འོད་ཟེར་པོད་ཁུག་ལས་བསྒྱུར། ནགས་ཤོད་སད་མི།
ཡུལ་ཤུལ་ནས་འབྱོར་བའི་གནས་ཚུལ། བོད་ཀྱི་བུད་མེད་ཅིག་གི་སྐྱོ་གླུའི་ནང༌། “ང་ཚོས་འབྲོག་པའི་འཚོ་བ་བཞག་སྟེ། རྡོ་བ་དང་ཤིང་ལས་བསྐྲུན་པའི་ཁང་པར་གནས་སྡོད་བྱེད་པའི་སྐབས། ང་ཚོས་འདི་ལྟ་བུའི་མཐའ་འབྲས་ཤིག་ཡོང་གི་རེད་བསམ་བསམ་མེད། ཡུད་ཙམ་ཞིག་ལ་ང་ཚོའི་ཕ་ཡུལ་འདི་དུར་ས་ཞིག་ཏུ་ཆགས་སོང༌། དུས་འདིར། ང་ཚོས་ཕ་མེས་ཡང་མེས་ནས་འཚོ་སྡོད་བྱ་སའི་སྦྲ་ནག་གྲུ་བཞི་དེ་ཇི་ལྟར་དྲན་མི་སྲིད། ”
ཡུལ་ཤུལ་ནས་འབྱོར་བའི་གནས་ཚུལ། ཚེས ༢༠ ཉིན་བླ་གྲྭ་དག་ཕྱིེར་བསྐྲད་སོང༌། སྲིད་གཞུང་གི་འཐབ་ཕྱོགས་གཅིག་གྱུར་པུའུ་ནས་གནོད་ཐེབས་ས་ཁུལ་དུ་རོགས་སྐྱོབ་བྱེད་བཞིན་པའི་དགེ་འདུན་པ་རྣམས་རང་ས་ན་ཕྱིར་ལོག་བྱ་དགོས་པར་བཤད། ད་དུང་ནན་པོའི་སྒོ་ནས་བཤད་དོན། “ཁྱོད་ཚོས་ག་རེ་ཡིན་ན་བྱས་སོང༌། ཧ་ཅང་གིས་ཐལ་དྲགས་པ་རེད། ད་མྱུར་མགྱོགས་ཀྱིས་སོ་སོའི་ས་གནས་སུ་ཕྱིར་ལོག་རྒྱུགས། དེ་མིན་ན། རྙོག་གྲ་ཡོང་གི་རེད།”ཟེར། ལས་བྱེད་པ་ཞིག་གིས་དགེ་འདུན་པ་ཚོར་བརྗོད་དོན། ད་ལྟ་བདེ་སྲུང་གི་དམག་དཔུང་སྐྱེ་རྒུ་རུ་འཛོམས་ཚར་འདུག་ཟེར།
ཡུལ་ཤུལ་ནས་འབྱོར་བའི་གནས་ཚུལ། ཚེས ༢༠ ཉིན་དགེ་འདུན་པ་ཕྱིར་བསྐྲད་སོང༌། སྲིད་གཞུང་གིས་འཇིགས་སྣང་བསྐུལ་བ་ལ་བརྟེན་ནས། ད་ཆ། གནོད་ཕོག་ས་ཁུལ་ཆེས་ཐོག་མར་འབྱོར་མཁན་གྱི་དཀར་མཛེས་ས་ཁུལ་སེར་ཤུལ་རྫོང་སེར་ཤུལ་དགོན་པའི་དགེ་འདུན་པ་བརྒྱ་ཕྲག་འགའ་ཤས་གནོད་ཐེབས་ས་ཆ་ནས་ཁ་མ་བྲལ་རང་བྲལ་ཆགས་ཡོད་པས། ཕྱིར་ལོག་བྱ་རྒྱུའི་མགོ་རྩོམ་བཞིན་འདུག
ཡུལ་ཤུལ་ནས་འབྱོར་བའི་གནས་ཚུལ། དགེ་འདུན་པའི་མུག་སྐྱོབ། དཀར་མཛེས་ས་ཁུལ་གསེར་རྟ་ལྔ་རིག་ནང་བསྟན་སློབ་གླིང་ནས་དངུལ་དམར་སྒོར་ཁྲི ༣༨༠ ཁུར་ནས། ཚེས ༡༩ ཉིན་བོད་རྒྱ་ཧུའུ་རིགས་སོགས་ཀྱི་དབྱེ་བཀར་མེད་པར། མི་ཤི་ཁྱིམ་སྐྱོན་བྱུང་བའི་དུད་ཚང་དུ། འདས་པོ་རཻར་སྒོར ༢༠༠ དང༌། ཁང་པ་ཞིག་རལ་སོང་བ་དག་ལ་སྒོར ༢༠༠ བཅས་ཆ་བགོས་བྱས་ནས་ཤུལ་ལུས་ཚོའི་ལག་པར་བསྟབས་འདུག་ལ། དགོན་པ་གཞན་དག་ཚོས་ཀྱང་དེ་ལྟར་བྱེད་ཀྱི་ཡོད་པ་རེད་འདུག
ཡུལ་ཤུལ་ནས་འབྱོར་བའི་གནས་ཚུལ། དགེ་འདུན་པའི་མུག་སྐྱོབ། ཉིན་འདི་འགའི་རིང་ལ། སེར་ཤུལ་དགོན་དང༌། གསེར་རྟ་ལྔ་རིག་ནང་བསྟན་སྤོབ་གླིང་སོགས་ཀྱི་དགོན་ཁག་གཞན་ནས་མི་དམངས་སྡོད་ཁུལ་དུ་ཐབ་ཀ་བཅས་ནས་རྩམ་ཐུག་བསྐོལ་བ་དང༌། གེགས་ཕོག་མི་དམངས་ཚོར་བཟའ་བཅའ་སྣ་ཚོགས་ཀྱང་ཆ་བགོས་བྱས་ནས་སྦྱིན་གཏོང་བྱས་འདུག
ཡུལ་ཤུལ་ནས་འབྱོར་བའི་གནས་ཚུལ། གཞུང་ཕྱོགས་ཀྱི་དྲིལ་བསྒྲགས་ཡོང་རྫོགས་ནང་དུ་དམག་གི་རོགས་སྐྱོབ་དང༌། པར་རིས། གནས་ཚུལ་རྐྱང་ཡིན་པ་ལས། དགེ་འདུན་པ་ཚོས་མི་སྲོག་སྐྱོབ་པའི་གནས་ཚུལ་གཡོལ་གྱི་ཡོད་པ་འདི་ཅི་རེད། འདི་སྐོར་གནོད་ཐེབས་མི་དམངས་ནང་མ་རངས་པའི་བསམ་འཆར་གླེང་གིན་ཡོད་པ་རེད། དགེ་འདུན་པ་ཚོས་ད་དུང་བཤད་རྒྱུར། ལུང་དགུའི་ས་འགུལ་གྱི་གནས་ཚུལ་སྤེལ་གཏོང་བྱེད་པའི་སྐབས་སུ་ཕྱི་ཕྱོགས་ཀྱི་དང་བླངས་རོགས་སྐྱོབ་པའི་སྐོར་དྲིལ་བསྒྲགས་བྱས་པ་རེད། ཡིན་ནའང༌། ཡུལ་ཤུལ་གྱི་ས་ཡོམ་སྐབས་དང་བླངས་གྲྭ་པ་ཚོར་སྣང་མེད་གཏོང་དགོས་པའི་རྒྱུ་རྐྱེན་ཅི་ཞིག་རེད། ཅིའི་ཕྱིར་དུ་ང་ཚོ་གླེང་གི་མེད་པ་རེད་ཟེར།
ཡུལ་ཤུལ་ནས་འབྱོར་བའི་གནས་ཚུལ། ཕྱོགས་སོ་སོ་ནས་རོགས་སྐྱོབ་ཅ་དངོས་སྐྱེ་རྒུ་མདོར་འབྱོར་ཡོད་ན་ཡང༌།གནོད་ཐེབས་མི་དམངས་ཀྱི་ལག་པར་སླེབས་རྒྱུར་ནུས་པ་ཐོན་མེད་ལ། ཧ་ཅང་གི་ཟང་ཟིང་ཆགས་ཡོད་པ་རེད། ཕྱོགས་གཅིག་ན། གུར་དང་བཟའ་བཅའ་རི་ལྟར་སྤུངས་ཡོད་པ་དང༌། ཕྱོགས་གཞན་ཞིག་ན། གནོད་ཕོག་མི་དམངས་འཁྱག་ལྟོགས་གིས་མནར་བཞིན་ཡོད་འདུག
ཡུལ་ཤུལ་ནས་འབྱོར་བའི་གནས་ཚུལ། གནོད་ཐེབས་མི་དམངས་ཚོས ྋ སྐྱབས་མགོན་ཏཱ་ལའི་བླ་མ་རེ་སྒུག་བྱས་ནས་ཡོད་པ་རེད། ད་ཆ། གནོད་ཕོག་ས་ཁུལ་དུ ྋ གོང་ས་མཆོག་གནོད་ཐེབས་ས་གནས་ལ་ཕེབས་ནས། ས་འགུལ་གྱི་གནོད་པ་ཐེབས་པའི་མི་དམངས་ཚོར་སེམས་གསོ་དང་སྨོན་ལམ་འཚོག་རྒྱུ་རེད་ཅེས་པའི་སྐད་ཆ་འདི་གང་སར་འཁྱམ་བཞིན་ཡོད་པ་རེད། ཚེས ༡༩ ཉིན་ཡུལ་ཤུལ་ནམ་མཁའ་ནས་འཕུར་བའི་གནམ་གྲུ་དེའི་ནང ་ནས་ ྋ གོང་ས་མཆོག་གིས་གནོད་འཚེ་ཕོག་པའི་མི་དམངས་ཚོར་ཐུགས་སྨོན་དང༌། བྱིན་རླབས་གནང་གི་ཡོད་པར་ངོས་འཛིན་ཡང་བྱས་འདུག
ཡུལ་ཤུལ་ནས་འབྱོར་བའི་གནས་ཚུལ། ཚེས ༡༧ ཉིན། དགེ་འདུན་པ་སྟོང་ཚོ་བརྒལ་བ་ཞིག་གིས་ཆོས་ལུགས་ཀྱི་བྱེད་སྒོ་དང་སྦྲགས་ཏེ། རྐྱེན་ལམ་དུ་ཤོར་བའི་མི ༢༠༠༠ ལྷག་གི་ཕུང་པོ་ཞུགས་འབུལ་བྱས་རྗེས། ཉིན་འདི་ཚོའི་རིང་སྔ་མའི་ཞུགས་འབུལ་བྱས་ཤུལ་ན། རྟག་པར་འདས་པོ་བརྒྱ་ཕྲག་གི་ཕུང་པོ་མེར་བསྲེགས་བྱ་བཞིན་ཡོད་འདུག ཡང༌། ཤུལ་ལུས་ནང་མི་འགའ་རེས་ཕུང་པོ་དགོན་ཁག་གཞན་དུ་དབོར་ནས་ཞུགས་འབུལ་ཞུ་བཞིན་ཡོད་པ་རེད། སྲོག་ཉེན་ལས་ཐར་བའི་མི་མང་ཆེ་བ་ནི། ཐོག་དང་པོར་ས་གནས་ལ་འབྱོར་མཁམ་གྱི་དགེ་འདུན་པས་བསྐྱབས་གནང་བ་རྣམས་ཡིན་འདུག
ཡུལ་ཤུལ་ནས་འབྱོར་བའི་གནས་ཚུལ། ས་འགུལ་འདིའི་ནང་འཆི་སྐྱོན་བྱུང་མཁན་ཕལ་མོ་ཆེ་བོད་མི་ཡིན་པ་ཕུད། ད་དུང༌། ཡུལ་ཤུལ་དུ་ཡོང་འབབ་གསོག་མཁན་གྱི་རྒྱ་མི་དང༌། ཧུའུ་རིགས་སོགས་ཡོད་འདུག ཁོང་ཚོ་མང་ཆེ་བ་ནི་ཁང་པ་ཐབས་ཆག་གི་ནང་དུ་ཟ་ཁང་གཉེར་མཁན་དང༌། ཚོང་ཁང་བཟུང་མཁན་སོགས་རེད་ལ་ས་འགུལ་ནང་ཤི་རྨས་ཧ་ཅང་ཚབས་ཆེན་ཕོག་ཡོད་པ་རེད། སྲིད་གཞུང་གིས་ཁོང་ཚོ་གནས་སྤོས་མི་དམངས་ཀྱི་ཁོངས་སུ་བཞག་ནས། ད་ལྟའི་ཆར་རྐྱེན་ལམ་ཤོར་བའི་གྲངས་ཀའི་ནང་ཐེ་མེད་པ་རེད་ཟེར།
འདི་དངོས་བདེན་ཡིན་ན་རྒྱ་གཞུང་གིས་ཡག་པོ་བྱེད་མི་འདུག སེམས་ཕམ་ཡོད།
ཡུལ་ཤུལ་སྤུན་ཟླ།
འབྱུང་བའི་མྱོ་ཧམ་དེ་ཆེ་བྱུང།
ཉེས་མེད་སྲོག་ཐོག་ཏུ་བཏང་སོང༌།
སེམས་ཁམས་རྦ་ལོང་དུ་གཡོ་བས།
མིག་ཆུའི་སྐྱེམ་ཆང་རེ་འབུལ་ལོ།
མ་ཎེའི་དབྱངས་ལྟ་རེ་འཐེན་ཤོག
ཡུལ་ཤུལ་སྤུན་ཟླ་ལགས།
གནས་ཁང་གཤེད་མར་རུ་གྱུར་ནས།
བེམ་རོ་རི་བོ་ལྟར་སྤུང་སོང་།
སེམས་ཁམས་རྦ་ལོང་དུ་གཡོ་བས།
མིག་ཆུའི་སྐྱེམ་ཆང་རེ་འབུལ་ལོ།
མ་ཎིའི་དབྱངས་ལྟ་རེ་འཐེན་ཤོག
བརྩེ་བའི་སྤུན་ཟླ་ལགས།
ཕ་མེས་ངུ་ངག་གི་སྐྱེས་མ།
བུ་དང་ཚ་བོ་ལ་གནང་དུས།
སེམས་ཁམས་རྦ་ལོང་དུ་གཡོ་བས།
མིག་ཆུའི་སྐྱེམ་ཆང་རེ་འབུལ་ལོ།
མ་ཎིའི་དབྱངས་ལྟ་རེ་འཐེན་ཤོག
བརྩེ་བའི་སྙིང་ཉེ་ལགས།