ཁྱེད་རང་དེང་སང་བདེ་མོ་ཡིན་ནམ།

དོལ་སྨྱོན།
——-འཛིན་རོགས་གཅིག་པ་བསྟན་སྐྱིད་ལ་ཕུལ།

 
ནད་པ་ལྟ་དུས་སྨན་པ་ཡིན་མཁན།།
གླུ་དབྱངས་ལེན་དུས་གཞས་མ་ཡིན་མཁན།།
སྙན་ངག་འབྲི་དུས་རྩོམ་རོགས་ཡིན་མཁན།།
ཁྱེད་རང་དེང་སང་བདེ་མོ་ཡིན་ནམ།།

དཔེ་དེབ་ཀློག་ལ་དགའ་བོ་ཡོད་མཁན།།
ཟིན་ཐོ་འབྲི་ལ་སྤྲོ་བ་ཡོད་མཁན།།
དོན་ནོར་ཡིག་ནོར་མང་ཙམ་བྱེད་མཁན།།
ཁྱེད་རང་དེང་སང་བདེ་མོ་ཡིན་ནམ།།

མི་རིགས་ལ་རྒྱ་སེམས་ལ་ཡོད་མཁན།།
རིག་པའི་གཞུང་ལ་དུང་བ་ཡོད་མཁན།།
ཕ་ཡུལ་ཕྱོགས་ལ་རྒྱང་ལྟ་བྱེད་མཁན།།
ཁྱེད་རང་དེང་སང་བདེ་མོ་ཡིན་ནམ།།

གླུ་དབྱངས་ཉན་ལ་དགའ་བོ་ཡོད་མཁན།།
འདྲ་པར་ལེན་ལ་སྤྲོ་བ་ཡོད་མཁན།།
ཁ་པར་ཆུང་ཆུང་ལག་ཏུ་ཐོགས་མཁན།།
ཁྱེད་རང་དེང་སང་བདེ་མོ་ཡིན་ནམ།།

སྐད་ཆ་ཤོད་ལ་སྦྱང་ཆ་ཡོད་མཁན།།
རྣམ་འགྱུར་སྟོན་ལ་མཁས་པོ་ཡིན་མཁན།།
འབྲེལ་འདྲིས་འཇོག་ལ་འཇོན་པོ་ཡོད་མཁན།།
ཁྱེད་རང་དེང་སང་བདེ་མོ་ཡིན་ནམ།།

ཁ་ལག་བཟའ་ལ་འདོད་རྔམ་ཡོད་མཁན།།
འཐེན་ཐུག་འཐུང་ལ་སྤྲོ་བ་བྱེད་མཁན།།
དམར་ཟས་ཁ་ལག་དགྱེས་པོ་ཡོད་མཁན།།
ཁྱེད་རང་དེང་སང་བདེ་མོ་ཡིན་ནམ།།

སྨད་ལ་ཤམ་ཐབས་དམར་པོ་གསོལ་མཁན།།
སྟོད་ལ་ཕྱི་ལུགས་གོས་དཀར་མཆོད་མཁན།།
དོན་དུ་ཕྱི་ནང་ཟུང་དུ་འབྲེལ་མཁན།།
ཁྱེད་རང་དེང་སང་བདེ་མོ་ཡིན་ནམ།།

ཚོན་ཀན་ཆག་གིས་ནད་ངོས་འཛིན་མཁན།།
སྐམ་ཁབ་རྩེ་མོས་ནད་ཟུག་གཅོག་མཁན།།
ཐང་ཕྱེ་རིལ་བུས་ནད་གཏིང་འདོན་མཁན།།
ཁྱེད་རང་དེང་སང་བདེ་མོ་ཡིན་ནམ།།

ཀུན་དང་འགྲོགས་ལ་དཀའ་ཙམ་ཡིན་མཁན།།
འགྲོགས་པའི་གྲོགས་ལ་ཕྱི་ཐག་རིང་མཁན།།
གྲོགས་ཀྱི་ལ་རྒྱ་སེམས་སུ་འཛིན་མཁན།།
ཁྱེད་རང་དེང་སང་བདེ་མོ་ཡིན་ནམ།།

ང་ཡི་སྐད་ཆ་སེམས་ལ་འཇོག་མཁན།།
ང་ཡིས་ཅི་གསུང་ཚད་མར་འཛིན་མཁན།།
ནམ་རྒྱུན་ང་ལ་འཁྲུག་པ་རྒྱག་མཁན།།
ཁྱེད་རང་དེང་སང་བདེ་མོ་ཡིན་ནམ།།

༡༦།༠༡།༢༠༡༥།