་གཅིག་༸གོང་ས་ཡིད་བཞིན་དགོས། །
ཡ་མེད་སྲིད་སྐྱོང་སྐུ་ངོ་སྤེན་ཚེ་དགོས། །
ར་སྤྲོད་ཁུངས་འཚོལ་ཐུབ་མཁན་སྤེན་ཚེ་རེད། །
ལ་རྒྱའི་ཆོད་སེམས་ཡོད་མཁན་སྤེན་ཚེ་རེད། །
ཤ་ཞེན་ཆོལ་གསུམ་ཁྱབ་མཁན་སྤེན་ཚེ་རེད། །
ས་གོལ་གང་སར་སླེབ་མཁན་སྤེན་ཚེ་རེད། །
ཧ་ཅང་སྨྲ་མཁས་ནང་དགྲ་ཕྱི་དགྲ་ཤེས། །
ཧ་གོ་དོན་རྟོགས་ཡོད་པའི་སྤེན་ཚེ་མཆོག །
ཧ་ལོག་མི་ལ་རང་འོས་མ་འཕེན་པར། །
ཧ་ཧ་ཧི་ཧི་ངང་ལ་སྤེན་ཚེར་འཕེན། །
ཨ་ཁུ་སྟོན་པའི་རྣམ་ཐར་བློ་སེང་བསྟན། །
ཨ་མདོ་མིན་པའི་མངའ་རིས་ཀརྡོ་ངས། །
ཨ་མདོ་སྤེན་ཚེ་སྲིད་སྐྱོང་འཁོད་ཕྱིར་དང་། །
ཨ་མདོ་༸གོང་ས་མཆོག་དེ་རྒྱལ་ཕྱིར་བྲིས། །
མབྲོང་ཆུང་མི་ཚད་ལྡན་ཞིག་ལ་ངོས་འཛིན་ཡོད། འོན་ཀྱང་ད་ལོ་ནས་ཁོས་མདོག་ངོ་མ་དེ་བསྟན་སོང་། མཐོང་སོང་། གང་ཡིན་ཟེར་ཁོ་ནི་དབང་ཆ་ལ་རྔམ་ནས་ཡོད་པ་མཐོང་སོང་། ཁྲིམས་སྒྲིག་ལ་མགོ་བདེ་འཁྲབ་ནས་རྐང་པ་གཉིས་འཛུགས་བྱས་སོང་། གལ་སྲིད་ཁྲིམས་སྒྲིག་དང་མ་འགལ་ཙམ་བྱུང་སྲིད་ན་ཡང་བཟང་སྤྱོད་དང་ཡོངས་སུ་འགལ་སོང་། རྒྱབ་སྐྱོར་པ་ཚོས་ཤུགས་ཆེར་བསྒྲགས་རྒྱུ་ཁོས་བཟང་སྤྱོད་ཡིན་ལབ་སོང། ད་ག་རེ་ལྷག་སོང་། ད་རུང་སྡིག་པ་མིག་བཙུན་བྱེད་རྒྱུ་ཡིན་ནམ།
བོད་མི་རྣམས་ནས་དཔྱད་རྩོམ་འབྲི་སྐབས་གང་ཟག་ཅི་འདྲའང་རུང་ནག་པོ་བཟོ་བའི་ཐབས་སུ་མ་གནང་རོགས། ང་ཚོ་བོད་མི་རྣམས་ལ་ནག་པོ་བཟོ་མཁན་པད་༥༠ ཅན་གྱི་རྒྱ་མིའི་དམག་མི་ཞེས་པ་ཟུར་དུ་ཡོད་པས། དོགས་ཟོན་གལ་ཆེའོ།།
་་་་་་་”སྐུ་ངོ་དངོས་གྲུབ་མཆོག་གི་རྒྱབ་སྐྱོར་བ་རྣམས་ནི་ང་ཚོའི་སྤྱི་ཚོགས་ནང་གི་ཤེས་ཡོན་ཅན་དང་བསམ་ཤེས་ཅན་རྣམས་ཡིན་པ་མ་ཟད། གཞུང་ཞབས་ཟུར་པ་དང་ལས་ཐོག་ཕོན་ཆེའང་ཡོད་འདུག ཁོང་ཚོས་རྒྱབ་སྐྱོར་བྱེད་སྐབས་ཧ་ཅང་བཟང་སྤྱོད་ལྡན་པ་དང་། གཞན་ལ་དམའ་འབེབས་བརྙས་སྨོད་མི་བྱེད་པ། རིགས་པ་དང་རྒྱུ་མཚན་ལ་བརྟེན་པ་སོགས་མཐོང་དུས་རྒྱབ་སྐྱོར་བྱ་ཡུལ་དང་རྒྱབ་སྐྱོར་བྱེད་མཁན་རྣམས་བློ་སེམས་མཐུན་པ་མ་ཟད། དངོས་གནས་བོད་ཀྱི་གནད་དོན་ལ་བཟང་ཕྱོགས་ཀྱི་འགྱུར་བ་གཏོང་ཐུབ་པའི་ནུས་པ་ལྡན་འདུག་སྙམ་པ་ཡོང་གི་འདུག”
འོན་ཀྱང་། མང་ཚོགས་ཀྱི་འོས་ཤོག་སྐུ་ངོ་འབྲོང་ཆུང་ལ་ཐོབ་དགོས་ན། ད་ནི་སྤེན་པ་ཚེ་རིང་ལ་མ་ཉེས་ཁག་གཡོགས་མ་བྱས་ན་ཡོང་ཡག་ཁོ་རང་ཡོད་པ་མ་རེད་བསམ་ཡིན་ས་རེད། སྐུ་ངོ་འབྲོང་ཆུང་ལ་འོས་ཤོག་བླུག་ཤོག་ཅེས་དབུས་གཙང་མི་མང་ལ་འབོད་སྐུལ་གནང་མཁན་སྤོ་ལགས་ཡབ་ཆེན་ཞུ་བ་ཁོང་ནི་སྐུ་ངོ་འབྲོང་ཆུང་ལ་རྒྱབ་སྐྱོར་བའི་གྲས་ཀྱི་ལོ་ན་རྒན་ཤོས་དང་། སྒང་གི་ཚིག་རྗོད་ནང་ལབ་སྟངས་ལྟར་གྱི་བསམ་ཤེས་ཅན་ཡང་ཡིན་ངེས། ད་ཡིན་ན་ལྟད་མོ་འདུག