ཤེད་བུ།
ཉིན་དེར་པདྨ་ཚེ་བརྟན་གྱིས་རང་གི་བརྩམས་ཆོས་དག་ལ་ཕྱིར་དྲན་བྱས། དེ་དང་ལྷན་དུ་རང་གི་འཚོ་བ་ལའང་ཕྱིར་དྲན་བྱས། དཀའ་སྡུག་གི་འགག་འཕྲང་སྣ་ཚོགས་བརྒལ་བའི་མི་རིགས་ཤིག་གིས་རང་གི་བརྩམས་ཆོས་ལ་གཟི་བརྗིད་བསྣན་ཞིང་། རང་གི་བརྩམས་ཆོས་རེ་རེ་ནི་མི་རིགས་དེའི་སྣང་བརྙན་དང་དྲིན་གཟོ་གཉིས་ཀར་གྱུར་ཡོད་པས། སེམས་ལ་སྤོབས་པ་ཤིག་རྒྱས་ནའང་རང་དང་འབྲེལ་འདྲིས་ཆེ་བའི་བུད་མེད་མང་པོ་ཞིག་གི་ལས་དབང་དྲན་པས། པདྨ་ཚེ་བརྟན་བསམ་གཞིག་གི་ཀློང་དུ་ནུབ་ཐལ་ནས། རང་ཉིད་ཀྱི་གོམ་འགྲོས་ཀྱང་བརྗེད་པར་གྱུར། གློ་བུར་གྱི་རླུང་འཚུབ་ཤིག་གིས་ཁོ་རང་ཧད་སེར་བཏང་ཞིང་། ནམ་མཁར་བལྟས། རླུང་འཚུབ་ཀྱིས་དབུགས་ལྒང་ཞིག་སྤུར་ནས་ནམ་མཁའི་མཐོངས་སུ་ཡལ། སྣང་ཚུལ་དེ་མཚར་པོ་ཞིག་ཏུ་བསམ་ཞིང་ཡང་ཡང་བསམ་གཞིག་གི་ཀློང་དུ་ཉུལ།
བསོད་རྒྱལ་རིན་པོ་ཆེའི་དེབ་སྐད་གྲགས་ཅན་སྐྱེ་འཆིའི་རྣམ་གཞག་ཅེས་པར་བལྟས། སྐྱེས་པའི་རྗེས་ལ་འཆི་དགོས་པ། འདུས་པའི་ཐ་མར་འབྲལ་དགོས་པ། བསགས་པའི་རྗེས་ལ་འཛད་དགོས་པ། ཐོབ་ཤོར་རེས་མོས་ཀྱིས་འཁོར་བའི་དཔེར་མཚོན་དག་རེ་རེ་བཞིན་ཡིད་ལ་འཁོར། ང་ཚོ་ནི་མཐོང་ཐོས་རེག་གསུམ་དང་རྟེན་ཅིང་འབྲེལ་བའི་བརྩེ་དུང་གི་ཚོད་འཛིན་འོག་ཚུད་པ་སྟེ། འཁྱག་དར་དང་འབྲི་མར་ཉི་མར་ལྡེ་བའི་དངོས་ཚུལ་གྱི་འཕྲུལ་སྣང་མཐའ་དག་ལྭ་བ་གསར་རྙིང་བརྗེ་བ་ལྟར་བརྗེས་པའམ། ཡང་ན་འཆི་བ་ནི་རང་ཉིད་ཀློང་ཡངས་པའི་བར་དོའི་དབྱིངས་སུ་འཕུར་སྐྱོད་ཐེངས་ཤིག་གི་སྣང་བ་ལ་སྙིང་ནས་བདེན་ཁ་སྟེར་བར་འདོད་པ་མ་ཟད། མི་ཚེ་ནི་འཁྲུལ་སྣང་གི་དར་ཤིང་ལྟར་ངལ་བ་འབྲས་མེད་དང་སྙིང་བོ་ཅི་ཡང་མེད་པའི་ལྟ་ཚུལ་ལའང་བདེན་ཁ་སྟེར་བར་འདོད། ལྷག་པར་བྱ་དངོས་ཡོད་ཚད་སྟོང་བ་དང་དམར་རྗེན་ཡིན་པའི་འགྲེལ་བཤད་ཀྱི་སྐབས་སུ། ཁོའི་མིག་ལམ་ནས་རླུང་འཚུབ་ཀྱིས་ཁུར་སོང་བའི་དབུགས་ལྒང་དམར་པོ་དེ་ཡིད་ལ་དྲན། པདྨ་ཚེ་བརྟན་གྱིས་དེབ་འདིར་གསལ་བའི་བརྗོད་བྱ་ཡོད་ཚད་བར་སྣང་ལ་ཁུར་བའི་དབུགས་ལྒང་དམར་པོ་ཞིག་ཏུ་བསྡུ་ཐུབ་པར་གྱུར།
ཞེ་ལྷོད་ལ་བབས་ཏེ་དཔེ་ཁང་ལས་མལ་ཁང་གི་ཕྱོགས་སུ་ཆས་ཤིང་། ཉལ་ཁྲིའི་ཟུར་གྱི་འཐེན་སྒམ་གྱི་ཁ་ཕྱེས། འཐེན་སྒམ་སྟོང་བ་ཉིད་དུ་གྱུར་ཅིང་ཆུང་མའང་སྔ་ས་ནས་གཉིད་ལ་ཤོར་འདུག་པས། པདྨ་ཚེ་བརྟན་བསྐྱར་དུ་བསམ་གཞིག་གི་ཀློང་དུ་ནུབ། བསམ་གཞིག་གི་ཁྲོད་ནས་མཁའ་དབྱིངས་སུ་འཕུར་བའི་དབུགས་ལྒང་དེའི་སྣེ་མོར་དབུགས་ལྒང་མང་པོ་ཞིག་མཐུད། དེ་བཞིན་དབུགས་ལྒང་འཚོལ་བའི་རང་ཉིད་དང་། དབུགས་ལྒང་སྦས་ཉར་ལ་དཀའ་ངལ་འཕྲད་པའི་ཞིང་གྲོང་གི་མི་རྣམས་ཀྱང་ཡིད་ལ་དྲན། བུད་མེད་རྣམས་ཀྱི་བརྩེ་དུང་དང་འཚོ་བའི་ཆག་སྒོའི་མཐར་ཐུག་ལ་བསམ་བློ་བསྲིངས། མི་ཚང་མས་ཆག་སྒོའི་མཐར་ཐུག་ནི་འཆི་བ་ཡིན་པར་བསམ་གྱིན་ཡོད་མོད། གློག་བརྙན་འདིས་འཆི་བ་ལ་འགྲེལ་བཤད་གཞན་པ་ཞིག་རྒྱག་རྩིས་ཡོད་པས། འཆི་བ་ལས་གཞན་ཞིག་བཙལ། ད་གཟོད་བོད་ཁུལ་གྱི་སྣང་ཚུལ་ཞིག་སྟེ། བུད་མེད་གཞོན་ནུ་མ་ཞིག་མི་འདོད་བཞིན་དུ་ཇོ་མོ་བྱེད་པ་ནི་བརྩེ་དུང་གི་ཆག་སྒོ་མཐར་ཐུག་དང་། རང་གི་བུ་ཕྲུག་འདེད་པ་དང་། བཟའ་ཟླ་དང་བྱིས་པ་བཅས་ཤུལ་དུ་བཞག་ནས་དགོན་པར་ཆས་པའང་འཚོ་བའི་ཆག་སྒོ་མཐར་ཐུག་ཅིག་ཡིན་པ་འགྲེལ་བཤད་ཀྱི་མཐའ་སྣེར་བཟུང་། པདྨ་ཚེ་བརྟན་གྱིས་གློག་བརྙན་གསར་བ་ཞིག་གི་སྤྱི་སྒྲོམ་ཞིག་བློས་བསླངས་ཐུབ་སོང་བས། ག་ལེར་གཉིད་དུ་ཡུར།
པདྨ་ཚེ་བརྟན་གྱིས་འཁྲབ་གཞུང་དང་འཁྲབ་སྟོན་པ་ཡོད་ཚད་གྲ་སྒྲིག་བྱས་ཏེ། གློག་བརྙན་ཕབ་སྐྲུན་བྱེད་པར་ཆས། ཁོས་གློག་བརྙན་གྱི་མགོ་ཇི་ལྟར་འཛུགས་དགོས་པའི་འབབ་སྟེགས་ཤིག་མ་རྙེད། ཡང་ནས་བསྐྱར་ཏུ་ཕབ། ཡང་ནས་ཡང་དུ་ཚོད་ལྟ་བྱས། ཐབས་ཟད་དེ། ཡང་སྐྱར་བསོད་རྒྱལ་རིན་པོ་ཆེའི་དེབ་དེ་བཀླགས། བདག་འཛིན་དང་སྒྲིབ་པ། བདེ་གཤེགས་སྙིང་བོ། རྟེན་འབྱུང་། བདག་མེད་དང་མི་རྟག་པ་སོགས་ཀྱི་གོ་དོན་དང་འགྲེལ་བརྗོད་ཁག་གི་ཉེ་སའི་ཉེ་སར་བཅར། དེ་དག་ཚང་མ་འཁོར་བ་ལ་སྙིང་བོ་མེད་པ་དང་། འཁོར་བའི་རྩ་བ་མ་རིག་པ་ཡིན་པའི་གཏན་ཚིགས་བཙན་པོ་ཤ་སྟག་ཡིན་པའི་ཕྱི་ནང་རྙེད། མ་རིག་པ་ནི་ང་ང་ཞེས་པའི་འཛིན་པ་ཞིག་ཡིན་པ་དང་དེའང་བདེན་པ་དང་དངོས་ཡོད་གནས་ཚུལ་སྒྲིབ་ཚུལ་ཞིག་ཡིན་པའི་ཕྱི་ནང་མཐོང་། ང་ཚོ་ཚང་མར་བདེ་གཤེགས་སྙིང་པོ་ཡོད་ཀྱང་དེའང་ཅི་ཞིག་གིས་སྒྲིབ་ཡོད་པའི་འགྲེལ་བརྗོད་དག་བློ་ལ་འཐད་པར་གྱུར། “འུ་གོ་སྤྲིན། འུ་གོ་ལུག ཨ་མྱེ། ཨ་ཕ། ” དེ་དག་ཀྱང་སྒྲིབ་གཡོག་གསལ་ལ་མི་གསལ་བ་ཞིག་གམ་ཡང་ན་དབུགས་ལྒང་གི་སྒྲིབ་འོག་ནས་མངོན་དུ་འཇུག་རྒྱུ་ཡིད་ལ་དྲན།
པདྨ་ཚེ་བརྟན་ཧ་ཅང་དགའ་ཞིང་གློག་བརྙན་ཕབ་སྐྲུན་གྱི་ལས་མགོ་ལེགས་པར་བཙུགས། བྱིས་པ་གཉིས། བུད་མེད་གཉིས། དབུགས་ལྒང་གཉིས། དབུགས་ལྒང་དམར་པོ་གཉིས་བཅས་མངོན་གསལ་གྱི་འདྲ་ཆས་གཉིས་རེ་དང་། སྤྲིན་དཀར་གཉིས། ལོ་ལོན་གཉིས། རྣམ་ཤེས་གཉིས། རྒད་པོ་གཉིས། ཁྲོམ་རྒན་གཉིས། བརྩེ་དུང་གི་ཆག་སྒོ་གཉིས། སྨན་པ་གཉིས་བཅས་མངོན་པར་མི་གསལ་བའི་འདྲ་ཆས་གཉིས་རེ་བཅས་བདམས་ཏེ། རྟེན་འབྱུང་ཕྲ་རགས་དང་ཐོབ་ཤོར་གྱི་མཚོན་དོན་ཅན་དུ་ཕབ་པ་མ་ཟད་། དབུགས་ལྒང་གཉིས་ཕྲལ། བྱིས་པ་གཉིས་གསོན་དྭ་ལ་བུད། བུད་མེད་གཉིས་སྒར་ལ་ཆས། དབུགས་སྒང་དམར་པོ་གཉིས་ཀྱང་གཅིག་ཕྲལ་གཅིག་འཕུར། དེ་བཞིན་མངོན་པར་མི་གསལ་བའི་འདྲ་ཆས་མཐའ་དག་ལ་སྙིང་བོ་ཅི་ཡང་མེད་པའི་སྣང་ཚུལ་དུ་གློག་བརྙན་ཕབ་སྐྲུན་གྲུབ་རྗེས། ཧ་ཧ། འདི་འཁོར་བའི་རང་བཞིན་ཡིན་ནམ། འཁྲབ་ཁྲིད་པའི་གཏུམ་སྤྱོད་ཡིན་ཞེས་ཆིག་ལབ་ཅིག་རྒྱག་བཞིན། ཕྱིར་གྲོང་ཁྱེར་དུ་ཆས།
པདྨ་ཚེ་བརྟན་གྱི་གློག་བརྙན་ནང་དུ་བོད་ཀྱི་རིག་གནས་ཡོད་པའི་ཆ་ནས་གཞན་དང་མི་འདྲ་བ་ཞིག་དང་། སྒྱུ་རྩལ་ཡོད་པའི་ཆ་ནས་རབ་རིབ་དང་སབ་སིབ་ཞིག་ཡིན། ད་དུང་དངོས་ཚུལ་ཡོད་པའི་ཆ་ནས་དོན་སྙིང་ལྡན་པ་ཡིན་མོད། ངས་ཕྱི་མ་གཉིས་ལ་དཔྱད་པ་བཏང་མེད། བརྡ་ཙམ་བཏང་ན། གནམ་གྱི་སྤྲིན་དཀར་འུ་གོའི་སྤྲིན་པ་ཡིན་པ་ནར་མ་སོན་པའི་བྱིས་པས་ཀྱང་ཤེས་པ་ནས་མགོ་བཙུགས་ཤིང་། བོད་ཀྱི་ལོ་རྒྱུས་ནང་བྱུང་མ་མྱོང་བའི་རིགས་རྒྱུད་ཀྱི་མེ་རྟ་གསོད་དགོས་པའི་སྡུག་བསྔལ་ཡང་མགོར་ཐོན་ཡོད་པ་སོགས་ཀྱིས་གཞུང་བསྲིངས། དབུགས་སྒང་དམར་པོ་གཅིག་ས་དེ་རུ་འཐིམས་ཤིང་། དབུགས་སྒང་དམར་པོ་གཅིག་འཕུར་འཕུར་ནས་སྤྲིན་དཀར་དུམ་བུ་ཞིག་ལ་འཐིམས་ཤིང་། བྱིས་པ་གཉིས་དང་ཨ་ཕ། ཨ་མ། ཇོ་མོ། སློབ་མ། དགེ་རྒན། ཐ་ན་ཁྲོམ་གྱི་བདག་པོ་བཅས་ཡོད་ཚད་པོས་དེ་ལ་ཅེར་བ་ལས། འགྲེལ་ལོག་མང་པོ་མི་དགོས་པར་གློག་བརྙན་འདིའི་སྒྱུ་རྩལ་དང་རྣམ་དཔྱོད་ནི། ཆེས་ཀློང་ཡངས་ཤིང་གཏིང་ཟབ་པ་ལ་ངེས་པ་ཐོབ་པ་ཞིག་མ་རེད་དམ།
སྤྱི་ལོ་ ༢༠༢༠ ཟླ་ ༡༢ ཚེས་ ༣༡ ཉིན།
བོན་རྒྱ་བསྟན་འཛིན་རབ་རྒྱས་ཀྱིས།
མཆན།
འུ་གོ། — ཨམ་སྐད། འུ་ཚང་གི་ཞེས་པ་ལྟ་བུའོ། །
བོད་ཀྱི་ཡིག་ཟམ་གྱིས་པདྨ་ཚེ་བརྟན་གྱི་བཅར་འདྲི་ཞིག་བོད་བསྒྱུར་བྱས་པ་དེར་གློག་བརྙན་འདི་བུད་མེད་སྐོར་གྱི་ཁོའི་གློག་བརྙན་ཐོག་མ་དང་། ནང་བའི་སྐྱེ་འཆིའི་རྣམ་གཞག་དང་ཕལ་ཆེར་འབྲེལ་བ་དང་། སྤྱིར་ན་བསོད་རྒྱལ་རིན་པོ་ཆེའི་དེབ་ཀྱི་ནང་དུ་སྐྱེ་འཆིའི་རྣམ་གཞག་གསལ་རབས་གླེང་ཡོད།
དབུགས་ལྒང་གློག་བརྙན་འདི་ནི། མདོར་བསྡུས་ན་བོད་ནང་གི་བོད་པར་ཕྱ་དམོད་བྱ་གཞི་ཙམ་ལས། ཆེ་བསྟོད་ཀྱི་རྣམ་པ་གཅིག་ཀྱང་མི་འདུག ང་ནི་ཡང་བསྐྱར་ལྟ་དང་། མི་རིགས་གཞན་པར་བསྟན་ཡ་ལ་ངོ་ཚ་བོ་འོངས་ས་འདུག
ངས་ཀྱང་དེ་སྔོན་གློག་བརྙན་དབུགས་ལྒང་ལ་བལྟས་པ་ཡིན། འོན་ཀྱང་འདིར་དབུགས་ལྒང་རང་གི་སྐོར་ལ་ཅི་ཡང་ཤོད་འདོད་མེད། ངས་ཅི་ཞིག་ཤོད་འདོད་པ་དེ་ཀརྡོ་རབ་འབྱམས་པའི་གློག་བརྙན་འདིར་ལྟ་སྟངས་ཀྱི་བསམ་བློ་ཅུང་ཙམ་གླེང་བར་འདོད་པ་ཡིན། གཅིག་བྱས་ན། ཀརྡོའི་བསམ་བློ་འདི། ལྷག་བསམ་རྣམ་དག་དང་། རང་མི་རིགས་ལ་ཤ་ཚའི་དུང་སེམས་ཤིག་གི་ངང་ནས་བྱུང་བ་ཡིན་སྲིད་མོད།
གང་ལྟར་བསམ་བློ་དེ་ལྟ་བུ་ནི་གནད་དོན་ཞིག་རེད་ལ། གློག་བརྙན་འདིས་གསལ་འདོན་བྱེད་བཞིན་པའི་སྤྱི་ཚོགས་ཀྱི་ཞན་ཆའི་གྲས་
ཀྱི་སྤང་བྱ་གལ་ཆེན་ཞིག་རེད།
སྤྱི་ཚོགས་ཀྱི་འཕེལ་རྒྱས་ནི། སྤྱི་ཚོགས་གང་དེའི་ཞན་ཆ་འཚོལ་ཞིབ་ཀྱིས། དེ་མུ་མཐུད་ནས་ལེགས་བཅོས་ཀྱིས། དུས་རབས་དང་མི་འཚམ་པ་དང་། དངོས་ཡོད་དང་མི་མཐུན་པའི་བསམ་བློ་དང་། སྤྱོད་ལམ་བསྒྱུར་བཅོས་བྱས་ནས་བྱུང་བ་ལས། ཞན་ཆ་སྦས་སྐུང་བྱས་ཏེ། སྣང་ལ་མ་ངེས་པའི་བསྟོད་དབྱངས་ཤིག་ལ་མགོ་འཁོར་བ་ནི། ཡར་རྒྱས་དང་མདུན་བསྐྱོད་ཀྱི་ལམ་བུ་དང་གཏན་ནས་ཁ་བྲལ་བ་ཞིག་རེད།
སྤྱི་ཡོངས་ཀྱི་ཆ་ནས་བཤད་ན། མི་སྒེར་ནས་སྤྱི་ཚོགས་ཀྱི་རྒྱ་ཆེ་ས་བར་སྐྱོན་ནམ་ཞན་ཆ་མེད་པ་ཞིག་ཧ་ཅང་དཀོན་ལ། ཞན་ཆ་ཡོད་པ་དེ་ཙམ་ཞུམ་དགོས་པ་དང་། ངོ་ཚ་དགོས་བྱེད་ཅིག་མིན་མོད། འོན་ཀྱང་། རང་ཉིད་ལ་ཞན་ཆ་མེད་པར་འདོད་པ་དང་། ཡང་ན། ཞན་ཆ་ཡོད་པ་ཁས་ལེན་རྒྱུའི་སྙིང་སྟོབས་མེད་པ་ནི། ཆེས་ངོ་ཚ་དགོས་པའི་གནད་དོན་དང་། མདུན་བསྐྱོད་བྱེད་ཐབས་མེད་པའི་འགག་རྩའི་ཉེན་ཁ་ཞིག་རེད། བོད་པའི་སྤྱི་ཚོགས་ནི། ད་དུང་འཚོ་བའི་རྣམ་བཞག་གི་ཕྱོགས་མང་དག་ཅིག་གི་ཐོག་ནས་རྗེས་ལུས་ཡིན་པ་དེར་རྩོད་པ་མེད་ལ། རྗེས་ལུས་ཀྱི་རྣམ་པ་སྣ་ཚོགས་ཤིག་གློག་བརྙན་སོགས་བརྒྱུད་ལམ་འདྲ་མིན་ནས་གསལ་འདོན་བྱེད་བཞིན་པ་ནི། སྒྱུ་རྩལ་ཐབས་ལམ་ཤིག་སྤྱད་ནས་རང་རེར་ངོ་སྤྲོད་བྱེད་བཞིན་ཡོད་པ་འདི་ཙམ་ནི་ཅིས་ཀྱང་ཤེས་དགོས། མ་གཞི་ནས་འཛམ་གླིང་གི་ཁྱིམ་ཚང་ཆེན་པོ་འདིར། ལོ་རེར་གློག་བརྙན་ཁྲི་ཕྲག་དང་འབུམ་ཕྲག་སྒོར་ཐོན་བཞིན་པའི་ནང་གི་བརྒྱ་ཆ་མང་དག་ཅིག་གིས། སྤྱི་ཚོགས་ཀྱི་ཞན་ཆ་གསལ་འདོན་བྱེད་བཞིན་ཡོད།
ཞན་ཆ་མང་དག་ཅིག་གསལ་འདོན་བྱེད་བཞིན་པ་དེ། མཐའ་གཅིག་ཏུ་གང་ཟག་བྱེ་བྲག་པ་དང་། སྤྱི་ཚོགས་ཀྱི་ཆ་ཤས་བྱེ་བྲག་པ་ཞིག་ནག་པོ་བཟོ་ཐབས་དང་། དེའི་མདུན་ལམ་འགོག་ཐབས་མིན་པར། མུ་མཐུད་ནས་ཡར་རྒྱས་གཏོང་ཐབས་ཡིན་པ་འདི་ཤེས་དགོས།
ཀརྡོའི་བསམ་བློར་བོད་པའི་སྤྱི་ཚོགས་ལ་ཞན་ཆ་ཡོད་མི་རུང་བ་དང་། ཞན་ཆ་ཡོད་པ་བཤད་ན། དེ་ནི་འཕྱ་སྨོད་བྱས་པ་ཞིག་ཡིན་ཁར།
ངོ་ཚ་དགོས་པར་འདོད་པ་འདིའི་ཐོག་ནས་བལྟས་ན། རང་རེའི་བསམ་བློའི་གོ་རྟོགས་དེ་ད་དུང་དུས་རབས་འགའི་རྗེས་ལུས་ཐེབས་འདུག དེ་ལྟར་བལྟས་ན། གློག་བརྙན་དབུགས་ལྒང་གིས་ཀརྡོ་རབ་འབྱམས་པ་སོགས་གཉིད་ལས་སད་དགོས་པའི་ཅུང་བརྡ་འཕར་མ་ཞིག་བཏང་ཡོད་ངེས།
་
ཁ་བརྡར་ཐང་མ་དང་པོར་བསྟན་དུས་ངས་ཀྱང་། བོད་པའི་གློག་བརྙན་རེད་ཟེར་དུས་ཞེན་ཁོག་བྱས་ནས་བལྟས་པ་ཡིན། ང་ཡང་གློག་བརྙན་འདི་ཐོག་མར་ལྟ་དུས་ནས་བོད་ནང་ལ་ད་ལྟ་ཡང་། བོད་ཕྲུག་ཚོས། སྒང་སྦུགས་ཀྱི་ཚབ་ལ་རླིག་ཤུབ་འཁྱེར་ན་ཡང་རྒན་པ་ཚོ་ལ་ངོ་ཚ་མེད་དམ་སྙམ་ནས་ང་རང་ངོ་ཚ་བྱུང་།
དེ་ནས་མར་མར་བལྟས་པ་ཡིན། གློག་བརྙན་ནང་ལ་ཆོས་སེམས་བ་ལ་ཆེ་ཚོད་མེད་པ་གྲོང་པས་ཆོས་གནས་ཚོས་ཀྱང་། རང་གི་ཕ་གྲོངས་ནས། རང་གི་བུར་སྐྱེས་པར་ལུང་བསྟན་བརྒྱབས་ཐུབ་པ་དང་། གྲོང་མིས་ཡིད་ཆེས་ཀྱང་བྱེད་ཐུབ་པ།
ཆོས་སེམས་མེད་པ་ནི་མེད་སྟངས་ངན་པ་རང་གི་ཕའི་སྐྱེ་བ་ཡིན་པ་ཧ་གོ་བ་དང་གཅིག རང་གི་ཕྲུ་གུ་ཡང་སྨན་ཁང་ནང་དུ་དམར་གསོད་བཏང་བ་གཉིས་ཀྱིས། གློག་བརྙན་བལྟས་ཚར་པ་དང་ང་ཉོབ་སོང་། མཆན་ཞིག་ཀྱང་བྲིས་ཐལ་ཤོར་སོང་།།
རྩོམ་འདི་ངེད་གློག་བརྙན་དྲ་པ་པྲ་དྲ་བཀོད་ན་ཆོག་གམ།