གྲོང་དང་གྲོང་བརྡལ།

ཀླུ་སྨྱོན།

ཐལ་རྡུལ་འཕྱུར་བའི་གྲོང་ན། །
ཤོག་བུ་རླུང་གིས་འཁུར་བཞིན། །
སྲང་ལམ་སྟོང་པའི་གད་སྙིགས། །
ཆང་དམ་ངོས་སུ་འཕོས་འདུག །

གློག་དམར་འཁྱུག་ཙམ་འཁྱུག་ཙམ། །
སྦི་རག་འདེག་ཙམ་འདེག་ཙམ། །
དེ་ལས་མིག་ལ་གཟན་པ། །
མཛེས་མའི་སེན་མོ་དམར་པོ། །

གྲོང་པའི་ཆང་ཁང་ནང་དུ། །
སྐྱིད་པོ་མི་འདུག་མ་གསུངས། །
གླུ་དང་གར་ལ་རོལ་བཞིན། །
འཁོར་བ་སྐྱིད་པོ་རེད་འདུག །

རླངས་འཁོར་ཁྲ་ཁྲ་སིལ་སིལ། །
འཁོར་ལོ་ཆེ་ཆུང་འདྲ་མིན། །
ཆར་རྗེས་ལམ་ཁའི་ངོས་སུ། །
གློག་འོད་རི་མོ་མཛེས་པ། །

མེ་མདའ་AKཞེ་བདུན། །
མཛུབ་དཀྲིས་རྡོ་རྗེ་ཕ་ལམ། །
དངུལ་ལོར་བརྩེགས་མའི་གསེབ་ན། །
དུད་དྲི་འཐུལ་ཙམ་ཡལ་ཙམ། །

ཆུ་ཚོད་ཆེན་པོའི་མདའ་མོས། །
འཆི་བ་ཆང་དང་བརྗེས་ནས། །
ཕ་གའི་གསེར་སོ་ཅན་དེར། །
ཝུ་ཆང་ལན་མང་བཀྱགས་སོང་། །

རླུང་བུ་ལྡང་ཐེངས་མང་པས། །
རྩིགས་ངོས་ཁྱབ་བསྒྲགས་དབྲལ་སོང་། །
ཤོག་བུ་ཐེར་ཚལ་སྦར་ཚལ། །
ཆར་བའི་ནང་དུ་སྦངས་སོང་། །

དོར་མའི་ཁ་འདིག་ཆེན་པོ། །
ཟངས་ཀྱི་འབྲོང་རྒོད་བསྣོལ་མ། །
ཨི་ཁུང་བརྒྱ་དང་བཞི་ཅུ། །
མདེའུ་ཤག་སྒྲ་ཡོད་དོ། །

མདང་ནུབ་ཆར་བ་བབས་པས། །
དོ་ནུབ་རླུང་བུ་བསིལ་བ། །
ལན་བུ་ཕྲག་པར་འཕྱོ་དུས། །
ལང་ཚོའི་ཕྱིར་དྲན་ལྕི་བ། །

སྒོ་ལྕགས་བཙའ་ཡིས་ཟིན་པས། །
ལྡེའུ་མིག་ག་རེས་ཆོག་པ། །
སྐྱེ་འགོག་རིལ་བུ་ཆ་གཅིག །
རྒུན་ཆང་དམར་པོས་དེད་སོང་། །

གནའ་བོའི་སྙན་ངག་ཐར་ཐོར། །
དུར་རྡོའི་ངོས་སུ་བརྐོས་པ། །
མུན་ནག་མཚན་མོའི་ལྗོངས་སུ།
གློག་འོད་འཁྱུགས་པ་འདྲ་བ། །

སྐྲ་ལོའི་འདབ་མའི་ངོས་སུ། །
ཐ་མག་འཚིག་དྲི་ཁ་བ། །
རི་མོར་བྲིས་པའི་འཆར་ཡན། །
གད་སྙིགས་ནང་དུ་གཡུགས་འདྲ། །

གཙག་རིས་གཡུ་འབྲུག་ཁ་སྤྲོད། །
ཡིན་པ་འདྲ་ཞིག་འདུག་སྟེ། །
གྲོད་ཁོག་ལྕི་མོ་དེ་ལ། །
གཏམ་རྒྱུད་ག་ཚོད་ཡོད་དམ། །

སེན་མོའི་བར་གྱི་དྲེགས་པ། །
མངར་སྐྱུར་འདྲ་མིན་ཡོད་ཀྱང་། །
མི་ཚེའི་གཏམ་རྒྱུད་རིང་མོ། །
ཤོག་བུའི་ངོས་སུ་མི་འདུག །

གློ་བུར་རླངས་འཁོར་མང་པོ། །
འཚང་ག་བྱས་ནས་བསླེབས་པས། །
རོལ་དབྱངས་དུས་སྟོན་ཞིག་གི །
ཁྱབ་བསྒྲགས་ཡིད་ལ་ལྷང་ངེ། །

མུན་ནག་ཁྲོད་ཀྱི་གྲོང་བརྡལ། །
སྣུམ་ཚོན་རི་མོ་འདྲ་བ། །
དེ་ལ་གོང་ཚད་རྒྱག་པར། །
ང་ལ་འཆར་གཞི་མེད་དོ། །

མཚན་མོའི་དུས་སྟོན་འཚོག་དུས། །
སྐར་མ་ཁྲ་ཆིལ་འཚེར་བ། །
རྒས་པའི་སྡུག་བསྔལ་གསེབ་ཀྱི། །
སྨྲེ་སྔགས་འཐོར་བ་འདྲ་བྱུང་། །

ཡིད་ལ་འཁོར་བའི་སྙིང་སྡུག །
ཆར་བའི་ནང་དུ་ལུས་པ། །
སྟོན་མཇུག་མེ་ཏོག་རྐང་གཅིག །
དེབ་ཀྱི་བར་དུ་བཅུག་འདྲ། །

ཅོག་ཙེ་རྙིང་ཞིང་གོག་པ། །
གློག་ཀླད་ངལ་ཞིང་དུབ་པ། །
སྙན་ངག་འཆོལ་ཞིང་འཐོར་བས། །
དྲན་པ་བརླགས་པ་འདྲ་བྱུང་། །