གྲགས་པ་ནས།
སྤྱི་ཟླ་༡ཚེས་༢ཉིན་བལ་ཡུལ་འཇོ་ལ་ཁེལ་གཞིས་ཆགས་སུ་གནས་སྡོད་བྱེད་མཁན་བུད་མེད་བསོད་ནམས་ཟེར་བ་མོས་རང་ལུས་མེ་སྲེག་བྱེད་རྩིས་བྱས་འདུག་མོད། གནད་དོན་འདིའི་སྔ་རྗེས་ལ་བསམ་གཞིག་བྱས་ན། མོ་རང་ནི་དེ་སྔོན་ཕྱི་ལོ་༢༠༠༨ནས་བལ་ཡུལ་ནང་གི་བོད་དོན་ལས་འགུལ་ལ་མཉམ་ཞུགས་གནང་མཁན་གྱི་དཔའ་མོ་ཞིག་ཡིན་པ་མ་ཟད། བོད་དོན་ལས་འགུལ་གྱི་ཆེད་དུ་རང་གི་ཤ་ནས་སྐྱེས་པའི་ཕྲུ་གུ་གཉིས་ཡོད་པ་ཡང་སྐབས་རེ་ནང་ལ་བཅུག་ནས་སྐད་འབོད་ལ་འགྲོ་བ་དང་། སྐབས་རེ་ཁྱིམ་མཚེས་ལ་བཅོལ་ནས་རང་ཉིད་ལས་འགུལ་ནང་མཉམ་ཞུགས་བྱེད་མཁན་ཞིག་ཡིན་པ་ཁོ་བོས་ཤེས་རྟོགས་བྱུང་། དེ་བཞིན་ད་རེས་ཡང་ཕྱི་ཟླ་༡༡ཚེས་༡ཉིན་བལ་ཡུལ་ནང་གི་ས་གནས་གཞོན་ནུས་གོ་སྒྲིག་བྱས་པའི་ལས་འགུལ་ནང་མཉམ་ཞུགས་བྱེད་སྐབས་ཀྱང་བལ་ཡུལ་གྱི་ས་གནས་དྲག་ཆས་ཉེན་རྟོག་པས་བོད་མི་ལས་འགུལ་བ་ཚོའི་ཐོག་དམ་དྲག་དང་སྡིགས་ར་སྐུལ་བ་སོགས་སྐུ་པར་འཕྲོག་བཅོམ་བྱས་པ་སོགས་སུན་གཙེར་སྣ་ཚོགས་བྱས་སོང་། གནས་ཚུལ་དེ་དག་དང་མོ་རང་གི་སེམས་ཁམས་གཉིས་འབྲེལ་བ་ཡོད་པ་ཞིག་རེད། རྒྱུ་མཚན་ནི་མོ་རང་ནི་བལ་ཡུལ་ནང་གི་བོད་མིའི་ལས་འགུལ་གང་ན་ཡོད་པ་དེ་ལ་མཉམ་ཞུགས་བྱེད་མཁན་བློ་ཐག་གཙང་བཅད་གནང་མཁན་གྱི་བུད་མེད་ཅིག་རེད། མོ་རང་ནི་སྐྱེས་ས་བལ་ཡུལ་ནང་ཡིན་ཡང་སེམས་བསམ་པ་བོད་ནང་གི་གཞིས་ལུས་རྒྱ་ཆེའི་མང་ཚོགས་ལ་རྒྱ་གཞུང་གིས་དམ་དྲག་དང་དྲག་གནོན་ཚད་ལས་བརྒལ་བ་བྱས་པའི་སྐོར་ལ་སེམས་ནས་མི་བཟོད་མཁན་ཞིག་རེད། དེ་ལྟ་བུའི་སེམས་ཁམས་ཡོད་མཁན་ཞིག་གིས་རང་དབང་ལུང་པ་ནས་ལས་འགུལ་སྤེལ་ཡོང་དུས། རྒྱ་གཞུང་གི་བཀོད་འདོམས་འོག་ནས་འཚོ་མཁན་གྱི་བལ་ཡུལ་གཞུང་གི་ཉེན་རྟོགས་པས་དུས་ནས་དུས་སུ་བཀག་འགོག་དང་དམ་དྲག་བྱས་པ་ཙམ་མ་ཟད་བོད་མི་ལས་འགུལ་བ་ཚོར་རྒྱལ་སྤྱིའི་ཐོག་ཏུ་གྲགས་ཆེ་བའི་ཉེས་རྡུང་བཏང་ཡོད་པ་དེ་ཚོ་ཡང་བརྒྱུད་ལམ་ཁག་ན་གསལ། གནས་ཚུལ་དེ་དག་གི་རྐྱེན་པས་རང་དབང་དང་་རང་གིས་འདོད་པའི་བོད་མི་རིགས་ཀྱི་ཆེད་དུ་སྤེལ་ན་འདོད་པའི་ལས་འགུལ་ལ་བཀག་འགོག་དང་། དམ་དྲག་ཤུགས་ཆེ་བྱས་པ་དེའི་རྐྱེན་པས། སེམས་ཁམས་ལ་དཀའ་སྡུག་གི་ཚོར་བ་ཤུགས་ཆེ་སླེབས་ཡོད་པ་བཤད་ཐུབ། ད་དུང་དེ་སྔོན་མཆོད་འཇོར་ས་གནས་ཀྱི་ཚོགས་ཁང་དུ་ཡང་བོད་མི་སྐོར་ཞིས་ཟད་བཅད་ངོ་རྒོལ་གྱི་ལས་འགུལ་སྤེལ་སྐབས་ཀྱང་མོ་རང་མཉམ་ཞུགས་བྱས་ཤིང་། སྐབས་དེར་སྟོད་ཐུང་ངོས་སུ་བོད་ཀྱི་རྒྱལ་དར་ཡོད་པ་ཞིག་གྱོན་པ་བལ་ཡུལ་ཉེན་རྟོག་པས་བཙན་གྱིས་ཕུད་བཅུག་སོང་། མོ་རང་སྟོད་ཐུང་དེ་ཕུད་པ་དང་འོག་ཏུ་གྱོན་ཆས་གཞན་མེད་སྟབས་མར་སྲང་ལྟ་བུར་གྱུར་སོང་། རྒྱ་ཆེའི་མང་ཚོགས་ཀྱི་ཐུགས་བསམ་བཞེས་དང་བུད་མེད་ཀྱི་སྟོད་གོས་བཙན་གྱིས་ཕུད་བཅུག་པ་ནི་ལུགས་མཐུན་ཞིག་རེད་དམ།
བལ་ཡུལ་འདི་ཡང་ད་ཆ་དེ་སྔ་ཕྱི་ལོ་ 1959 ཡི་གོང་གི་བོད་ཀྱི་གནས་སྟངས་ནང་བཞིན་རྒྱ་མིའི་དབང་ཤུགས་སླེབས་ནས་ཁ་ལོ་བསྒྱུར་གྱིན་འདུག མི་འགྱངས་པར་བལ་ཡུལ་གྱི་བདག་དབང་དེ་ཡང་རྒྱ་ནག་ལ་སྤྲོད་ཉེན་འདུག