ཡོང་ཁུངས། བོད་མིའི་སྒྲིག་འཛུགས་ཀྱི་དྲ་རྒྱ
གཞུང་ཆེན་རིགས་གཅིག་རྐང་འཛིན་མཁས་པའི་ཚོགས་ཆུང་གི་ལྷན་ཚོགས་ཐེངས་གཉིས་པ་སྐོང་ཚོགས་གནང་བ།
ཕྱི་ལོ་༢༠༡༥ ཟླ་༣ ཚེས་༦ ཉིན་གྱི་སྔ་དྲོ་ཆུ་ཚོད་༩།༣༠ ཐོག་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་གོ་སྒྲིག་ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་གཞུང་ཆེན་རིགས་གཅིག་རྐང་འཛིན་མཁས་པའི་ཚོགས་ཆུང་གི་ལྷན་ཚོགས་ཐེངས་གཉིས་པ་སྐོང་ཚོགས་གནང་སོང། དེ་ཡང་གོང་ཚེས་ཉིན་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་པའི་སློབ་དཔོན་དང་། མཁན་པོ། དགེ་བཤེས་བཅས་ཁྱོན་མི་གྲངས་ ༡༠ ལྷན་འཛོམས་ཐོག་ཆོས་རིག་དྲུང་ཆེ་རྒྱལ་གླིང་དོན་གྲུབ་རྡོ་རྗེ་ལགས་ཀྱིས་ངོ་སྤྲོད་གསུང་བཤད་གནང་དོན། གཞུང་ཆེན་རིགས་གཅིག་རྐང་འཛིན་མཁས་པའི་ཚོགས་ཆུང་གི་ཚོགས་འདུ་ཐེངས་གཉིས་པ་དེ་བཞིན་དེ་རིང་ཚོགས་སྐོང་གནང་གི་ཡོད། རྣམ་པ་ཚོ་ཕེབས་ཐུབ་པར་ངས་ཆོས་རིག་ལས་ཁུངས་ཀྱི་ཚབ་ཞུས་ཏེ་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
ད་རེས་ཀྱི་ཚོགས་འདུའི་ཐོག་གྲོས་གཞི་དོན་ཚན་ལྔ་ཡོད། གྲོས་གཞི་དོན་ཚན་ཁག་ལྔའི་ནང་ནས་གཞུང་ཆེན་རིགས་གཅིག་རྐང་འཛིན་ལས་རིམ་གྱི་སྒྲིག་གཞི་དེ་སྔ་ཡོད་པའི་ཁོངས་ནས་བསྐྱར་ཞིབ་དང་བསྐྱར་བཅོས་ཕྲན་བུ་གནང་དགོས་པ་མཐོང་བྱུང་། དེར་བརྟེན་ཆོས་རིག་ལས་ཁུངས་ངོས་ནས་ད་ཡོད་སྒྲིག་གཞི་ལ་བསྐྱར་བཅོས་ཀྱིས་འཆར་ཟིན་ཚོགས་འདུ་འདིའི་ཐོག་ཕུལ་ཡོད། དེའི་ཐོག་ལ་དོན་ཚན་རེ་རེ་བཞིན་བགྲོ་གླེང་གནང་སྟེ་གཏན་འབེབས་གནང་རྒྱུ་ཡིན། གཞུང་ཆེན་རིགས་གཅིག་རྐང་འཛིན་གྱི་ལས་རིམ་སློབ་གཉེར་ཐེངས་དང་པོ་དེ་འགྲོ་བཞིན་ཡོད། གཉིས་པ་དེ་ནི་རིང་མིན་ཕྱི་ལོ་༢༠༡༥ ཟླ་༤ ཚེས་༡ ཉིན་ནས་འགོ་འཛུགས་ཞུ་རྒྱུའི་བང་རིམ་བསྒྲིགས་ཡོད། དེའི་ནང་འཚང་སྙན་ཕུལ་མཁན་གྲངས་ ༡༦ ཙམ་འདུག ཚོགས་འདུ་འདིའི་ཐོག་ནས་དེ་དག་འདེམས་སྒྲུག་གནང་རྒྱུ་ཡིན། ཞེས་སོགས་ཀྱི་ངོ་སྤྲོད་གསུང་བཤད་གནང་།
དེ་ནས་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ལྷན་ཚོགས་དབུ་འབྱེད་ཀྱི་གསུང་བཤད་གནང་དོན། དེ་རིང་འདིར་ཆོས་བརྒྱུད་ཁག་ནས་རིགས་གཅིག་རྐང་འཛིན་གྱི་ཚོགས་ཆེན་ཐོག་གདན་ཞུས་ལྟར་དུས་ཐོག་ཕེབས་པར་ཐུགས་རྗེ་ཆེ་ཞུ་རྒྱུ་ཡིན། ཆོས་རིག་ལས་ཁུངས་ཀྱི་ལས་འགན་གཙོ་བོ་ནི་ཆོས་ཕྱོགས་ཀྱི་མཛད་སྒོ་དང་བསླབ་པ་སློབ་གཉེར། དེ་བཞིན་བཤད་སྒྲུབ་ཀྱི་བསྟན་པ་གོང་སྤེལ་གནང་ཐབས་ལ་འབད་བརྩོན་ཞུ་རྒྱུ་དེ་རེད། ཚང་མས་མཁྱེན་གསལ་རེད། ང་ཚོས་འཛམ་གླིང་འདིའི་སྟེང་ངོམ་ཆོག་པ་དང་འཛམ་གླིང་གིས་དོ་སྣང་བྱེད་ས་དེ་ནང་ཆོས་ཆགས་ཡོད། ནང་ཆོས་འདི་བཞིན་འཛམ་གླིང་གིས་རྩ་ཆེན་ཞིག་དང་དོ་སྣང་བྱེད་ས་ཞིག་ཆགས་ཡོད་སྟབས། ང་ཚོས་ད་ལྟའི་གནས་སྟངས་འདིའི་ཐོག་ནས་དེ་ཡར་རྒྱས་ཇི་ལྟར་གཏོང་དགོས་མིན་ཐད་དགོངས་པ་བཞེས་རྒྱུ་གལ་ཆེན་པོ་ཆགས་ཀྱི་འདུག
ངས་ནམ་རྒྱུན་དུ་འདི་ལྟར་ཞུ་བཞིན་ཡོད། ང་ཚོའི་ཆོས་བརྒྱུད་ཆེན་པོ་སོ་སོའི་ནང་གྲུབ་པ་ཉམས་ལེན་བྱེད་ཕྱོགས་དེ་བསྲེས་ལྷད་དང་འགྱུར་བ་མེད་པ་སོགས་ཀྱི་གནའ་སྲོལ་བཟང་པོ་ཞིག་ཡོད་སྟབས། དེ་དག་གཞིར་བཞག་ཐོག་དེང་གི་དུས་རབས་དང་མཚུངས་པའི་བསླབ་པ་སློབ་གཉེར་བྱེད་སྟངས་ཀྱིས་གཙོས་གང་ཅིའི་ཐད་བསྐྱར་ཞིབ་དང་གསར་གཏོད། དེ་བཞིན་ཡར་རྒྱས་ཇི་ལྟར་གཏོང་དགོས་ཀྱི་ཡོད་མེད་སྐོར་དགོངས་པ་བཞེས་པ་བརྒྱུད་ང་ཚོས་དུས་རབས་ ༢༡ པའི་ནང་པ་ཞིག་ཆགས་ཐབས་བྱེད་དགོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་འགྱུར་དང་བསྟན་འགྱུར་དེ་དག་མཆོད་གཤོམ་ནང་སྒྲིག་ནས་སྐྱབས་སུ་འཆི་ཟེར་ནས་མ་བསྡད་པར་དེ་དག་ལ་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་རེད། ཅེས་སྔ་ཕྱི་བར་གསུམ་དུ་བཀའ་སློབ་རིམ་བཞིན་ཕེབས་ཡོད་པ་དེ་དག་གཞིར་བཞག་ཐོག ཆོས་རིག་ལས་ཁུངས་ནས་གསར་གཏོད་རིམ་པས་ཞུ་བཞིན་ཡོད། སོ་སོ་རང་ཉིད་ལྟ་བུ་མཚོན་ན་ང་ཚོར་ཡོད་པའི་ནང་ཆོས་དེ་གཞིར་བཞག་ཐོག་དུས་རབས་དང་མཚུངས་པའི་སྒོ་ནས་དེ་ཡར་རྒྱས་གཏོང་རྒྱུ་ཧ་ཅང་གལ་ཆེན་པོ་རྩིས་མཁན་དང་དེའི་ཐོག་འབད་བརྩོན་བྱེད་མཁན་གྱི་མི་ཞིག་ཡིན།
ང་ཚོས་གཞུང་ཆེན་རིགས་གཅིག་རྐང་འཛིན་གྱི་ལས་རིམ་འདི་ལོ་གཅིག་སྔོན་ཙམ་ནས་འགོ་འཛུགས་བྱས་ཏེ། སྒྲིག་གཞི་གཏན་འབེབས་ཀྱིས་ད་ལྟ་འགྲོ་བཞིན་ཡོད་པ་མ་ཟད། སྡེ་ཚན་དང་པོའི་ནང་རིགས་གཅིག་རྐང་འཛིན་པ་ ༢༢ ཡོད་ཁོངས་ནས་གཅིག་གིས་དགོངས་པ་ཞུས་ཤུལ་དུ་གཞན་ཚང་མས་ཉམས་ཞིབ་གནང་བཞིན་ཡོད་སྟབས། ཆོས་རིག་ལས་ཁུངས་ངོས་ནས་ཁོང་ཚོར་གང་ཐུབ་ཅི་ཐུབ་བྱེད་བཞིན་ཡོད། ང་ཚོའི་ཆོས་བརྒྱུད་ཁག་ལ་དགེ་བཤེས་ལྷ་རམས་པ་དང་། མཁན་པོ་དང་སློབ་དཔོན་ཟེར་བ་སོགས་ཀྱི་ཐ་སྙད་འདྲ་མིན་ཡོད། ང་ཚོས་དགེ་བཤེས་ལྷ་རམས་པ་དང་འབུམ་རམས་པ་ (Phd) གཅིག་མཚུངས་ཡིན་པར་ངོས་འཛིན་བྱེད་ཀྱི་ཡོད་ཀྱང་། ངས་དེ་འདྲ་མ་རེད་བསམ་གྱི་འདུག ངས་ད་ལྟ་ང་ཚོས་གནང་བཞིན་པའི་གཞུང་ཆེན་རིགས་གཅིག་རྐང་འཛིན་འདི་འབུམ་རམས་པ་རེད་བསམ་གྱི་འདུག དགེ་བཤེས་ལྷ་རམས་པ་ནི་གཞུང་ཆེན་བཀའ་པོད་ལྔ་ལ་གཟིགས་ནས་དེའི་ཐོག་རྒྱུགས་འཕྲོད་པ་ཞིག་ལ་ཟེར་གྱི་ཡོད། རིགས་གཅིག་རྐང་འཛིན་ཟེར་བ་དེ་གཞུང་ཆེན་བཀའ་པོད་ལྔའི་ཁྲོད་ནས་གཞུང་ཆེན་གཅིག་ཐོག་སློབ་གཉེར་གནང་ནས་མཁས་པ་གཙུག་ཏུ་བཀུར་བ་ཞིག་ཆགས་ཐུབ་པ་དགོས་ཀྱི་ཡོད་སྟབས། ངས་ཐ་སྙད་འདོགས་སྟངས་ཐད་མ་འོངས་པར་བཀའ་བསྡུར་དང་ཐུགས་ཞིབ་གནང་དགོས་ཀྱི་འདུག་བསམ་གྱི་ཡོད།
ང་ཚོས་གཞུང་ཆེན་རིགས་གཅིག་རྐང་འཛིན་གནང་མཁན་དག་དཔལ་ན་ལེནྡྲའི་མཁས་སྒྲུབ་གཉིས་ལྡན་གྱི་སྐྱེས་བུ་ལྟར། འཛམ་གླིང་འདིའི་སྟེང་གཙུག་ཏུ་བཀུར་འོས་ཀྱི་མཁས་པ་ཆགས་རྒྱུར་རེ་བ་དང་འབད་བརྩོན་ཞུ་བཞིན་ཡོད། དེ་ཆགས་རྒྱུའི་མཐུན་རྐྱེན་དེ་ད་ཐེངས་མཁས་པའི་ཚོགས་ཆུང་ཐོག་བཀའ་བསྡུར་གནང་སྟེ། མཁས་དབང་ཚོས་སྒྲིག་གཞི་སྒྲིག་འཛུགས་གཏན་འབེབས་དང་། རིགས་གཅིག་རྐང་འཛིན་གནང་མཁན་ཚོས་རྩོམ་ཡིག་བྲིས་པ་དག་ལ་ཉམས་ཞིབ་གནང་རྒྱུ་དུས་སྐབས་འདིར་གལ་ཆེན་པོ་ཆགས་ཡོད་པ་མ་ཟད། མ་འོངས་པར་ཁོ་ཚོ་གང་འདྲ་ཆགས་མིན་ནི་ད་ཐེངས་ལྷན་ཚོགས་ཐོག་ཕེབས་པའི་མཁས་པ་ཚོར་རག་ལུས་ཡོད། ཅེས་སོགས་ཀྱི་གསུང་བཤད་གནང་སྟེ་དབུ་འབྱེད་ཀྱི་མཛད་སྒོ་གྲོལ།
དེ་ནས་ཆུ་ཚོད་ ༡༡ ཙམ་དུ་ཆོས་རིག་དྲུང་ཆེ་རྒྱལ་གླིང་དོན་གྲུབ་རྡོ་རྗེ་ལགས་ཀྱིས་གཙོ་སྐྱོང་ཐོག་ཚོགས་འདུ་དངོས་གཞི་དབུ་འཛུགས་གནང་སོང་། ཐེངས་འདིའི་ཚོགས་འདུའི་གྲོས་གཞི་དང་པོ། ཕྱི་ལོ་༢༠༡༣ ཟླ་༡༡ ཚེས་༢༧ ཉིན་བསྐྱངས་པའི་ཚོགས་འདུ་དང་པོའི་གྲོས་ཆོད་ཐོག་བསྐྱར་ཞིབ་གནང་རྒྱུ།
གྲོས་གཞི་གཉིས་པ། ཆོས་རིག་ལས་ཁུངས་ནས་རགས་ཟིན་དུ་ཕུལ་བའི་གཞུང་ཆེན་རིགས་གཅིག་རྐང་འཛིན་ལས་རིམ་གྱི་སྒྲིག་གཞིའི་ཐོག་བསྐྱར་ཞིབ་བཀའ་བསྡུར་གྱིས་གཏན་འབེབས་གནང་རྒྱུ།
གྲོས་གཞི་གསུམ་པ། གསར་དུ་གཏན་འབེབས་ཞུས་པའི་སྒྲིག་གཞིའི་དགོངས་དོན་མཁས་པའི་ཚོགས་ཆུང་གི་ཚོགས་གཙོ་འོས་འདེམས་གནང་རྒྱུ།
གྲོས་གཞི་བཞི་པ། གསར་དུ་གཏན་འབེབས་ཞུས་པའི་སྒྲིག་གཞིའི་དགོངས་དོན་ཕྱི་ལོ་ ༢༠༡༥་་་༢༠༡༦ ནས་ ༢༠༡༨་་་༢༠༡༩ བར་གྱི་གཞུང་ཆེན་རིགས་གཅིག་རྐང་འཛིན་པ་འདེམས་སྒྲུག་གནང་རྒྱུ།
གྲོས་གཞི་ལྔ་པ། དེ་མིན་འབྲེལ་ཆགས་གནད་དོན་ཐོག་བཀའ་བསྡུར་གནང་རྒྱུ་ཡིན་འདུག་པ་བཅས།།
གཞུང་ཆེན་རིག་གཅིག་མཁས་པའི་ཚོགས་ཆེན་ལ་མི་བཅུ་ལས་འཛོམས་མེད་ན་
ག་འདྲ་རེད་།
དངོས་གནས་བྱས་ན་དེ་ལས་མང་བ་འཛོམས་ནས་གྲོས་ཆོད་ལུང་པ་གང་བཞག་
ནས་ལག་ལེན་བལྟར་རྒྱུ་མེད་པའི་རོགས་དངུལ་མང་ཙམ་བཟོ་ཐུབ་ན་འགྲིགས་
པ་རེད་དོ་།
གཞུང་ཆེན་ཕར་བཞག་ཕྱོ་ག་་ཕྱག་ལེན་ཆ་ཚང་བ་ཞིག་ཨ་ཡོད་།
“ང་ཚོའི་ཆོས་བརྒྱུད་ཁག་ལ་དགེ་བཤེས་ལྷ་རམས་པ་དང་། མཁན་པོ་དང་སློབ་དཔོན་ཟེར་བ་སོགས་ཀྱི་ཐ་སྙད་འདྲ་མིན་ཡོད། ང་ཚོས་དགེ་བཤེས་ལྷ་རམས་པ་དང་འབུམ་རམས་པ་ (Phd) གཅིག་མཚུངས་ཡིན་པར་ངོས་འཛིན་བྱེད་ཀྱི་ཡོད་ཀྱང་། ངས་དེ་འདྲ་མ་རེད་བསམ་གྱི་འདུག ངས་ད་ལྟ་ང་ཚོས་གནང་བཞིན་པའི་གཞུང་ཆེན་རིགས་གཅིག་རྐང་འཛིན་འདི་འབུམ་རམས་པ་རེད་བསམ་གྱི་འདུག”
ཟེར།
“ང་ཚོས་གཞུང་ཆེན་རིགས་གཅིག་རྐང་འཛིན་གནང་མཁན་དག་དཔལ་ན་ལེནྡྲའི་མཁས་སྒྲུབ་གཉིས་ལྡན་གྱི་སྐྱེས་བུ་ལྟར། འཛམ་གླིང་འདིའི་སྟེང་གཙུག་ཏུ་བཀུར་འོས་ཀྱི་མཁས་པ་ཆགས་རྒྱུར་རེ་བ་དང་འབད་བརྩོན་ཞུ་བཞིན་ཡོད།” ཟེར།
ད་གནང་རྒྱུ་མེད་པའི་གནང་རྒྱུ་རང་རེད། བཞུགས་གདན་ཡག་གནང་ན་མི་ལེགས་སམ།