གངས་རིའི་མཆོད་པ།

འབའ་སྲས།

སུས་ཀྱང་མ་བརྩིགས་གངས་རི་མཐའ་ན་བརྗིད།།
བཏབ་པ་མ་ཡིན་མེ་ཏོག་ཕྲེང་བ་དགོད།།
དྲངས་མིན་གཙང་བོའི་འབབ་པ་ལྷང་ལྷིང་བཞུར།།
གངས་རིའི་ལྗོངས་འདི་ཨེ་མ་ངོ་མཚར་ཆེ།།

སྟོད་ན་འབྲོག་པའི་ཕྱུགས་ཀྱི་འཕེལ་ཁ་རྒྱས།།
སྨད་ན་རོང་བའི་ཞིང་གི་སྙེ་མ་མཐོ།།
བར་ན་ཤིང་ནགས་སྨན་གྱི་སྐྱེས་རྒྱ་ཡག །
གངས་ཅན་བོད་ཀྱི་ས་ལ་གང་གིས་འགྲན།།

གངས་དཀར་མཐོན་པོ་མཆོད་རྟེན་བཞེངས་འདྲ་ཡིན།།
མེ་ཏོག་ཕྲེང་བ་མཆོད་པ་འབུལ་འདྲ་ཡིན།།
གཙང་བོའི་ཆུ་རྒྱུན་ཁ་དར་འཐེན་འདྲ་ཡིན།།
དགེ་བཅུ་ཚང་བ་གངས་རིའི་ཡུལ་ལྗོངས་ཡིན།།

རི་དང་བྲག་རི་རིན་ཆེན་གཏེར་གྱི་མཛོད།།
སྤང་དང་ནེའུ་གསིང་རྩ་ཆེན་སྨན་གྱི་ས།།
དབྱིག་འཛིན་སྣོད་ཀྱི་མ་མ་གངས་རིའི་ལྗོངས།།
ས་གསུམ་གང་དུ་བསྡུར་ཡང་ཁྱད་པར་ཆེ།།

སྐབས་གསུམ་གནས་ན་གྲོང་ཞིག་ཡོད་པར་གྲགས།།
གཏིང་འོག་ས་ན་ཡུལ་ཞིག་ཡོད་པར་ཐོས།།
དེ་གཉིས་ཕུན་ཚོགས་ཡོན་ཏན་ཆེ་ལྡན་ན།།
བར་གྱི་གངས་རིའི་ལྗོངས་ལ་འགྲན་དུ་ཤོག །

ལྷ་ཡུལ་སྒྲོགས་པ་མཛེས་པའི་རི་མོ་ཙམ།།
ཀླུ་ཡུལ་འབོད་པ་བློ་ཡིས་བཅོས་པ་ཉིད།།
མ་བཅོས་མ་བྲིས་མཛེས་པ་དངོས་མཐོང་བ།།
འཛམ་གླིང་འཛིན་མའི་ཁྱིམ་ན་གངས་རིའི་ལྗོངས།།

གངས་ལ་བལྟས་ན་མགོ་ཡི་ཞྭ་མོ་ལྷུང་།།
བྲག་ལ་གཟིགས་ན་སྙིང་གི་རྩ་ཕྲན་གཡོ།།
ཐང་ལ་ཅེར་ན་མིག་འབྲས་རབ་རིབ་བྱེད།།
གངས་རིའི་ལྗོངས་འདིའི་ཆེ་བ་བློས་མི་དཔོག །

གཙང་བོ་འབབ་པས་ཁྱོད་ལ་སྤྲོ་གླུ་ལེན།།
མེ་ཏོག་ལྡེམ་པས་ཁྱོད་ལ་དགའ་སྤྲོ་སྟེར།།
རི་དང་བྲག་གིས་ཁྱོད་ལ་དཔུང་རོགས་མཛད།།
གངས་རིའི་ལྗོངས་འདི་དགེ་བའི་ཞིང་ས་ཡིན།།

དཀོན་མཆོག་གསུམ་གྱི་བྱིན་བརླབ་ཆར་ལྟར་འབབ།།
མཁས་ཤིང་གྲུབ་པའི་ལེགས་བཤད་འོད་བཞིན་འབར།།
ས་དང་མི་ཡི་དགེ་བ་ལྷུན་རྫོགས་པ།།
གངས་རིའི་ལྗོངས་སུ་འབོད་པའི་ས་ཁོ་ན།།

༡༨/༠༢/༡༤ ཕ་ཁྱིམ་བགྲོ་གླེང་གྲུབ་རྗེས་སུ།