༸གོང་ས་མཆོག་ལ་ཕྱི་ལོ་༢༠༡༥ ལོའི་ཨ་རིའི་རང་དབང་གཟེངས་རྟགས་འབུལ་འཆར།

ཡོང་ཁུངས། བོད་མིའི་སྒྲིག་འཛུགས་དྲ་རྒྱ

༸གོང་ས་མཆོག་ལ་ཕྱི་ལོ་༢༠༡༥ ལོའི་ཨ་རིའི་རང་དབང་གཟེངས་རྟགས་འབུལ་རྒྱུའི་གསལ་བསྒྲགས་སྤེལ་བ།

ཨ་རིའི་ཕི་ལ་གྲེལ་ཕི་ཡར་(Philadelphia)རྟེན་གཞི་བྱས་པའི་ཕི་ལ་གྲིལ་ཕི་ཡ་མངའ་སྡེའི་རྩ་ཁྲིམས་བསྟི་གནས་ཁང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་འཛམ་གླིང་སྤྱིར་ཁྱབ་པའི་འགྲོ་བ་མིའི་ཐོབ་ཐང་གོང་སྤེལ་གཏོང་གནང་མཛད་མཁན་ཞིག་ཡིན་པར་ངོས་འཛིན་གྱིས་ཕྱི་ལོ་༢༠༡༥ ལོའི་རང་དབང་གཟེངས་རྟགས་འབུལ་རྒྱུ་ཡིན་པའི་གསལ་བསྒྲགས་སྤེལ་ཡོད། དེ་ཡང་ཕྱི་ལོ་༢༠༡༥ ཟླ་༡༠ ཚེས་༢༦ རེས་གཟའ་ཟླ་བའི་ཕྱི་དྲོ་ཆུ་ཚོད་༥ པའི་ཐོག་ཕི་ལི་གྲེལ་ཕི་ཡའི་ནང་ཡོད་པའི་ལོ་རྒྱུས་རང་བཞིན་གྱི་སྐྱེད་ཚལ་(Independence National Historical Park in Philadelph)དུ་ལོ་ངོ་ཧྲིལ་པོ་ ༢༧ འཁོར་བའི་སྙན་གྲགས་ཅན་གྱི་གཟེངས་རྟགས་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་ལམ་ཞུ་རྒྱུ་ཡིན་འདུག

སྐབས་དེའི་མཛད་རིམ་ཁག་ས་གནས་དེ་གའི་ཨེ་བི་སི་དང་། ཝི་པི་ཝི་ཨཧེ་བརྙན་འཕྲིན། སིག་སེ་ཨེ་བི་སི་བཅས་ཀྱི་ནང་ (local ABC affiliate, WPVI-TV/6abc)རྒྱང་སྲིང་ཞུ་རྒྱུ་ཡིན་ཞེས་གསལ་བརྡ་བཏང་ཡོད་འདུག ཕི་ལ་གྲིལ་ཕི་ཡ་མངའ་སྡེའི་རྩ་ཁྲིམས་བསྟི་གནས་ཁང་གིས་རང་དབང་གི་གཟེངས་རྟགས་ (Liberty Medal) དེ་བཞིན་ཕྱི་ལོ་ ༡༩༨༨ ལོར་གནང་འགོ་བཙུགས་ཏེ་ལོ་རེར་གོ་ལ་དེའི་སྟེང་རང་དབང་འཐབ་རྩོད་གནང་མཁན་གྱི་ཕོ་མོ་ཁྱད་མེད་གང་རུང་ལ་ཆེ་བསྟོད་ཀྱིས་གཟེངས་རྟགས་དེ་དང་། དངུལ་གྱི་བྱ་དགའ་ཨ་སྒོར་འབུམ་གཅིག་གནང་སྲོལ་ཡོད་པ་དང་། ལོ་སྔོན་མའི་གཟེངས་རྟགས་བཞེས་མཁན་ཁྲོད་པ་ཀི་སི་ཐན་(Pakistan)ནང་གི་རང་དབང་འཐབ་རྩོད་པ་བུ་མོ་མཱ་ལ་ཡུ་ས་ཕི་དང་། (Malala Yousafzai) མངའ་སྡེའི་དྲུང་ཆེ་ཟུར་པ་ཧི་ལི་རི་རོ་དམ་ཁི་ལིན་ཊོན་ལགས། (former Secretary of State Hillary Rodham Clinton) ཁུ་ཚུར་རྩལ་འགྲན་པ་མོ་ཧད་མད་ཨ་ལི་(boxer Muhammad Ali) བཅས་ལ་ཐོབ་ཡོད་པ་དང་། ཐེངས་འདིར་ཕི་ལ་གྲིལ་ཕི་ཡ་མངའ་སྡེའི་རྩ་ཁྲིམས་བསྟི་གནས་ཁང་གི་གཙོ་འཛིན་དང་། ཚོང་དོན་སྤྱི་ཁྱབ་གཅིག་ལྕོགས་ཡིན་པ་ཇེབ་རི་རོ་སིན་(National Constitution Center president and CEO Jeffrey Rosen)ལགས་ཀྱིས་༸གོང་ས་མཆོག་ལ་གཟེངས་རྟགས་དེ་འབུལ་ལམ་ཞུ་དགོས་པའི་གསལ་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་བོད་ཀྱི་རྩ་དོན་དང་། དེ་བཞིན་འཛམ་གླིང་སྤྱི་ཡོངས་ལ་འདྲ་མཉམ་དགོས་པ་དང་། འགྲོ་བ་མི་རིགས་ཡོངས་ལ་བདེ་སྐྱིད། ཞི་བདེ། རང་དབང་། འདྲ་མཉམ་སོགས་ཀྱི་ཐོག་རྩོད་ལེན་མཛད་མཁན་ཞིག་ཡིན། མ་ཟད་ཁོང་གིས་ཕྱི་ལོ་ ༡༩༨༩ ལོར་ནོ་བེལ་ཞི་བདེའི་གཟེངས་རྟགས་བཞེས་གནང་མཛད་ཡོད། ཁོང་ནི་འཛམ་གླིང་སྤྱིའི་འགྲོ་བ་མིའི་ཐོབ་ཐང་ཐོག་རྩོད་ལེན་མཛད་མཁན་ཞིག་དང་། ལྷག་བསམ་རྣམ་དག་གིས་སྒོ་ནས་རང་དབང། གྲོས་མོལ། དེ་བཞིན་བཟོད་སྲན་བཅས་ཀྱི་དགོངས་པ་ནན་བརྗོད་ཀྱི་མཛད་རྗེས་དེས་རང་དབང་གི་གཟེངས་རྟགས་དེ་ཉིད་གསལ་པོར་མཚོན་གྱི་ཡོད་པར་བརྟེན། ཐེངས་འདིའི་གཟེངས་རྟགས་བོད་ཀྱི་༸སྐྱབས་མགོན་ཏཱ་ལའི་བླ་་མར་འབུལ་རྒྱུ་ཡིན། ཞེས་འགྲེལ་བརྗོད་གནང་འདུག

གཞན་ཡང་ཕི་ལ་གྲིལ་ཕི་ཡ་མངའ་སྡེའི་རྩ་ཁྲིམས་བསྟི་གནས་ཁང་གི་གཟེངས་རྟགས་ཀྱི་གསུང་འཕྲིན་༸གོང་ས་མཆོག་ལ་སྤྱན་འབུལ་ཞུས་བརྒྱུད་༸གོང་ས་མཆོག་གིས་བཀའ་སློབ་ཕེབས་དོན། ངོས་ཀྱི་མི་ཚེའི་བྱ་གཞག་ནང་དམ་བཅས་པའི་བྱམས་པ་དང་བརྩེ་བ་གོང་སྤེལ་གཏོང་རྒྱུའི་ལས་གཞི་དེར་སྤུན་ཟླ་ཕོ་མོ་ཚོས་མཛའ་བརྩེའི་འདུ་ཤེས་ཐོག་ངོས་འཛིན་གནང་བ་འདི་ལས་ལྷག་པའི་ངོས་ལ་ཆེད་མཐོང་ངོས་འཛིན་ཞིག་དགོས་པ་མ་མཐོང་། ཅེས་བཀའ་ལན་སྩལ། ཕི་ལ་གྲིལ་ཕི་ཡ་མངའ་སྡེའི་བསྟི་གནས་ཁང་ནི་ཁེ་མེད་ཚོགས་པ་དང་ཆབ་སྲིད་ཀྱི་ལངས་ཕྱོགས་མ་ཡིན་པའི་ཨ་རིའི་རྩ་ཁྲིམས་མཚོན་པའི་ཚོགས་པ་ཞིག་རེད་འདུག ཚོགས་པ་དེ་ཉིད་ཨ་རིའི་ཨིན་གྲི་པེན་གྲེན་མོལ་པན་ས་ལི་ཝི་ནི་ཡ་ (Independence Mall, Pennsylvania) ཞེས་པ་དེར་ཆགས་ཡོད་པ་དང་། ཚོགས་པ་དེས་གཞུང་གི་འགོ་ཁྲིད་མི་སྣ་དང་། གསར་འགོད་པ། ཤེས་ལྡན་མི་སྣ། གྲགས་ཅན་མི་སྣ། བཅས་མཉམ་ཞུགས་ཐོག་རྩ་ཁྲིམ་སྐོར་གྲོས་མོལ་དང་། སྲིད་འཛིན་འདེམས་ཕྱོགས་ཀྱི་གོ་བསྡུར། འགྲེམས་སྟོན་ལས་རིགས་བཅས་མུ་མཐུད་གོ་སྒྲིག་གནང་གི་ཡོད་འདུག་པ་བཅས། །