ཀྲུང་གོའི་འབའ་བ་ཕུན་ཚོགས་དབང་རྒྱལ་གླེང་།

རྔ་རྒོད།

ཁོ་བོས་ཐོག་མར་ཕུན་དབང་རྒྱལ་ས་པེ་ཅེན་ནས་བདེ་འཇགས་ངང་ཤི་སོང་བའི་གཏམ་དེ། ངས་སྐྱག་པ་ཞིག་གཏོང་ཞོར་དུ་མའོ་དང་ཏན་གཉིས་ཀྱི་ལོ་རྒྱུས་དབྱིན་བྲིས་ཚད་ལྡན་མ་ཞིག་ཀློག་བཞིན་པའི་སྐབས་དེར་ཐོས་སོང་མོད། འོན་ཀྱང་། སྐད་ཆ་དེས་ང་ལ་ཚོར་བ་བདེ་སྡུག་གང་ཡང་སྤྲད་མ་སོང་། རྒྱུ་མཚན་ནི་ཕལ་ཆེར། སྐབས་དེར་ངའི་མིག་ལམ་དུ་འཆར་འོངས་པ་ནི་ཁོའི་མི་ཚེའི་ལོ་རྒྱུས་དེ་དབྱིན་བོད་གཉིས་ཀའི་སྟེང་ན་ཡོད་པ་ཁོ་ན་ཡིན་པས་རེད། དེའི་སྐོར་ལ་ངས་ནམ་རྒྱུན་དབྱིན་སྐད་ཐོག་ཏུ་འདི་ལྟར་ལབ་ཀྱིན་ཡོད། I didn’t buy that story ཞེས་བཤད་རྐྱང་ཡིན། རྒྱུ་མཚན། ལས་མི་དགེ་བ་བསྒྲུབས་པ་ལས་འབྲས་པུ་དགེ་བ་འབྱུང་དཔེ་མི་སྲིད་པ་དང་ལྷག་པར་དུ་ལོ་རྒྱུས་དེ། ཕྱི་རྒྱལ་གྱི་གསར་འགོད་པ་སྐུ་ཞབས་གྷོ་སི་ཐྲིན་གཙོས་མི་ལྔས་ལོ་བཅུའི་རིང་རྒྱ་ནག་གི་ཁ་གཏད་ཆེད་དུ་ཕུན་དབང་ལ་བཅར་འདྲི་ཡང་དང་བསྐྱར་དུ་བགྱིས་ཏེ་མཐར་ཡག་བསྒྲིགས་བླ་མའི་ལོ་རྒྱུས་ལྟར་ང་ཚོའི་མིག་མདུན་དུ་སྤུངས་པའི་དེབ་རྒན་དག་ལྟར་བཟོས་པ་ཞིག་དེའོ།།
དཔེར་ན། ཤར་བ་བསྟན་འཛིན་གྱིས་སྐུ་ཞབས་ཧེ་ལོ་རི་ལ་གཡོག་བགྱིས་ཏེ་ཇོ་མོ་གླིང་མའི་གངས་རྩེར་བསྐྱོད་དེ་འཛམ་གླིང་ན་ལོ་རྒྱུས་གསར་བ་ཞིག་བསྐྲུན་པའི་རྗེས་སུ། ད་གཟོད་ནུབ་བོད་གསར་འགོད་པ་དག་གིས། ཤར་བ་བསྟན་འཛིན་ལ་དཔའ་བོའི་མཚན་སྙན་ཞིག་གསོལ་བ་འདྲ་བོ་རེད། དངོས་ནས་དེ་དུས་ཤར་བ་བསྟན་འཛིན་ནི་གཡོག་གླ་ཙམ་གྱི་ཆེད་དུ་སོང་བ་ལས་བོད་མིའི་ལན་ཞེན་དོན་དུ་སོང་བ་མ་ཡིན་པ་ལྟ་བུ།

གང་ལྟར་མདོར་བསྡུས་ན། ཕུན་དབང་གི་སྤྱོད་པ་ནི་འཚེ་བའི་རིགས་དང་། ལྟ་བ་ནི་རྒྱང་འཕེན་པའི་བསམ་བློ་དང་ཧ་ཅང་འདྲ་བོ་ཡོད་མཁན་གྱི་འཇིག་རྟེན་པའི་མི་རྒན་ཞིག་ལ་ཚང་མས་ངོས་འཛིན་བྱ་འོས། དེའི་ཕྱིར། འདི་འདྲའི་འཇིག་རྟེན་པ་ཞིག་ལ། ནང་བའི་དགེ་སློང་ཞིག་ཕར་ཞོག མཐའ་ན་ནང་བ་ཞིག་ཡིན་ཕྱིན། ཕུན་དབང་དེ་དམ་པ་དང་ཡིད་རྟོན་བྱ་བའི་གནས་སུ་བཞག་ན། རང་རྒྱུད་ཀྱི་སྐྱབས་འགྲོ་དེ་ཡང་བརླག་འགྲོ་བ་དེ་ཚད་ལྡན་གྱི་གཞུང་དུ་ལུང་རིགས་གཉིས་ཀྱིས་བསྒྲུབས་ཡོད། དེའི་ཕྱིར། བོད་ཕྱི་ནང་གི་གྲོང་དགེ་ཚོང་བ་ཚོས་ཕུན་དབང་གི་འདྲ་པར་དེ་རང་གི་བླ་མའི་ཁྲི་སྟེང་དུ་བཞག་སྟེ་ཕུན་དབང་དེ་དམ་པའམ་སྐྱབས་གནས་སུ་འཛིན་པ་ནི་སྟོན་པ་ཤཱཀྱ་ཐུབ་པའི་གསུང་ཚད་མ་དང་རྒྱབ་འགལ་ཡིན་པར་ཤེས་དགོས།

གཞན་འདིར་ཕུན་དབང་དང་འདྲ་མཚུངས་ཡིན་པའི་ལོ་རྒྱུས་བདེན་པ་ཞིག་བཤད་འདོད་བྱུང་། ངའི་ཕ་ཡུལ་ན་ཕུན་དབང་དང་དུས་མཉམ་དུ་འཚར་ལོངས་བྱུང་བའི་གསར་བརྗེ་བ་གྲགས་ཅན་མཚང་མིང་དུ་༼འབྲོག་ལུ་མྱིག་ཆེ༽རུ་འབོད་པ་ཞིག་ཡོད། ཁོ་དང་ཕུན་དབང་གཉིས་ཀའི་དམིགས་ཡུལ་དང་ལས་ཀ་ཚང་མ་གཅིག་པ་གཅིག་རྐྱང་ཡིན་ཏེ། རྒྱ་བོད་སྐད་སྒྱུར། དམག་མིའི་ལམ་ཁྲིད། བོད་མིར་གཅར་རྡུང་བྱེད་པ་སོགས་རེད། ཁོང་གཉིས་འདྲ་མཚུངས་མིན་པ་གཅིག་ནི་གཟན་ཤམ་གྱོན་ཡོད་མེད་ཁོ་ན་རེད། སྐབས་དེར་ཁོང་རྔ་བ་སྒོ་མང་དགོན་པའི་རྒྱུད་པ་གྲྭ་ཚང་གི་དགེ་བསྐོས་རེད། ཡིན་ནའང་དགོན་པའི་ལྷ་སྡེའི་ཁོངས་སུ་གཏོགས་པའི་དཔའ་བོ”རྡོ་ཤུལ་གྭ་ཉག”གཙོས”དགའ་བདེ་རྐང་ལོ”དང”སོག་གཙང་ཨ་ལོ”བཅས་ཀྱིས”འབྲོག་ལི་མྱིག་ཆེ”དེ་བཙན་བཟུང་བགྱིས་ཏེ། དང་བོར། ཁོའི་རྐང་ལག་གཉིས་བཅད། གཉིས་པ་ཁོའི་རྣ་མཆོག་དང་། མཐར། ཁོའི་སྐེ་ལ་རྡོ་བཏགས་ནས་རྨ་ཆུའི་དར་འོག་ཏུ་བརྫངས་ཏེ་དམར་བསད་བཏང་བ་རེད།

དེར་བརྟེན་རྒྱ་དམག་དང་མཉམ་པོར་བོད་ཀྱི་རུས་རྒྱུད་ཡིན་པའི་ཁེར་བའི་བསོ་སྟོབས་ཀྱིས་རྒྱང་རིང་ནས་མེ་མདའི་ཁར་མཐར་རྡོ་ཤུལ་གྭ་ཉག་བསད་པ་རེད། ཡིན་ནའང་ནང་དགྲ་མ་ཐུལ་བར་དུ། ཕྱི་དགྲ་ལ་རྫོགས་པ་མེད་ཅེས་པའི་དཔེ་ལྟར། ༢༠༠༩ ལོར་རྡོ་ཤུལ་གྭ་ཉག་གི་ཡང་ཚ་གྲྭ་བ་ཤོ་ར་ཟེར་བ་དེས་ཁེེར་བའི་བསོད་སྟོབས་ཀྱི་ཚ་བུ་ལ་གྲིས་བཙུགས་ཏེ། ཡང་བསྐྱར་འཁོན་ལན་གསར་བ་ཞིག་གི་མགོ་བརྩམས་ཡོད་ཀྱང། བོད་རྒན་བསམ་ཤེས་འགའི་བཀའ་དྲིན་ལ་བརྟེན། མཐར་ཁེར་བའི་བསོ་སྟོབས་ཚང་གིས་གྭ་ཉག་གི་མྱི་ཤའི་དོད་དུ་རྒྱ་སྒོར་སྟོང་ཕྲག་༢༠༠ བཤགས་པ་བྱས་ཏེ་འགྲིགས་འཇགས་བྱས་ཡོད། ཞིབ་ཀྱིས་བལྟས་ན། ཡང་སྙིང་ང་ཚོས”འབྲོག་ལུ་མྱིག་ཆེ” དམར་གསོད་བཏང་བ་དེ་ནོར་བ་རེད་དམ།
ཁོ་ལ་ཡང་བོད་ནང་དུ་དམར་ཕྱོགས་པའི་ལྟ་བ་དང་བསམ་བློ་རྒྱ་དམག་ནང་འདྲེན་བྱས་པའི་ནག་ཉེས་ཙམ་ལས་ང་ཚོར་ཅི་ཡང་འདྲེན་རྒྱུ་མེད། ཁོང་འཇིག་རྟེན་འདི་དང་གྱེས་ཏེ་མི་ལོ་ལྔ་བཅུ་ཙམ་འགོར་ཡོད་ཀྱང་ཁོང་ལ་རྗེས་དྲན་ཙམ་ཡང་བྱེད་མཁན་མེད་ཡེ་ནས་མེད། རྒྱུ་མཚན་ནི། སྐབས་དེའི་བོད་མི་དག་གི་སྣང་ངོར་ཡོད་པའི”འབྲོག་ལུ་མྱིག་ཆེ”ནི་གྲྭ་ཆས་ཐོག་ཏུ་མེ་མདའ་ཁུར་བའི་ནང་རུལ་བ་ཞིག་དང་། ཆོས་གོས་གྱོན་པའི་སྤྱང་རྒན་ངོ་མ་ཞིག ད་དུང་ཕྱི་དགྲ་ནང་དུ་འཁྲིད་མཁན་གྱི་རྒྱལ་འཚོང་བའིི་ནག་ཉེས་ཁོ་ན་ལས་ཅི་ཡང་ལྷག་མི་འདུག་པས་སོ།། གང་ལྟར་དེ་མཚུངས་རེ་འབའ་ཐང་དང་ལི་ཐང་ཡུལ་ནའང་ཡོད་སྲིད་དོ།།

སྤྱིར་མི་ཚེའི་སྐོར་གླེང་ན། སྟོད་སྨད་བར་གསུམ་པོ་བཤད་ལོས་དགོས། དེའི་ཕྱིར། ཕན་དབང་ལོ་ནི་༩༠ ལྷག་རེད། བྱས་ཙང་། ཁོའི་ལོ་སྟོད་དེ་ལོ་ངོ་སུམ་ཅུའི་རིང་ལ་ཁོང་གིས་བོད་ལ་དམིགས་བསལ་གྱིས་གྲུབ་འབྲས་དང་ལྷག་བསམ་གྱི་ཕྱག་རྗེས་འདི་རེད་ཟེར་བ་ཞིག་བསྟན་རྒྱུ་མེད། ཁོའི་མི་ཚེ་བར་བའི་རིང་ལ་མཚོན་ན་རྒྱ་བོད་གང་གི་ཆེད་དུ་ཡིན་པར་མ་ངེས་མོད། ཁོང་བཙོན་ཁང་དུ་སོང་འདུག དེའི་རྗེས་རྒྱ་ནག་གིས་གུ་ཡངས་ཅུང་བཏང་བ་དང་བསྟུན་ནས་སླར་ཡང་གནམ་གྱི་ས་བཀད་པ་ལྟ་བའི་མཁས་དབང་རྣམ་པ་གསུམ་སྟེ། བཀུར་འོས་དུང་དཀར་ཚང་། བསྟོད་འོས་ཚེ་ཏན་ཞབས་དྲུང་། དྲིན་ཆེན་དམུ་དགེ་བསམ་གཏན་ཚང་སོགས་ལ་ཕུན་དབང་གི་བཀའ་དྲིན་དང་ལས་རོགས་འདི་བྱས་པ་ཞིག་གསུངས་རྒྱུ་མེད། འདི་ཡག་རྟགས་ཤིག་མ་རེད་འདོད།

འོན་ཀྱང་ཁོང་གི་མི་ཚེའི་མཇུག་ཏུ་རང་གི་ལོ་རྒྱུས་དེ་ཕྱི་རྒྱལ་གསར་འགོད་པ་གྷོལ་སི་ཐྲིན་གྱིས་བསྐྱར་དང་ཡང་དུ་ལོ་བཅུའི་རིང་བཅར་འདྲི་དང་དཀའ་ལས་བརྒྱུད་དེ། ཕྱི་རྒྱལ་བ་ལྔ་དང་མཉམ་པོར་ཕུན་དབང་གི་ལོ་རྒྱུས་དེ་ཡི་གེར་བསྐྲུན་ཡོད། འདིའི་སྐོར་གསར་འགོད་པས་གསུངས་པ་ལྟར་ལོ་རྒྱུས་འདི་ཀློག་ན་སྤྲོ་བོ་ཞིག་ཡོད་དེ། བླ་མའི་རྣམ་ཐར་དང་རྒྱལ་བོའི་ལོ་རྒྱུས་དང་མི་འདྲ། འདི་ནི་ལོ་རྒྱུས་ཀྱི་དཀྱོགས་མཚམས་གལ་ཆེན་ཞིག་ལ་སྐྱེས་པའི་རྒྱ་བོད་ཀྱི་ལོ་རྒྱུས་ཤེས་མཁན་དེ་ཕུན་དབང་སྒེར་གྱི་ལོ་རྒྱུས་རེད། དེ་ཡང་གསར་འགོད་པས་ཆབ་སྲིད་ཀྱི་སྐོར་དེ་ལ་ཚིག་གི་སྡེབ་སྦྱོར་དང་ནང་དོན་གང་གི་ཆ་ནས་བལྟས་ན་ཀློག་མཁན་གྱི་ཡིད་དབང་འཕྲོགས་པ་ཞིག་བྲིས་ཡོད་པ་འདི་ལ། ཁོ་བོས་ཀྱང་རྟག་པར་གུས་བརྩི་བྱས་དང་བྱ་ངེས་ཡིན། འོན་ཀྱང་གནད་དོན་ངོ་མ་ནི་ལོ་རྒྱུས་དེ་ཕུན་དབང་གི་སྔོན་མའི་བསམ་སྦྱོར་དང་འབྲེལ་བ་གཏིང་ཟབ་ཡོད་མེད་ཀྱིས་བརྟག་ན་ཧ་ཅང་ལེགས་པར་འདོད་སྙམ།

གང་ལྟར་ང་ཚོའི་གླེང་གཞི་དེ་ཕུན་དབང་ཁོང་བོད་མི་རིགས་ཀྱི་དཔའ་པོའམ་དམ་པར་བཀུར་འོས་མིན་གྱི་གནད་གཙོ་བོའི་ནང་གི་གཙོ་བོ་དེ་གང་ལ་བལྟ་དགོས་ཟེར་ན། ༡༩༥༠ནས་༡༩༦༣ བར་གྱི་ཕུན་དཔང་དེ་རེད། འོན་ཏེ། སྐབས་དེར་ཕན་དབང་ཁོང་བོད་ལ་ལྷག་བསམ་ཆེ་ཞིང་བཀུར་འོས་པའི་དམ་པ་ཞིག་ཡིན་པའི་སྒྲུབ་བྱེད་ཡང་དག་ཅིག་སྟོང་གསུམ་ན་རྙེད་རྒྱུ་མེད། སྤྱིར་ན་མི་རིགས་ཀྱི་དཔའ་བོ་ཟེར་བ་ནི་རང་གི་མི་རིགས་ཀྱི་ཆེད་དུ་རང་གི་སྲོག་ཀྱང་གཏོང་ཐུབ་པའམ་ཡང་ན་ཁོ་བོའམ་ཁོ་མོས་རང་གི་མི་རིགས་དེའི་ཆེད་དུ་ཕྱག་རྗེས་འབུར་ཐོན་བླ་ན་མེད་པ་ཞིག་མཐོང་རྒྱུའམ་ཐོས་རྒྱུའི་དོན་དངོས་ལོ་རྒྱུས་ངེས་པར་དུ་དགོས། ད་དུང་གཞན་པ་རང་གི་མི་རིགས་འདི་མ་ཤེས་པའི་རྨོངས་པ་ལས་གྲོལ་ཏེ་ལེགས་པའི་ལམ་སྟོན་མཛད་པའི་སྐྱེས་བུ་རྣམས་སོ།།

དམིགས་བསལ་ཞུ་རྒྱུར། ཕྱི་སྡོད་བོད་མིའི་ཁྲོད་ནས་ཕུན་དབང་སྐོར་ལ་སྐྱོན་བརྗོད་དང་བསྔགས་བརྗོད་གཉིས་ཀ་བྱུང་ཡོད། དེ་ལ་ཡང་རིགས་གཉིས་ཏེ། ན་གཞོན་པའི་སྡེ་དང་ཕྱི་མ་དེ་རྒན་པའི་སྡེའམ་ཕུན་དབང་དང་ཕ་ཡུལ་གཅིག་པའི་སྡེ་དག་རེད། གང་ལྟར་༧ གོང་ས་མཆོག་དང་ཟམ་གདོང་ཚང་རྣམ་གཉིས་ཀྱིས་ཕུན་དབང་ལ་མཐོང་ཆེན་དང་མྱ་ངན་བགྱིས་ཏེ་ཁོང་རྣམ་པས་ཕུན་དབང་སྐོར་ལ་བཀའ་སློབ་རེ་གནངས་པའི་རྐྱེན་གྱིས། ང་ཚོ་མི་མང་ཧང་སངས་དགོས་བྱུང་བ་རེད།
གཅིག་ནི། ༧ གོང་ས་མཆོག་གི་ཕུན་དབང་སྐོར་གྱི་བཀའ་སློབ་དེ་ལ་བལྟས་ཏེ་འཇམ་དབྱངས་ནོར་བུས་”༧ གོང་ས་མཆོག་ལ་སེམས་པ་ཐེང་ཐེང་མི་འདུག”ཅེས་ལབ་པ་དེ་རེད།
གཉིས་པ། ཟམ་གདོང་ཚང་གིས་ཀྱང་ཕུན་དབང་གི་སྐོར་གླེང་དུས་ཕུན་དབང་ལྟ་བུའི་དམར་ཕྱོགས་ཀྱི་ལྟ་གྲུབ་ལ་མཁས་ཤིང་ཤེས་འཇོན་ལྡན་པའི་འཛངས་མི་འདི་འདྲ་ཞིག་བོད་རིགས་ཕར་ཞོག རྒྱ་རིགས་དང་ཨུ་རིའི་སུའི་ནང་དུའང་ཁོང་འདྲ་བ་དཀོན་པོ་རེད་ཅེས་མངོན་སུམ་ལ་མིག་བཙུམ་སྟེ་འུར་བསྟོད་བྱས་པ།

གཞན་དྲང་མོར་བཤད་ན། ཕུན་དབང་དང་ཟམ་གདོང་ཚང་གཉིས་ཐེངས་གསུམ་ལ་ཐུག་འཕྲད་བྱུང་ཡོད་པ་འདྲ་བོ་ཞིག་ང་ཚོར་གསུངས་ཡོད་མོད། མང་ཚོགས་ང་ཚོའི་ངོས་ནས་ཐེངས་གཅིག་ཡིན་ནམ་ཐེངས་གཉིས་ཡིན་ནམ་ཡང་ན་ཐེངས་གསུམ་པ་དེ་གང་ཡིན་ནམ་མ་ངེས་པར་དེའི་སྐོར་ལ་མགོ་འཁོར་ནས་སྣ་ཚོགས་ཤིག་གླེང་གིན་ཡོད། གཞན་ཡང་རྣམ་པ་གཉིས་ཀྱིས་ཐུན་མོང་དུ་ཕུན་དབང་ལ་ལར་ཞེན་དམིགས་བསལ་བ་ཞིག་ཡོད་པའི་རྟགས་ལ་དུས་ནམ་ཡིན་ན་༧གོང་ས་མཆོག་ལ་མཇལ་བའམ་ཁོང་གི་སྐོར་གླེང་ཚེ། ཕུན་དབང་གིས་མིག་ཆུ་གཏོང་བའི་ངང་ཚུལ་ཙམ་བཤད་པ་རེད། གནས་ཚུལ་འདི་ནི་བོད་ཕྱི་ནང་གི་བོད་མི་ཕལ་མོ་ཆེ་བའི་ལུས་སྟེང་ན་མངོན་སུམ་དུ་མཐོང་རྒྱུ་ཡོད་པ་ཞིག་ལས། ལྷག་པར་ཕུན་དབང་གི་ཐུན་མོང་མ་ཡིན་པའི་ཁྱད་ཆོད་ཅི་ཡང་མ་རེད་དོ།།
གཞན་འཇམ་དབྱངས་ནོར་བུས། ཕུན་དབང་ནི་མི་རིགས་ཀྱི་དཔའ་བོ་དང་མི་ཡག་པོ་ཞིག་མིན་པར་སྒྲུབ་བྱེད་ནི། ན་ནིང་གི་བཅར་འདྲིའི་སྐབས་སུ་ཁོང་གིས” ངའི་ཨ་མ་ལགས་ཀྱིས་ཕུན་དབང་ངོ་ཡག་པོ་ཤེས་ཀྱིན་འདུག་པས་ཕུན་དབང་རྩ་བ་ཉིད་ནས་ཡག་པོ་མེད་གསུངས་སོང་ཞེས་ཨ་མ་ལགས་རྒྱབ་རྟེན་ལ་དྲངས་སོང་། འོན་ཀྱང་ཁོང་གིས་ཁ་རྩང་ཕུན་དབང་གི་སྐོར་གླེང་དུས་ནག་ཉེས་གཙོ་བོ་གསུམ་བསྙད་ཡོད།
༡༽ རྒྱ་དམག་བོད་ལ་འཁྲིད་མཁན་དང་། ༢༽ ཀྲུང་གོའི་ཆེད་དུ་ཕན་དབང་གིས་རང་གི་ཆུང་མ་བསད་པ། ༣༽ ཕུན་དབང་གིས་ཞི་བའི་དོན་ཚན་བཅུ་བདུན་དང་ལམ་དབུ་མ་ཡང་གསར་བཏོད་བྱས་པའི་ནག་ཉེས་སོ།།

གཞན་དེ་ལས་ལྡོག་ཕྱོགས་ཀྱི་བསམ་བློ་གཏོང་མཁན་དག་གིས། ཕུན་དབང་དེ་བོད་མི་རིགས་ཀྱི་དཔའ་བོ་དང་རླབས་ཆེན་ཡིན་པའི་སྒྲུབ་བྱེད་དུ་འབའ་བའི་ལོ་རྒྱུས་བསྲེས་ལྷད་ཅན་དང་། ༧གོང་ས་མཆོག་གི་ལུང་ཚིག་རེ་འདྲེན། ལ་ལས་ཕུན་དབང་དང་པཎ་ཆེན་གཉིས་ཀྱིས་མཉམ་དུ་བླངས་པའི་པར་རེ་བསྟན། མཐར་རང་རང་གི་རྒྱུ་མཚན་རེ་འདོན། ཁྱེད་ཅག་ལ་ངས་འདིར་དཔེ་ཞིག་བཤད། སྔོན་མ་རྡོ་སྤི་དགེ་བཤེས་ཚང་གིས་”ལུང་ཙམ་ལ་ཡིད་ཆེས་ན། ང་ལ་མའོ་ཙེ་ཏུང་སངས་རྒྱས་ཡིན་པའི་སྒྲུབ་བྱེད་ཅིག་ཡོད་གསུངས་པ་རེད”དེའི་དོན་ནི་སངས་རྒྱས་ཀྱི་བསྟན་པ་དེ་སྣུབ་པར་མཁས་པས། སངས་རྒྱས་ཀྱི་སྤྲུལ་བ་ཡིན་པར་སྒྲུབ་པའི་ཆོས་གཞུང་དེ་བསྟན་པ་རེད། སྐད་ཆ་འདི་ལ་གོ་རྒྱུ་ཡ་མཚན་ཞིག་ཡོད།

མཇུག་ཏུ་ཕྲན་སྒེར་གྱིས་ཕུན་དབང་སྐོར་ལ་བརྟག་ཚུལ་བརྗོད་ན། ཕུན་དབང་གི་ནག་ཉེས་ནི། དང་བོར། རྒྱ་དམག་གི་ལམ་ཁྲིད་བྱས་ཏེ་རྒྱའི་ཆེད་དུ་སྐད་སྒྱུར་དང་གསང་བ་བྱས་པ། བར་དུ་སྒེར་དམ་རྒྱ་གཞུང་མཉམ་པོར་སྔོན་ཐོན་ཆེད་དུ་རང་ཡུལ་ལ་སློབ་གྲྭ་སོགས་བརྒྱབ་མེད་པར། མཐའ་མར་རང་གི་བློས་ཐུབ་ཀྱི་གྲོགས་མཆོག་༧གོང་ས་མཆོག་ལ་མཇལ་རྒྱུ་ཙམ་གྱི་སྙིང་སྟོབས་དང་སྤོབ་པ་ཡང་མེད་པ་། ད་དུང་མདོ་དབུས་ཁམས་གསུམ་གྱི་སྐྱིད་སྡུག་རྟོགས་ཆེད་ལོ་མང་རིང་བོད་ས་གནས་གང་དུ་འགྲོ་མ་ཕོད་པའམ་མ་སོང་བའི་སྐྱོན་སོགས་རེད། གང་ལྟར་བློ་མཐུན་ཏན་ཞའོ་ཕུན་གྱིས་བློ་བཀོད་ལྟར་ཕུན་དབང་དང་བོད་པ་སྐོར་ཞིག་ལྷ་སར་གསང་བའི་ངང་བཏང་འདུག འོན་ཀྱང་ཁོ་བོས། ཕུན་དབང་གིས་ཞི་བའི་དོན་ཚན་བཅུ་བདུན་དང་དབུ་མའི་ལམ་གསར་བཏོད་བྱས་པ་ཞིག་གཏན་ནས་འདོད་ཀྱི་མེད། རྒྱུ་མཚན། ཕུན་དབང་ནི་སྐད་སྒྱུར་གྱི་ལས་ཀ་ཙམ་ལས། རྒྱ་བོད་གང་གི་ཕྱོགས་ལ་མཚོན་ནའང་དབང་ཆ་དེ་ཙམ་ཆེན་པོ་མེད་པས་སོོ།།
མཐར་སྡོམ་ཁོ་བོའི་བསམ་ཚུལ་འདིའི་གཏན་ཚིགས་འབྱུང་ས་གཙོ་བོ། དུས་རབས་ཉི་ཤུ་བའི་ལོ་རབས་ལྔ་བཅུའི་ནང་གི་མིའི་བསམ་བློ་དང་ལྷག་པར་ཕྱི་རྒྱལ་བ་གྷ་སི་ཐྲིན་དང་ཕུན་དབང་གཉིས་ཀྱིས་ཕུན་དབང་གི་ལོ་རྒྱུས་པར་སྐྲུན་མ་བྱས་གོང་གི་ཁ་བརྡ་དག་དང་། དམིགས་བསལ་གནམ་ས་གོ་འབྱེད་སྐབས་སུ༼༼ངའི་ཕ་ཡུལ་དང་བཅིངས་བགྲོལ༽༽ཡང་ན་༼༼ཡིག་འབྲི་ཁྲི་བདུན༽༽ གཞན་པ་༼༼ནགས་ཚང་ཞི་ལུའི་སྐྱིད་སྡུག་༽༽ལ་སོགས་གལ་ཆེན་དུ་བརྩིས་ཡོད་ཅིང་། ཕུན་དབང་གི་ལོ་རྒྱུས་དེ་མ་བཤད་པའི་གནད་འགག་སོགས་ལ་བརྟགས་ཏེ་གང་ཟག་ལ་མ་བལྟས་པར་ཆོས་ལ་བལྟ་ཁུལ་ཙམ་ཡིན་ནོ།།

ཞེས་རྔ་རྒོད་ཀྱིས་༢༠༡༤/༤/༡༣ ལ་དབྱིན་ཡུལ་ནས།