བོད་འབྱོར།
གྲང་འཁྱག་གི་ཡུལ་ལྗོངས་འཚོ་བའི་མི་ཚོགས་ཤིག་གིས།
གློ་སྙིང་བྲང་གསུམ་གཏད་ཆོག་ཆོག་ནི།
གངས་རི་ལས་ཡོད་མི་སྲིད་པས།
ཤིན་ཏུ་འཁྱག་པའི་སྐབས་སུ་གངས་རི་དྲན་འོང་བ་ནི།
ཆེས་རྒྱུན་ལྡན་ཞིག་རེད།
མཐོ་སྒང་གི་གནམ་གཤིས་ལོ་རེ་བཞིན་ཇེ་དྲོར་གྱུར་དུས།
གངས་རི་ལོ་རེ་བཞིན་ཞུ་འགྲོ་བ་ལ་སེམས་ཁྲལ་བྱེད་མཁན་སུ་ཞིག་ཡོད།
གངས་རི།
སྐྱིད་དུས་ཀྱི་གངས་རི།
སྡུག་དུས་ཀྱི་གངས་རི།
དཀར་པོ་ཡིན་པའི་གངས་རི།
ནོགས་མ་མྱོང་པའི་གངས་རི།
ཉི་འོད་ཀྱིས་དྲོ་དུས་ཁྱོད་རང་དྲན།
ཟླ་འོད་ཀྱིས་བསིལ་དུས་ཁྱོད་རང་དྲན།
བླ་སྲོག་གི་རྒྱབ་རི་ལྷུན་པོ།
ཆར་རླུང་གི་དུས་ཚོད་འདི་རུ།
ཁྱོད་རྟག་བརྟན་གྱི་ཉི་ཟླ་ཚེས་དགོས།
བསྐལ་བ་མི་འཇིག་པའི་སྲོག་རྟེན་ཁྱོད་ཡིན།
མཚོ་མོ་མི་སྐམ་པའི་སྨོན་འདུག་ཁྱོད་ཡིན།
གངས་རི།
འཛུམ་གྱི་ལེར་རྟག་བརྟན་ཡོང་ན།
ཨ་ཕའི་ཐོད་རུས་ཀྱི་གྲིབ་མ་སྣུམ་ཤིག་གེར།
ཨ་མའི་སྙིང་ཁོང་གི་གསོལ་འདེབས་དྲོད་ལྷང་ངེར།
ཕུ་བོའི་གཞིས་ཀ་ཡི་སྦྲ་ནག་སྨུག་གྱི་ལེར།
ཨ་ཅེའི་གནས་ཚང་གི་རྡོ་མཁར་ལྷུན་ཆགས་སེར།
གངས་རི་ཚ་གདུག་གི་སེར་ཁ་མ་འཆོར་ན།
དེའི་ཡན་གྱི་སྨོན་འདུན་གཞན་ཞིག་མི་འདུག
༩༠
རིན་ཆེན་བྱང་ཆུབ་སེམས་ཀྱི་མཛོད་ཁང་དབུས་ན༎
མ་འདྲེས་སྟོན་པ་མཆོག་གིས་དགྱེས་བརྩེར་མཛད་བཞིན༎
ཚད་མེད་སྙིང་རྗེའི་གཏེར་ཆེན་གངས་ལ་འཕོས་པའི༎
ལྷ་གཅིག་དགེ་སྦྱོང་གང་དེས་ཤིས་པ་སྩོལ་ཅིག།
ཞལ་རས་དུང་གི་ཟླ་བ་ཡུན་རིང་མ་མཇལ༎
གསུང་སྐད་ཚངས་པའི་དབྱངས་སྙན་ཡུན་རིང་མ་ཐོས༎
དགུ་བཅུའི་ལ་རྩེར་འཛེགས་པའི་དྲང་སྲོང་མེ་ཏོག།
སྐུ་བདེ་ཁམས་བདེ་ཡིན་ནམ་སེམས་ཀྱི་ཨ་ཇོ༎
སྐྱིད་ཤོད་ལྷ་སའི་ལུང་པའི་གཞིས་ཆུང་དབུས་ན༎
ཆུ་ཆེན་ཡར་ཀླུང་གཙང་པོའི་རླབས་སྒྲ་བརྗིད་ཀྱང་༎
ཉི་མའི་དབུ་ཞྭ་མནབས་པའི་རི་བོ་གྲུ་འཛིན༎
ཡུལ་ལ་གཅིག་པུར་ལྷག་པས་སྐྱོ་ཉམས་ཆེ་འདུག།
དད་བརྩེའི་འཇའ་གུར་འཁྲིགས་པའི་བོད་ཀྱི་ཞིང་ན༎
མ་ཎི་ཡི་གེ་དྲུག་མའི་ཆོས་དབྱངས་སྙན་མོད༎
བྱེས་སོང་སླར་ཡོང་མེད་པའི་བར་ཐག་དེ་ཡིས༎
དྲན་གདུང་སེམས་ཀྱི་རྨ་ཁ་སོས་ཐབས་མ་བྱུང་༎
རང་དབང་འབའ་སྒྲ་སྒྲོག་པའི་རྩྭ་ཐང་དེ་རུ༎
ལུག་ཁྱུ་ལྷས་ལ་བཀོད་པའི་གཡང་གི་རྫི་བོ༎
འཇིགས་ཅན་སྤྱང་ཀིས་བདས་པའི་ལོ་ཟླ་དེ་ནས༎
ཏི་སེའི་དབུ་འཕང་ཉམས་སོང་རིགས་ཀྱི་སྲུང་མ༎
སླར་མཇལ་རེ་བའི་འཛུམ་ཞལ་ཞེ་ལ་འཆང་ཞིང་༎
དད་པའི་ཡིད་ཆེས་ཟབ་པའི་བགྲེས་པོ་ཕལ་ཆེར༎
མ་མཇལ་གཤིན་ཡུལ་འགྲིམ་པའི་གཏན་ནས་གཏན་དུ༎
བྲལ་བའི་སྣང་བརྙན་དེ་ཡིས་ཡིད་ཁམས་སྐྱོམས་སོང་༎
ང་ཁྲུང་ལྷོ་རུ་འཕུར་བའི་རྗེས་ཤུལ་དེ་ན༎
སྐྱོ་བ་ཙེར་ཙེར་འབྱིན་པའི་སྒྲ་ལས་མེད་ཀྱང་༎
རེ་སྒུག་བྲག་ལ་བྲིས་པའི་གངས་ཀྱི་འདབ་རོལ༎།
བྱོན་པའི་སྐལ་བར་ཡོད་བསམས་ཞེ་ཡིས་བཏེགས་ཡོད༎
བཅུ་ཚན་བཅུ་ཡན་བརྒལ་བར་ཞལ་བཞེས་ཡོད་ཀྱང་༎
ཞལ་ལ་བགྲེས་ཉམས་དོད་པའི་སྐུ་ཡི་བཀོད་པ༎
དད་པའི་ཡིད་མཁར་སྒོམ་བཞིན་བདེ་ནས་བདེ་བར༎
རེ་བའི་སྨོན་ལམ་བཏབ་པ་ལན་ཅིག་མ་ཡིན༎
ཆོ་འཕྲུལ་འདྲེ་ཡིས་བཅོམ་པའི་བྷོ་ཊའི་ལྗོངས་ལ༎
དགུན་ཟླའི་ལྷགས་རླུང་གཡོལ་བའི་དབུ་ཞྭ་མེད་པས༎
ཉོན་མོངས་འབྱུང་ཆེན་འཁྲུགས་པའི་རི་བོས་གཙེར་ལ༎
རྒྱང་ནས་ཐུགས་ཁྲེལ་ཆེ་སོང་གྲུ་འཛིན་བདག་པོ༎
ལོ་རྒྱུས་དུས་ཀྱིས་བཅད་ཀྱང་ནོག་པ་མ་རེད༎
བར་ཐག་རི་ཆུས་བསྐལ་ཡང་ཆོད་པ་མ་རེད༎
སྒྲིབ་མེད་བྱམས་བརྩེའི་སྤྱན་གྱིས་དུས་ཀུན་འཚོས་པའི༎
བཀའ་དྲིན་འོ་མའི་ཆུ་གཏེར་སྐམ་པ་མེད་དོ༎