ཁྲག་ལ་འབར་བའི་མེ།

ཌཱཀིམ།

སྲིན་མོ་ལ་ཕུལ།
ཁྲག་འབར་བཞིན། ཆུ་བོ་འབབ་པ་བཞིན།
མེ་བཞུར་ཟིན། གློག་ཞགས་འཁྱུག་པ་བཞིན།

བྱེ་བ་དུང་ཕྱུར་གྱི་ཕྲ་ཕུང་རྣམས་འབར་བཞིན།
ས་ཡ་མང་པོའི་རྣམ་ཤེས་ཀྱང་འབར་ཟིན།

ནམ་མཁའ་དམར་པོ་དེ།
འབར་བའི་མེ་ཡིན་ནམ། དམར་མོ་དེ།
བཞུར་བའི་ཁྲག་མིན་ནམ། དམར་པོ་དེ།

ས་གཞི་ནག་པོ་དེ།
བཞུར་བའི་མེ་ཡིན་ནམ། ནག་པོ་དེ།
འབར་བའི་ཁྲག་མིན་ནམ། ནག་མོ་དེ།

མེ་ཏོག་མང་པོ་ཞིག་ང་ཚོའི་ཁྲག་ལས་སྐྱེས་ནས་ཚིག
ཁ་བ་མཐུག་པོ་ཞིག་ང་ཚོའི་སེམས་ལ་བབས་ནས་སྐམ།

སྟིག་སྟིག་ལྡིང་བའི་འབྲོང་གི་སྙིང་སྒྲ་དེ་བར་དོའི་ཡུལ་ནས་ཀྱང་ཐོས།
ལྷང་ལྷང་གྲགས་པའི་དྲ་ཕྲུག་ཚོའི་ངུ་ངག་དེ་གནམ་གྱི་མཐའ་ནས་ཀྱང་ཚོར།

ནམ་མཁའ་སྟོང་པ་ཞིག་ན།
ཉི་མ་ནག་པོ་ཞིག
ཐལ་སྤྲིན་ཟབ་ཟིབ་ཀློང་ན།
ཟླ་བ་དམར་པོ་ཞིག

སྐར་མ་སྐམ་པོ་ཚོ།
ཚེ་སྲོག་ལ་རིན་ཐང་མེད་པའི་མི་ཚོགས་དང་འདྲ།

གནམ་དང་ཐག་ཉེ་ས་ན།
རི་དང་བྲག་ལ་ཡང་ཁྲག་བཞུར།
ཆུ་བོ་དང་རྒྱ་མཚོ་འང་ངུ་།

ནག་པོའི་ཁྲག་ལ་འབར་བའི་དམར་བོའི་མེ།
དཔྱིད་ཀྱི་མེ་ཏོག་གི་གསེབ་ཏུ་སྐྱེས་ཤིང་མཆེད།
སྟོན་ཀའི་འབྲས་བུ་དང་ལྷན་དུ་སྨིན་ཞིང་ལྷུང་།
དགུན་གྱི་གྲང་ངར་གྱིས་སྡོམ་ག་ལ་ཐུབ།
དབྱར་གྱི་ཆར་ཞོད་ཀྱིས་གསོད་ག་ལ་ཐུབ།

གད་རྒྱངས་ཀྱིས་འཇིག་རྟེན་སྒྲལ་བར་ནུས་བའི་སྲུང་མ་ཚོ་གཉིད་དུ་ཡུར།
ཟུར་མིག་གིས་འདོད་ཁམས་འཁྲུག་པར་ནུས་པའི་བརྟན་མ་རྣམས་སླེབས་མ་སོང་།

དྲག་སྔགས་ཀྱི་ཕུར་ཁ་སུས་ཡིས་བསྡམ།
གཏོར་ཟོར་གྱི་མཐུ་ཁ་ཅིའི་ཕྱིར་འགག
བདེན་ཚིག་དང་དམོད་མོ་ཐམས་ཅད་དབྱིངས་སུ་ཐིམ།

མཆོད་མེ་ལ་་འབར་བའི་ཁྲག
མཆོད་ཀོང་ནས་བཞུར་བའི་མེ།
ང་ཚོའི་འོད་སྣང་ནི་འཇའ་ལས་འཕྲོས།
ལྷ་མོ་དམར་མོ་དེའི་ཕྱག་ན་ཁྲག་ལ་འབར་བའི་མེ་ལྕེ་འཕྱོ།
ཨ་ལ་ལ། ཀྱེ་མ། ཀྱེ་མ།

སེང་ག་ཕོར་ནས་བྲིས།
06-02-2012