ཚངས་དབྱངས་རྒྱ་མཚོས་ཕྱི་ལོ་༢༠༡༢ཟླ་༡ཚེས་༢༦ཉིན་བསྡུ་རུབ་བྱས། འབྲེལ་གཏུག་ཁ་པར་ཨང་གྲངས། 9882603991
བོད་ནང་གི་འབོད་ཚིག <<ཞི་བདེའི་དེད་དཔོན་བོད་ལ་ཕེབས་པར་རང་དབང་དགོས།>>
ཕྱི་ལོ་ ༢༠༡༢ ཟླ་ ༡ ཚེས་ ༡༨ ནས་ཚེས་ ༢༥ བར་དུ་མདོ་སྨད་མགོ་ལོག་པདྨ་རྫོང་དུ་ཞི་རྒོལ་བྱུང་བའི་གནས་ཚུལ་རགས་རིམ།
ཕྱི་ཚེས་ ༡༨ ཉིན་གྱི་ཞོགས་པ་དུས་ཚོད་ ༡༡ ། ༣༠ ཙམ་ནས་ཨ་སྐྱོང་ཇོ་ནང་དགོན་པའི་གྲྭ་ཉི་ཤུས་རྫོང་ཐོག་ཏུ་ཞི་རྒོལ་བྱས་ཡོད་ལ། སྐབས་དེར་ཁོང་ཚོའི་ལག་ཏུ་གོང་ས་མཆོག་གི་སྐུ་པར་དང་ནང་པའི་ཆོས་དར། དེ་བཞིན་དུ་འཕྲེད་དར་ཆེན་པོ་གསུམ་བཅས་བཟུང་ཡོད་པ་ལས་འཕྲེད་དར་གཅིག་གི་སྟེང་དུ་“ང་ཚོར་རང་དབང་དགོས”་ཞེས་དང་། ཡང་གཅིག་གི་སྟེང་དུ་“ཞི་བདེའི་དེད་དཔོན་བོད་ལ་ཕེབས་པར་རང་དབང་དགོས།”ཞེས་དང་། ཡང་གཅིག་གི་སྟེང་དུ་“པཎ་ཆེན་རིན་པོ་ཆེའི་གཙོས་ཆབ་སྲིད་བཙོན་པ་རྣམས་གློད་གྲོལ་གཏོང་དགོས།” ཞེས་བཀོད་ཡོད་འདུག་ལ། ཁོང་ཚོས་རྫོང་གི་སྲང་སྨད་ནས་ཞི་རྒོལ་མགོ་བཙུགས་ཏེ་རྫོང་སྲིད་གཞུང་གི་སྒོར་ཐོན་དུས། དེར་ཡང་པདྨ་རྫོང་ལྕགས་རི་ཡུལ་ཚོ་འབྲུས་སྒང་དགོན་པའི་གྲྭ་བ་དྲུག་གིས་དེར་སྐད་འབོད་བྱེད་བཞིན་ཡོད་པ་དང་ཁེལ། དེར་ཡོད་པའི་གྲྭ་བ་དྲུག་གི་ལག་ཏུ་གོང་ས་མཆོག་གི་སྐུ་པར་བཟུང་ཡོད་ལ། ཁོང་ཚོས་མི་རེའི་མགོར་བོད་རང་བཙན་ཞེས་པའི་ཡི་གེ་བྲིས་ཡོད་པའི་རས་བཅིངས་ཡོད་འདུག ཁོང་ཚོས་མཉམ་དུ་སྐད་འབོད་བྱས་ཏེ་སྲང་བར་དུ་སྐོར་བ་གསུམ་བྱས་རྗེས། སྲང་དཀྱིལ་དུ་ཨར་འདམ་ལས་བཟོས་པའི་མེ་ཏོག་པདྨ་འདབ་བརྒྱད་ཆེན་པོ་ཞིག་ཡོད་པ་དེའི་སྟེང་དུ་སྐུ་པར་དང་ཆོས་དར། འཕྲེད་དར་བཅས་ཕྱར་ཏེ་ལས་འགུལ་མཚམས་འཇོག་བྱས་འདུག ཉིན་དེར་དམག་དང་ཉེན་རྟོགས་པས་འདྲ་པར་རེ་བླངས་པ་ཙམ་ལས་འཛིན་བཟུང་བྱས་མི་འདུག
ཕྱི་ཚེས་ ༡༩ ཉིན་རྫོང་གི་ལས་བྱེད་པ་ཨ་སྐྱོང་ཇོ་ནང་དགོན་དུ་ཡོང་ནས་ཁ་སང་སྐད་འབོད་བྱེད་མཁན་གྱི་གྲྭ་བ་དག་རྩིས་སྤྲོད་དང་མགོ་བཏགས་བྱས་ན་གུ་ཡངས་གཏོང་ཚུལ་དང་། དེ་མིན་ན་དགོན་པའི་ཆོས་སྒོ་བརྒྱབ་རྒྱུ་ཡིན་པ་མ་ཟད་གྲྭ་བ་ཚང་མ་འཛིན་བཟུང་བྱེད་རྒྱུ་ཡིན་ཚུལ་སོགས་ཀྱི་འཇིགས་སྐུལ་བྱས་མོད། དགོན་པས་གྲྭ་བ་དག་རྩིས་སྤྲོད་མ་བྱས་པར་མ་ཟད། གྲྭ་བ་དག་གིས་ཀྱང་མགོ་བཏགས་བྱས་མི་འདུག
ཕྱི་ཚེས་ ༢༠ ཉིན་ཨ་སྐྱོང་ཇོ་ནང་དགོན་ཐོག་ཏུ་རྫོང་ཉེན་རྟོགས་པ་དང་། དམག་མི་ཕོན་ཆེན་འབྱོར་ཏེ་དགོན་ཐོག་ཏུ་ཡོད་པའི་གྲྭ་བ་དག་འཛིན་བཟུང་དང་ཆོས་སྒོ་རྒྱབ་འཆར་བྱས་སྐབས། ཨ་སྐྱོང་སྡེ་བའི་སྡེ་མི་བདུན་བརྒྱ་ལྷག་དགོན་པར་འཛོམས་ཏེ་དགོན་པར་སྐོར་བ་བྱས་པའི་ཁུལ་གྱིས་དགོན་པར་ཡོད་པའི་གྲྭ་བ་དག་འཛིན་བཟུང་བྱེད་མ་བཅུག་པར་མ་ཟད། ཉེན་རྟོགས་པ་དང་དམག་མིས་དགོན་པའི་ཆོས་སྒོ་ཡང་རྒྱབ་མ་ཐུབ་པར་ཕྱིར་ལོག་བྱས་འདུག
ཕྱི་ཚེས་ ༢༡ ཉིན་འབྲུས་སྒང་དགོན་དང་ཨ་སྐྱོང་ཇོ་ནང་དགོན་གཉིས་སུ་རྫོང་སྲིད་གཞུང་གི་ལས་ཁུངས་བཙུགས་ནས་རྒྱལ་གཅེས་ཆོས་གཅེས་ཀྱི་སློབ་གསོ་ཞེས་པ་གཏོང་འགོ་བརྩམས་ཡོད་མོད། འོན་ཀྱང་ཨ་སྐྱོང་ཇོ་ནང་དགོན་པའི་ནང་དུ་ད་སྐབས་གྲྭ་བ་གཅིག་ཀྱང་མེད་པས་ཁོ་ཚོས་སློབ་གསོ་གཏོང་ས་གཅིག་ཀྱང་རག་མི་འདུག་མོད། འོན་ཀྱང་ཨ་སྐྱོང་ཇོ་ནང་དགོན་པའི་ནང་དུ་ད་སྐབས་ཆོས་ལུགས་ཀྱི་བྱེད་སྒོ་གཅིག་ཀྱང་སྤེལ་མི་ཆོག་པའི་བཙན་བཀའ་བཏང་ཡོད་འདུག་ལ། ཚེས་ ༢༤ ཉིན་ཞི་རྒོལ་བྱེད་མཁན་གྱི་གྲྭ་བ་དག་ད་སྐབས་རིའི་སྒང་དུ་བྲོས་བྱོལ་བྱེད་བཞིན་ཡོད་འདུག
ཕྱི་ཚེས་ ༢༤ པདྨ་རྫོང་དབང་རུས་ཡུལ་ཚོའི་མི་སྐྱ་དྲུག་གིས་པདྨ་རྫོང་ཐོག་ཏུ་གོང་ས་མཆོག་གི་སྐུ་པར་ལག་ཏུ་བཟུང་ནས་སྐད་འབོད་བྱས་ཡོད་འདུག་ལ། སྐབས་དེར་རྫོང་ཉེན་རྟོགས་པ་དང་། དམག་མི་ཕོན་ཆེན་འབྱོར་ནས་ཁོང་ཚོ་འཛིན་བཟུང་བྱས་པར་མ་ཟད། སྐབས་དེར་ཁོང་ཚོ་གཅར་རྡུང་ཚད་ལས་བརྒལ་བ་བཏང་བར་བརྟེན། དེའི་ཉེ་འཁོར་དུ་ཡོད་པའི་བོད་པ་དག་གིས་མ་བཟོད་པར་མཉམ་དུ་བརྒྱུགས་ནས་ཁོ་ཚོ་ཉེན་རྟོགས་པའི་ལག་ནས་འཕྲོག་ཐབས་བྱས་མོད། ཉེན་རྟོགས་པ་དང་དམག་མི་མང་པར་བརྟེན་འཕྲོག་ཐུབ་མི་འདུག་ལ། སྐབས་དེར་དམག་མིས་མང་ཚོགས་ལ་ཚོད་མེད་དུ་རྡུང་རྡེག་བྱས་པས་མི་མང་པོར་རྨས་སྐྱོན་ཕོག་ཡོད་པར་མ་ཟད། ཡང་བསྐྱར་མི་དྲུག་འཛིན་བཟུས་བྱས་འདུག་མོད། དེ་དག་ཕྱི་ཚེས་ ༢༥ ཉིན་གློད་གྲོལ་བཏང་ཡོད་པའི་གནས་ཚུལ་ཐོན་འདུག
ཕྱི་ཚེས་ ༢༥ ཉིན་མགོ་ལོག་པདྨ་རྫོང་སྟག་མཁར་ཡུལ་ཚོ་རུ་ཞི་རྒོལ་བྱས་ཡོད་པ་དང་། དེ་བཞིན་དུ་མགོ་ལོག་གཅིག་སྒྲིལ་རྫོང་དཔལ་ཡུལ་ཡུལ་ཚོ་ནས་ཞི་རྒོལ་བྱས་ཡོད་པའི་གནས་ཚུལ་ཐོན་ཡོད་ཀྱང་ཁ་གསལ་ཤེས་རྟོགས་མ་བྱུང་།
གོང་འཁོད་གསར་འགྱུར་ཁག་བོད་ནས་ཁ་པར་བརྒྱུད་འབྱོར་པའི་གནས་ཚུལ་ཁུངས་ལྡན་ཡིན།
བོད་རྒྱལ་ལོ།