ཀུན་ལྡན་ཞེས་པ་རབ་རྒྱན་ལྕགས་ཕོ་བྱི་ལོའི་གནམ་ལོ་གསར་བཞད་ལ་བཀྲ་ཤིས་བདེ་ལེགས།

དགེ་འདུན་རབ་གསལ།

ཀུན་ལྡན་ཞེས་པ་ལྕགས་ཕོ་བྱི་ཡི་ལོར།།
ཁམས་བཟང་བཀྲ་ཤིས་དོན་ཀུན་འགྲུབ་པར་ཤོག།
ལྕགས་བྱིའི་བྱུང་བ་རབ་བྱུང་དང་སྦྱར་ཏེ།།
ལོ་རྒྱུས་རི་མོ་རགས་ཙམ་སྒོམ་པར་བྱ།།

རབ་བྱུང་དང་པོའི་ལྕགས་ཕོ་བྱི་ཡི་ལོ།།
ཕྱི་ལོ་ཆིག་སྟོང་དྲུག་ཅུ་ཐམ་པ་ཡིན།།
སྣ་ནམ་རྡོ་རྗེ་དབང་ཕྱུག་འདས་ ཞེས་གསལ།།
དགེ་བཤེས་ཚུལ་བྱང་རྒྱལ་གྱི་གདན་སར་ཕེབས།།

རབ་བྱུང་གཉིས་པའི་ལྕགས་ཕོ་བྱི་བ་ལ།།
རབ་བྱུང་སྔ་མའི་ལྕགས་བྱི་ལ་འཁྲུངས་པའི།།
རྨ་བྱ་རྣར་བ་རྒྱལ་གྱི་གདན་སར་ཕེབས།།
རྔོག་རྒྱུད་ཐོགས་མེད་གྲགས་པ་འཁྲུངས་ཞེས་གསལ།།

རབ་བྱུང་གསུམ་པའི་ལྕགས་ཕོ་བྱི་བའི་ལོར།།
ཕྱི་ལོ་ཆིག་སྟོང་བརྒྱ་དང་བརྒྱད་ཅུ་ཡིན།།
སྔ་ལོར་སྐྱོབ་པས་འབྲི་གུང་མཐིལ་བཏབ་རྗེས།།
ཆོས་རྗེ་བཀྲ་ཤིས་དཔལ་བས་སྟག་ལུང་བཏབ།།

རབ་བྱུང་བཞི་པའི་ལྕགས་བྱི་བོད་ལ་ངན།།
ཧོར་དམག་བོད་དུ་སླེབས་ནས་དགོན་སྡེ་བཅོམ།།
རྭ་སྒྲེང་དང་ནི་རྒྱལ་གྱི་ལྷ་ཁང་དག།
ཞིག་གསོའི་ལས་ལ་བྲེལ་ཞེས་ཚེ་ཏན་གསུངས།།

ཕྱི་ལོ་ཆིག་སྟོང་སུམ་བརྒྱ་ཐམ་པ་དེ།།
རབ་བྱུང་ལྔ་པའི་ལྕགས་ཕོ་བྱི་ལ་འཁེལ།།
ཆོས་རྗེ་རིན་ཆེན་འབྱུང་གནས་(རཏྣ་ཀ་ར་)འཁྲུངས་ཞེས་གསུངས།།
སྟག་ལུང་ཁྲི་རབས་བདུན་པ་ཡིན་ལུགས་མཐོང་།།

རབ་བྱུང་དྲུག་པའི་ལྕགས་ཕོ་བྱི་ཡི་ལོ།།
ཕྱི་ལོ་ཆིག་སྟོང་སུམ་བརྒྱ་དྲུག་ཅུ་ཐམ་པ་ཡིན།།
ཀརྨ་རོལ་པའི་རྡོ་རྗེ་རྒྱ་ལ་ཕེབས།།
ཚེས་བཞི་རྙིང་མ་གྲགས་རྒྱན་འདས་ཞེས་འཁོད།།

རབ་བྱུང་བདུན་པའི་ལྕགས་ཕོ་བྱི་ཡི་ལོར།།
ས་སྐྱའི་ཏཱ་དབེན་བློ་རྒྱན་འདས་པ་དང་།།
རྒྱལ་རྩེ་དཔོན་ཆེན་རབ་བརྟན་ཀུན་འཕགས་ཀྱིས།།
རྒྱལ་རྩེའི་ལྷ་ཁང་ཆེན་མོ་བཞེངས་ཞེས་བཀོད།།

ཕྱི་ལོ་ཆིག་སྟོང་བཞི་བརྒྱ་བརྒྱད་ཅུའི་ལོར།།
སྨོན་ལམ་དཔལ་བ་དགའ་ལྡན་ཁྲི་ལ་ཕེབས།།
འདི་ཡན་གཙང་བ་བདུན་བརྒྱུད་ཅེས་སུ་གྲགས།།
རིན་སྤུངས་དོན་རྡོས་སྣེའུ་གདོང་སྲིད་དབང་འཕྲོགས།།

རབ་བྱུང་དགུ་པའི་ལྕགས་ཕོ་བྱི་ལོར།།
དགའ་ལྡན་ཁྲི་ཆེན་ཆོས་ཀྱི་བཤེས་གཉེན་དང་།།
ཁྲི་ཆེན་རིན་ཆེན་འོད་ཟེར་ལ་སོགས་འདས།།
ཁྲི་ཆེན་སངས་རྒྱས་རིན་ཆེན་འཁྲུངས་ཞེས་གྲགས།།

ཕྱི་ལོ་ཆིག་སྟོང་དྲུག་བརྒྱ་ཐམ་པའི་ལོར།།
“སྟག་ལུང་ཞབས་དྲུང་བཀྲ་ཤིས་དཔལ་གྲུབ་འཁྲུངས།།
དྭགས་པོ་མཁན་ཆེན་ནམ་མཁའ་རྒྱལ་མཚན་གཤེགས།།”
དཀོན་མཆོག་ཆོས་འཕེལ་ ཁམས་ལ་ཕེབས་ཞེས་འཁོད།།

རབ་བྱུང་བཅུ་གཅིག་ལྕགས་ཕོ་བྱི་བའི་ལོར།།
བསྟན་འཛིན་དཱ་ཡན་རྒྱལ་པོ་འདས་པ་དང་།།
སྡེ་སྲིད་འཕྲིན་ལས་རྒྱ་མཚོ་སྲིད་ལ་དབང་།།
གོང་མ་ཧྲུན་ཀྲི་འདས་ཞེས་ཡི་གེ་མཐོང་།།

ཕྱི་ལོ་ཆིག་སྟོང་བདུན་བརྒྱ་ཉི་ཤུ་ལོར།།
རྒྱལ་མཆོག་བདུན་པ་དབུས་ལ་ཕེབས་པ་དང་།།
ལྷ་སར་སྲིད་ཉེས་བྱུང་བའི་གཏམ་ཡང་གདའ།།
ཕོ་བྲང་ཞོལ་དུ་རྡོ་རིང་བཙུགས་སོ་ལོ།།

རབ་བྱུང་བཅུ་གསུམ་ལྕགས་ཕོ་བྱི་ཡི་ལོར།།
པཎ་ཆེན་དཔལ་ལྡན་ཡེ་ཤེས་པེ་ཅིང་དུ།།
དགོངས་པ་རྫོགས་ཤིང་དེ་བཞིན་གཙང་པཎ་དང་།།
རྔ་རྒོད་ནམ་མཁའ་སེང་གེ་འདས་ཞེས་འཁོད།།

ཕྱི་ལོ་ཆིག་སྟོང་བརྒྱད་བརྒྱ་བཞི་བཅུ་ལོར།།
དཔའ་རིས་བློ་བཟང་རབ་གསལ་འཁྲུངས་པ་དང་།།
དེའུ་དམར་དགེ་བཤེས་བསྟན་འཛིན་ཕུན་ཚོགས་ཀྱིས།།
སྨན་དཔེ་ཤེལ་གོང་ཤེལ་ཕྲེང་བརྩམས་ཞེས་འཁོད།།

རབ་བྱུང་བཅོ་ལྔ་ལྕགས་ཕོ་བྱི་བའི་ལོར།།
དགའ་ལྡན་ཁྲི་ལ་གཙང་པ་བློ་རྒྱན་ཕེབས།།
མཚན་ཞབས་རྡོར་ཡིབ་ཨུ་རུ་སུ་རུ་མངགས།།
རྒྱ་ནག་གོང་མ་བྲོལ་བྱོལ་བྱས་སོ་ལོ།།

ཕྱི་ལོ་ཆིག་སྟོང་དགུ་བརྒྱ་དྲུག་ཅུ་ལོར།།
“མུ་གེའི་བསྐལ་བ་ཡ་ང་”བྱུང་ཞེས་འཁོད།།
རིག་གནས་གསར་བརྗེའི་རླུང་འཚུབ་དེ་ནས་འཕེལ།།
བྱེས་ཀྱི་བཞུགས་སྒར་རྡ་རམ་ས་ལར་སྤོས།།

དེ་ལྟར་ལྕགས་ཕོ་བྱི་ཡི་ལོ་རབས་ལ།།
ཐོས་ཙམ་བྱས་ཏེ་རྗེས་སུ་དྲན་པར་བྱེད།།
ལོ་ངོ་སྟོང་ལ་ཉེ་བའི་རི་མོ་དེ།།
ཡིད་ལ་སྒོམ་པའང་སྐལ་བ་བཟང་ངོ་ལོ།།

ལྕགས་ཕོ་བྱི་བའི་ལོ་རྒྱུས་སྙིང་བསྡུས་འདི་ནི། འདི་ག་ཨིན་ཌི་ཡ་ཎ་སློབ་གྲྭ་ཆེན་མོའི་དགེ་རྒན་ཆེན་མོ་མཁས་དབང་ཁཱ་ར་(György Kara)འམ་རྡོ་རྗེ་ནག་པོ་ཡིས་སོག་པོའི་ལོ་སར་སྐབས་སོག་པོའི་རྒྱལ་རབས་དང་ལོ་རྒྱུས་ཡིག་ཚགས་ཁྲོད་ནས་ལོ་དེའི་གལ་ཆེའི་མཛད་པ་རྣམས་བཏུས་ཏེ་ལོ་སར་ལ་བསུ་བ་བྱེད་པར་མཛད་ཅིང་། དེ་ཉིད་ལ་དཔེར་ལེན་གྱིས་ དགེ་རྒན་ཆེན་མོ་སྤེར་ལིང་(Elliot Sperling)གིས་ཀྱང་སློབ་གྲྭ་ཆེན་མོའི་བོད་ལུགས་ལོ་སར་སྐབས་སུ་ རབ་བྱུང་དང་པོ་ནས་ད་བར་གྱི་ལོ་རེའི་མཛད་པ་འཆད་པའི་སྲོལ་ཞིག་བྱུང་། དེ་དག་ལ་རྗེས་སུ་ཡི་རངས་པ་དང་བཅས་ཕྲན་གྱིས་ལོ་ཤས་རིང་འདི་ལྟ་བུ་ཞིག་བསྡེབས་པ་ཇི་བཞིན། འདི་ལོར་ཡང་བསྟན་རྩིས་ཀུན་བཏུས་དང་ལོ་ཚིགས་དྭངས་ཤེལ་མེ་ལོང་གཉིས་ལས་བཏུས་ཏེ་བཀོད་པ་དགེའོ།། ལྕགས་ཕོ་བྱི་བའི་ལོ་སར་ལ་བཀྲ་ཤིས་བདེ་ལེགས་ཞུ། ཚེ་རིང་ནད་དཀོན། བཞེད་དོན་ལྷུན་གྱིས་གྲུབ་པར་གྱུར་ཅིག། དགེ་འདུན་རབ་གསལ་གྱིས་ལོ་སར་ཚེས་པ་གཅིག་ཉིན་བསྡེབས་པའོ།།