བཀྲ་ཤིས་དོན་འགྲུབ།
(ལས་ལ་བསྐོས་པ།)
གཡུ་འབྲུག་ཚན་སྡེབ།
གཟུགས་ལ་འཛིན་རྒྱུ་མེད་པ།།
ཨ་སྔོན་དབྱིངས་ཀྱི་འཇའ་ཚོན།།
སྡུག་ལ་དྭངས་རྒྱུ་མེད་པ།།
ཕ་ཡུལ་དྲན་པའི་གདུང་བ།།
མི་ཡི་ལུང་པ་འགྲིམས་དུས།།
དཀའ་ལས་གང་ཡང་བྱུང་སོང་།།
ཕ་ཡུལ་ཕྱོགས་སུ་འཕུར་བའི།།
བྱ་ཞིག་ཡིན་ན་བསམ་བྱུང་།།
ཕ་ཡུལ་དྲན་ཐེངས་རེ་ལ།།
ཡ་ཆུང་མཆི་མས་བརླན་སོང་།།
མི་ཡི་ལུང་པ་འགྲིམས་དུས།།
སྐྱོ་བ་སེམས་ལ་ལྷུང་སོང་།།
རང་ཡུལ་ཕྱོགས་སུ་སྐྱོད་པའི།།
སྤྲིན་པ་ཡིན་ན་བསམ་བྱུང་།།
ཕ་ཡུལ་དྲན་ཐེངས་རེ་ལ།།
སྙིང་ལ་གས་ཁ་བབས་སོང་།།
ལས་ལ་བསྐོས་པ་ནི་གཡུ་འབྲུག་ཚན་སྡེབ་ཀྱི་གཞས་བྱེ་བྲག་པ་ཅིག་གི་ཁ་ཡིག་རེད། བོད་མིའི་གོམས་སྲོལ་ལྟར་བྱས་ན་ལས་ལ་བསྐོས་པ་ཞེས་པའི་ཚིག་འདི་སྡུག་དང་འཕྲད་དུས་མ་གཏོགས། སྐྱིད་ཀྱི་དུས་སུ་བེད་སྤྱོད་བྱེད་སྲོལ་ཆེན་པོ་མེད་ཅེས་ལབ་བཞག་ན་མི་འགྲིག་པ་ཅང་མེད། སྡུག་ཅིག་དང་འཕྲད་དུས་ད་གཟོད་ལས་ལ་བསྐོས་པ་རེད་ཅེས་རང་སེམས་གསོ་ཆེད་སྨྲེ་ངག་གི་ཚུལ་དུ་སྒྲོག་པར་བྱེད། དེ་བས་ངས་ནི་ལས་ལ་བསྐོས་པ་ཞེས་པའི་ཚིག་འདི་བོད་མིའི་འདུ་ཤེས་འཛིན་སྟངས་ལ་བལྟས་ཏེ་ཐད་ཀར་སྨྲེ་ངག་གི་ཚིག་ཅིག་ལ་ངོས་འཛིན་བྱེད་ཀྱིན་ཡོད། འོ་ན་གཞས་འདིས་ཅི་ཞིག་ལས་ལ་བསྐོས་རབས་གྱེར་གྱིན་ཡོད་སྲིད་དམ།
གཞས་འདིས་གྱེར་བའི་ལས་ལ་བསྐོས་པ་ནི། བོད་མི་ཚོ་རང་ཡུལ་མི་ལག་ཏུ་ཤོར་ནས་དམིགས་ཡུལ་དང་གཏད་སོ་ཅི་ཡང་མེད་པར་མི་ཡུལ་འགྲིམས་དགོས་བྱུང་བ་དང་། གཞིས་བཞུགས་བོད་མིར་ཆ་བཞག་ན་ཡང་། ཚོང་ལས་བཟོ་ལས་སོགས་གང་ཡང་ཤིན་ཏུ་འགྲོས་མྱུར་བའི་དུས་རབས་ཉེར་གཅིག་གི་དུས་ཚོད་འདིར་སླེབ་པ་ན། བོད་རང་ཉིད་ཀྱི་རིག་གནས་མ་ལག་ཀྱིས་ཁ་མི་གསོས་ཤིང་རྒྱབ་མི་ཁེབས་པས། ན་གཞོན་རྣམས་རང་ཡུལ་བསྐྱུར་ནས་རྒྱ་ནག་གི་གྲོང་ཁྱེར་ཁག་སོགས་མི་རིགས་གཞན་དང་གཞན་འདུས་སྡོད་བྱེད་སའི་ཡུལ་གྲུ་ཁག་ཏུ་རྒྱ་མཚོར་ཆུ་ཐིག་ཐིམ་པ་ལྟར་འཁྱམ་ཉུལ་གྱི་འཚོ་བ་རོལ་དགོས་བྱུང་བ་ན། བཟོད་དཀའ་བའི་སྐྱོ་བ་དང་གདུང་བ་དེར། “ལས་ལ་བསྐོས་པ་”ཞེས་བོད་མི་རང་ཉིད་ཀྱི་འདུ་ཤེས་ལྟ་ཚུལ་གཞིར་བྱས་ཏེ་སྡོམ་ཚིག་བཀོད་བཞག་པ་རེད། དེ་བས་གཞས་འདིའི་ཁ་བྱང་ལ་བལྟས་པ་ཙམ་གྱིས་ཀྱང་། ཅི་ཞིག་གི་གདུང་བ་བརྗོད་ཀྱིན་ཡོད་པ་ཤེས་ཐུབ་པ་མ་ཟད། བོད་མི་རང་ཉིད་ཀྱི་འདུ་ཤེས་ལྟ་ཚུལ་གཞིར་བྱས་པ་དང་གཞས་ལུས་ཡོངས་ཀྱི་ནང་དོན་ཕྱོགས་ཡོངས་ནས་མཚོན་ཐུབ་པ་སོགས་ཀྱི་ཁྱད་ཆོས་འདུག་པས། ཁ་ཡིག་འདི་ཁོ་ནས་ཀྱང་བདག་གི་སེམས་ནི་ཤིན་ཏུ་རབ་ཏུ་འཕྲོག་སོང་ལགས།
སྡུག་ལ་དྭངས་རྒྱུ་མེད་པ། །ཕ་ཡུལ་དྲན་པའི་གདུང་བ། །ཞེས་པ་ནི་ཅི་འདྲའི་གནས་ལུགས་བཙན་པའི་སྐད་ཆ་ཞིག་རེད་དེ། ཕ་མ་ཤི་བ་དང་དགའ་གྲོགས་ཀྱི་བྲལ་གདུང་སོགས་འཇིག་རྟེན་འདིའི་སྡུག་བསྔལ་ཆེ་མ་ཆུང་གསུམ་གང་ཡིན་ཡང་ལོ་དང་ཟླ་བའི་ཁ་ཟས་སུ་མི་འགྱུར་བ་གཅིག་ཀྱང་མེད་པས། སྡུག་བསྔལ་དེ་ཚོ་ནི་དྭངས་དུས་ཡོད་པའི་སྡུག་བསྔལ་རྐྱང་རྐྱང་ཡིན། དུས་ཚོད་ཀྱིས་ཁ་ལོ་བསྒྱུར་མི་སྲིད་ཅིང་བརྗེད་ངས་རྐུན་པོར་ཡང་འཁྱེར་དབང་མེད་པའི་ཁར། ལོ་ཟླའི་འཁོར་འགྲོས་མང་རིམ་བཞིན་ཇེ་ཐུ་ཇེ་ཐུར་འགྲོ་སྲིད་པའི་སེམས་ནད་ཉག་ཅིག་ནི་ཕ་ཡུལ་དྲན་པའི་གདུང་བ་དེ་ཡིན། གནས་ལུགས་དེས་ཡིན་པ་འདྲ་སྟེ། ནམ་རྒྱུན་བོད་མི་ཚོར། མི་རྒས་ན་ཡུལ་དྲན། །བྱ་རྒས་ན་ཚང་དྲན། །ཞེས་པའི་གཏམ་དཔེ་ཞིག་ཀྱང་འདུག
མི་ཡི་ལུང་པ་འགྲིམས་དུས། །དཀའ་ལས་གང་ཡང་བྱུང་སོང་། །ཕ་ཡུལ་ཕྱོགས་སུ་འཕུར་བའི། །བྱ་ཞིག་ཡིན་ན་བསམ་བྱུང་། ། ཞེས་པ་ཅིས་མ་བདེན། དུས་རབས་འདིར་སླེབ་དུས། ང་ཚོར་དམིགས་གཏད་དང་ཁ་ཕྱོགས་ཁྱོན་ནས་མེད་པར་མི་ཡུལ་འགྲིམས་དགོས་བྱུང་སོང་ལ། ཡུལ་སྲོལ་གོམས་གཤིས་དང་རིག་གནས་བསམ་བློ་སྐད་ཡིག་འགྲོ་ལུགས་སོགས། ང་ཚོར་རྒྱུས་ཙམ་ཡང་མེད་པའི་གསར་པ་གསར་རྐྱང་མང་པོ་ཞིག་ཆ་རྐྱེན་ཅི་ཡང་མེད་པའི་ཐོག་ནས་དང་ལེན་བྱེད་དགོས་ཐུག་འོང་། ཁོ་བོར་མཚོན་ན་སྡུག་བསྔལ་དེ་ནི་ཤིན་ཏུ་ཆེ་བའི་སྡུག་བསྔལ་ཞིག་ཡིན་ཏེ། འདི་ནི་གཞན་ཡུལ་འགྲིམ་མཁན་ཡོངས་རྫོགས་ཀྱི་སྡུག་བསྔལ་ཞིག་ཀྱང་ཡིན་པ་འདྲ་བས། གནད་དོན་འདིས་ཡང་བསྐྱར་གོང་དུ་བཤད་པའི་“ལས་ལ་བསྐོས་པ་”སྟེ། ཚེ་སྔོན་ལས་ཀྱིས་བསྐོས་པ་ཡིན་ནའང་འདྲ། ཚེ་འདིའི་ལས་ལ་བསྐོས་པ་ཡིན་ནའང་འདྲ། གང་ལྟར་“ལས་ལ་བསྐོས་པ་”དེ་དྲན་དུ་བཅུག་བྱུང་།
མི་ཡི་ལུང་པ་འགྲིམས་དུས་ཀྱི་དཀའ་ལས་ནི་བརྗོད་ཐུབ་པ་ཞིག་ཡིན་ཚོད་མི་འདུག་ཀྱང་། ཁོ་བོས་མཐོང་མྱོང་བ་དང་ཚོར་མྱོང་བ་ནི། གཞན་གྱིས་གང་བཤད་ལ་ཉན་དགོས་ཤིང་བརྙས་བཅོས་ཆེ་མ་ཆུང་གསུམ་ལ་མགོ་བོ་སྒུར་དགོས་པ་མ་ཟད། རྒྱུས་མེད་གཞན་ཡུལ་ནས་བློར་བབས་མིན་ལ་མ་ལྟོས་པར་སྡུག་གཡོག་རྒྱུག་རྒྱུ་ལས་གཞན་པའི་བྱ་བ་བཟང་པོ་ཞིག་རྙེད་དཀའ་བས་མི་ཚད། ང་ཚོ་བོད་མིར་ཆ་བཞག་ན་བྱ་བ་དེ་འདྲ་ནི་གསེར་ལས་དཀོན་པའི་ཚད་དུ་སོང་ཡོད་གཤིས། བོད་མིའི་ལས་དབང་ནི་དེ་འདྲ་རང་ཡིན་པས། མི་ཡི་ལུང་པ་འགྲིམས་དུས། ། དཀའ་ལས་གང་ཡང་བྱང་སོང་། །བ་ཅིས་མི་བདེན་ཨང་། དེ་འདྲའི་གནས་སྟངས་སྐབས་སུ་ཕ་ཡུལ་གྱི་རི་ཆུ་ལུང་གསུམ་ལྷག་ཏུ་དྲན་པ་ནི་ཤིན་ཏུ་བདེན་ཤས་ཆེ་བས། གཞས་འདིའི་འགུལ་བརྙན་དུ་ཡང་ཡུལ་མི་ཚོའི་འཚོ་བ་རོལ་སྟངས་དང་ཕ་ཡུལ་གྱི་ནམ་དུས་བཞིའི་ཡུལ་ལྗོངས་རྣམས་ཁྱུག་ཙམ་ཁྱུག་ཙམ་པར་ངོས་སུ་མངོན་པར་བྱས་འདུག
མིའི་ལྷན་སྐྱེས་ཀྱི་སེམས་གཤིས་ངོ་མ་བོ་ནི་ཤིན་ཏུ་ལྷད་མ་འདྲེས་པ་དང་ཤིན་ཏུ་དག་གཙང་ཡིན་པ་འདྲ་སྟེ། འདི་ལྟར་དགའ་བས་གཉུག་མའི་ཁམས་སུ་འབྱོར་དུས་དང་། སྐྱོ་བས་བཅོས་མའི་ལྷན་པ་མཐའ་དག་བཤུས་འགྲོ་དུས་ཡོད་ཚད་བྱིས་པའི་སེམས་ཁམས་དང་དབྱེར་མེད་གཅིག་འདྲེས་སུ་གྱུར་འགྲོ་བས། རང་ཡུལ་ཕྱོགས་སུ་འཕུར་བའི། །བྱ་ཞིག་ཡིན་ན་བསམ་བྱུང་། །བའི་ཆེས་ལྷད་མེད་ཅིང་ཆེས་རྣམ་དག་གི་སྟོང་བསམ་དེ་འདྲས། སེམས་པ་འཁྱག་ཏུ་འཇུག་པ་ཡང་ཆེས་རྒྱུན་ལྡན་ཞིག་རེད་ཨང་།
འཁྱམ་ཉུལ་གྱི་འཚོ་བ་མཚོན་པའི་གཞས་ཚིག་འདི་ནི་བོད་མི་རིགས་ཀྱི་ད་ལྟའི་གནས་བབས་མཚོན་པར་ཆར་པ་ཆུ་གྲོགས་སུ་སོང་ཡོད་པས། ཁོ་བོས་མི་རིགས་ཀྱི་བདེ་སྡུག་གླུ་རུ་གྱེར་བའི་གཞས་ཚིག་ཅེས་པ་འདི་འདྲ་ཞིག་ལ་ངོས་འཛིན་བྱེད་ཀྱིན་ཡོད་པ་ལས། “མཉམ་དུ་འགྲོ། མཉམ་དུ་འགྲོ། ང་དང་མཉམ་དུ་འགྲོ། སྤང་གཞོང་བདེ་མོའི་ནང་ལ། རྐང་པ་ལག་པ་བསྐྱངས་ནས། གཅིག་གཅིག་གཉིས་གཉིས་བྱེད་ཀ ང་དང་མཉམ་དུ་འགྲོ།” ཞེས་པ་ལྟ་བུའི་གཞས་ཚིག་དག་ནི། ཡིན་པ་ཕོ་མོའི་བརྩེ་དུང་མཚོན་པའི་གཞས་ཚིག་ཅིག་ཡིན་ཁུལ་རེད་ཀྱང། བརྩེ་དུང་གི་ཐོབ་ཤོར་དང་རེ་སྙེགས། འཁྲེང་ཞེན་དང་འདུ་འབྲལ། དགའ་གདུང་དང་སྟོང་འདངས་སོགས་ཅི་ཡང་སྔོག་འདོན་བྱེད་ཐུབ་མེད་པའི་གཞས་ཚིག་དེ་འདྲའི་རིགས་ལ་ཕྱོགས་ག་འདྲ་ཞིག་ནས་ངོས་འཛིན་བྱེད་དགོས་མིན་ཁོ་བོས་ནི་ཤེས་མ་བྱུང་ལགས།
བྲིས་རྩོམ་ལེགས་པར་དགའ་བསུ།
སྡུག་ལ་དྭངས་རྒྱུ་མེད་པ།། ཞེས་པར་སྡུག་ཅེས་པ་ཁ་སྐད་ལ་སྡུག་བསྔལ་ལ་གོ་ཡང་། རིག་གཞུང་སྐད་དུ་། སྡུག་པ་དང་བྲལ་བའི་སྡུག་བསྔལ། མི་སྡུག་པ་དང་འཕྲད་པའི་སྡུག་བསྔལ། ཟེར་བ་ཡོད་པས་ཚིག་སྦྱོར་གཟབ་དགོས།
སྒྲོག ཅེས་པ་སྡོམ་པ་དང་། སྒྲོགས། ཞེས་པ་སྐད་ཤུགས་ཆེར་འདོན་པ་བསྟན་བཅོས་སྐད་དུ་གྲགས་ཆེ།
དགོས་པ་མ་ཟད། ཅེས་པར་ཁ་སྐད་དུ་ར་སྒྲ་མ་འཐོན་པས་དེ་འདྲ་བྱུང་ཡང་། བོད་ཀྱི་མཁས་པའི་གསུང་རྩོམ་རྣམས་ན། དགོས་པར་མ་ཟད། ཅེས་མཐོང་བ་དེའི་རྗེས་སུ་འབྲང་བ་དག་སྐལ་བ་བཟང་། བ་ཅིས་མི་བདེན་ཨང་། འདིར་ཡི་གེ་ཆད་པ་ཡིན་ནམ། ཆེ་མ་ཆུང་གསུམ། ཞེས་པ་ཆེ་འབྲིང་ཆུང་གསུམ། ཞེས་་པའི་དོན་ཡིན་ནམ། སྟོང་འདངས། ཞེ་པའི་འདངས་ཀྱི་དོན་ཅི་ནམ། སྤྱིར་བཏང་འདངས་ཞེས་པ། དང་བ་དང་དྭངས་པའི་ད་ལྟ་བ་ཡིན་དགོས་པར་སེམགས་སོ།
ཧཧཧཧཧཧཧཧཧཧཧ
མཛའ་བཤེས་ཕན་པར་འདོད་རྣམས་ཀྱི།
གང་ཞིག་སྨྲས་པ་མི་འཛིན་པ།
རུས་སྦལ་ཁ་ནས་ཤིང་ཤོར་ལྟར།
དེ་ནི་ལྷུང་ཞིང་ལུས་པར་འགྱུར།།