བོད ལྷ་ཀླུ་གཉན་གསུམ།
ང་རང་གིས་ལོ་ངོ་གཅིག་གི་རིང་དུ་མགྲོན་ཁང་ཆེན་པོ་འདི་རུ་ལས་ཀ་བྱས་པ་ཡིན་ལ། རང་གི་ལས་ཀ་ནི་ཐེ་ལན་གྲའི་མ་བྱན་ཆེན་མོ་ཞིག་་གི་འགན་འཁུར་བ་དེ་ཡིན། གླ་ཆ་ནི་ཧིན་སྒོར་བརྒྱད་ཁྲི་ལྷག་རང་ལག་དུ་འབབ་ཀྱི་ཡོད་པ་རེད། ས་ཁུལ་འདི་ནས་ཧིན་སྒོར་བརྒྱབ་ཁྲི་ལྷག་གིས་ཁང་གླ་དང་ཟས་སོང་། རླངས་འཁོར་གྱི་སྣུམ་སོགས་ཀྱི་འགྲོ་སོང་མི་འགྲོ་སྟབས། ཟླ་ངོ་གཅིག་གི་སྔོར་དེར། ངས་མགྲོན་ཁང་འདིའི་སྤྱིའི་འགན་འཛིན་ལ་ཁོ་རང་གིས་ལོ་ངོ་གཅིག་གི་གོང་དུ་ང་ལ་ཁས་ལེན་བྱས་པ་དེར་ལག་ལེན་མ་བྱས་པ་ཡིན་ན། ང་རང་ཟླ་ངོ་གཅིག་གི་རྗེས་ཏག་ཏག་ལ་ལས་ཀ་ནས་དགོངས་པ་ཞུ་རྒྱུ་ཡིན་ཟེར་ནས་བཤད་ཀྱང་། ཁོས་ང་རང་ལ་ཉིན་འགའི་རྗེས་སུ་གླ་ཆ་ག་ཚོད་ཅིག་སྤར་ཐུབ་མིན་ཐད་ནས་ལན་གསལ་བོ་ཞིག་སྤྲོད་ཆོག་ཟེར་བས་ངས་ཀྱང་ཁོ་རང་གི་ལན་ཞིག་སྟེར་བར་བདུན་ཕྲག་གཉིས་རིང་དུ་སྒུག་པ་ཡིན།
བདུན་ཕྲག་གཉིས་ཙམ་བྱིན་ཡང་ལན་གང་ཡང་མ་སླེབས་སྟབས། ངས་ལས་ཁུངས་ལྟེ་བ་རུ་ལས་དགོངས་སྙན་ཞུ་བྲིས་པ་ཡིན། སྙན་ཞུ་སྤྲད་པའི་ཕྱིར་ཉིན་དེར། འགན་འཛིན་གཞོན་པ་ཞིག་ང་རང་གི་སར་ཡོང་ནས་ཁོང་ཚོས་ཁྱེད་རང་གི་གླ་ཆ་ཧིན་སྒོར་དགུ་ཁྲི་ལྷག་སྤྲོད་རྒྱུའི་ཐག་གཅོད་བྱས་ཟིན་ཟེར། སྐབས་དེར་ངས་ཁོང་ལ་ཐད་ཀར། དགོངས་དག ཐུགས་རྗེ་ཆེ། ད་ནི་ང་རང་འདི་ནས་ཐོན་རྒྱུའི་གྲྭ་སྒྲིག་ཚང་མ་བྱས་ཚར་ཡོད། ད་ནི་ངས་གླ་ཆ་འཕར་མིན་དེ་ལ་བལྟ་བཞིན་མེད་ཅེས་བཤད་པ་ཡིན།
འགན་འཛིན་གཞོན་པ་དེས། ཁྱེད་རང་ལ་་ང་ཚོས་གླ་ཆ་དེས་འདོད་པ་ཁེངས་ཀྱི་མི་འདུག་གམ་ཟེར་བས། ངས་དེ་འདྲ་མ་རེད། ད་ནི་ང་རང་ལ་དུས་ཚོད་གང་ཡང་མེད། ངས་འདི་ནས་ལས་ཀ་མི་བྱེད་རྒྱུའི་ཐག་བཅད་ཟིན་པ་ཡིན་ཞེས་ལན་བཏབ་དུས་སུ། འགན་འཛིན་གཞོན་པ་དེས་མགོ་བོ་འཕྲེད་དུ་གཡུགས་ཞོར་དུ། ད་ཁྱེད་རང་གིས་ནོར་འཁྲུལ་བྱེད་ཀྱི་འདུག་ཟེར་བཞིན་ཐབ་ཚང་ནས་ཕྱི་རུ་བུད་སོང་།
ཕྱིར་ཉིན་ཡང་འགན་འཛིན་གཞོན་པ་ཡོང་ནས་ཡང་བསྐྱར་ངས་ཁྱེད་རང་ལ་ཁ་བརྡ་ཞིག་བྱས་པ་ཡིན་ན། ཁྱེད་རང་ལ་བསམ་བློ་འདྲ་གཏོང་རྒྱུ་མེད་དམ་ཟེར་ནས་དྲིས་སོང་། ངས་དགོངས་དག ང་རང་གིས་ཐག་བཅད་ཚར་བ་ཡིན་ཞེས་བཤད་དུས་སུ། ཁོས། དེས་ན་ཁྱེད་རང་ག་དུས་ཕྱི་ལ་འབུད་རྒྱུ་ཡིན་ཟེར་བས། ངས་སུམ་བཅུ་སོ་གཅིག་ཉིན་ཞེས་བཤད་མ་ཐག ཁོ་བོས་བློ་ཕམ་གྱི་ངང་ཚུལ་དང་བཅས་དེ་ཐ་མག་རྐང་གཅིག་ལ་མེ་སྒྲོན་ནས་རྔུབ་འཐེན་བྱེད་ཞོར་དུ་བུད་སོང་།
ཉིན་མོ་དེ་ནས་བཟུང་། ཟ་ཁང་ནང་གི་ཞབས་ཞུ་མ་གསུམ་དང་ལས་རོགས་གཞན་པ། འགན་འཛིན་གཞན་དག་བཅས་ཀྱིས་ང་རང་ལ་སྐད་ཆ་རེ་འདྲི་བ་ནི། ཅིའི་ཕྱིར་འདི་ལས་འགྲོ་བཞིན་ཡོད། གཞན་དུ་ལས་ཀ་ཡོད་དམ། གང་དུ་འགྲོ་རྒྱུ་ཡིན་སོགས་དྲི་བ་སྣ་ཚོགས་ཤིག་ཡིན་ལ། ཞབས་ཞུ་མ་གསུམ་ནས་ང་རང་ལ་མ་འགྲོ་རོགས་ཟེར་ནས་ཡང་ཡང་ཞུ་བ་ཡང་འཐེན་སོང་།
གང་ལྟར། ང་རང་ནི་ལས་ཀ་འདི་ནས་ཐོན་རྒྱུའི་ཐད་དུ། ང་རང་གི་དགའ་རོགས་མ་དང་ལྷན་དུ་གྲོས་ཁ་བྱས་ཟིན་པ་དང་། ཁང་བ་ཡང་ཕྱིར་རྩིས་སྤྲོད་ཟིན་པ་ཡིན་སྟབས། ལས་ཀ་འདི་ནས་འབུད་རྒྱུ་ལས་གཞན་གང་ཡང་མེད། འོན་ཀྱང་། ཁོང་ཚོས་ཟ་ཁང་འདིར་ལས་ཀ་བྱེད་མཁན་གྱི་མ་བྱན་ཆེན་མོ་ཞིག ཤར་ཕྱོགས་ནས་ཡིན་པའི་མི་ཞིག་མ་རེག་སྟབས། ཨེས་སུ་རལ་རང་གི་མི་སེར་ཡིན་པ། ཤར་ཕྱོགས་ཀྱི་ཟ་མ་བརྔོས་སྤྱོར་བྱེད་སྟངས་ལ་གཏན་ནས་རྒྱུས་མངའ་མེད་མཁན་ཞིག་དང་ཅུང་ཙམ་ཤར་ཕྱོགས་ཉི་ཧོང་གི་ཁ་ལག་བཟོ་མཁན་གྱི་མ་བྱན་བྱེད་མྱོང་མཁན་གཉིས། ཉིན་འགའི་སྔོན་དུ་ང་རང་སར་འཁྲིད་དེ་ཡོང་ནས། ཁོང་གཉིས་ལ་བསླབ་རོགས་ཟེར་བ་ལྟར། ངས་ཀྱང་གང་ཐུབ་ཅི་ཐུབ་ཀྱིས་ཁྲིད་ཁུལ་བྱས་པ་ཡིན།
ཤར་ཕྱོགས་ཀྱི་ཟ་མ་གཏན་ནས་བཟོ་མི་ཤེས་པའི་མི་དེས་ངས་གང་བཤད་ལ་ཉམས་འཇོག་་བྱེད་ན་ཡང་། དྲི་བ་མང་བ་དང་དྲི་ལན་དེ་ལྟར་བཏབ་ན་ཡང་། སྐར་ཆ་ཁ་ཤས་ཀྱི་རྗེས་སུ་སླར་ཡང་དྲི་བ་དེ་རང་འཇག་འདྲི་བ་སོགས་བྱེད་པས་དངོས་ནས་སུན་སྣང་སྤྲོད་ན་ཡང་། ཉིན་ཁ་ཤས་ཀྱི་རིང་ལ་བཟོད་བསྒོམ་མི་ཐུབ་པ་གང་ཡོད་བསམ་ནས་ཁ་རོག་གེར་གང་ཐུབ་ཐུབ་ཅིག་བྱས་པ་ཡིན།
ཤར་ཕྱོགས་ཉི་ཧོང་གི་ཁ་ལག་ལས་ཤར་ཕྱོགས་ཀྱི་ཡུལ་ལུང་གཞན་གྱིས་ཁ་ལག་བཟོ་མི་ཤེས་པའི་མ་བྱན་ཆེན་མོ་ཡིན་ཟེར་མཁན་དེ་ནི། མི་དེ་ལས་ཀྱང་དྲི་བ་མང་བ་མ་ཟད། དྲིས་པའི་ལན་དུ་རང་གིས་གང་ཤེས་ཤིག་ལྷག་བསམ་རྣམ་དག་གིས་ཁྲིད་ཀྱང་། སྐད་ཆ་རེ་གཉིས་རེ་ཕར་འགྲེལ་བཤད་བརྒྱབ་དུས་སུ། ངས་ཤེས། ངས་ཤེས་ཟེར་ནས་ལན་རྐྱང་རྐྱང་འདེབས་སྟབས། བར་སྐབས་ཤིག་ལ་དངོས་ནས་ཚུགས་པ་ཟ་རུ་བཅུགས་སོང་། དེ་ནས་ངས་ཁོང་ལ། ད་དྲི་བ་མ་འདྲི། ངས་གང་བྱེད་ཀྱི་འདུག་པ་དེར་ལྟོས་ཤིག་ཟེར་ནས་བཤད་དགོས་ཐུག་སོང་། སྐབས་དེར་མི་རྒན་ལོ་ན་ལྔ་བཅུ་ལས་བརྒལ་བ་ཁོང་གིས་ཀྱང་ཁ་རོག་གེར་ཉན་ནས་ངས་གང་བྱེད་ལ་བལྟ་བཞིན་བསྡད་སོང་།
བདག་གི་སེམས་སུ་གློ་བར་དུ་བློ་འགྱོད་ཅིག་སྐྱེ་ཞོར་དུ། གདོང་ལ་འཛུམ་མདངས་ལྷད་མེད་ཅིག་བསུས་དེ། ཁོང་གཉིས་ལ་མུ་མཐུད་དུ་སློབ་ཁྲིད་བྱས་པ་ཡིན། དྲང་མོ་བཤད་པ་ཡིན་ན། མི་རྒན་ཁོང་གིས་ཀྱང་ཤར་ཕྱོགས་ཉི་ཧོང་གི་ཁ་ལག་རེ་ཟུང་བཟོ་ཤེས་སྲིད་ཀྱང་། ང་རང་གིས་བསླབ་པའི་ཐེ་ལན་གྲའི་ཁ་ལག་འདི་ཚོ་བཟོ་རྒྱུ་ཁག་པོ་རེད་འདུག དེ་ཡི་ར་སྤྲོད་ལྟ་བུ་ཞིག་ནི་ཚལ་སླང་གཡུགས་སྟངས་ཀྱང་ཡག་པོ་མི་ཤེས་པ་དེ་རེད། གང་ལྟར། ང་རང་ནི་ལས་ཀ་འདི་ནས་ཐོན་འགྲོ་མཁན་ཡིན་དུས། རང་གིས་ལྷག་བསམ་རྣམ་དག་གིས་ཁོང་གཉིས་ལ་གང་ཐུབ་ཞིག་ཁྲིད་ཁུལ་བྱས་པ་ཡིན།
མཇུག་དེར། ངས་ཁོང་གཉིས་ལ་ད་མ་ཤེས་པ་རེ་ཡོད་ན་ང་ལ་དྲིས་ཤིག་དང་། ངས་འདི་ནས་འགྲེལ་བཤད་བྱས་ཆོག་ཟེར་ནས་བཤད་དུས། རྒན་པོ་དེས་གདོང་ལ་འཛུམ་མདངས་ཤིག་བླངས་ཞོར་དུ། འདི་ག་རེ་རེད། གཤེར་ཁུ་འདི་ཇི་ལྟར་སྡེབ་སྤྱོར་བྱེད་དགོས་པ་རེད་སོགས་ནས་དྲི་བ་རེ་ཟུང་ཞིག་དྲིས་སོང་།
ཞབས་ཞུ་མ་ཚོས། ང་རང་ལ་སྐད་བཏང་ནས། དོ་ནུབ་ཁྱེད་རང་ཡིན་གཅིག་མིན་གཅིག་ང་ཚོ་ལྷན་དུ་བསྡད་ནས་ཟ་མ་ཟ་རོགས་བྱོས། ཁྱེད་ཀྱིས་ག་རེ་བཞེས་འདོད་འདུག་སོགས་མང་བོ་ཞིག་བཤད་པ་དེར་ངས་ཁས་ལེན་བྱས་དེ་ཁོང་ཚོའི་ལྷན་དུ་བསྡད་པ་ཡིན། ཁོང་ཚོས་ང་ཚོ་དངོས་ནས་ཁྱེད་རང་ལ་བརྩེ་བ་ཡོད། ཁྱེད་རང་བུད་སོང་ན་ང་ཚོས་དངོས་ནས་དྲན་ངེས་ཡིན། རྗེས་ཕྱོགས་ང་ཚོའི་འབྲེལ་བ་ཆད་དུ་མི་འཇུག ང་ཚོ་ཁྱེད་རང་དང་ལྷན་དུ་ལས་ཀ་བྱེད་རྒྱུ་བྱུང་བ་དེར་དངོས་ནས་དགའ་བོ་དང་སྐྱིད་པོ་བྱུང་ཟེར། སྐབས་དེར། ངས་ཁོང་ཚོ་ལ་ངས་ཀྱང་བྲེལ་བ་ཆེ་བའི་སྐབས་སུ་ཁྱེད་ཅག་ལ་ཚིག་རེ་ཟུང་སེམས་ལ་གནོད་པ་དེ་འདྲ་ཤོར་ཡོད་སྲིད་པ་རེད། དེ་འདྲ་བྱུང་ཡོད་ན། དེ་རིང་གི་གོ་སྐབས་འདི་བཟུང་དེ། ངས་ཁྱེད་ཚོ་ཚང་མ་ལ་དགོངས་དག་ཞུས་པ་ཡིན་ཞེས་བཤད་དུས། ཁོང་ཚོས་ཁ་གཅིག་གྲགས་ཀྱིས་དེ་འདྲ་གཏན་ནས་མེད་ཟེར། མཐའ་མཇུག་ངས་ཁ་པར་ཨང་གྲངས་སྟེར་རོགས་གནོང་ཟེར་བ་ལྟར། ངས་ཀྱང་རང་གི་ཁ་པར་ཨང་གྲངས་ཁོ་མོ་ཚོར་སྤྲད་པ་ཡིན།
ལས་ཀ་མཇུག་བསྡུ་རན་སོང་། སྐབས་དེར། མི་རྒན་ཁོང་གིས་དགེ་རྒན་ཁྱེད་ལ་བཀའ་དྲིན་ཆེ། ཁྱེད་རང་གང་དུ་སོང་ཡང་། བྱ་བ་ལམ་འགྲོ་ཡོང་བ་དང་བསམ་དོན་འགྲུབ་པར་རེ་བ་ཡོད་ཟེར། གཞོན་པ་དེས། ཁྱེད་རང་ལྟ་བུའི་མ་བྱན་ཞིག་ད་སྔ་ངས་མཐོང་མྱོང་མེད། དངོས་ནས་བསམ་ཤེས་ཡོད་མཁན། ལས་ཀ་ལ་འཇོན་ཐང་ཅན། མི་ལ་བསྟུན་མཁས་པ། སྤྱང་གྲོང་འཛོམ་པོ། ཁ་ཡག་ལུང་བ་བཀང་བཤད་པ་མ་ཟད། དངོས་ནས་ང་རང་ལ་སེམས་གཏིང་ནས་གང་དུ་སོང་ས་དེ་ནས་དོན་ཀུན་འགྲུབ་པར་རེ་བ་དང་སྨོན་ལམ་ཡོད་ཟེར། ངས་མཐའ་མཇུག་དུ་ཁོང་གཉིས་ལ་ཁྱེད་གཉིས་ཀྱི་འདོད་དོན་འགྲུབ་པར་རེ་བ་ཡོད་ཅེས་བཤད་པ་ཡིན།
ཨ་རོགས་དྲ་གྲོགས་ཆ་བོ། དབྱིན་ཡིག་གིས་མིང་lobsing བློ་བཟང་ཞེས་པའི་མིང་ཅན་འདིས་མཆན་བུ་འདེབས་སྟངས་ལ་ཅིག་ལྟོས་དང། ངོ་མ་ངོ་ཚ་བྱེད་དང་བགད་ཤོར་བྱེད་ཅིག་མ་རེད་དམ། ང་དང་ཤག་མཚེས་ཀྱི་དྲ་ཐོག་དང་ཟིན་བྲིས་སྐོར་ལ་ཁ་བརྡ་བྱས་པ་ཡིན། གོང་གི་དབྱིན་ཡིག་གི་མིང་ཅན་འདི་ཀི་རྟི་དགོན་པའི་གྲྭ་བ་ཞིག་ཡིན་ཐག་ཆོད་རེད་འདུག ཁོས་ཆབ་ཚང་འཇམ་དཔལ་སྡུག་ཚུལ་ལ་གཅིག་ལྟོས་དང་། ཁོ་རང་གི་རྒྱུས་ཡོད་མདོག་གིས་མི་ནག་པོར་བཟོ་བར་དམིགས་འདུག ། ད་དུང་མི་ཧ་ལམ་མི་ཤེས་ས་ཡང་མི་འདུག དྷཨ་རོགས་བློ་བཟང་མིང་ཅན། ཁྱེད་ཀྱི་འདོད་ཆགས་ཞེ་སྡང་གི་སྐད་ཆ་མ་བཤད་མ་གཏོགས་ངའི་ཁཀེྱད་རང་ཕྱོགས་གཏོགས་དང་བཅས་པའི་ནང་ཚུལ་དམར་རྗེན་ལ་མི་འདོན་ན། བཀའ་འགྱུར། ཁྱེད་ཚོའི་རིགས་ལ་མ་ཤེས་མེད།
བོད་ ལྷ་ཀླུ་གཉན་གསུམ། ཀློག་འདོད་ཡོད་པའི་དངོས་སྒྲུང་བྲིས་འདུག
དེ་ནས་ཁུར་རྩ་དེ་རྒྱབ་ཏུ་ཁུར་ཞིང་། ན་ཆུང་མ་དེ་ལག་པས་ཁྲིད་དེ་ཟ་ཁང་ཕྱིར་རུ་ཐོན་སོང་བ་ངས་ཀྱང་ཤེས་ལ། གང་དུ་སོང་བའི་རྗེས་ཀྱི་གནས་ཚུལ་རྣམས་ངས་སྒུག་ནས་སྡོད།