ཁྱོད་དང་ང་ལས་མི་ལྷག་པའི་བོད་ཁམས་ལ་བལྟས་ཏེ་དྲན་གསོ་ཐེངས་གཅིག

འཕྲིན་ལས་འོད་ཟེར།

ཚེ་སྲོག་མེ་ཞགས་ཀྱི་གུང་བུར་ཐིམ་ཐིམ་རེད།།
ཚར་གཅོད་དྲག་དཔུང་གི་གླུ་སྒྲ་ལེན་ལེན་རེད།།
མཇུག་འབྲས་ཏིལ་འབྲུ་བཞིན་ད་ནས་ཆུང་ཆུང་རེད།།
འཆི་གསོན་གྲངས་འབོར་གྱི་གཤིབ་བསྡུར་བྱེད་རན་རེད།།

འཁྱོག་བཤད་རྫུན་གཏམ་གྱི་མཛུབ་མོ་ཀེར་ཀེར་རེད།།
རེ་སྒུག་རྨི་ལམ་གྱི་འཇའ་ཚོན་ཕར་ཕར་རེད།།
གཉིས་ཕན་བྱམས་སེམས་ཀྱི་ལམ་ཁ་དོག་དོག་རེད།།
གསོན་ཤུགས་གསར་བ་ཞིག་གང་ནས་འཚོལ་རན་རེད།།

མེར་སྲེག་ལས་འགུལ་གྱི་གསུར་དྲི་འཐུལ་འཐུལ་རེད།།
མ་བུ་མཉམ་འཛོམས་ཀྱི་འདི་སྣང་འབྲལ་འབྲལ་རེད།།
ཚུར་ཕྱོགས་སྒྲིག་འཛུགས་ཀྱི་ལས་ཀ་ཉུང་ཉུང་རེད།།
ཟས་བཅད་ངོ་རྒོལ་དེ་ནང་ལ་བྱེད་རན་རེད།།

འདས་སོང་ཞལ་ཆེམས་རྣམས་ཁ་བ་འབབ་འབབ་རེད།།
དད་འདུན་རེ་འབོད་ཀྱི་ཨག་སྐད་གཅིག་གཅིག་རེད།།
མཁྲེགས་འཛིན་ལོག་སྤྱོད་ཀྱི་རྒོལ་གཏམ་གཏན་གཏན་རེད།།
འཚོ་ཐབས་གསར་བ་ཡི་ལམ་ལ་ཆས་རན་རེད།།

རེ་འདུན་མིག་ཆུ་རྣམས་གངས་ནས་བཞུར་བཞུར་རེད།།
ལ་རྒྱའི་མགོ་བོ་རྣམས་སྔར་ལས་མཐོ་མཐོ་རེད།།
མིག་དཀྱུས་མདུན་ཅོག་ལས་རྒྱང་དུ་བརྐྱངས་བརྐྱངས་རེད།།
གཞིས་ལུས་སྤུན་མཆེད་ཀྱི་དཔུང་རོགས་བྱེད་རན་རེད།།

བསྔོ་སྨོན་མཆོད་འབུལ་གྱི་ཆབ་སྲིད་འཁྲབ་འཁྲབ་རེད།།
འཕོ་འགྱུར་གསར་བ་ཞིག་རྟག་ཏུ་སྒུག་སྒུག་རེད།།
ཡིད་ཆེས་རྫུན་མ་དེ་རྒྱུན་དུ་སྒོམ་སྒོམ་ལས།།
དོན་ལྡན་བསྔོ་སྨོན་གྱི་ལམ་རྒྱགས་གནང་རན་རེད།།

སྲིད་འཛིན་གསར་བ་ལ་སྔར་ནས་སྒུག་སྒུག་རེད།།
གནོན་ཤུགས་རྫུན་མ་ལ་རྟག་ཏུ་བཅོལ་བཅོལ་རེད།།
དུས་དང་སྐབས་བབས་ཀྱི་ལམ་ཁ་འཆོལ་འཆོལ་རེད།།
ཕྱི་སྡོད་བོད་རིགས་ལ་ཡིད་ཆེས་བརླག་རན་རེད།།

ནུས་མེད་དྲིལ་བསྒྲགས་ཤིག་གང་སར་བཤད་བཤད་རེད།།
འཇོན་མེད་འགྲོ་སོང་ཞིག་གང་དུ་བཏང་བཏང་རེད།།
ཡ་ལན་ཚོར་མེད་ཅིག་རྒྱ་ལ་བསྟན་བསྟན་ལས།།
བཙན་པོའི་དཔུང་ཚོགས་ཤིག་གྲ་སྒྲིག་བྱེད་རན་རེད།།

ཕྱི་སྐྱོད་རླངས་འཁོར་གྱི་འཛིན་བྱང་བཏོག་བཏོག་རེད།།
བརྡ་ལན་ནན་མོ་དེ་སྔར་ནས་བརྒྱབ་བརྒྱབ་རེད།།
ཅི་ཡང་ལྷག་མེད་ཀྱི་དེ་རང་སྤྱི་ཚོགས་ནས།།
ལག་སྟོང་སྙིང་ཁ་ལ་སྦྱར་ཏེ་འཆི་རན་རེད།།

སྒྲིག་འཛུགས་སྲ་བརྟན་གྱི་ཁ་ཕོ་བསྒྲགས་བསྒྲགས་རེད།།
ཆིག་སྒྲིལ་དམ་ཟབ་ཀྱི་འཕྲེང་ཐག་ཆད་ཆད་རེད།།
ཚེ་སྲོག་མེ་འོབས་ཀྱི་ཀློང་དུ་རྫོགས་པ་ལས།།
འཆི་ཐབས་གསར་བ་ཡི་ལམ་ལ་ཞུགས་རན་རེད།

སྤྱི་ལོ་༢༠༡༢ཟླ་བ་༡༡་ཚེས་༡༣ཉིན་བྲིས།