གཞུང་པ་ཚེ་དབང་བསོད་ནམས།
མང་གཙོའི་རྒྱལ་ཁབ་ཀྱི་གྲོས་ཚོགས་ལས་རིམ་ནང་དུས་ཚོད་ལ་འགན་འཁུར་ནས་འཐུས་མི་ཚོའི་གྲོས་ཚོགས་ནང་རང་ཉིད་ཀྱིས་གཏམ་བཤད་བྱ་རྒྱུའི་སྒོ་སྐབས་རྩ་ཆེར་རྩིས་ནས་སྔོན་ཚུད་ནས་ཡིག་ཐོག་ཏུ་བཀོད་ནས་སྒྲ་སྒྲིག་བྱེད་བཞིན་པ་དང་། རང་གི་བཤོད་རྒྱུའི་གནད་དོན་ཡིག་ཐོག་ལ་ཡོད་པ་དེ་དག་ལ་ངག་ཐོག་ནས་འབྲེལ་བཤད་རིང་ཙམ་རྒྱབ་ནས་གྲོས་ཚོགས་ཀྱི་འཐུས་མི་ཚོའི་གསལ་པོ་མཁྱེན་ཐུབ་པ་དང་འོས་འཕེན་མང་ཚོགས་ཀྱི་མངོན་འདོད་སྒྲུབ་དགོས་པ་ནི་མི་མང་གི་སྐུ་ཚབ་གྲོས་ཚོགས་འཐུས་མིའི་ཐུགས་འགན་ངོ་མ་དེ་ཡིན་པ་དང་། ང་ཚོའི་སྤྱི་འཐུས་གྲོས་ཚོགས་ནང་བགྲོ་གླེང་ག་འདྲ་ཞིག་གནང་གི་ཡོད་ཀྱང་གྲོས་ཚོགས་ཀྱི་ལས་རིམ་དང་མཐུན་པ་བཟང་སྤྱོད་དང་ཁ་མ་བྲལ་བ་ཞིག་དགོས་པ་ནི་བཙན་བྱོལ་བོད་མིའི་བཅའ་ཁྲིམས་དང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞིའི་ལམ་སྟོན་དང་མཐུན་པ་ཞིག་དགོས་པ་དང་། གལ་སྲིད་འཐུས་མི་ཞིག་ནས་གྲོས་ཚོགས་ཀྱི་ལས་རིམ་དང་མ་མཐུན་པ་བཟང་སྤྱོད་དང་ཁ་བྲལ་བའི་གཏམ་གླེང་གནང་གི་ཡོད་ན་ལམ་སེང་ཚོགས་གཙོའི་བཀག་དགོས་པ་དང་། ཚོགས་གཙོའི་མ་གཟིགས་པའམ་མ་གསན་པའི་སྐབས་སུ་གྲོས་ཚོགས་ཀྱི་འཐུས་མི་སུ་རུང་ནས་ལས་རིམ་རྣམ་བཞག་༼ Point of Order ༽ འདོན་ཆོག་པ་དང་། ལས་རིམ་རྣམ་བཞག་གི་ནང་དོན་ཡང་འགྲོ་བཞིན་པའི་ལས་རིམ་དང་འབྲེལ་བ་མེད་ལུགས་གསུང་དགོས་པ་ལས་ལས་རིམ་རྣམ་བཞག་ལ་སྒོ་སྐབས་བླང་ནས་རང་གི་བསམ་ཚུལ་གཏམ་བཤད་ལ་ནམ་ཡང་ཁ་ཕྱོགས་མི་ཉན་པ་དང་། གལ་སྲིད་འཐུས་མི་ཞིག་ནས་ལས་རིམ་རྣམ་བཞག་ལ་སྒོ་སྐབས་བླང་ནས་རང་གི་བསམ་ཚུལ་གླེང་གི་ཡོད་ཚེ་དེ་མ་ཐག་ཚོགས་གཙོའི་བཀག་དགོས་པ་དང་། འཐུས་མི་ཞིག་ནས་ལག་པ་ཡར་ཀྱང་ནས་ལས་རིམ་རྣམ་བཞག་ཟེར་སྐབས་ཚོགས་གཙོའི་གཏམ་བཤད་གནང་མཁན་གྱི་འཐུས་དེ་མར་བཞུགས་དུ་བཅུག་ནས་ལས་རིམ་རྣམ་བཞག་འདོན་མཁན་གྱི་འཐུས་མི་དེ་ལ་ལས་རིམ་ག་རེ་ཡིན་གསུང་དགོས་པ་དང་། ལས་རིམ་རྣམ་བཞག་འགྲིག་ཡོད་ན་ཚོགས་གཙོའི་ལས་རིམ་རྣམ་བཞག་ངོས་ལེན་ཞུས་པ་ཡིན་གསུང་ནས། གཏམ་བཤད་གནང་མཁན་གྱི་འཐུས་མི་དེ་ལ་ལས་རིམ་དང་མཐུན་པ་འཕྲོས་གསུང་རོགས་གནང་གསུང་དགོས་པ་དང་། འཐུས་མི་ནང་ཁུལ་གཅིག་གི་གཅིག་ལ་ལན་སློག་རྒྱུ་དང་ཟུར་ཟའི་ཚིག་བེད་སྤྱོད་བྱ་རྒྱུ་དེ་ཚོ་གྲོས་ཚོགས་ཀྱི་ལས་རིམ་དང་མ་མཐུན་པ་མ་ཟད་ཐོག་མའི་དམ་བཅའ་དང་འགལ་བ་ནས་གནས་ཚུལ་དེ་རིགས་ལ་ཚོགས་གཙོའི་དུས་ནས་དུས་་སུ་བཏང་འཛིན་ནན་པོ་མ་གནང་ཚེ་མ་འོངས་ང་ཚོའི་གྲོས་ཚོགས་དེ་སྤྱི་འཐུས་སྒེར་གྱི་ཆབ་སྲིད་རྩོད་གླེང་བྱ་སའི་སྡེང་ཆ་ཞིག་མི་ཆགས་པའི་ངེས་པ་མེད་པ་ནས་ད་ལྟ་ནས་བཙན་བྱོལ་བོད་མི་ཚང་མས་ཐུགས་སྣང་གནང་དགོས་པའི་འབོད་བསྐུལ་ཡང་ཞུ་འདོད་བྱུང་ལ་ང་ཚོའི་གྲོས་ཚོགས་དེ་སྤྱི་འཐུས་སྒེར་གྱི་ཆབ་སྲིད་རྩོད་གླེང་བྱ་སའི་ཆབ་སྲིད་ཀྱི་སྡེང་ཆ་ཞིག་ཆགས་པའི་ཉིན་མོ་དེ་ནས་ང་ཚོའི་གྲོས་ཚོགས་དེ་མི་ཚང་མས་བཞད་གད་ཤོར་བའི་མང་གཙོའི་བང་མཛོད་ལ་༼ Democracy of Laughing Stock ༽ ངོས་འཛིན་བྱེད་མི་སྲིད་པ་མིན་ན་བསམ་ཡོད་བློ་ལྡན་བོད་མི་ཚང་མས་གྲོས་ཚོགས་ལས་རིམ་ལ་ཐུགས་སྣང་གནང་རྒྱུ་དེ་ནམ་ཡང་ལྷོད་གཡེང་མ་ཤོར་བ་ནས་གྲོས་ཚོགས་ཀྱིས་ལས་རིམ་ལ་དགེ་སྐྱོན་ལ་མཛུབ་སྟོན་དུས་ཐོག་རྣག་ཐོག་གཙག་འཁེལ་ཐེར་འདོན་དགོས་པ་མི་མང་གི་ལས་འགན་ཞིག་ཡིན་པའི་ངོས་འཛིན་དང་བཅས་རེ་ཞིག་འདིར་འཇུག་བསྡུས་པའོ།