{གཏམ་བཟང་གསར་འགྱུར།}

{རང་འཚོལ་གྱིས་ཕབ་བསྒྱུར་བྱས།}
 

༧གོང་ས་མཆོག་གི་ཆིབས་བསྒྱུར་དང་། རྒྱ་གར་གྱི་ལངས་ཕྱོགས།

ཁེ་ཉིན་སྤྱི་ཟླ་ ༣ ཚེས ༣༡ ཉིན་རྒྱ་གར་ཌི་ཌི་གསར་ཁང་{DD news}གིས་༧གོང་ས་མཆོག་ཨཱ་སམ་དང་ཨ་རུ་ན་ཅལ་དུ་ཆིབས་བསྒྱུར་གནང་བའི་སྐོར་ལ་བཅར་འདྲི་ཞུས་པའི་གལ་ཆེའི་བརྙན་འཕྲིན་གསར་འགྱུར་ཞིག་སྤེལ་འདུག

གསར་ཁང་དེས་རྒྱ་གར་གྱི་རྒྱ་ནག་ཉམས་ཞིབ་པ་ཇཱཡ་དྷེ་བ་ར་ན་ཌེ་(Jayadeva Ranade)དང་། བོད་དོན་ཉམས་ཞིབ་པ་བིཇེ་ཀརན་ཏི་(Vijay Kranti)གཉིས་གདན་ཞུས་ཀྱིས་བཅར་འདྲི་ཞུས་འདུག

དེ་ཡང་ཐོག་མར་གསར་འགོད་པས་ཨཱ་སམ་གྷོ་ཧ་ཊི་ལ་ཡར་ལུང་གཙང་པོར་མཆོད་འབུལ་གྱི་ལས་རིམ་དེ་འགོ་འཛུགས་བཞིན་ཡོད་པ་དང་། དེར་རྒྱལ་ཁབ་ཕྱི་ནང་གི་སྐུ་མགྲོན་ཧ་ཅང་མང་པོ་མཉམ་ཞུགས་གནང་ཁར་ཕེབས་ཡོད་ཅིང་། དམིགས་བསལ་སྐུ་མགྲོན་དེ་༧གོང་ས་མཆོག་ཡིན་པ་དང་། ༧གོང་ས་མཆོག་གི་ཆིབས་བསྒྱུར་དེ་གལ་གནད་ཆེན་པོ་ཡིན་སྐོར་སོགས་གླེང་སྟེ་བཅར་འདྲི་འགོ་འཛུགས་གནང་སོང་།

བཅར་འདྲི་དེའི་དྲི་བ་དང་གླེང་གཞི་གཙོ་བོ་ནི་གནད་དོན་གསུམ་སྟེ། ༧གོང་ས་མཆོག་གི་ཆིབས་བསྒྱུར་འདིར་རྒྱ་ནག་གིས་སྔར་རྒྱུན་བཞིན་བསྐྱར་དུ་ངོ་རྒོལ་བྱས་ཡོད་པའི་སྐོར་དང་། རྒྱ་དཀར་ནག་གི་འབྲེལ་ལམ་གྱི་ཁ་ཕྱོགས། རྒྱ་གར་གྱིས་བོད་དང་རྒྱ་ནག་ཐོག་ལ་སྲིད་ཇུས་གསར་པ་གང་འཛིན་དགོས་མིན་གྱི་སྐོར་བཅས་རེད་འདུག

ཇཱཡ་དྷེ་བ་ཡིས་-༧གོང་ས་མཆོག་ནི་སངས་རྒྱས་པའི་ཆོས་ཀྱི་དབུ་ཁྲིད་མཐོ་ཤོས་དེ་ཡིན་པ་དང་ཆིབས་བསྒྱུར་འདི་ནི་གཙོ་བོ་ཆོས་འབྲེལ་ཞིག་ཡིན་པས། དེར་རྒྱ་ནག་གིས་དོ་གལ་དགོས་དོན་མེད་སྐོར་འགྲེལ་བརྗོད་གནང་འདུག།

བིཇེ་ཀརན་ཏི་ཡིས་-རྒྱ་ནག་ལ་སྤྱི་ལོ་༡༩༤༩ དང་༡༩༥༠ ལོ་ནས་རིམ་གྱིས་བོད་བཙན་འཛུལ་བྱས་པའི་ཁྲིམས་འགལ་དང་ཚུལ་མཐུན་མིན་པའི་ནག་ཉེས་ཆེན་པོ་དེ་ལས་གྲོལ་མ་ཐུབ་པའི་དཀའ་ངལ་ཆགས་ཡོད་པས། ཏཱ་ལའི་བླ་མའི་མཚན་ཐོས་པ་དང་ཁོང་ཚོར་བསུན་པོ་ཆགས་ཏེ་ངོ་རྒོལ་བྱེད་ཀྱི་ཡོད་པ། ཏཱ་ལའི་བླ་མ་ནི་བོད་ཙམ་མ་ཟད་རྒྱ་ནག་དང་འཛམ་གླིང་ཡོངས་ལ་ཤུགས་རྐྱེན་ཧ་ཅང་ཆེན་པོ་ཡོད་པ་དང་། དེའི་དབང་གིས་འཛམ་གླིང་ཡོངས་ལས་བོད་དོན་རྒྱབ་སྐྱོར་ཤུགས་ཆེན་ཐོབ་བཞིན་ཡོད་པས། རྒྱ་ནག་གིས་རྒྱུན་དུ་དགག་བྱ་བྱེད་ཀྱི་ཡོད་པ། ཏཱ་ལའི་བླ་མའི་མཚན་ནམ་ཐོས་ཀྱང་རྒྱ་ནག་བསུན་པོ་ཆགས་ཀྱི་ཡོད་པ་དང་། ཆིབས་བསྒྱུར་གར་གནང་ལ་ངོ་རྒོལ་བྱེད་ཀྱི་ཡོད་སྐོར་འགྲེལ་བརྗོད་གནང་འདུག

དེ་བཞིན་ཁོང་གཉིས་ཀྱིས་རྒྱ་ནག་ལ་༧གོང་ས་མཆོག་སྐུ་ཕྲེང་རྗེས་མའི་སྐོར་ལ་སེམས་ཁྲལ་ཡོད་སྐོར། ཁོང་གི་མཚན་སྙན་ཆེན་པོ་ཆགས་བཞིན་པར་འཇིགས་ནས་མཚན་སྙན་ཆུང་དུ་བཏང་ཐབས་བྱེད་ཀྱི་ཡོད་པ། ཡང་སྲིད་ངོས་འཛིན་ལའང་ཐེ་ཇུས་བྱེད་ཀྱི་ཡོད་པ། རྒྱ་ནག་གིས་པཎ་ཆེན་རིན་པོ་ཆེའི་ཡང་སྲིད་རྫུན་མ་ངོས་འཛིན་བྱས་པར་བོད་མི་ཚོས་ངོས་ལེན་བྱེད་ཀྱི་མེད་པ་དང་། ཡང་སྲིད་དངོས་དེ་བཙན་ཁང་དུ་བཅུག་ཡོད་པའི་སྐོར། རྒྱ་ནག་སྐམ་ས་ཆེན་པོར་ནང་པ་ཇེ་མང་དུ་འགྲོ་བཞིན་ཡོད་པ་དང་། དེའི་དབང་གིས་རྒྱ་ནག་ལ་༧གོང་ས་མཆོག་གི་མཚན་སྙན་ཆེ་རུ་འགྲོ་བའི་སེམས་འཚབ་ཡོད་ཚུལ་སོགས་ཀྱང་གླེང་འདུག

མ་ཟད། ད་ལན་རྒྱ་ནག་གིས་༧གོང་ས་མཆོག་གི་ཆིབས་བསྒྱུར་འདིར་ངོ་རྒོལ་ཤུགས་ཆེན་བྱེད་དོན་གཅིག་ནི། རྒྱ་ནག་ལ་རྒྱ་གར་གྱིས་རྒྱ་ནག་ཐོག་འཛིན་པའི་ལངས་ཕྱོགས་དེ་བརྟན་དུ་སོང་ཡོད་པ་དང་། རྒྱ་གར་གྱིས་ལོ་མང་ནས་ཨ་རུ་ན་ཅལ་དེ་རྒྱ་གར་གྱི་ཆ་ཤས་རེད་ཅེས་ཟེར་གྱི་ཡོད་པས། རྒྱ་ནག་གིས་རང་གི་འཛིན་ཕྱོགས་དེ་སླ་བོ་ཆགས་འགྲོ་གི་འདུག་སྙམ་པའི་དོགས་གཞི་ཡོང་གི་ཡོད་པ་དང། དེའི་རྐྱེན་གྱིས་རྒྱ་ནག་སྐད་ཤོར་གྱི་ཡོད་ཚུལ།

དེ་བཞིན་ཁོང་གཉིས་ཀྱིས་རྒྱ་ནག་གིས་ཕྱོགས་གཅིག་ནས་འཇིགས་སྐུལ་བར་རྒྱབ་སྐྱོར་བྱེད་པ་དང་། ཕྱོགས་གཞན་དེ་ནས་༧གོང་ས་མཆོག་ལྟ་བུའི་ཆོས་ཀྱི་དབུ་ཁྲིད་ལ་དགག་བྱ་བྱེད་པ་དེ་གཉིས་འགལ་ཟླ་ཆེན་པོ་རེད་ཅེས་སྐྱོན་བརྗོད་ཀྱང་བྱས་འདུག

 

{མོ་དྷི་གཞུང་གི་ལངས་ཕྱོགས་སྲ་བརྟན་སྐོར།}

བིཇེ་ཀརན་ཏི་ཡིས་- རྒྱ་གར་གྱི་གཞུང་འཛིན་གོང་མ་ཚོས་རྒྱ་ནག་གི་སིམ་འཛུལ་དང་སྐྱོན་བརྗོད་སོགས་མ་མཐོང་མ་ཐོས་མདོག་བྱས་ཏེ་སྡོད་ཀྱི་ཡོད་སྐོར་དང་། མོ་དྷི་སྲིད་གཞུང་སླེབས་པའི་ཉིན་དང་པོ་ནས་ལངས་ཕྱོགས་དེར་འགྱུར་བ་བཏང་སྟེ། སྲིད་འཛིན་ཕོ་བྲང་དུ་སྲིད་བློན་གསར་པ་མོ་དྷིའི་དམ་འབུལ་སྐབས། རྒྱ་གར་གྱི་ཉེ་འཁོར་རྒྱལ་ཁབ་ཚང་མར་གཞུང་འབྲེལ་གྱིས་མགྲོན་འབོད་བྱས་ཏེ་དམ་འབུལ་ལ་མཉམ་ཞུགས་བྱས་ཡོད་པ་དང་། སྐབས་དེར་རྒྱ་ནག་གཅིག་པུ་མགྲོན་འབོད་མ་བྱས་པར་ཁེར་རྐྱང་དུ་ཕུད་ཡོད་ཚུལ། དེ་ཙམ་མ་ཟད་སྐབས་དེར་བཙན་འབྱོར་གཞུང་གི་སྲིད་བློན་འབུམ་རམས་པ་བློ་བཟང་སེང་གེ་ཡང་མགྲོན་འབོད་བྱས་ཡོད་པ་དང་། དེ་ནི་གནས་དོན་ཆུང་ཆུང་ཞིག་མིན་པར་འགྱུར་ལྡོག་གལ་ཆེན་ཞིག་ཡིན་སྐོར། དེ་བཞིན་མོ་དྷི་གཞུང་གིས་རྒྱ་དཀར་ནག་གི་ས་མཚམས་བརྟན་སྲུང་བྱ་རྒྱུ་སོགས་རྒྱ་ནག་ལ་འཛིན་པའི་ལངས་ཕྱོགས་རྣམས། སྔར་ལས་བརྟན་པ་དང་མཁྲེགས་སུ་ཕྱིན་པའི་བཟང་ཕྱོགས་ཀྱི་འགྱུར་བ་
ཤུགས་ཆེན་བྱུང་ཡོད་ཚུལ་སོགས་ཀྱི་གནད་དོན་ཡང་མང་པོ་གླེང་འདུག

ལྷག་པར་རྒྱ་ནག་གིས་ཧམ་སེམས་བྱས་ཏེ། ཨ་རུ་ན་ཅལ་ཁོང་ཚོའི་ཆ་ཤས་ཡིན་པ་དང་ལ་དྭགས་ལ་བོད་ཆུང་ཆུང་ཞེས་བརྗོད་དེ་རྒྱ་ནག་གི་ཆ་ཤས་དུ་བསྒྱུར་ཐབས་ཀྱི་ས་ཁོངས་དེ་ཇེ་མང་དུ་གཏོང་བཞིན་ཡོད་པས། དེའི་ཐོག་རྒྱ་གར་ཁུ་སིམ་མེར་བསྡད་རྒྱུ་མེད་སྐོར།
དེ་བཞིན། རྒྱ་ནག་གིས་ཨ་རུ་ན་ཅལ་དང་ལ་དྭགས་རྣམས་ཁོང་ཚོའི་ཆ་ཤས་ཡིན་ཞེས་སིམ་འཛུལ་བྱེད་པ་དང་གནོད་ཤུགས་སྤྲོད་ཀྱི་ཡོད་པ་དེ་ནི། དོན་དངོས་སུ་ཁོང་ཚོས་རྒྱ་གར་གྱིས་བོད་ཀྱི་ཐོག་ལ་དོ་སྣང་སྤྲོད་ཐབས་མེད་པ་བཟོ་རྒྱུ་དང་། རང་གིས་བོད་ཐོག་ཁྲིམས་འགལ་གྱི་བཙན་འཛུལ་བྱས་པ་དེ་སྐྱོབ་པའི་མཁྲེགས་འཛིན་གྱི་སྲིད་ཇུས་ཆེན་པོ་ཞིག་ཡིན་པ་དང་། དེའི་རྒྱུ་མཚན་གྱིས་ཨ་རུ་ན་ཅལ་ལ་ཁོང་ཚོས་ལྷོ་བོད་ཅེས་བརྗོད་ཀྱི་ཡོད་སྐོར་སོགས་ཀྱང་གླེང་འདུག

 

{བོད་ཀྱི་ཐོག་ལ་ལངས་ཕྱོགས་ཇི་ལྟར་འཛིན་དགོས་མིན།}

གསར་འགོད་པས།-ཁག་ཅིག་གིས་རྒྱ་གར་གྱིས་བོད་ཀྱི་ཐོག་ལ་སྲིད་ཇུས་ཡག་པོ་འཛིན་དགོས་སྐོར་གླེང་གི་ཡོད་ཀྱང་། སྟབས་ཉེས་ནས་མི་མང་པོ་ཞིག་གིས་བོད་ཀྱི་སྐོར་ལ་རྒྱ་གར་གཞུང་གིས་ལོ་མང་རིང་(རྒྱ་ནག་ལ)མགོ་བཏགས་ཞུས་པ་ལྟ་བུ་བརྩི་གི་ཡོད་པས། ཁྱེད་ལ་དེའི་ཐོག་ལྟ་ཚུལ་གང་ཡོད་ཅེས་འདྲི་སྐབས།

བིཇེ་ཀརན་ཏི་ཡིས་- རྒྱལ་ཁབ་གང་འདྲ་ཞིག་ཡིན་རུང་དེའི་ཕྱི་འབྲེལ་སྲིད་ཇུས་ལ་འགྱུར་བ་མེད་པ་གཅིག་རང་ཡོད་པ་དེ་ནི་རང་གི་ཁེ་ཕན་གཙོ་འཛིན་བྱ་རྒྱུ་དེ་ཡིན་པ་དང་། དེ་མིན་གནས་དོན་ཚང་མ་དུས་དང་དགོས་མཁོ་ལ་གཞིགས་ཏེ་འགྱུར་བ་འགྲོ་གི་ཡོད་སྐོར་དང་། ད་བར་འདས་པའི་རྒྱ་གར་གཞུང་འཛིན་པ་ཚོ་ཁུ་སིམ་བཞུགས་པ་དེར་ཁོང་ཚོ་ལ་རྒྱུ་མཚན་དགོས་པ་ཡག་པོ་དེ་འདྲ་ཡང་ཡོད་སྲིད་ཀྱང་། ད་སྐབས་རྒྱ་ནག་གིས་མཁྲེགས་འཛིན་གྱིས་པཀ་ཀིས་ཏན་དང་མཉམ་འབྲེལ་གྱིས་ཕྱོགས་གཉིས་ཀ་ནས་བསྐོར་ཡོང་གི་ཡོད་པས། དེ་ལ་ཕར་ཡང་དེ་བཞིན་ལན་འདེབས་ནན་པོ་བྱ་དགོས་ཀྱི་ཡོད་པ།

ད་དུང་རྒྱ་གར་ངོས་ནས་ཀྱང་རྒྱ་ནག་ལ་ཁྱེད་ཚོས་བོད་བཙན་འཛུལ་བྱས་པ་དེ་ཁྲིམས་འགལ་དང་ཚུལ་མིན་རེད་ཅེས་ཁ་ཐུག་བརྗོད་པ་ཡིན་ན་ཡག་པོ་ཡོད་ལུགས། དེ་ལྟར་བརྗོད་ན་ཁོང་ཚོས་ཨ་རུ་ན་ཅལ་དང་ལ་དྭགས་རྣམས་དྲན་པ་བརྗེད་དགོས་པར་འགྱུར་བ་དང་། དེས་རྒྱ་ནག་ལ་ཁ་གཏད་གཅོག་ཐུབ་སྐོར། དེ་མཚུངས་གནས་དོན་གཞན་ཁག་ཅིག་གི་ཐོག་ལ་རྒྱ་ནག་གི་ཚུལ་མིན་བྱ་སྤྱོད་རྣམས་རྒྱལ་སྤྱིའི་མདུན་དུ་གསལ་འདོན་བྱ་དགོས་པ་དང་། ཁ་གཏད་གཅག་དགོས་པའི་སྐོར་བཅས་ཀྱང་གླེང་འདུག

 

{༧གོང་ས་མཆོག་ལ་གཟེངས་རྟགས་འབུལ་དགོས་སྐོར།}

བིཇེ་ཀརན་ཏི་ཡིས་-“གནས་དོན་གསུམ་པ་ཞིག་ཡོད། དེ་ནི་ངས་བལྟས་ན་བྱ་འོས་པ་དང་ལས་སླ་བོ་ཡིན་ལ། དེ་ལ་སུས་ཀྱང་དགག་བྱ་ཡང་ཡོད་རྒྱུ་མ་རེད། ང་ཚོས་ཡང་ནས་ཡང་དུ་ཏཱ་ལའི་བླ་མ་ནི་ང་ཚོའི་བཀུར་འོས་ཀྱི་མགྲོན་པོ་ཡིན་ཅེས་བརྗོད་ཀྱི་ཡོད་པ་རེད། ཏཱ་ལའི་བླ་མ་ལ་འཛམ་གླིང་ཡོངས་ནང་ངོས་འཛིན་དང་ཆེ་མཐོང་གང་ཐོབ་པ་ལྟར། རྒྱ་གར་གྱིས་ད་བར་དེ་ཕུལ་ཡོད་མ་རེད། དངོས་གནས་བྱས་ན་སྔོན་ནས་ཕུལ་ཚར་དགོས་པ་ཞིག་རེད། རྒྱ་གར་གྱིས་ཏཱ་ལའི་བླ་མ་ལ་བྷཱརཏ་རཏ་ན་(Bharat Ratna)འབུལ་འོས་པ་རེད། ཁཱན་ཨབྷ་དྷུལ་ཕྷར་ཁཱ་ལ་འབུལ་འོས་པ་རེད། ནེན་སཱེན་མཎ་ཌ་ལ་ལ་འབུལ་འོས་པ་རེད། “ཅེས་བརྗོད་འདུག་ལ།
ཡང་། ཏླ་ལའི་བླ་མས་སྐུ་ཚེ་གང་ཚང་རྒྱ་གར་ལ་སྐྱེལ་ཡོད་པ་དང་། འཛམ་གླིང་ཡོངས་ནང་རྒྱ་གར་ལ་ལྟ་ཚུལ་ཧ་ཅང་ཡག་པོ་བསྐྲུན་ཡོད་པས། ཁོང་ལ་ཡང་བྷཱརཏ་རཏ་ན་འབུལ་དགོས་ཀྱི་རེད་ཅེས་གསུངས་འདུག

དེ་བཞིན། ཇཱཡ་དྷེ་བ་ར་ན་ཌེ་ཡིས་ཀྱང་། ” ཁོང་གིས་གསུངས་པ་དེ་ཧ་ཅང་གནད་འགག་ཆེན་པོ་རེད། ང་ཚོས་ཏཱ་ལའི་བླ་མ་ལ་ཡང་བྷཱརཏ་རཏ་ནའི་རྒྱལ་ནང་གཟེངས་རྟགས་དེ་འབུལ་འོས་པ་རེད། ཁོང་རྒྱ་གར་ལ་བཞུགས་ཡོད་པ་རེད་པ་ལ། ཁོང་གིས་རྒྱ་གར་ལ་ཧ་ཅང་རྒྱབ་སྐྱོར་ཆེན་པོ་གནང་ཡོད་པ་རེད། དེ་སོང་ཙང་ངས་བལྟས་ན་ཁོང་ལ་འབུལ་དགོས་ཀྱི་རེད། དེ་ཕྱོགས་གཅིག་ནས་སྲིད་དོན་གྱི་གཟེངས་རྟགས་ཤིག་ཀྱང་རེད།”ཅེས་གསུངས་འདུག

མཐར། ཇཱཡ་དྷེ་བ་ཡིས་- སྤྱི་ལོ་༢༠༡༤ ལོར་རྒྱ་གར་ཕྱི་སྲིད་བློན་ཆེན་ལྕམ་སུཤ་མ་སྭ་རཱཇ་(Sushma Swaraj)གིས་རྒྱ་ནག་གི་ཕྱི་སྲིད་བློན་ཆེན་བང་ཡུས་རྒྱ་གར་དུ་སླེབས་སྐབས། མོས་ཁོང་ལ་ཁྱེད་ཚོའི་རྒྱ་ནག་གཅིག་ཅེས་བརྗོད་པ་བཞིན། ང་ཚོས་རྒྱ་གར་གཅིག་ཅེས་པ་དེའང་བརྗོད་དགོས་ཀྱི་རེད་ཅེས་ཞུས་པ་ལྟར། ད་ཆ་དེ་སྲིད་ཇུས་གཅིག་བཟོས་ཏེ་ལག་བསྟར་བྱ་དགོས་པའི་དུས་ལ་བབ་ཡོད་པ་དང་། མ་འོངས་པར་དང་པོར་རྒྱ་ནག་གཅིག་གི་སྲིད་ཇུས་ལ་རྒྱབ་སྐྱོར་བྱ་རྒྱུ་མཚམས་བཞག་སྟེ། གལ་ཏེ་ཁྱེད་ཚོས་རྒྱ་གར་གཅིག་ཅེས་བརྗོད་པ་ཡིན་ན། ང་ཚོས་རྒྱ་ནག་གཅིག་ཅེས་བརྗོད་ཆོག་ཅེས་པའི་སྔོན་འགྲོའི་ཆ་རྐྱེན་འདོན་དགོས་པ་དང་། འབྱུང་འགྱུར་རྒྱ་ནག་ཐོག་ལ་ཕྱི་འབྲེལ་སྲིད་ཇུས་སྔར་ལྷག་མཁྲེགས་བརྟན་དགོས་པ་ལས། སླ་བོ་བྱ་རྒྱུ་མེད་སྐོར་སོགས་གནས་དོན་གལ་ཆེན་མང་པོའི་ཐོག་བགྲོ་གླེང་གནང་འདུག

{གོང་གསལ་བཅར་འདྲི་ཞུ་ཡུལ་ཇཱཡ་དྷེ་བ་ར་ན་ཌེ་ནི། རྒྱ་གར་བདེ་འཇགས་ལྷན་ཁང་གི་སློབ་སྟོན་པའི་ཚོགས་མི་དང་རྒྱ་ནག་ཉམས་ཞིབ་དང་སྲིད་ཇུས་ལྟེ་གནས་ཁང་གི་ཚོགས་གཙོ་ཡིན་འདུག བིཇེ་ཀརན་ཏི་ནི་བོད་དོན་ཉམས་ཞིབ་པ་དང་ཌི་ཌི་གསར་ཁང་གི་སློབ་སྟོན་པ་རེད། ཁོང་ནི་ཡུན་རིང་ནས་བོད་དོན་ལ་རྒྱབ་སྐྱོར་ཤུགས་ཆེན་གནང་མཁན་ཞིག་ཡིན་ལ། དབྱིན་སྐད་ཐོག་ལ་༧གོང་ས་མཆོག་གི་མཛད་རྣམ་ཞིག་ཀྱང་བརྩམས་ཡོད།)

{གསར་འགྱུར་འདི་ནི། གུས་པས་གསར་ཁང་དེས་བཅར་འདྲི་ཞུས་པའི་བརྙན་ཐུང་དུས་ཡུན་སྐར་མ་༣༡ ཡོད་པ་དེའི་གཙོ་གནད་རེ་ཟུང་ཞིག་ཇི་བཞིན་དུ་ལུང་འདྲེན་གྱིས་ཤད་གུག་ནང་བཅུག་ཡོད་པ་མ་གཏོགས། དེ་བྱིངས་རྣམས་དོན་བསྒྱུར་དང་སྤྱི་འགྲོས་བྱས་ཏེ་རགས་བསྡུས་སུ་བཀོད་པ་ཡིན།}

གསར་འགྱུར་དྲ་ཚིགས། https://youtu.be/yNf_Ydekik0

https://www.youtube.com/watch?v=yNf_Ydekik0