ཕྱི་ལོ་ ༢༠༡༣ ལོའི་ཟླ་༣ ཚེས་ ༡༤ ཉིན་ལྡི་ལིའི་མདོ་སྨད་ས་གནས་རྒྱུན་ལས་ཀྱི་ཚོགས་གཙོ་རྟ་མགྲིན་དང་། རས་པ། ངེད་གསུམ་གླིང་ཚ་ཕ་བུ་གསུམ་ལ་ལྟ་སྐོར་བྱེད་པར་སོང་ཞིང་། སྐབས་དེར་གླིང་ཚའི་ཨ་མ་སྡོམ་པོ་སྐྱིད་ཀྱིས་རྒྱལ་བ་རིན་པོ་ཆེས་བསྟན་པའི་ལམ་ཁ་ལ་ངའི་བུ་ཞུགས་ཀྱིན་ཡོད་པ་རེད། ལམ་ཁ་འདི་ལ་ངའི་བུ་གཅིག་པུ་མིན་པར་མི་སུ་མཉམ་ཞུགས་བྱས་ནའང་ངས་རྒྱབ་སྐྱོར་ཡོད། ན་ནིང་ཡིན་ནའང་ངའི་བུས་བློས་གཏོང་ཆེན་པོ་ཞིག་བྱས་ནས་སོང་བ་རེད། དེ་ལ་རྒྱབ་སྐྱོར་བྱས་ནས་ང་རང་ཉིད་ན་ནིང་མཉམ་ཞུགས་བྱས་པ་ཡིན་ལ་ད་ལོའང་མཉམ་ཞུགས་བྱས་པ་ཡིན། ང་ལ་མཚོན་ན་སྔོན་ཆད་རང་གི་བཟའ་ཚང་དང་ལྟོ་དོན་ལ་དཀའ་ལས་བརྒྱབ་པ་རེད། དེང་སྐབས་དེ་ཙམ་མིན་པར་བོད་མི་ས་ཡ་དྲུག་གི་ཆེད་དུ་དཀའ་ལས་རྒྱག་གིན་ཡོད་སྙམ་ན་སྤོབས་པ་སྐྱེ་ནི་དང་དགའ་ནི་ཞིག་རེད། ཁོང་གཉིས་ཀྱི་རྐང་པར་རྨ་རྒྱག་པ་སོགས་བྱེད་ཀྱིན་ཡོད་མོད། ང་ནི་དཀོན་མཆོག་གི་ཐུགས་རྗེ་ལ་རྐང་པའང་ན་གི་མི་འདུག ཡིན་ནའང་། ཉིན་བདུན་གྱི་རྗེས་ནས་ལོ་ཚད་ཀྱི་བཀས་བཅད་དབང་གིས་ངེད་གཉིས་ཕྱིར་ལོག་དགོས་ཀི་རེད། དེ་ནི་སེམས་ཁྲལ་ཆེ་ཤོས་རེད། ལོ་སྔོན་མར་རྒྱ་མིའི་དར་ཆ་མ་ཁྱེར་ན་མ་གཏོགས་མཉམ་ཞུགས་མི་བྱེད་ཅེས་འཇིགས་སྐུལ་བྱེད་མཁན་མང་པོ་བྱུང་ཐལ། དེ་དག་ལ་ད་མཉམ་ཞུགས་བྱེད་རོགས། ངས་བུས་བོད་མིའི་མཐུན་སྒྲིལ་ལ་བསམ་བློ་བཏང་ནས་རྒྱ་མིའི་དར་ཆ་འཁྱེར་གྱིན་ཡོད་པ་མ་རེད། ད་ཁྱེད་ཅག་གིས་ངའི་བུ་ལྟར་མི་ཚེ་བློས་བཏང་ནས་ཞུགས་མི་ཐུབ་ནའང་བདུན་ཕྲག་གཅིག་རེ་གཉིས་རེ་ཡིན་རུང་མཉམ་ཞུགས་བྱེད་རོགས་ཞེས་ངས་འབོད་སྐུལ་བྱས་པ་ཡིན། བོད་ནང་ལ་མཚོན་ན། བོད་མིའི་མཐུན་སྒྲིལ་ལ་བསམ་བློ་བཏང་ནས་གྲི་མར་ལ་གཡུག བོད་མི་ནང་ཁུལ་ལ་འཁྲུག་འཛིང་རྐུན་ཇག་མི་བྱེད་པའི་མནའ་འཇོག་པ་སོགས་བྱེད་ཀྱིན་ཡོད་པ་རེད། བླ་མའི་ཞལ་བཞུགས་ས་ནས་ང་ཚོས་རྩོད་མི་དགོས་པ་དག་བརྩད་བསྡད་ན་ང་དངོས་གནས་སེམས་སྐྱོ་གི བོད་ནང་མེར་བསྲེགས་བཏང་ཚར་བ་དང་བཞུགས་ཡོད་པ་དག་ཡིན་ནའང་རྡོག་རྩ་ཆིག་སྒྲིལ་བྱེད་རྒྱུ་དེ་ཁོང་ཅག་གི་རེ་བ་རེད་ལ། ངའི་རེ་བའང་དེ་ཡིན་ཞེས་བཤད་སོང་། དེ་རྗེས་གླིང་ཚ་ལ་གནད་དོན་ཁ་ཤས་ཐད་ནས་ང་ཚོས་དྲི་བ་དྲིས་པར་ཁོང་གིས་ལན་འདི་ལྟར་གནང་སོང་།
དྲི་བ། ཁྱེད་རང་གི་ཞི་བའི་འཐབ་རྩོད་འདི་ལྟ་གྲུབ་གང་ཞིག་ལ་གཞི་བྱས་ནས་བསླངས་པ་ཡིན།
གླིང་ཚ། ང་རང་གི་ཞི་བའི་འཐབ་རྩོད་ཅེས་པ་འདིའི་བསམ་བློའི་གཞི་བཅོལ་ས་ངོ་མ་ནི་རྒྱལ་བ་རིན་པོ་ཆེ་དང་གྷན་དྷི་རྗེ་ཟུང་གི་ལྟ་གྲུབ་ལ་གཞི་བཅོལ་བ་ཡིན་ཞེས་བཤད་ན་ཆོག་སྙམ། ད་བར་རྒྱལ་བ་རིན་པོ་ཆེའི་བཀའ་སློབ་སླེབས་པ་ཞིག་ངས་མ་ཀློག་པ་མེད་ཅེས་བརྗོད་ཆོག་རྒྱུ་རེད། ལྷག་པར་བྱམས་བརྩེ་ནུས་སྟོབས་ནི་ངས་བཀླག་བཀླགས་ནས་དེབ་ཀྱང་རལ་བར་གྱུར་སོང་། དེ་ནི་ང་ལ་ཤུགས་རྐྱེན་ཐེབས་ཆེ་ཤོས་དེ་ཡིན། གྷན་དྷི་རྗེ་ལ་མཚོན་ན་བོད་བསྒྱུར་བྱས་པའི་དེབ་དག་བཀླགས་པ་ཡིན། དེ་དག་ལས་ང་ལ་བསམ་བློ་འདི་བསྩལ་བྱུང་། ཞི་བའི་འཐབ་རྩོད་འདི་མི་སྒེར་བ་ཞིག་གི་ངོས་ནས་བསླངས་པ་རེད་དེ། འདི་ལ་ཆ་རྐྱེན་ཚང་དགོས་པ་ངོ་མ་ནི་དམ་བཅའ་དང་བློས་གཏོང་རེད། འདི་གཉིས་ཚང་སོང་ན་ཞི་བའི་འཐབ་རྩོད་པའི་མི་ལ་གྱུར་བ་རེད། ཡིན་ནའང་། ཡུལ་དང་དུས་ཚོད་ནི་བབ་བལྟས་ཀྱིས་ཡོང་བ་ཞིག་རེད།
དྲི་བ། ཁྱེད་ལ་བོད་དོན་འཐབ་རྩོད་པ་དང་སྤྱི་ཚོགས་དབར་གྱི་འབྲེལ་བ་ ལ་ལྟ་ཚུལ་ག་འདྲ་ཡོད།
གླིང་ཚ། མ་འོངས་པར་བོད་མི་རིགས་ཀྱི་འཐབ་རྩོད་སྟེང་མི་སྣ་སུ་ཞིག་བྱུང་ནའང་དེར་ལྟ་ཚུལ་ཡག་པོ་ཞིག་འཛིན་རྒྱུ་ཧ་ཅང་གལ་ཆེན་པོ་རེད། མི་རིགས་ལ་ཞབས་འདེགས་ཞུ་མཁན་དག་ལའང་མི་ཞིག་ཡིན་པའི་ཆ་ནས་ཞན་ཆ་ཡོད་རྒྱུ་རེད་དེ་དེ་ཐེར་འདོན་ལས་ཀྱང་དེས་ནུས་པ་ཅི་ཞིག་འདོན་གི་ཡོད་མེད་ལྟ་རྒྱུ་གལ་ཆེན་རེད་སྙམ། ང་རང་ཉིད་ལ་མཚོན་ན། གཞན་ལ་སྐྱོན་བརྗོད་ལས་རང་ཉིད་ཀྱི་ནོར་འཁྲུལ་ངོས་འཛིན་དང་སྐྱོན་སྤོང་ལ་འབད་ནས་རང་ཉིད་ཡར་རྒྱས་གཏོང་བར་འབད་ཀྱིན་ཡོད། ངས་རང་ཉིད་དང་རང་ཉིད་ཀྱི་བྱ་སྤྱོད་ལ་མཛུབ་མོ་འཛུགས་མཁན་དག་ལ་འཁོན་སེམས་ནམ་ཡང་བཅངས་མྱོང་མེད། མ་འོངས་པར་ལྷག་པར་འཚེ་མེད་ཞི་བ་ཞེས་པ་འདི་རང་ཉིད་སྒེར་ངོས་ནས་དངོས་སུ་ལག་བསྟར་བྱེད་ཐབས་ལ་མགོ་འཛུགས་ཀྱིན་ཡོད།
དྲི་བ། ཁྱོད་ཀྱིས་གསར་འགོས་གསལ་བསྒྲགས་སྐབས་གོམ་བགྲོད་རྗེས་མར་རྒྱ་དར་འཁྱེར་རྒྱུ་ཡིན་ཞེས་བསྒྲགས་པ་རེད། ཁ་སང་དངོས་སུ་མགོ་བཙུགས་དུས་མ་ཁྱེར་བ་རེད་དེ་ལ་དགོས་དམིགས་ཅི་ཞིག་ཡོད།
གླིང་ཚ། ཁྱེད་ཀྱིས་བཤད་པ་བདེན་པ་རེད། ངས་ཁ་སང་སྔོན་ལ་གོམ་བགྲོད་བསྐྱར་དུ་མགོ་འཛུགས་སྐབས་རྒྱ་དར་འཁྱེར་རྒྱུ་ཡིན་ཞེས་བཤད་པ་རེད། དེ་བདེན་པ་རེད། ཡིན་ནའང་། གོམ་བགྲོད་དངོས་སུ་མགོ་འཛུགས་དུས་རྒྱ་དར་མ་ཁྱེར་བ་དེར་རྒྱུ་མཚན་གཉིས་ཡོད། གཅིག་ནི་བོད་མི་རིགས་ཀྱི་མཐུན་སྒྲིལ་དང་། གཉིས་བོད་མི་རིགས་ཀྱི་སེམས་ཁམས་ལ་ཕོག་ཐུག་མི་འགྲོ་བ་དེ་གཉིས་རེད། དྲ་རྒྱའི་ནང་གི་གླེང་ཕྱོགས་ཙམ་མིན་པར་ཕྱོགས་ངོས་གང་ལ་བལྟས་ནའང་བོད་མི་རིགས་ཀྱི་འཁོན་སེམས་ཞི་མི་འདུག དེ་འཇགས་ཐབས་ལ་གནས་སྐབས་ངས་ངོས་ནས་རྒྱ་དར་ཕྱིར་འཐེན་བྱེད་རྒྱུ་ལས་གཞན་མི་འདུག དེ་ནི་མདོར་དྲིལ་ན་ངས་བོད་མི་རིགས་ཀྱི་མཐུན་སྒྲིལ་ལ་འགན་ཁུར་བ་ཞིག་ཡིན།
དྲི་བ། ཁྱེད་ཀྱིས་ད་ལྟ་ནས་རྒྱ་དར་ཁུར་བ་ཡིན་ན་མ་འོངས་པར་དབུ་མའི་ལམ་ནས་རྒྱ་བོད་ཞི་འགྲིག་དངོས་སུ་མགོ་འཛུགས་གོ་སྐབས་རེ་བྱུང་ན་ང་ཚོར་ཆ་རྐྱེན་བགྲང་རྒྱུ་མེད་པ་དེ་འདྲར་འགྱུར་རྒྱུ་རེད་བསམ་ཨེ་མྱོང་།
གླིང་ཚ། ན་ནིང་ངས་ལྡི་ལིར་ཐོན་གྲབས་ཡོད་དུས་རྒྱ་དར་འཁུར་རྒྱུ་ཡིན་ལབ་དུས་ཉན་མཁན་ཚང་མ་ཧང་སངས་ཡོད་པ་རེད། དེ་ནི་སྤྱིར་བཏང་ང་ཚོ་མི་མང་པོ་ཞིག་གིས་སེམས་ནང་ལ་དགྲ་ཞེས་པ་འདི་ལས་འདྲ་མཉམ་དང་གྲོགས་ཞེས་པ་འདི་ལེན་ཐུབ་ཀྱི་མི་འདུག དེ་ངའི་ལྟ་ཚུལ་ཡིན། ང་ལ་མཚོན་ན། འཚེ་མེད་ཞི་བ་མི་རང་ཉིད་ནས་ལག་བསྟར་བྱེད་དགོས་པའི་ངེས་ཤེས་ཤིག་ངའི་སེམས་གཏིང་ལ་གྲུབ་ཡོད་པ་རེད། གཞན་ལ་བསྐྲུན་ཐུབ་མིན་ངས་མི་ཤེས། འཚེ་མེད་ཞི་བ་ཞེས་པ་འདི་ངས་ལུས་ངག་ཡིད་གསུམ་གྱི་སྟེང་ལ་ངོས་འཛིན་གྱིན་ཡོད། སྤྱིར་ན་དགྲ་ཞེས་པ་ཞིག་རྩ་བ་ནས་མེད་པའི་བསམ་བློ་ཞིག་ང་ཚོར་ཤར་དགོས་དགོས་ཀི འཚེ་མེད་ཞི་བའི་ཡུལ་ཞིག་ངོས་བཟུང་ན་གལ་སྲིད་མི་ཞིག་གིས་ང་ལ་མེ་མདའ་བཙུགས་ནའང་ངས་མེ་ཏོག་སྤྲོད་ཨེ་ཐུབ་འབད་རྒྱུ་དེ་ངའི་འགན་རེད། དཔེར་ན། རྒྱལ་བ་རིན་པོ་ཆེའི་འདྲ་མཉམ་གྱི་ལྟ་བ་དང་ཀུན་ཁྱབ་ཀྱི་སེམས་ཁུར་སོགས་ཚང་མ་འདྲ་མཉམ་དང་འཚེ་མེད་ཞི་བ་རང་གཞི་བཅས་འདུག་སྙམ།
དྲི་བ། ཁྱོད་ཀྱི་ཞི་བའི་འཐབ་རྩོད་འདི་ཆབ་སྲིད་དང་ཆོས་ལུགས་སོགས་དེང་སང་གི་རིག་ཚན་གང་ལ་གཏོགས་ནི་རེད། གལ་སྲིད་གཏོགས་ན་དཔེ་མཚོན་འདྲ་སྟོན་རྒྱུ་ཨེ་ཡོད།
གླིང་ཚ། ངའི་ཞི་བའི་འཐབ་རྩོད་འདི་དེང་སང་གི་ཆབ་སྲིད་ཅེས་པ་འདིའི་ཁོངས་སུ་གཏོགས་རྒྱུ་མ་རེད། ངས་ནི་མིའི་རིགས་ཀྱི་ལྷན་སྐྱེས་ཀྱི་བདེན་པ་ཞེས་པ་འདི་གཙིགས་སུ་བཟུང་ཡོད། འདིའི་སྟེང་ནས་ངས་ཞི་བའི་འཐབ་རྩོད་འདི་བསླངས་པ་རེད། ང་ཚོ་བོད་མི་རིགས་ལའང་ལྷན་སྐྱེས་ལ་མིའི་རིགས་ཀྱི་བདེན་པ་དེ་ཡོད་པ་རེད། དེ་རྩོད་པའི་བདེན་པ་དང་རང་དབང་ཡང་ཆ་ཚང་ཡོད་པ་རེད། འདི་མུ་མཐུད་ན་དུས་ཚོད་ལ་འཚམས་མིན་མི་ཤེས་ལ། ཕྱོགས་གཞན་ནས་ངས་དེ་བཤད་ན་འཚམས་པོ་མི་འདུག ངའི་མི་ཚེ་བརྒྱུད་རིམ་དེ་ཤེས་ཡོན་གྱི་སྡེ་ཚན་ནས་འཚར་ལོངས་མ་བྱུང་བས་ང་ལ་དེའི་ཤེས་ཚད་ཀྱང་མི་འདུག
དྲི་བ། ཁྱོད་ཀྱིས་གོང་ནས་བདེན་པ་དང་འཚེ་མེད་ཞི་བ་ཞེས་པ་དེ་ཤུགས་ཆེན་པོ་བཤད་ཀྱིན་འདུག དེ་དང་རྒྱ་དར་འཁྱེར་བ་གཉིས་ལ་འབྲེལ་བ་ཅི་ཞིག་ཡོད་པ་རེད།
གླིང་ཚ། ང་ལ་མཚོན་ན་རྒྱ་དར་འཕྱར་མ་བཅུག་པ་དེ་ངའི་མགོ་ནས་སྐྲ་རྐང་གཅིག་བལ་བཏང་ནི་རེད། ང་ལ་མཚོན་ན་སྐྲ་རྐང་གཅིག་བལ་ན་མ་བལ་ན་ཁྱད་པར་ཅི་ཡང་མི་འདུག ཡིན་ནའང་། གཞན་དག་ལ་མཚོན་ན་དེ་ནི་ཧ་ལས་པ་ཧང་སངས་པ་ཞིག་རེད། ཁོང་ཚོས་ང་སྐྱོན་བཙལ་ས་ཆེ་ཞིག་རེད་དེ། ང་ལ་མཚོན་ན་དེ་ནི་ཞི་བའི་འཐབ་རྩོད་ཀྱི་གལ་ཆེན་ཅི་ཡང་མ་རེད།
དྲི་བ། ཁྱོད་ཀྱིས་ང་ཚོ་མི་མང་གི་འཁོན་སེམས་ཞི་མི་འདུག་ཅེས་བཤད་ཀྱིན་འདུག དེ་ཅི་བཤད་ཀྱིན་ཡོད་པ་རེད།
གླིང་ཚ། ང་ཚོ་བོད་མི་རིགས་ཀྱིས་དབུ་མའི་ལམ་དང་ཆེས་མཐོའི་རང་སྲིད་རང་སྐྱོང་། དོན་དངོས་ལ་གཉིས་ཕན་ཞེས་པ་འདིའི་ལམ་དུ་བསྐྱོད་པ་ལ་འཁོན་སེམས་མ་ཞི་ཐབས་མེད་རེད་ལ། ངས་བསླངས་པའི་ཞི་བའི་འཐབ་རྩོད་ཅེས་པ་འདིའང་ཧ་ཅང་ཁེགས་པོ་རེད། ངས་འདི་འདྲ་བསམས་མྱོང་ལ་ཉིན་ཐོ་ཞིག་གི་ནང་དུའང་བྲིས་ཡོད། དཔེ་བཞག་ན། རང་བཙན་རྩོད་རྒྱུའི་ལམ་ཁ་འདི་ལས་སླ་བོ་རེད། འདིས་རང་ཕྱོགས་གཅིག་པུར་འགན་ཁུར་ན་འགྲིག་གི གཞན་དེས་རང་གཞན་གཉིས་ཀར་འགན་ཁུར་དགོས་ཀི དེའི་འགན་ཧ་ཅང་ལྕི་མོ་རེད། དེང་སང་འཛམ་གླིང་གི་ཆབ་སྲིད་ཅེས་པ་འདི་རང་གཙོ་བོར་འཛིན་པའི་གཞུང་ལུགས་ཤིག་ལ་ངོས་བཟུང་ནས་བསྡད་ཡོད་པ་རེད། གལ་སྲིད་མི་ཅེས་པ་འདིས་རང་གཙོར་བོར་འཛིན་པའི་གཞུང་ལུགས་ཤིག་རྒྱུན་འཛིན་བྱེད་རྒྱུ་ཡིན་ན། ཕལ་ཆེར་རྒྱ་ནག་གི་ད་ལྟའི་གཞུང་འདི་ལ་བདེན་ཁ་སྤྲོད་དགོས་པ་རེད་སྙམ། ཁོ་ཚོས་རངགི་གཞུང་ཁོ་ན་གཙོ་འཛིན་ལས་གཞན་ཞིག་ངོས་ལེན་བྱེད་ཀྱིན་ཡོད་པ་མ་རེད། འདིའི་སྟེང་ནས་ང་ཚོར་ར་ཞིག་སྤྲད་འདུག གལ་སྲིད་མི་ཅེས་པ་འདིས་བདེན་པ་རྩོད་རྒྱུ་ཡིན་ན་དེ་ཧ་ཅང་གི་ལྗིད་ཁོག་ཅན་ཞིག་རེད།
དྲི་བ། ཁྱོད་ཀྱི་ཞི་བའི་འཐབ་རྩོད་འདི་ཁྱོད་ཀྱི་རྩོམ་ཡིག་གང་གི་ནང་ན་གསལ་བ་རེད།
གླིང་ཚ། མང་པོ་ཞིག་ངས་འབྲི་ཤེས་ཀི་མེད་ལ་ཕོད་ཀིའང་མེད། ང་ལ་དགོས་པ་དུས་ཚོད་དང་ལྷིང་འཇགས་རེད་དེ། ད་ལྟ་ལྷིང་འཇགས་མ་རེད་ལ་ཁོར་ཡུག་ཀྱང་མི་འཛོམས་ཀི ཕྱོགས་གཞན་ནས་བྲིས་མ་བྲིས་མི་འདུག བཙན་བྱོལ་སྤྱི་ཚོགས་འདི་སྔོན་མ་ཞིག་ལ་ཁ་ཡར་འཁོར་གྱིན་ཡོད་ཚོད་གདའ་ནའང་། དེང་སང་རྦད་དེ་ཁ་ཐུར་ལ་འཁོར་ཚར་ཡག་རེད་སྙམ་གྱིན་འདུག དཔེར་ན། སྔོན་མ་དགུ་བཅུའི་ནང་ལ་ཡོང་མཁན་ཚང་མ་རྒྱལ་བ་རིན་པོ་ཆེ་དང་བོད་གཞུང་ཡིད་ལ་བཅངས་ནས་ཡོང་བ་ཤ་སྟག་རེད་དེ། དེང་སང་བཙན་བྱོལ་ལ་ཡོང་བའི་བསམ་བློའི་གོ་རིམ་བརྗེས་ནས་ཡོང་གི་འདུག དེ་བཞིན་འདི་ནས་འཚར་ལོངས་བྱུང་བ་རྣམས་ཀྱང་དེ་བཞིན་སྟེང་འོག་བརྗེས་ནས་ཡོང་གི་འདུག དེ་ནི་མི་གཅིག་གཉིས་ཙམ་མ་རེད་ཚང་མའི་བསམ་བློ་བརྗེས་འདུག དེའི་རྒྱབ་ལྗོངས་ང་ཚོས་ལས་སླ་བོར་ཤེས་རྟོགས་ཐུབ་ཀྱི་འདུག
དྲི་བ། འཐབ་རྩོད་ཅིག་ཡིན་ན་མཇུག་འབྲས་དགོས་ཀྱི་འདུག དེ་ནི་ཤར་ནུབ་ཀྱི་མི་རིིགས་འཐབ་རྩོད་པ་ཚང་མ་དེ་འདྲ་རེད། ཁྱོད་ཀྱིས་བློས་གཏོང་ཇི་འདྲ་བྱས་ནའང་མཇུག་འབྲས་ཅུང་དགོས་པའི་གདེང་ཚོད་དགོས་པ་རེད། གལ་སྲིད་ཁྱོད་ཀྱི་ཞི་བའི་འབོད་ཚིག་དོན་ཚན་ལྔ་ལ་འབྲས་བུ་མེད་པ་གཏན་འཁེལ་ན་ཁྱོད་ཀྱིས་འདི་ཕྱིར་བསྡུ་བྱེད་རྒྱུ་ཨེ་ཡིན།
གླིང་ཚ། ངའི་བློས་གཏོང་ཞེས་པ་འདི་ཁྱོད་ཀྱིས་ཕྱོགས་གཅིག་ནས་ཧ་གོ་འདུག་ལ། ཕྱོགས་གཅིག་ནས་ཧ་གོ་མི་འདུག ངས་ནི་བློས་གཏོང་དགོས་པ་ཆ་ཚང་བཏང་ཡོད་པ་རེད། མི་ཞིག་ལ་མཚོན་ན་ཚེ་སྲོག་གལ་ཆེན་དུ་བརྩི་གྱིན་ཡོད་ནའང་། ངའི་བསམ་ཚུལ་ལ་མི་ཞིག་གི་ཚེ་སྲོག་ནི་བདེན་པ་དང་བསྡུར་ན་ཧ་ཅང་རིན་ཐང་ཆུང་ཆུང་ཞིག་རེད། ངའི་བློས་གཏོང་གི་ཁྲོད་ན་དམ་བཅའ་ཞིག་ཡོད་པ་རེད། དམ་བཅའ་ནི་རྒྱལ་བ་རིན་པོ་ཆེ་བོད་ལ་ཕེབས་རྒྱུ་དང་བོད་ལ་རང་དབང་ཐོབ་རྒྱུ་རེད། གལ་སྲིད་དེ་མ་བྱུང་ན་ངའི་མི་ཚེ་འདི་ཞི་བའི་འཐབ་རྩོད་ཁྲོད་བསྟིམས་ནི་རེད། ངས་ཞི་བའི་འཐབ་རྩོད་བྱེད་སའི་ཡུལ་དངོས་ནི་བོད་རེད། ཞི་བའི་གོམ་བགྲོད་ནི་ཡུལ་དེར་སླེབས་ཐབས་ཀྱི་ཞི་བའི་འཐབ་རྩོད་ཀྱི་ཆ་ཤས་ཤིག་རེད།
དྲི་བ། ཁྱོས་གོམ་པ་རེ་རེ་བཞིན་སྤོ་དུས་གཏན་ནས་བརྗེད་མི་ཐུབ་པ་གང་རེད།
གླིང་ཚ། ངས་གོམ་པ་རེ་རེ་བཞིན་སྤོ་དུས་བརྗེད་མི་ཐུབ་པ་བདེན་པ་རེད། མི་ཞེས་པ་བདེན་པར་དགའ་བ་བཤད་མ་དགོས་པ་མ་རེད། ཡིན་ནའང་། བདེན་པ་བཤད་པ་དང་བདེན་པ་ལས་པ། བདེན་པའི་ཆེད་དུ་ཡར་ལངས་མི་ཐུབ་པ་དེར་ང་ཧང་སངས་ཀྱིན་ཡོད། ཕྱོགས་གཅིག་ནས་བཤད་ན་ཁེགས་མི་འདུག ང་རང་ཉིད་ལ་མཚོན་ནས་བཤད་ནའང་ལོ་ཉི་ཤུའི་གོང་ནས་བདེན་པ་ཞེས་པ་འདིར་འགྲོགས་རེས་བྱས་ནའང་ད་བར་དུ་ཡོད་ཚད་བློས་བཏང་ནས་ཞུགས་མ་ཐུབ་པ་རེད།
དྲི་བ། ཁྱོས་བལྟས་ན་བདེན་པ་ཞེས་པ་དེ་ཅི་ཞིག་རེད།
གླིང་ཚ། བདེན་པ་ཞེས་པ་ནི་མིས་རོལ་མྱོང་བྱེད་དགོས་པ་ཞིག་རེད། དེ་བྱས་ན་ད་གཟོད་ཐག་གཅོད་ཅིག་ཡོང་གི་རེད། དེ་མ་གཏོགས་མིའི་དབར་རྒྱག་རེས་བྱེད་དུས་ང་ལ་བདེན་པ་ཡོད་ཁོ་ལ་བདེན་པ་མེད་ཅེས་པ་དེ་མ་རེད། བདེན་པ་ཞེས་པ་འདི་མཐར་ཐུག་ན་མིའི་རིགས་ཀྱི་ཚེ་སྲོག་གི་རིན་ཐང་ངོ་ཤེས་ན་ངས་བཤད་ཀྱིན་པའི་བདེན་པ་ཞེས་པ་དེ་ཡིན། དེང་སང་ངས་ནི་བཤད་རྒྱུ་གཙོ་བོར་འཛིན་གྱིན་མེད། ང་རང་ཉིད་ཀྱི་སྟེང་ནས་འཚེ་མེད་ཞི་བ་འདི་ཇི་ཙམ་ར་སྤྲོད་ཐུབ་མིན་ལ་ལྟ་གིན་ཡོད། ཅེས་ང་ཚོའི་དྲི་བ་རེ་རེ་བཞིན་ལན་འདེབས་གནང་རྗེས། མ་བུ་གསུམ་གྱིས་བསྐྱར་དུ་རྡོག་ཁྲེས་ཁུར་ནས་ལམ་ལ་བུད་སོང་།
འདྲ་པར། བོད་ཀྱི་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེས་ཞི་བའི་གོམ་བགྲོད་སྔ་ཕྱི་གཉིས་ལ་གོན་པའི་ལྷམ་ཡིན།
བོན་རྒྱ་བསྟན་འཛིན་རབ་རྒྱས་ཀྱིས།
གུས་བཀུར་ཞུ།
ཁྱོས་འགྲོ་ནི་རེད།
ཅེས་པ་འདི།
ཁྱོད་ཀྱིས་ འགྲོ་བགྱིད་ རེད།
ངོ་མ་སྙིང་ནས་ཡིད་རངས་ཞུ། ཁྱེད་ཕ་མ་གསུམ་པོར་་་་་
གཅིག་ནི་བོད་མི་རིགས་ཀྱི་མཐུན་སྒྲིལ་དང་། གཉིས་བོད་མི་རིགས་ཀྱི་སེམས་ཁམས་ལ་ཕོག་ཐུག་མི་འགྲོ་བ་དེ་གཉིས་རེད་ཟེར་་་་་་་ དངོས་གནས་རང་་་་དེ་བསམ་བློ་ཡག་པོ་ཞི་དྲག་རེད། གླིང་ཚར་བཀའ་དྲིན་ཆེ་ཞུ་འདོད་བྱུང་། ཡང་ དེ་ནི་མདོར་དྲིལ་ན་ངས་བོད་མི་རིགས་ཀྱི་མཐུན་སྒྲིལ་ལ་འགན་ཁུར་བ་ཞིག་ཡིན་ཟེར་་་
བདེན་པ་རེད། དངོས་སུ་གོམ་བགྲོད་གཉིས་པ་མགོ་འཛུགས་པའི་ཉིན་མོར་དར་དམར་མ་ཁྱེར་བ་གོ་ཐོས་བྱུང་བས་དགའ་བོ་བྱུང་ལ། འགན་ཁུར་གྱི་བསམ་བློ་ལྡན་པའི་གོམ་བགྲོད་པ་དངོས་གནས་ཞིག་ད་ཆགས་སོང་དྲན་ནས་དགའ་ཡོད།
ངས་རང་ཉིད་དང་རང་ཉིད་ཀྱི་བྱ་སྤྱོད་ལ་མཛུབ་མོ་འཛུགས་མཁན་དག་ལ་འཁོན་སེམས་ནམ་ཡང་བཅངས་མྱོང་མེད་ཟེར་་་་་་སྐུ་ཉིད་ནས་ཕྱོགས་གཞན་ཞིག། རང་བཙན་རྩོད་རྒྱུའི་ལམ་ཁ་འདི་ལས་སླ་བོ་རེད། འདིས་རང་ཕྱོགས་གཅིག་པུར་འགན་ཁུར་ན་འགྲིག་གི རང་བཙན་རྩོད་རྒྱུའི་ལམ་ཁ་འདི་ལས་སླ་བོ་རེད། འདིས་རང་ཕྱོགས་གཅིག་པུར་འགན་ཁུར་ན་འགྲིག་གི་ཟེར་་་་
འདི་གཞོན་ནུ་ལ་བཅངས་པས་བརྡ་ལན་ཞིག་མིན་ན་སྙམས།
དེ་ལྟར་མིན་ན་གཞུངས་དང་དམངས་ཕལ་ཆེ་བ་རང་བཙན་གྱི་གཞུང་ལམ་ཆེ་པོ་འདི་རྒྱུད་ནས་ཕེབས་མ་ཐུབ་པ་དེའང་ལས་སླ་ཐག་ཆོད་པ་ཡིན་ནམ། གྲུབ་འབྲས་ཅེས་མེད་ཚོད་གསུང་ན་ཅིག་ཤོས་ལའང་མ་ལྡན་ཕྱིར།
རྩེ་མོ་ཡིན་ནོ། གོམ་བགྲོད་པར་སྒྲུབ་པའི་མཆོད་པ་ཡིན། གསུངས་རབ་མ་ལུས་འགལ་མེད་དུ་འཆར་བའི་ཆེ་བ་གསུང་པ་ལྟར། སྐུ་ཉིད་ནས་ཀྱང་ལམ་བུ་འདི་གཉིས་འགལ་མེད་དུ་འཛིན་ནས་ས་ཡ་དྲུག་གི་རང་དབང་ཐོབ་བྱེད་ཀྱི་ཐབས་སུ་བཟུང་ནས་གོམ་འགྲོད་དུ་ཕེབས་ན་ག་འདྲ་གཟི་བརྗིད་ལ། གླིང་ཚ་གོམ་བགྲོད་པ་བྱ་བ་ལམ་འགྲོ་ཡོང་བ་ཤོག།། །།
ཕོ་རྒོད་གླིང་ཚ་ཚེ་བརྟན་རྡོ་རྗེ་ལགས། ཁྱེད་ཀྱིས་ད་ཐེངས་བོད་དོན་འཐབ་རྩོད་ཀྱི་གོམ་བགྲོད་སྐབས་དམར་པོའི་ཁྲག་དར་དེ་གནས་སྐབས་འཕྱར་མི་འདུག་ན་གུས་པས་གུས་བཀུར་ཞུ་ཡི་ཡོད། ཡིན་ནའང་གུས་ཀྱི་རེ་བར་ཁྱེད་ཀྱིས་གནས་སྐབས་ཙམ་མིན་པར་དམར་པོའི་ཁྲག་དར་མཁའ་དབྱིངས་སུ་འཕྱར་ཞིང་གུས་བརྩི་བྱེད་དགོས་དོན་མི་འདུག་ལ་ཁྱེད་ཀྱིས་ད་ནས་བཟུང་བོད་གཞི་བྱེས་གཉིས་ཀྱི་གཞུང་མང་ཡོངས་རྫོགས་དམར་པོའི་ཁྲག་དར་འོག་དབང་དུ་མ་བསྡུས་བར་རྒྱ་དར་གནམ་ལ་མ་འཕྱར་རོགས་ཞུ་རྒྱུ་ཡིན། ད་དུང་ངས་ཞུ་འདོད་པ་ཞིག་ནི་ཁྱེད་ཀྱིས “རང་བཙན་རྩོད་རྒྱུའི་ལམ་ཁ་འདི་ལས་སླ་བོ་རེད། འདིས་རང་ཕྱོགས་གཅིག་པུར་འགན་ཁུར་ན་འགྲིག་གི གཞན་དེས་རང་གཞན་གཉིས་ཀར་འགན་ཁུར་དགོས་ཀི དེའི་འགན་ཧ་ཅང་ལྕི་མོ་རེད” ཅེས་གསུངས་འདུག དེ་ན་རྒྱ་གཞུང་གིས་ད་བར་རང་བཙན་གྱི་འཐབ་རྩོད་དོར་ན་དབུ་ལམ་གྱི་ལྟ་སྒྲུབ་དེ་ཉིད་ལ་གཙིགས་སུ་བཟུང་ནས་གཉིས་སྨན་གྱི་གྲོས་མོལ་བྱེད་ཀྱི་ཡིན་ཞེས་ལབ་མྱོང་མེད་ལ་གྲུབ་འབྲས་ཀྱང་ཐོན་མེད་པ་བོད་རྒྱ་ཞི་མོལ་གྱི་ཚོགས་གཙོ་རྒྱ་རི་བློ་གྲོས་རྒྱལ་མཚན་ལགས་དམིགས་བསལ་སྐུ་ཚབ་ནས་རྩ་དགོངས་ཞུས་སྐབས་གཏམ་བཤད་ནས་ཤེས་ཐུབ། དེ་ལས་ཁྱེད་ཀྱིས་གསུངས་པ་ལྟར་ལས་སླ་ལ་ལོ་རྒྱུས་དང་དྲང་བདེན་ཡོད་པའི་རང་བཙན་འཐབ་རྩོད་རྒྱུན་འཁྱོང་བྱེད་ན་རིན་ཐང་ཆེ་བ་ལས་ངོ་མནོང་དགོས་པ་མི་འདུག་སྙམ། ཡང་ཁྱེད་ཀྱིས “དེང་སང་འཛམ་གླིང་གི་ཆབ་སྲིད་ཅེས་པ་འདི་རང་གཙོ་བོར་འཛིན་པའི་གཞུང་ལུགས་ཤིག་ལ་ངོས་བཟུང་ནས་བསྡད་ཡོད་པ་རེད། གལ་སྲིད་མི་ཅེས་པ་འདིས་རང་གཙོར་བོར་འཛིན་པའི་གཞུང་ལུགས་ཤིག་རྒྱུན་འཛིན་བྱེད་རྒྱུ་ཡིན་ན། ཕལ་ཆེར་རྒྱ་ནག་གི་ད་ལྟའི་གཞུང་འདི་ལ་བདེན་ཁ་སྤྲོད་དགོས་པ་རེད་སྙམ” ཞེས་གསུངས་འདུག དེ་ནི་ཁྱེད་ཀྱི་ལྷག་བསམ་ལ་སླད་མེད་རུང་རྒྱ་ནག་གུང་ཁྲན་སྲིད་གཞུང་གིས་དུས་ཀུན་གཞི་མེད་ཀྱི་དྲིལ་བསྒྲགས་རྫུན་མ་དང་ལོག་གཏམ་སྤེལ་བཞིན་པར་རྒྱབ་བསྐྱོར་དང་མི་མཐུན་བྱས་འདུག་ལ། ང་ཚོའི་དྲང་བདེན་དང་ཐོབ་སྐལ་ཡོད་པའི་བོད་རང་བཙན་གྱི་འཐབ་རྩོད་དེ་ཉིད་ཀྱང་རང་གཙོ་བོར་འཛིན་པའི་གཞུང་ལུགས་ཤིག་ལ་ངོས་འཛིན་བྱས་འདུག དེ་ནི་ནོར་འཁྲུལ་གནམ་སར་མ་ཤོང་པ་ཞིག་རེད་སྙམ། རང་བཙན་ནི་༧གོང་ས་མཆོག་གིས་གསུངས་པ་ལྟར་ཐོབ་ཐང་དང་ལོ་རྒྱུས་ཡིན་པ་ལས་རང་གཙོ་བོར་འཛིན་པར་ངོས་འཛིན་བྱས་ན་མི་འགྲིག རྩ་བས་ཁྱེད་ནང་མི་རྣམས་ཀྱི་ལྷག་བསམ་དང་བློས་གཏོང་ལ་ཡི་རངས་དང་གུས་བརྩི་ཞུ་ཡི་ཡོད།
རྒྱ་ཆེ་ཀློག་པ་པོ་རྣམས་ལ་ཞུ་རྒྱུར། “མི་མཐུན” ཡིག་ནོར་ཤོར་འདུག་ན་” མོས་མཐུན”་ལ་ནོར་བཅོས་གནང་རོགས་ཞུ།
ཞི་བའི་འཐབ་རྩོད་པ་གླིང་ཚ་ལགས།ཁྱེད་ཀྱི་སྙིང་སྟོབས་ལ་རྗེས་སུ་ཡི་རང་ཞུ་བཞིན་ཡོད་ལ། མ་ཟད་ཁྱེད་ཀྱི་ལན་འདེབས་གནང་བ་དག་ཡང་ཚིག་ཤིན་ཏུ་རྣོ་ངར་ལྡན་འདུག་པས་ལྷག་ཏུ་དགའ་སོང་།ཆབ་སྲིད་ཀྱི་འཐབ་རྩོད་པ་ཞིག་ཡིན་དུས་བསམ་བློ་རྣོ་བོ་དགོས་པ་གལ་ཆེན་རེད།
རྒྱལ་གཅེས་པ་ཁོང་ལ་སེམས་གཏིང་ནས་ཐུགས་རྗེ་ཆེ་ཞུ་རྒྱུ་ཡིན། ལོ་རྒྱུས་ཀྱིས་ཁྱོད་གཏན་ནས་བརྗེད་མི་སྲིད། མ་འོངས་པར་་་་་་་་་་་་་་་་་་་་་་་
ངས་མ་ནིང་གླིང་ཚས་རྒྱ་དར་ཤར་རྗེས་ཁོའི་མི་ཚེར་རྒྱུས་ལོན་མང་པོ་བྱས་བ་ཡིན་ལ་རྒྱ་དར་ཤར་བར་ངོ་རྒོལ་ཡང་བྱས་ཡོད་། གང་ལྟར་དེ་རིང་ངས་ཁོ་བོས་རྒྱ་དར་མ་ཤར་བ་ལ་བཟང་གི་ཞེས་བཤད་ཀྱི་ཡོད་ལ་མུ་མཐུད་ནས་མཇུག་མ་ཡོད་པའི་རེ་བའང་ཞུ་བཞིན་ཡོད་།
ན་ནིང་ཞེས་བཅོས་ཡོད
ཁྱོད་ཀྱི་སྙིང་སྟོབས་དང་ལྷག་བསམ་ལ་ངའི་ནམ་ཡིན་ཡང་རྗེས་སུ་ཡི་རངས་དང་གུས་བཀུར་ཞུ་བཞིན་ཡོད། ཁྱོད་ནི་ངའི་སེམས་ཁོང་གི་དཔའ་རྒོད།
གླིང་ཚ་ལགས་ཀྱིས་ཁ་ཉིན་རྒྱ་མིའི་ཁྲག་དར་འཕྱར་གྱི་ཡིན་ཟེར་བ་གོ་དུས་དངོས་གནས་སེམས་ཕམ་ཆེ་དྲག་ནས་མཆན་གྱི་ནང་དུའང་མི་འདོད་པའི་ཚུལ་མང་པོ་བྲིས་པ་ཡིན། དངོས་སུ་ཕེབ་དུས་ཁྲག་དར་ཁྱེར་མ་སོང་བས་དགའ་ནས་ཡོད། སྐུ་ཉིད་ཀྱིས་བདེན་པ་ནི་མི་ཞིག་གི་ཚེ་སྲོག་ལས་རྩ་་ཆེ་བ་རེད་གསུང་འདུག་ལ་ཡིན་ཡང་ཡིན་པ་རེད། དེས་ན་བོད་པས་རང་བཙན་རྩོད་ན་དེ་བདེན་པ་རེད་དམ་མ་རེད་ཅེས་ངས་ཁྱེད་ལ་དྲི་བ་ཞིག་མ་ཞུས་རང་ཞུས་རེད། ཁྱེད་ཀྱིས་ཀྱང་བདེན་པ་གཞི་ལ་བཞག་པའི་ལན་ཞིག་འདེབས་ཡོང་བའི་རེ་བ་དང་ཡིད་ཆེས་བྱེད་བཞིན་སྒུག་ནས་ཡོད། མཐའ་དོན་ཁྱེད་ཀྱིས་གཟུགས་པོ་ལ་འཕྲོད་སྟེན་ཡག་པོ་བྱེད་རོགས་ཞུ།
རྒྱ་དར་བོད་དར་ག་རེ་ཤར་ན་ཤར་བོད་སྤྱིར་ལ་ཕན་པའི་བྱ་སྒྲུབ་པ་ལ་ཐུགས་རྗེ་ཆེ
སྙིང་ན་གུས་བཀུར་ཞུ
ཆོལ་གསུམ་བོད་རིགས་ཡོངས་རྫོགས་ཆབ་སྲིད་ཀྱི་སྒྲོམ་གཞི་གཅིག་གི་འོག་ཏུ་རང་བཙན་གཙང་མ་ཡིན་པའི་ལོ་རྒྱུས་ཞིག་མཁོ་སྤྲོད་གནང་རོགས། ལན་དོན་མཐུན་ཞིག་མེད་ཚེ་རང་བཙན་ཟེར་བ་དེ་དབུ་མའི་ལམ་ལས་ལྷག་པ་མེད་སོང་བ་རེད།།
རེད་རེད་དབུ་མས་རང་བཙན་རྩོད་ན་བོད་ཡོངས་རྫོགས་རང་བཙན་མ་རེད་ཟེར་། དེའི་སྒྲུབ་བྱེད་དུ་བོད་པ་འབྲི་ཆུའི་ཕར་རྒྱུད་་པ་རྒྱའི་འོག་དང་ཚུར་རྒྱུད་བོད་འོག་རེད་ཟེར་། དེར་རྟེན་ང་ཚོ་བོད་ལ་ཆོལ་གསུམ་ཆ་ཚང་བའི་རང་བཙན་གཙང་མ་མེད་ཟེར་། རང་བཙན་རྩོད་མཁན་ཀྱིས་ཆོལ་གསུམ་ཆ་ཚང་གནའ་ནས་གོང་ཁྲན་མ་ཡོང་བར་རང་གཙན་གཙང་མ་རེད་། དེའི་ཕྱིར་རང་བཙན་ནི་བོད་དབང་ཐོབ་ཐང་རེད་། གང་ལྟར་བོད་རང་བཙན་མིན་ན་མིན་བདེན་དཔང་དང་ཡིན་ན་ཡིན་པའི་བདེན་དཔང་དྲ་སྟིང་ལ་བཀོད་ཐུབ་ལོ་རྒྱུས་བ་ཞིག་ཡོད་ན་དཔེ་ཡག་པོ་འདུག
གླིང་ཚ་ཕ་བུ་གསུམ་གྱིས་རང་ཉིད་བོད་མི་དཀྱིས་མ
ཞིག་གི་འགན་ཁུར་བཞིན་ཐབས་རྩོད་ཀྱི་ལམ་ལ་ཆས་
ཟིན་པ་རེད།དབུས་བོད་མིའི་སྒྲིག་འཛུགས་ཀྱིས་རང་
གི་མི་མང་ལ་དཀའ་ངལ་འཕྲད་དུས་འགན་ཅུང་ཟད
་ཁུར་ན་བསམ་བྱུང་།རྒྱུ་མཚན་གླིང་ཚའི་ཨ་མའི་སེམས
་ཚོར་དྲག་པོས་རེ་སྐུལ་བཞིན་པ་ཁོང་དཀའ་ངལ་ཞིག་ལ་
འཕྲལ་སྲིད་པས་སྔོན་བརྡ་རེད་རང་གཞུང་ལ་བློ་དཀར་བའི་
མི་ཞིག་གློ་བུར་བོར་བརླག་སོང་ཚེ་དེས་འགན་ང་ཚོ་ཚང་མ་ལ་ཡོད།
རྒྱ་ཆེ་ཀློག་པ་པོ་རྣམ་པར་ཞུ་རྒྱུ།རེ་སྐུལ་བཞིན་ཞེས་པ་རེ་སྐུལ་ཞུ་བཞིན་པ་ཞེས་བཅོས།
འཕྲལ་སྲིད་པས་ཞེས་པ་འཕྲད་་སྲིད་པས་ཞེས་བཅོས།
ཚེ་སྲོག་དང་ནང་མི་སྙིང་ཉེ་སོགས་རྒྱབ་དུ་བཞག་ནས་མི་རིགས་དང་རིག་གཞུང་བདེན་དོན་སོགས་ཚེ་སྲོག་གི་ཚབ་དུ་འཛིན་བའི་འགྱུར་མེད་ཀྱི་འཐབ་རྩོད་པ་ངས་ཁྱོད་ལ་གུས་འདུད་ཞུ།
ནོར་བཅོས་།
རེད་རེད་དབུ་མས་རང་བཙན་རྩོད་ན་བོད་ཡོངས་རྫོགས་རང་བཙན་མ་རེད་ཟེར་། དེའི་སྒྲུབ་བྱེད་དུ་བོད་པ་འབྲི་ཆུའི་ཕར་རྒྱུད་པ་རྒྱའི་འོག་དང་ཚུར་རྒྱུད་པ་བོད་པའི་འོག་རེད་ཟེར་། དེར་རྟེན་ང་ཚོ་བོད་ལ་ཆོལ་གསུམ་ཆ་ཚང་བའི་རང་བཙན་གཙང་མ་མེད་ཟེར་ཞིང་གནས་ལུགས་དང་རྒྱུ་མཚན་མང་པོར་རྟེན་ནས་དབུ་མ་ནི་བོད་ལ་འོས་ཤིང་འཚམ་པོ་རེད་ཟེར་།
ཡང་རང་བཙན་རྩོད་མཁན་ཀྱིས་ཆོལ་གསུམ་ཆ་ཚང་གནའ་ནས་གོང་ཁྲན་མ་ཡོང་བར་རང་གཙན་གཙང་མ་རེད་། དེའི་ཕྱིར་རང་བཙན་ནི་བོད་པའི་ཐོབ་ཐང་རེད་ལ་རང་བཙན་རྩོད་ཀྱང་དགོས་ཟེར་།
གང་ལྟར་བོད་རང་བཙན་མིན་ན་མིན་པའི་བདེན་དཔང་དང་ཡིན་ན་ཡིན་པའི་བདེན་དཔང་དྲ་སྟེང་ལ་བཀོད་ཐུབ་པའི་ལོ་རྒྱུས་བ་ཞིག་ཡོད་ན་དཔེ་ཡག་པོ་འདུག
ས་ཡ་དྲུག་གི་སྙིང་ཁུང་ནས་བརྩེ་བའི་དཔའ་རྒོད་གླིང་ཚ་ལེགས། དྲ་འབུ་ཚོའི་ནང་ནས་རྩ་ཟིན་རྒྱལ་བཙོང་གི་རིགས་དང། ཁ་རྒོད་ཁོག་འཁྲེབ་དང། མགུལ་མི་ཐུབ་པའི་རི་བོ་ལ་ཉོག་གཏམ་གྲགས་ཆའི་རྣ་བ་འགེང་མཁན་ཡོད་ཚོད་རྣམས་ལ། ལན་གྱི་སྐུ་ངལ་བྱས་ཀྱང་ཕན་པ་མེད་པའི་དེ་ལས་ཉིད་གྱི་འཕྲོད་རྟེན་ལ་ཐུགས་ཟབ་གནང་རོག། ཁྱེད་གྱིས་རླབས་ཆེན་གྱི་སྤྱོད་པ་དང་རྒྱལ་སྲས་སེམས་དཔའ་ཆེན་པོའི་སྙིང་སྟོབས་ལ་གུས་འདུད་དང་ཡི་རང་ཞུ་བ་དང་ཆབ་གཅིག། ཁྱེད་གྱི་ཐུགས་འདོད་བཞིན་འགྲུབ་པའི་སྨོན་ལམ་འདེབ། བོད་རྒྱལ་ལོ་
སྤྱིར་ང་ཚོའི་བཙན་བྱོལ་གཞུང་ནང་བོད་དོན་སྐོར་ཁ་རྒྱག་པ་རྐྱང་རྐྱང་བཤད་ནས་སྡོད་མཁན་དཔེ་མང་པོ་ཡོད།། དོན་དངོས་སུ་གླིང་ཚ་ཚེ་བརྟན་ནང་བཞིན་ཞི་བའི་ལས་འགུལ་ཡང་ནས་ཡང་དུ་སྤེལ་མཁན་སུ་ཞིག་ཡོད།། དོན་གྱི་དཔའ་བོ་གླིང་ཚ་ཚེ་བརྟན་ལགས་ངས་ནམ་ཡང་ཁྱེད་ལ་གུས་འདུད་ཞུ་བཞིན་ཡོད།། ཁྱེད་ཀྱི་ལས་འགུལ་བྱ་བ་ལམ་འགྲོ་ཡོང་བའི་སྨོན་འདུན་ཞུ་བཞིན་ཡོད།། ཅི་སྟེ་ཞི་བའི་ལས་འགུལ་གྱི་སྣེ་ནས་ཁྱེད་ཀྱི་ཚེ་སྲོག་ཤོར་ན་ངས་ནམ་ཡང་ཁྱེད་བདེ་བ་ཅན་དུ་སྐྱེ་བར་སྨོན་ལམ་འདེབས་ཆོག།།
གླིང་ཚའི་ལས་འགུལ་ལ་རྒྱབ་སྐྱོར་དང་། རོགས་རམ་བྱ་རྒྱུ་དེ་ང་ཚོ་ཚང་མའི་ལས་འགན་རེད་དོ། །
གླིང་ཚ་མ་བུ་གསུམ་གྱི་ན་ནིང་གོམས་བགྲོད་དེས་ངོས་ཀྱི་སེམས་ནང་དུ་ནམ་ཡང་རྗེད་མེད་ཀྱི་བག་ཆགས་ཟབ་ཤོས་ཞིག་ལ་རྒྱལ་བུ་དྲི་མེད་ཀུན་ལྡན་ཡབ་ས་སྐྱོང་གྲགས་པས་བདུད་རི་ཧ་ཤང་ལ་རྒྱངས་ཕུད་གཏངས་བའི་ལོ་རྒྱུས་དེ་དྲན་སོང་། ད་ངོ་མ་ཡིན་ན་གླིང་ཚ་ནང་མི་རྣམས་ཀྱི་བློས་གཏངས་དེས་རྡ་རམ་ས་ལ་གནས་པའི་བཙན་བྱོལ་བོད་མིའི་སྒྲིགས་འཛུག་དང་། བཀའ་བློན་རྣམ་པ་སྤྱི་འཐུས་རྣམ་པ་ཚང་མ་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག དེ་བཞིན་རྩོམ་པ་པོ་སོགས་བོད་རིགས་ཡོངས་ལ་ཁ་ནས་བཤད་པའི་དུས་མ་ཡིན་ལག་ལེན་འདེབས་པའི་དུས་ཡིན་ཞེས་པའི་ཅོང་རྡ་ཞིག་རེད་བསམ། རྗེ་བཙུན་མི་ལས་རས་ཆུང་ལ་མགུར་གསུངས་པ་ནང་བཞིན།
བུ་ཕ་དང་མཉམ་ན་གཡག་རའི་ནང་དུ་ཤོག།
གནས་ཁང་བདེ་ལ་ཡངས་པ་གཡག་རའི་ནང་དུ་གདའ།།
རྒྱ་དམར་རྒྱལ་དར་མ་འཕྱར་བར་ཐུགས་རྗེས་ཆེ། ཨ་མ་སྡོམ་པོ་སྐྱིད་ནས་སྐད་ཅ་ཡག་པོ་གསུང་འདུག་བརྒྱབ་བསྐྱོར་ཡོད། བོད་ནང་བོད་མི་རང་དབང་ཆེད་རང་སྲེག་གནང་མཁན་ཨ་མདོ་བར་། རྒྱ་གར་ནང་བླ་མ་རི་པོ་ཆེ་མང་པོའི་ནང་ནས་བོད་མིའི་རང་དབང་ཆེད་ཀི་རྟི་རིན་པོ་ཆེ་ཨ་མདོ་། རྒྱ་གར་ནང་ཁ་རྒྱག་པ་བཤད་མཁན་མང་པོ་ཡོད་ཀྱང་གཞི་བའི་གོམ་བགྲོ་གནང་མཁན་གླིང་ཚང་ཕ་བུ་མ་གསུམ་ཨ་མདོ་ལ། བོད་མི་ཚོ་མཐུན་སྒྲིལ་དགོས་རང་དབང་ཆེད། ཆིག་སྒྲིལ་དགོས་ཆོལ་ཁག་གསུམ། ལས་འབྲས་བསུང་བོད་མི་ཡོང་འཛོགས། བོད་རྒྱལ་ལོ་ དཀར་ཕྱོགས་རྒྱལ་ནག་ཕྱོགས་ཕམ། བོད་མིའི་རྩ་དོན་ཆེད་དུ་གླིང་ཚང་ཕ་བུ་མ་གསུམ་སེམས་ཐག་ཙང་ཆེད་གནང་ནས་བོད་སྐྱོད་གཞི་པས་ལས་གུལ་ལམ་ལོང་ཡོང་བ་ཤོག།།།
བུ་དཔའ་བོ་གླིང་ཚ་ཚེ་རྡོར་ཁྱོད།། གླིང་ཕུ་ནུའི་ཁྲོད་ཀྱི་དཔའ་རྒོད་རེད།། དཔའ་ངོམ་ལུགས་བདེན་པའི་གོམ་བགྲོད་རེད།། དེའི་རྩ་བ་འཚེ་མེད་ཞི་བདེ་རེད།། དྲིན་ཕ་མའི་མིག་ཆུ་གཡས་བསྐྱུར་བྱས།། བུ་ཆུང་མའི་ངུ་ངག་གཡོན་བསྐྱུར་བྱས།། བོད་ཁ་བ་ཅན་གྱི་བདེན་དོན་ཆེད།། རྗེ་བླ་མའི་བཀའ་དང་འགལ་མེད་སྒྲུབ།། གཞུང་རྩ་བའི་སྲིད་ཇུས་ལག་ལེན་བསྟར།། དོན་རིན་ཐང་བྲལ་བའི་བདེན་པ་སྐྱོང་།། སྲོག་དམར་པོ་བློས་བཏང་བྱེད་པ་འདི།། མི་ཕལ་བ་ཞིག་གིས་སྒྲུབ་ནུས་མིན།། གླིང་ཚང་གི་བུ་རབས་ཚ་རྒྱུད་ཚོ།། བོད་ཁ་བའི་བདེ་སྡུག་ཁས་གླེང་ཞོར།། དོན་རང་གི་ཆེད་དུ་འདུར་རྒྱུགས་བྱེད།། ཕ་དྲིན་པོ་ཆེ་ལ་དྲིན་ལོག་བྱེད།། མི་ཡ་རབས་མཐོང་ན་མར་འཐེན་བྱེད།། དོན་བདེན་པར་མི་མོས་རྫུན་པར་མོས།། མི་གཞུང་དྲང་མི་དགའ་གཡོ་ཅན་དགའ།། ཆོས་ཟབ་མོར་མི་དད་ཟང་ཟིང་དད།། དུས་སྙིགས་མའི་རང་འཚང་མཚོ་ལྟར་བརྡོལ།། མི་སྙིགས་མ་ཆར་རྗེས་ཤ་མང་རེད།། བུ་དཔའ་བོ་ཁྱོད་ཀྱི་བྱ་གཞག་ཀུན།། ཡིད་བསམ་བཞིན་དུ་འགྲུབ་པར་སྨོན།། རྗེ་བླ་མའི་ཐུགས་རྗེ་སྤྱན་གྱིས་གཟིགས།། གེགས་བར་ཆད་མེད་པར་བྱིན་གྱིས་རློབས།། གླིང་གེ་སེར་ང་ཡི་གླུ་འདི་ཤོར།། དོན་ནོར་བ་ཡོད་ན་བཟོད་པར་གསོལ།།
གླིང་ཚ་ཕ་བུ་གསུམ་ལ་རྗེས་སུ་ཡིན་རང་དང་ཐུགས་རྗེ་ཆེ་་་བཀྲིན་ཆེ།
ཁྱེད་ཀྱི་དགའ་ཞིག་ས་སྟེང་འདི་ན་མེད་་་་་་་་་་་་་་་་་དཔའ་གླིང་ལགས