ཁེར་རྐྱང་བ། བདེ་མོ་བྱོས།

རྔ་བ་ཀུན་བཟང་སྒྲོལ་མ།

མཚམས་མཚམས་སུ་ཁྱོད་རང་
ཁེར་རྐྱང་ངང་ལམ་ལ་ཆས་དགོས་མོད
ཁྱེད་རང་ཁྱེད་ཀྱི་དོན་དུ་འཚོ་ན་བཟང་
ཡོད་ཚད་ལྐོག་གྱུར་ཞིག་གཏན་ནས་མིན་པས
སྐབས་སྐབས་སུ
ཁྱེད་ལ་ཁེར་རྐྱང་གི་ན་ཟུག་ཡོང་སྲིད་མོད
ཁྱེད་རང་ཁེར་རྐྱང་གཏན་ནས་མིན
རྒྱུ་མཚན ཁྱོད་ཀྱི་ཕ་རོལ་ན
སེམས་པས་ཁྱེད་ལ་ཉན་མཁན་ཧ་ཅང་མང་བས
ཁྱོད་རང་ཁེར་རྐྱང་ཡིན་མི་སྲིད

དེ་རིང་ཁ་སང་
ཁྱེད་གཅིག་པུས་ཡོད་ཚད་ཁུར་དུ་བླངས་པ་དེ་བས་ཀྱང་དཀའ་མོད
འོན་ཀྱང་ལས་དབང་ལ་བཤད་ས་ཞིག་གང་དུ་ཡོད
དེའི་ཕྱིར
ངས་ཁྱེད་ཀྱི་ཚབ་ཏུ་སྐྱབས་གསུམ་ལ་གསོལ་བ་འདེབས་བཞིན་ཡོད་པས
ཁྱེད་རང་ཁེར་རྐྱང་དུ་ལུས་མི་སྲིད་ལ
ཁེར་རྐྱང་གི་ཁྱེད་ཀྱི་སེམས་པ་འདིར
དུས་དེ་རིང་ནས་བཟུང་
ལྷིང་འཇགས་སུ་གནས་པར་སྨོན

ང་ནི་ངོ་མ་གླེན་རྟགས་སྟོན་མཁན་ཞིག་མ་ཡིན་ནམ
དོན་དངོས་སུ་་་་་་་་་ཁྱེད་ལ་ཁེར་རྐྱང་གི་ཐ་སྙད་ཙམ་ལས
ཁྱོད་རང་ཁེར་རྐྱང་གཏན་ནས་ཡིན་མི་སྲིད་ལ
ཁ་སང་སྐྱིད་པའི་གླུ་དབྱངས་ལེན་རོགས་མང་ལ་
དེ་རིང་ཡང་
སྡུག་གི་སྙིང་གཏམ་བཤད་རོགས་མང་བས
ས་གཞི་ཆེན་མོ་འགྲིམ་ན་བཟང་པས་
སང་ཉིན་
སླར་ཡང་འུ་ཅག་ལྷིང་འཇགས་ཀྱི་ཁང་ཆུང་ནས་འཕྲད་ངེས
ཡང་གཅིག་བཤད་ན
ཁ་སང་ཇི་འདྲའི་སྐྱིད
ངེད་གཉིས་ཀྱིས་ཞི་བདེ་ཆེ་བའི་ཁང་མིག་ཆུང་ཆུང་དེ་ནས
སྙིང་གཏམ་གྱི་འོ་མཚོ་འཁྱིལ་མྱོང་ལ
ངེད་གཉིས་ཁ་མཚར་དང་ཀུ་རེའི་ཁྲོད་ནས
ཁྱེད་ཀྱིས་ཁ་སང་གི་གཏམ་རྒྱུད་བཤད་མྱོང་ལ
དེ་རིང་གི་དྲན་གདུང་གླེང་མྱོང་བས
གར་ལྟར དེ་རིང་
སླར་ཡང་གནས་སྐབས་ཀྱི་བདེ་མོ་དེའི་ལག་བརྡ་ཞིག
དེ་རིང་ འུ་གཉིས་རང་རང་སོ་སོར་གྱེས་མོད
ངའི་དྲན་འཛིན་གྱི་མེ་ལོང་ངོགས་ན
ཁྱོད་ཀྱི་ལྷད་མེད་ཀྱི་བརྩེ་མདངས་མངར་མོ
ག་ལེར་ག་ལེར་འཛུལ་ཡོང་བས
ཁེར་རྐྱང་གི་སེམས་པ་དམར་པོ་འདི
ཁྱེད་ཕྱོགས་སུ་སླར་ཡང་
ཐེངས་ཤིག་ཤོར