ང་ཚོས་ཁ་བརྡ་བྱས་ནས་ཟླ་བ་བཞི་ཙམ་སོང་། ཟླ་གྲངས་ཉུང་ན་ཡང་རྩོམ་གྲངས་མང། དྲ་གྲོགས་མང་། མང་ན་ལོས་བཟང་སྟེ་སྤུས་ཀ་མཐོ་ན་དེ་ལས་བཟང་། ཁ་བརྡ་ལ་གྲངས་ཀ་འཕེལ་བ་དང་མཚུངས་སུ་སྤུས་ཀ་ཡང་འཕེལ་བཞིན་པ་འདི་ནི་ཧ་ཅང་དགའ་དགོས་པ་ཞིག་རེད། ཡིན་ན་ཡང་གཤམ་གྱི་དོན་ཚན་བཞི་ལ་ཡང་སྐྱར་དྲན་སྐུལ་ཞིག་གཏོང་བ་ལ་དགོངས་འགལ་མེད་པ་ཞུ།
༡ ཁ་བརྡ་དྲ་དེབ་ཀྱི་ཐོག་ལ་མི་སྒེར་བ་གང་རུང་གི་ཚེ་སྲོག་ལ་རྒོལ་བའི་གཏམ་ཀུ་རེའི་ཚུལ་དུ་ཡང་མ་ སྤེལ་རོགས། དཔེར་ན་ གསོད་ཀྱི་ཡིན་ལྟ་བུ། གལ་སྲིད་སྤེལ་ན་དྲ་དེབ་དོ་དམ་པས་བསུབ་རྒྱུ་ཡིན་པ་ལ་དགོངས་འགལ་མེད་པ་ཞུ།
༢ དྲ་གྲོགས་ཕན་ཚུན་དང་། གླེང་མོལ་གྱི་བརྗོད་གཞིར་གྱུར་བའི་གང་ཟག་སུ་ལ་ཡང་སྐྱག་པ་ཟོ་ཟེར་བ་ལྟ་བུའི་ ཚིག་རྩུབ་དང་ཚིག་བཙོག་མ་སྤྱོད་རོགས་གནང་། གང་ཟག་རེ་ཟུང་ལ་གཏམ་སྤྱོད་འདི་འདྲས་ཕོག་ཐུག་མི་འགྲོ་བ་བདེན་ན་ཡང་། གཏམ་རྗོད་ཀྱི་ཁོར་ཡུག་ཅིག་གི་ངོས་ནས་བཤད་ན་འདི་འདྲ་ནི་དོར་བྱ་ཞིག་ཡིན་པ་སྨོས་མེད་རེད།
༣ ཡིག་ནོར་འབྲི་མཁན་ལ་མ་སྤྱོ་རོགས། ཡིག་ནོར་ལ་སྤྱོ་ཐལ་ཤོར་ན་བསམ་བློ་གསར་པ་དང་གནས་ཚུལ་གསར་པ་སྤེལ་རྒྱུ་ཡོད་པ་ ཁ་ཤས་ཀྱིས་ཡིག་ནོར་ཤོར་དོགས་ཀྱིས་ཁ་བརྡ་དྲ་དེབ་ལ་འཛུལ་མི་ཐུབ་པ་ཡང་ཡོང་ སྲིད། ཡང་ཡིག་ནོར་སྐོར་ཞིག་ནི་འབྲི་མཁན་གྱིས་སྣང་མེད་བྱས་ནས་ཤོར་བ་མ་གཏོགས་མ་ཤེས་ ཏེ་ཤོར་བ་མ་རེད། དེ་རྣམས་ལ་རྩོམ་ཡིག་བྲིས་ནས་མ་སྤེལ་སྔོན་ལ་སྐྱར་ཀློག་ཅིག་གནང་བའི་འབོད་སྐུལ་ཞུ་གི་ཡོད།
༤ ཁ་བརྡ་དྲ་དེབ་འདི་ད་དུང་གསར་པ་ཡིན། དེ་བས་སྤྱོད་མཁན་ཡོངས་ཀྱིས་དྲ་དེབ་འདི་གསལ་བསྒྲགས་དང་བརྒྱུད་བསྒྲགས་གནང་རོགས་ཞུ་བ་ཡིན། ཁ་བརྡའི་དམིགས་ཡུལ་དུ་འཁོད་པ་བཞིན་ཁ་བརྡ་འདི་ལ་བོད་མི་གཞིས་བྱེས་རྒན་གཞོན་ ཕོ་མོ་དབྱེར་མེད་ཀྱིས་ཞུགས་ཐུབ་པར་སྨོན།
ཨ་རོགས། ངས་ཁྱེད་ཚོས་སྐྱག་པ་ཟོས་ཟེར་བ་དེ་འདྲ་ངས་བྲིས་མྱོང་། ཡིན་ན་ཡང་ངས་གང་ཟག་སྒེར་བ་ལ་དེ་འདྲ་བྲིས་མེད། ཐུན་མོང་ལ་བྲིས་ན་འགྲིགས་ཀྱི་མེད་དམ། ངས་དེ་གྲྭ་བ་ཚོས་འཁོར་གསུམ་ཟེར་བ་དེའི་ཚབ་བྲིས་པ་ཡིན།
འདི་འདྲ་མཚམས་མཚམས་ལ་རང་བཞིན་གྱིས་ཁ་ནས་ཤོར་འགྲོ་གི་འདུག
སྙིང་རྗེ་ཁག་མི་འདུག མགོན་པོ་ཕྱག་གཉིས་ངས་ངོ་མི་ཤེས་ཡིན་ན་འང་ཁོ་རང་གི་དགོད་བྲོ་བ་ཞིག་བྲིས་འདུག འདི་མཚམས་མཚམས་ལ་ཁ་ནས་ཤོར་འགྲོ་གི་ཟེར་དུས་ངོ་མ་སྨྲ་བརྗོད་རང་དབང་ལ་རིན་ཐང་ཡོད་པའི་སྤྲོ་སྣང་ཞིག་གི་རྒྱབ་ལྔོངས་རྙེད་ཐུབ།
ཡིན་ན་འང་ཁ་བརྡའི་རེ་སྐུལ་ལ་ང་རང་འཐད་པ་ཡོད།
སྤྱིར་ཁྲིམས་ནི་རང་དབང་གི་མངའ་ཐང་སྲུང་བྱེད་ཅིག་རེད་བསམ་གི་ཡོད།
རང་དབང་ཐད་ཆེ་ན་སྨྱོན་པར་འགྱུར་ཟེར་བ་དེ་འང་གནས་ལུགས་མེད་པའི་སྐད་ཆ་ཞིག་མ་རེད་དེ་བས་ཁ་བརྡའི་རེ་སྐུལ་གྱིས་ཀྱང་ཁོ་རང་གི་ཁོར་ཡུག་ཡག་པོ་ཞིག་གི་ཆེད་དང་ང་རང་ཚོའི་ཟུག་ལྟ་སྤུས་གཙང་ཞིག་ཡོང་བའི་ཆེད་དུ་རེད་བསམ་གི་འདུག