གློག་ཞགས་རེད་དམ་མེ་ལྕེ་རེད།

གྲིབ་གཟུགས།

མཆུ་སྒྲོས་དམར་པོ་དེ་མེ་ལྕེ་ཡིན་ནམ།།
སྤྱན་གྱི་གཟིགས་སྟངས་དེ་གློག་ཞགས་རེད་འདུག།
འདོད་པས་བཟི་སྟངས་ཀྱི་རྣམ་འགྱུར་མ་ལུས།།
ཆར་གྱི་ཐིགས་པ་བཞིན་སྙིང་ཁར་སིམ་སོང་།།

ཡ་མེད་སྨྱོ་སྤྱོད་ཀྱི་བྱེད་སྟངས་བྱེད་ལུགས།།
གང་དྲན་རང་དབང་གིས་རྩེད་འཇོར་རོལ་སྟངས།།
འཇིག་རྟེན་ལག་མཐིལ་དུ་བླངས་པའི་དགའ་མས།།
གུ་ཡངས་བློ་བདེ་ཡི་སློབ་གསོ་གནང་བྱུང་།།

གྱེད་སྒུག་ལུས་པོ་ཡི་འགུལ་སྐྱོད་གང་དག །
འདོད་པའི་བདུད་རྩི་ཡིས་བཟི་བ་ནང་བཞིན།།
སྐྱེ་གཟུགས་སྟོད་སྨད་ཀྱི་ཆ་ཤས་རེ་རེས།།
ཆར་ཞོད་ཆེ་དུས་ནའང་དྲོད་ཁོལ་སྟོར་གྱི།།

ཆུ་མོ་སྔོན་མོ་ཡི་ནང་གི་ལང་ཚོ།།
སྤྱོད་པའི་བདག་པོ་ནི་ཚངས་པ་ཡིན་ནམ།།
འདོད་པའི་སྦྲང་རྩི་ལ་སྲེད་པ་འདི་ཚོ།།
མཐོང་དུས་འདོད་ལྷ་ཡང་ལོགས་སུ་མེད་ཚོད།།

མིག་ཤེལ་ཟླ་གཟུགས་དེ་བཞིན་ལ་བྲིས་འདྲ།།
སྐྲ་ལོ་ཐུང་ཐུང་གི་འོག་གི་ངོ་གདོང་།།
ངོ་གདོང་དཀྱིལ་སྨད་ཀྱི་ཆུ་སྒྲོས་དམར་པོ།།
འདོད་ལྡན་སྙིང་ཁོང་གི་མདའ་གྲི་མདུང་གསུམ།།

འགྲེང་དུས་ལང་ཚོ་ཡི་སྒེགས་པ་ངོམ་ཞིང་།།
བསྡད་དུས་འབུར་ས་དང་ཉག་ས་སྟོན་མཁས།།
ཆུང་ཆུང་བྱིས་སེམས་དང་འདོད་སེམས་བསྲེས་པའི།།
རྣམ་འགྱུར་རེ་རེ་ནི་འདོད་ལྷའི་མེ་ཏོག།

འདོད་པའི་རྔུལ་ཆུ་དང་གཡའ་ཆུས་བྲིས་པའི།།
“མཚམས་འཇོག་མི་ཐུབ་”པའི་གླུ་ཚིག་རེ་རེ།།
མཆུ་སྒྲོས་དམར་པོ་དེས་འདར་བཞིན་ལེན་དུས།།
འགྲམ་ཆང་མངར་མོ་དེར་སེམས་པ་མཁྲེང་སོང་།།

མཛེས་མ་བརྒྱ་ཕྲག་ལ་རིག་མྱོང་ཡོད་ཀྱང་།།
སེམས་ཀྱི་ཉེ་ཚོད་ལ་ཁྱོད་ལས་མ་ཤར།།
ལྟད་མོ་སྟོང་ཕྲག་ལ་བལྟས་མྱོང་ཡོད་ཀྱང་།།
སྙིང་ཤ་དམར་པོ་འདི་ཁྱོད་ཀྱིས་བསྒུལ་སོང་།།

མེ་ཏོག་སོས་པ་ཡི་ལང་ཚོ་ཁུར་བའི།།
གཞོན་ནུ་ཕོ་མོ་ཚོ་དགའ་ལུགས་རྩེ་སྟངས།།
ཇི་བཞིན་སྣང་བརྙན་དང་གླུ་ཚིག་ངག་གིས།།
མིག་དང་རྣ་བ་ཡི་དཔྱིད་དུ་འགྱེད་འདུག །

Miley Cyrus ཀྱི་གཞས་ We Can’t Stop ཀྱི་གློག་བརྙན་བལྟས་རྗེས་བྲིས།
25/7/2013