གློ་བུར་དུ་འཆི་བ་ནི་འཆི་བདག་ཐོན་པ་མིན།

—གཙང་པ་བཀྲ་སྟོབས།

གློ་བུར་དུ་འཆི་ལམ་དུ་ལྷུང་ཡོང་བ་འདི་ནི་དུས་རྒྱུན་དུ་ནས་རང་གིས་རང་ལ་བདག་སྐྱོང་ཡག་པོ་ཞིག་མ་བྱས་པའི་རྐྱེན་གྱིས་ཐིགས་པ་དུ་མས་རྒྱ་མཚོའི་ཁ་གང་བ་བཞིན་ཡིན་སྟབས། རྒྱུན་ལྡན་འཚོ་བའི་ཁྲོད་དུ་ཟ་འཐུང་འདུག་སྤྱོད་ཀྱིས་མཚོན་པའི་སྤྱོད་ལམ་མཐའ་དག་ལ་སྟངས་འཛིན་ནན་པོ་བྱ་དགོས་པ་ལས་འཆི་བདག་མགྲོན་པོ་ནང་བཞིན་ནང་དུ་གློ་བུར་དུ་འཛུལ་ཡོང་རྒྱུ་ཡོད་པའི་ནོར་ཚབས་ཆེ་བའི་ལྟ་སྟངས་འདི་འཛིན་མི་རུང་།   ན་ཚ་ཞེས་པ་འདིའང་གཟུགས་པོའི་ཕྱི་ནང་གང་རུང་ཞིག་གི་ཆ་ཤས་འགའ་ནས་ན་བའམ་ཚ་བ་དང་གཟེར་བ་བཅས་ཁོ་ན་ཡིན་པའི་ངོ་འཛིན་འདི་ཡང་ནོར་བ་ཡིན་པས་དུས་རྟག་ཏུ་ལུས་སྦྱོང་དང་སྤྱོད་ལམ་བཟའ་ཅ་བཅས་དོ་ནན་བྱ་དགོས། ན་ཚ་འདི་ནི་ཕྱི་ནང་གི་དབང་པོའི་བྱེད་ནུས་ཉམས་པའི་སྟབས་ཀྱིས་འབྱུང་ཞིང་བྱེད་ནུས་ཉམས་བྱེད་ཀྱང་རྒྱུ་རྐྱེན་སྣ་མང་ཡོད་ལ་སྤྱི་བཏང་ང་ཚོའི་ལུས་ཕུང་འདི་ནི་འཕྲུལ་འཁོར་ཞིག་དང་འདྲ་བ་ཡང་སེ་མཛེར་མལ་རྣམས་སྡམ་པ་དང་དེའི་བར་དང་ཟུར་སྟེང་འོག་སོགས་ཀྱང་ཡང་ཡང་ཕྱིས་བརྡར་གཙང་སེལ་བྱ་དགོས་མ་གཏོགས་ནམ་ཞིག་ནང་གི་ལྷུན་ལག་རྣམས་བུད་པའང་ཆད་པ་དང་ཆག་པ་གྲུམ་པ་སོགས་འབྱུང་སྟེ་དོན་སྐྱོན་ངན་པ་འབྱུང་བ་ལྟར་རོ།

དེར་བརྟེན་བདེ་ཐང་དང་ཚེ་སྲོག་ལ་གཅེས་པའང་རང་ཉིད་ཡུན་རིང་དུ་བདེ་ཐང་ངང་འཚོ་འདོད་མཁན་ཞིག་ཡིན་ཚེ་ང་ཚོས་ནམ་ཞིག་ན་བ་སོགས་བྱུང་ཚེ་ཅི་འདི་མེད་པར་ཁྱིམ་དུ་ཡོད་པའི་ནོར་རྫས་དང་སྒོར་མོ་སོགས་རྩ་ཆེ་བའི་དངོས་པོ་ཡོད་ཚད་དགོན་པ་ལ་འབུལ་བ་དང་རིམ་གྲོ་འདོན་པ་སྲོག་བསླུ་བྱེད་པ་སོགས་བྱེད་ཀྱི་ཡོད། དེ་ནི་བྱ་འདོད་ཀྱང་བྱེད་མ་ཤེས་པའི་ལས་སྟངས་ཤིག་ཡིན་པས་དུས་རྒྱུན་ནས་ཁྱེད་ལ་སྒོར་མོ་སོགས་ཡོད་ཚེ་སྨན་ཁང་ཚད་ལྡན་ཞིག་ཏུ་སྨན་པ་མཁས་པ་ཞིག་ལ་བསྟེན་ནས་གཟུགས་པོའི་ཕྱི་ནང་གི་དབང་པོ་ཡོད་དོ་ཅོག་ལ་བརྟག་དཔྱད་ཡག་པོ་བྱེད་དགོས་ཤིང་རབ་ན་ལོ་ལྟར་བརྟག་དཔྱད་བྱེད་དགོས་པ་མ་ཟད་སྨན་པར་ཚན་རིག་དང་མཐུན་པའི་ཉིན་རེའི་འཚོ་བ་བསྐྱལ་སྟངས་སོགས་ཀྱི་ཐད་ལ་ལམ་སྟོན་ཞུ་བ་བཅས་ཀྱི་ཚན་རིག་དང་མཐུན་པའི་ཉིན་རེའི་འགྲོ་འདུག་སྤྱོད་གསུམ་རང་ཉིད་ལ་གོམས་འདྲིས་ཡོང་བ་བྱ་དགོས།    འཕྲོད་བསྟེན་གྱི་ལམ་ལུགས་ནང་ནས་སྨན་བསྟེན་པའི་ཐབས་འདི་ནི་ཆེས་མཐའ་མའི་གདམ་ཀ་ཞིག་ཡིན་པ་འདྲ་བས་འདི་བསྟེན་ནས་ཁྱེད་ཉིད་ནད་ལས་ཐར་བའི་ངེས་པར་གཏན་ནས་མེད་པས་ཡིད་ལ་འཇོག་རྒྱུ་གལ་ལོ།