མྱི་ལྟིག
__________ནམ་ཐུག་མི་ངེས་པའི་མི་ཞིག་ལ།
མེ་ཏོག་ཆ་གཅིག་རྣ་ལ་མ་བཏགས་ཁྱོད་ཉིད་བདག་གི་ཆུང་འདྲིས་མ་རེད།།
གློ་དང་མཆིན་པ་མཚན་གླན་བྱས་པའི་དགའ་མ་དེ་ལའང་ཁྱོད་རང་མ་རེད།།
ཉིན་མོ་འཛུམ་པ་མཚན་མོ་རུམ་པ་འུ་གཉིས་དབར་ལ་ཅི་ཡང་མེད་པ།།
ཇི་ལྟར་བསམས་ན་དེ་ལྟར་འཐོམས་པས་བུ་མོ་ཁྱོད་རང་དོན་དམ་སུ་ཡིན།།
ལབ་ཀྱིན་ལབ་ཀྱིན་བདག་བཅས་ནང་སེམས་སྐད་ཅིག་ཉིད་ལ་འཕྲོག་པ་འདྲའོ།།
བསམས་ཀྱིན་བསམས་ཀྱིན་བདག་གི་ཀུན་པོ་བུ་མོ་ཁྱོད་ཀྱིས་བརྐུས་པ་འདྲའོ།།
བསྡད་ཀྱིན་བསྡད་ཀྱིན་བདག་ནི་ཁྱོད་ཀྱི་གྲིབ་མ་འདྲ་བའི་གྲིབ་གཟུགས་ཤིག་སྟེ།།
མིག་ཟུང་བཙུམས་ན་རྨི་ལམ་ཁམས་ན་རྟག་ཏུ་འཆར་བ་ཁྱོད་རང་སུ་ཡིན།།
དགུན་ཁ་འཁྱག་སྟེ་ཁ་ཤ་འདར་ཡང་ཁྱོད་ཉིད་བསྒོམས་པས་འཁྱག་སྣང་མ་བྱུང་།།
དབྱར་ཀ་ཚ་སྟེ་ཤུན་པགས་འཚིག་ཀྱང་ཁྱོད་ཉིད་མེད་པས་འཁྱག་སྣང་སྐྱེས་བྱུང་།།
དུས་ཚིགས་བཞི་ཀའི་འགྱུར་ལྡོག་དབར་ནས་ཁྱོད་ནི་རྡོ་ཡིས་བཟོས་པ་འདྲ་བྱུང་།།
ནན་གྱིས་དགའ་སྟེ་ཏན་གྱིས་དུང་བའི་སེམས་ལ་ཟུག་པའི་ཁྱོད་ཉིད་སུ་ཡིན།།
གང་ནས་བལྟས་ཀྱང་སུ་ལ་དྲིས་ཀྱང་དམར་མདངས་ལྡན་པའི་ཀུ་ཤུ་ཞིག་སྟེ།།
ཉོ་འདོད་དང་ནི་ཟ་འདོད་ཟུང་གིས་འགྲམ་ཆུ་ལྡང་སྟེ་བཟོད་ཚོད་མེད་ཀྱང་།།
སྟབས་ཀ་མ་འགྲིག་ཅིག་གི་མནར་བས་ཨམ་ཚུགས་བསྡད་དེ་ཨུ་ཚུགས་བྱས་ཀྱང་།།
བརྗེད་པར་དཀའ་བའི་དྲན་ཤིང་ཞིག་སྟེ་བློ་ལ་འབབ་པའི་འབྲོག་མོ་སུ་ཡིན།།
སྐད་ཀྱི་གདངས་ལ་འབྲོག་སྐད་བབས་པའི་བརྩེ་འདང་ཅན་མ་ཁྱོད་རང་སུ་ཡིན།།
ཡག་གི་ནང་ལ་དམར་ཤ་འཁྱིལ་བའི་བསིལ་བ་འདྲ་བའི་ཁྱོད་རང་སུ་ཡིན།།
སེམས་ཀྱིས་བལྟས་ན་མཐོང་ཞིང་བོས་ན་ཡ་ལན་མེད་པའི་ཁྱོད་རང་སུ་ཡིན།།
སེམས་པའི་ནང་གི་སེམས་པར་འཛུལ་བའི་བདག་གི་གྲོགས་མོ་ཁྱོད་རང་སུ་ཡིན།།