གློག་བརྙན་དང་མི་ཚེ།

ཀླུ་སྨྱོན།
—-
རི་གྲོང་སྨུག་པས་བཏུམས་དུས།
དཔེ་ཆ་བ་ཚོ་ལྗོན་པའི་འོག་ཏུ་འདུས་བྱུང་།
ལུག་ཁྱུ་ཡང་རླུང་དང་འདྲེས་ཤིང་།
རྫི་གླུ་གང་སར་ཡན་པ་ནི་འཕྱོན་མའི་སྐྲ་འདབས་དང་ཡང་ཤིན་ཏུ་མཚུངས།

ཁེར་རྐྱང་གི་རྨི་ལམ་གང་མང་ཞིག་རྨིས་རྗེས།
ད་གཟོད་ངས་མི་ཚེ་ནི་མ་གཞི་ནས་སྤྲིན་པ་ལྡོམ་པོ་ཞིག་གི་གྲིབ་ནག་ལས་གཞན་ཅི་ཡང་མིན་པ་རྟོགས་བྱུང་།
ཀྱེ། ས་གཞི་ཆེན་པོ། རི་རབ་དང་གཙང་པོ་ཅིའི་ཕྱིར་རྒས། ཅིའི་ཕྱིར་རྒས།
ཀྱེ། ནམ་མཁའ་སྔོན་པོ། ཉི་མ་དང་སྐར་ཚོགས་ཅིའི་ཕྱིར་འཚེར། ཅིའི་ཕྱིར་འཚེར།

བྱིས་པ་ཚོས་ནུབ་འཚལ་གྱི་བྲོ་བ་མ་མྱངས་སྔོན།
གྲོང་གསེབ་ནས་གློག་བརྙན་གྱི་རས་ཡོལ་ཡམ་ཡོམ་འགུལ།
དེ་ནི་བསླུ་བྲིད་ཐེངས་ཤིག་མིན་ན་ཡང་།
དེ་ལ་སྨྲ་མི་ཤེས་པའི་འགུག་ཤུགས་ལྡན། ང་ལ་མཚོན་ན།

ཆུ་གཞུང་དུ་རྡོ་བ་ཐར་ཐོར་གྱི་ངོས་སུ་ལོ་ཟླའི་སྨུག་རྩི་བབས་ཤིང་།
བུ་མོ་ཚོའི་ཟླ་མཚན་ཡང་ཕྱིང་དཀར་གདན་གྱི་སྟེང་ན་འོད་དུ་འཚེར།
རི་གྲོང་དུ་གཏམ་རྒྱུད་ལ་ངེས་གཏན་མེད་པར་ཉི་ནུབ་དང་རི་བོའི་ཟོམ་དུ་རྒས་ཤིང་།
རྒན་རྒོན་ཚོའི་གཉེར་མ་ཁོ་ནས་ཁྱོད་ལ་འཇིག་རྟེན་འདིར་དེ་ཙམ་འདུག་དབང་མེད་པ་ཡང་བརྗོད་མྱོང་།

རི་བོའི་ཕ་རོལ་ཏུ་གཡག་རྒྱབ་ཚོང་ཁང་དང་རས་གུར་ཡོད་ལ།
དེ་རུ་བཀྲ་ཤིས་ཟླ་བའི་སྨྱུག་འོད་གི་མཐར་འཕེལ་དང་ཁྱུང་ཁྱུང་ཡང་ཡོད།
གཟའ་ཟླ་བར་ཉོས་པའི་ཆུ་ཚོད་དེ་འཇར་པན་དང་སིད་སི་གང་ནས་བཟོས་མིན་ཤེས་དཀའ་ཡང་།
དོ་ནུབ་མགོ་དཀྲིས་དམར་པོ་ཞིག་གི་དྲི་ཞིམ་ཁྱེར་ནས་མུན་ནག་གི་མཚན་ལྗོངས་འགྲིམ་དགོས་པ་གཏན་ཁེལ་བྱུང་།

བྲག་ཁུང་ཞིག་ལས་འཆི་བ་འཆི་བ་ཞེས་ལན་བརྒྱ་སྟོང་དུ་གྲག་འོང་ཞིང་།
ལྷ་ཁང་དེའི་ལྡེབས་རིས་ཀྱིས་ཀྱང་སྲིད་པ་འཁོར་ལོའི་འཇིགས་སུ་རུང་བའི་འགྲེལ་བཤད་བརྒྱབ་བྱུང་།
ཕུག་རོན་ཞིག་ལ་འགྲོགས་ནས་ནུབ་ཁའི་ཉི་ཟེར་ལ་ཐིམ་དགོས་པའམ།
སང་ཞོགས་བར་དུ་ཆང་རག་གི་དམ་བི་འདིའི་སྟེང་དུ་མཛུབ་རྗེས་ཅི་ཙམ་དཔར་དགོས་མིན་ཡང་ངས་ག་ལ་ཤེས།