གྲོགས་པོས་གྱེར་བའི་ཚོགས་ཆེན།

དམིགས་བསལ་ཚོགས་ཆེན་སྟེང་ལ།།
མི་ཆེན་དཔོན་ཆེན་ཕེབས་སོང༌།།
དགོངས་ཚུལ་བསམ་ཚུལ་བར་ནས།།
རྒན་གཞོན་ཁྱད་པར་ཤོང་སོང༌།།

རྒན་པ་བབ་བརླིང་བརྟན་གསུམ།།
གཞོན་པ་གཡས་རྒྱུག་གཡོན་རྒྱུག།
རྒན་གཞོན་གོམ་འགྲོས་བར་ནས།།
དགོངས་ཚུལ་བསམ་ཚུལ་འཁྲུགས་སོང༌།།

ཁ་སང་རྨིས་པའི་རྨི་ལམ།།
བསམ་ཚུལ་ནམ་མཁས་བཀྱགས་སོང༌།།
མཐོ་བཤད་དམའ་བཤད་བར་ནས།།
དམིགས་བསལ་བསམ་ཚུལ་བརླག་སོང༌།།

མང་ཉུང་ལག་པ་བཀྱགས་ནས།།
བསམ་ཚུལ་སྒོ་མོ་བརྒྱབ་སོང༌།།
ཉིང་བསྡུས་ཚིག་ཐོའི་ནང་ལ།།
སྐུ་ངོའི་སྐུ་གཟུགས་མངོན་བྱུང༌།།

བསམ་ཚུལ་བསྡུས་པ་སྔ་སོང༌།།
གནད་དོན་འགྱུར་བ་ཕྱིས་སོང༌།།
སྔ་རྗེས་ཤོར་བའི་རྨི་ལམ།།
སྐྱ་རེངས་ལག་པས་བསུབ་སོང༌།།

ཐམས་ཅད་བདེན་ན་ལྟས་ངན།།
ཕྱེད་ཀ་བདེན་ན་ཡ་མཚན།།
གོ་རྟོགས་མཐོ་དམན་བར་ན།།
ཡ་མཚན་རི་མོ་ཇེ་མང༌།།

ས་ཡ་དྲུག་གི་དོན་དག།
ཉི་མ་དྲུག་ལ་གླེང་སོང༌།།
དོན་ཚན་དྲུག་གི་ཚིག་ཐོས།།
ཚོགས་ཆེན་རེ་བ་བརླག་སོང༌།།

སྙིང་གྲོགས་ཤ་ཞེན་ཅན་པོའི།།
འཁྲུལ་སྣང་རེ་བ་ཡལ་འདུག།
རྒྱལ་ཞེན་སེམས་ཀྱི་རི་མོ།།
བསམ་འཆར་ཐིགས་པས་བསུབ་འདུག།

མཐོ་བཤད་དམའ་བཤད་བར་གྱི།།
འཆར་གཞི་འཇའ་ཚོན་རི་མོ།།
ལག་ལེན་ལག་པས་ལེན་པར།།
རྒྱང་ཐག་ཧ་ཅང་རིང་ཟེར།།

ཨ་ཙི་གྲོགས་པོ་ཨེ་བདེན།།
ཨ་ལ་གྲོགས་པོ་ཅི་ཟེར།།
ཨ་ཡོད་ནང་གི་ད་ཡོད།།
ཨ་ལོང་སྒོར་མོའི་འཇུ་ཐག

མང་ཉུང་ལག་པ་བཀག་པའི།།
བཀའ་སྤྱིའི་ལམ་སྟོན་ཐིག་ཤིང༌།།
ཚོགས་ཆུང་བསམ་ཚུལ་ལག་པས།།
དེ་རིང་རྐེད་ནས་བཅགས་སོང༌།།

ཚིག་ཐོའི་ནང་གི་རི་མོ།།
མང་ཉུང་ལག་པའི་རི་མོ།།
རི་མོའི་ནང་གི་བསམ་ཚུལ།།
ལག་པ་བཀྱགས་པའི་རི་མོ།།

འདི་ནི་གྲོགས་པོས་ཚོགས་ཆེན་སྐོར་གླེང་བའི་གཏམ་ལས་ཉུང་ངུའི་ཚིག་ཏུ་སྤེལ་བའོ།།