འདྲེན་ཁུངས། བོད་ཀྱི་དུས་བབ།
རང་དབང་ལུང་པའི་ནང་རང་དབང་གི་དུས་སྐབས་ལོངས་སུ་སྤྱོད་ཐུབ་དགོས།
༸གོང་ས་མཆོག་གིས་ལ་དྭགས་བོད་ཁྱིམ་དུ་བོད་མི་ཚོར་བཀའ་སློབ་གནང་སྟེ། རང་དབང་ལུང་པར་ཡོད་པའི་བོད་མི་ཚོས་གཞིས་ལུས་རྒྱ་ཆེའི་མི་མང་གི་བསམ་འདུན་སེམས་ལ་བཅངས། རང་དབང་ལུང་པའི་རང་དབང་གི་དུས་སྐབས་ལོངས་སྤྱོད་ཀྱིས་བོད་སྐད་ཡིག་གཙོས་ཆོས་དང་རིག་གཞུང་ལ་བདག་པོ་རྒྱག་དགོས་སྐོར་གསུངས་སོང་།
དེ་རིང་ཞོགས་པའི་ཆུ་ཚོད་༨།༠༠ པ་ཡས་མས་སུ་༸གོང་ས་མཆོག་ཞི་བའི་ཚལ་གསུང་ཆོས་རྭ་བའི་ཚོགས་མགོན་དུ་ཆིགས་བསྒྱུར་གནང་རྗེས། ཏཱ་ལའི་བླ་མའི་ཐེབས་རྩས་དངུལ་གྱི་མཐུན་འགྱུར་འོག་གསར་འཛུགས་གནང་བའི་བསོད་ནམས་གླིང་གཞིས་ཆགས་ཀྱི་སྤྱི་ཁང་དབུ་འབྱེད་རབ་གནས་དང་། ཆུ་ཚོད་ ༡༡།༠༠ ཡས་མས་སུ་ལ་དྭགས་བོད་ཕྲུག་ཁྱིམ་སྡེའི་སློབ་གྲྭ་ཆེ་བར་ཆིབས་བསྒྱུར་གྱིས། ལ་དྭགས་བོད་ཁྱིམ་སློབ་ཟུར་ཡོངས་ཀྱིས་སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་དང་ལ་དྭགས་བོད་ཁྱིམ་གྱི་དབུ་འཛིན་རྒན་པ་རྒན་བློ་བཟང་བསྟན་འཛིན་རྣམ་གཉིས་ལ། བཀའ་དྲིན་རྗེས་དྲན་དང་ཆེ་བསྟོད་ཆེད་གོ་སྒྲིག་གནང་བའི་གཟེངས་རྟགས་ཕུལ་སོང་མ་ཟད། བོད་མིའི་སྒྲིག་འཛུགས་ཀྱི་ལས་ཀྱི་སྣེ་མོ་བ་དང་བོད་ནས་ཕེབས་པའི་ཆོས་ཞུ་བ། ལ་དྭགས་བྱང་ཐང་ས་ཁུལ་བརྒྱད་ནས་ཕེབས་པའི་བོད་མི། ཕྱོགས་མཐའ་ཁག་ནས་ཕེབས་པའི་བོད་མི་ཆོས་ཞུ་བ། ལ་དྭགས་བོད་ཁྱིམ་གྱི་སློབ་ཟུར། ལ་དྭགས་བོད་ཕྲུག་ཁྱིམ་སྡེ་སློབ་གྲྭ་ཆེ་བའི་དགེ་ལས་སློབ་ཕྲུག དགེ་འདུན་པ་དང་བཙུན་མ། བསོད་ནམས་གླིང་བརྒྱ་ཤོག་བཅུ་གཉིས་ཀྱི་མང་ཚོགས་བཅས་ལ་མི་ ༡༠༠༠ བརྒལ་བར་དམིགས་བསལ་བཀའ་སློབ་གནང་སོང་།
དེ་རིང་བོད་མི་ཚོར་བཀའ་སློབ་གནང་སྐབས་༸གོང་ས་མཆོག་གིས། ལོ་རྒྱུས་ཧ་ལམ་ལོ་སྟོང་ཕྲག་ ༣༠ ཙམ་ཡོད་པ། བོད་མདོ་སྨད་ཀྱི་ས་ཁུལ་ཁ་ཤས་སུ་ས་འོག་ནས་སི་ཊོང་ཨེ་ཆི་ཟེར་བའི་རྡོ་རིགས་ཐོན་པ་ལ་གཞིགས་ན། ལོ་སྟོང་ཕྲག་ ༣༠ བཤད་ཀྱི་འདུག བོད་དབུས་ཁུལ་ཕལ་ཆེར་ལོ་སྟོང་ཕྲག་ ༧ དང་ ༨ བཤད་ཀྱི་འདུག གང་ལྟར། ང་ཚོ་བོད་མི་རིགས་ཟེར་བ་དེ་རྙིང་མགོ་ཅིག་ཆགས་བསྡད་ཡོད་པ་རེད། ལྷག་པར་དུ་ཆོས་རྒྱལ་སྲོང་བཙན་སྒམ་པོའི་གོང་ནས་ཞང་ཞུང་མང་ཡུལ་ཡོད་པ་ཡིན་ན་འདྲ། ཡང་སྙིང་སྲོང་བཙན་སྒམ་པོའི་ཁ་ཐུག་ལ་བོད་ཡིག་གི་ཡིག་གཟུགས་རྒྱ་གར་གྱི་ཡིག་གཟུགས་འགར་དཔེ་བལྟས་ཏེ། ང་རང་ཚོ་རང་གི་ཡི་གེ་ཆགས་བསྡད་ཡོད་པ་རེད། དེ་དང་ཆབས་ཅིག་སངས་རྒྱས་པའི་ཆོས་རྒྱ་གར་ནས་ཐད་ཀར་གདན་ཞུ་གནང་སྟེ། ང་ཚོ་བོད་གངས་ཅན་པ་ཟེར་བ་དེ་སོ་སོའི་སྐད་ཡིག་ཟུར་དུ་ཡོད་པ། སྐད་ཡིག་དེའི་ཐོག་དེང་སང་འཛམ་གླིང་འདིའི་ཐོག་ནང་པ་སངས་རྒྱས་པའི་ཆོས། དཔལ་ན་ལེཎྡྲའི་མཁས་པ་ཚོས་མཛད་བཞག་པའི་ལྟ་སྒོམ་སྤྱོད་གསུམ་དང་ལྟ་གྲུབ། སེམས་ཁམས་རིག་པའི་ཚན་རིག་བཅས་བོད་ཡིག་ནང་ཕྱུགས་པོ་ཡོད་བསྡད་པ་ཞིག་དང་། སངས་རྒྱས་པའི་ཆོས་སྤྱི་དང་ལྷག་པར་ན་ལེཎྡྲའི་ཆོས་རྒྱུད་ཀྱི་སྐོར་བོད་ཡིག་ཕྱུགས་ཤོས་ཆགས་འདུག འཛམ་གླིང་ཐོག་ནང་པ་ཕལ་ཆེར་དུང་ཕྱུར་ ༡༠ ཙམ་ཡོད་བསྡད་པ་རེད། དེའི་ནང་ན་ལེཎྡྲའི་ཆོས་རྒྱུད་སྐོར་ལ་འགྲེལ་བཤད་ཆ་ཚང་རྒྱག་ཐུབ་པའི་སྐད་ཡིག་དེ་བོད་པའི་སྐད་ཡིག་གཅིག་པུ་རེད། དེ་འདྲའི་མི་རིགས་རྙིང་པ་ རིག་གཞུང་ཕྱུགས་པོ། ལྷག་པར་དུ་སངས་རྒྱས་ཀྱི་ཆོས་ལྟ་གྲུབ་སྐོར་ལ་ཧ་ཅང་ཕྱུགས་པོ་ཡོད་པའི་མི་རིགས་ཤིག་རེད་ཅེས་གསུངས་སོང་།
༸གོང་ས་མཆོག་གིས། ང་ཚོ་བོད་མི་རིགས་དང་གངས་ཅན་པ་ཟེར་བ་དེ་ལོ་རྒྱུས་ཐོག་སོ་སོར་སྤོབས་པ་དང་ཡིད་ཆེས་བསླེབ་པའི་མི་རིགས་ཤིག་ཆགས་ཡོད་པ་རེད། དཀའ་ངལ་སྔར་འཕྲད་ཡོད་པ་རེད། ད་ལྟའང་དཀའ་ངལ་མང་པོ་ཞིག་འཕྲད་ཀྱི་ཡོད་པ་རེད། ཡིན་ནའང་། ལོ་རྒྱུས་ཀྱི་ཐོག་ནས་མི་རིགས་དང་ཆོས་དང་རིག་གཞུང་ཕྱུགས་པོ་ཡོད་པའི་མི་རིགས་ཤིག་ཆགས་ཡོད་སྟབས། དཀའ་ངལ་ག་རེ་འཕྲད་ཀྱང་བདེན་པའི་ལམ་ནས་སེལ་ཐུབ་པ་ཞིག་དང་རྒྱལ་ཐུབ་པ་ཞིག་ཕལ་ཆེར་རེད། ང་ཚོ་བཙན་བྱོལ་བ་ཆགས་ནས་ལོ་ ༥༥ ལྷག་འགྲོ་བསྡད་ཀྱི་ཡོད། དུས་ཡུན་དེའི་རིང་བཙན་བྱོལ་ནང་ཡོད་མཁན་ཚོས། དེང་དུས་ཀྱི་ཤེས་ཡོན་ཆ་ཚང་ཡོད་པའི་ཐོག་སོ་སོའི་གནའ་རབས་ཀྱི་ཆོས་དང་རིག་གཞུང་སྲུང་ཐུབ་པར་བྱས་ཏེ་དུས་ཡུན་ཕྱིན་པ་རེད། ཁྱེད་རང་ཚོ་བོད་ཕྲུག་གཞོན་ནུ་ཚོ་མི་རབས་གསར་བ་རེད། རྒྱ་གར་ནང་སྐྱེས། རྒྱ་གར་ནང་འཚར། ཁྱེད་རང་ཚོའི་མི་རབས་དེ་ང་ཚོ་བོད་པའི་མི་རིགས་གང་དུ་ཡིན་ཡང་། དུས་ཚོད་འགྲོ་བསྡད་ཀྱི་རེད། ཁ་སང་དྲན་པའི་ཡུལ་ལ་མ་གཏོགས་ཕྱིན་ཚར་རེད། བཟོ་བཅོས་རྒྱག་རྒྱུ་ཡོད་མ་རེད། མ་འོངས་པ་འགྱུར་བ་འགྲོ་བ་ཞིག་དང་འགྱུར་བ་གཏོང་རྒྱུ་ཡོད་པ་ཞིག་རེད། བོད་མི་རིགས་དང་ང་ཚོ་བཙན་བྱོལ་བའི་ཆ་ནས། ཁྱེད་རང་ཚོ་འབྱུང་འགྱུར་གྱི་མི་རབས་ཆགས་བསྡད་ཡོད་པ་རེད། མ་འོངས་པར་སོ་སོའི་ཆོས་དང་རིག་གཞུང་དེང་དུས་ཀྱི་ཤེས་ཡོན་དང་ཟུང་འབྲེལ་ཐོག་འཛིན་ཐུབ་པ་ཞིག་དང་། བོད་ཀྱི་བདེན་མཐའ་སེལ་ཐུབ་པར་ཁྱེད་རང་ཚོར་དམིགས་བསལ་ འགན་ཡོད་སྟབས། ཁྱེད་རང་ཚོས་སློབ་སྦྱོང་ཐོག་རིག་པ་སྒྲིམ་ཏེ་ཧུར་ཐག་བྱ་དགོས། དེ་ཧ་ཅང་གལ་ཆེན་པོ་རེད། ཅེས་གསུངས་སོང་།
ཡང་༸གོང་ས་མཆོག་གིས་ང་ཚོ་བཙན་བྱོལ་བོད་པའི་སྤྱི་ཚོགས་གང་དུ་ཡོད་ཀྱང་། སོ་སོའི་སྐད་ཡིག སོ་སོའི་ཆོས་དང་རིག་གཞུང་ཐོག་དོ་སྣང་བྱས་ཏེ། ང་ཚོ་ལོ་བཅུ་ཕྲག་ལྔ་ལྷག་ཕྱིན་པའི་རིང་ལ་ཚང་མས་ཧུར་ཐག་བྱས་ནས་གང་འཚམ་གྱི་གྲུབ་འབྲས་ཐོན་ཡོད། བོད་མི་བཙན་བྱོལ་བ་ཚོ་སྒྲིག་འཛུགས་ཡོད་བསྡད་པ་ཞིག་དང་། མི་རིགས་རིག་གཞུང་དང་བཅས་པ་འཛིན་མཁན་ཞིག་ཆགས་ཏེ། ཕལ་ཆེར་བཙན་བྱོལ་བ་འདྲ་འདྲའི་ནང་ནས་མི་འདྲ་བ་ཞིག་ཆགས་ཡོད། ང་ཚོ་འདི་འདྲའི་སྙིང་སྟོབས་དང་སྤོབས་པ་བསླེབ་དགོས་པའི་རྒྱུ་རྐྱེན་གཞིས་ལུས་རྒྱ་ཆེའི་མི་མང་ཆགས་བསྡད་ཡོད། གཞིས་ལུས་རྒྱ་ཆེ་མི་མང་ས་ཡ་དྲུག་ཡས་མས་ཡོད་ཀྱིས། དཀའ་ངལ་དཔག་ཏུ་མེད་པ་བརྒྱུད། ཐ་ན་སོ་སོའི་སྲོག་ལ་ཉེན་ཁ་ཡོད་པའི་གནས་སྟངས་རེད། ཡིན་ནའང་། སོ་སོའི་མི་རིགས་ཀྱི་ཆོས་དང་རིག་གཞུང་ལ་དགའ་ཞེན་དང་སོ་སོའི་སྐད་ཡིག་ལ་དོ་སྣང་། སོ་སོའི་སྐད་ཡིག་དང་རིག་གཞུང་སོ་སོའི་བླ་སྲོག་ལྟ་བུ་རེད། དཀའ་ངལ་ག་ཚོད་ཡོད་ཀྱང་གདོང་ལེན་བྱས་པ་རེད། དངོས་ནས་བྱས་ན་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་། གྲངས་ཉུང་མི་རིགས་ལ་ ཆོས་དང་རིག་གཞུང་། སྐད་ཡིག་བདག་པོ་རྒྱག་རྒྱུའི་ཐོབ་ཐང་ཡོད་ཀྱང་། ས་གནས་ལས་བྱེད་པའི་བྱེད་ཕྱོགས་ཐོག་སྐབས་རེར་དམིགས་བསལ་དཀའ་ངལ་འཕྲད་བསྡད་ཀྱི་འདུག ཡིན་ནའང་། དཀའ་ངལ་དེ་དག་ལ་གདོང་ལེན་བྱས་ཏེ། བོད་མི་རིགས་ཀྱི་རུས་ཞེན་བརྗེད་ཡོད་མ་རེད། བརླག་ཡོད་མ་རེད། དེ་ལྟར་གཞིས་ལུས་རྒྱ་ཆེའི་མི་མང་གིས་རྨད་དུ་བྱུང་བའི་སྙིང་སྟོབས་དང་ལྷག་བསམ་བསྐྱེད། ཞུམ་པ་མེད་པ་བྱས་ནས་བསྡད་སྟབས། ང་ཚོ་བཙན་བྱོལ་དུ་སྡོད་མཁན་ཚོས་གཞིས་ལུས་རྒྱ་ཆེའི་མི་མང་གི་བསམ་པའི་རེ་འདུན་སེམས་ལ་བཅངས་ཏེ། རང་དབང་ལུང་པའི་ནང་རང་དབང་གི་དུས་སྐབས་དེ་ལོངས་སུ་སྤྱད་ནས་སོ་སོའི་མི་རིགས་ཀྱི་ཆོས་དང་རིག་གཞུང་། སྐད་ཡིག་ལ་བདག་པོ་ཡག་པོ་ཞིག་རྒྱག་རྒྱུ་ཧ་ཅང་གལ་ཆེན་པོ་རེད། སྐབས་རེར་ང་ཚོ་རང་དབང་ལུང་པའི་ནང་ཡོད་བསྡད་མཁན་ཚོས་སོ་སོའི་སྐད་ཡིག་ཐོག་ལྷོད་ཡང་འགྲོ་བ་ལྟ་བུ་དང་། ཉིན་རེའི་འཚོ་བའི་ནང་ཡུལ་དེ་གའི་སྐད་ཡིག་མཁོ་གལ་ཆེན་པོ་ཡིན་སྟབས། ཡུལ་དེ་དང་དེའི་སྐད་ཡིག་ལ་དམིགས་བསལ་དོ་སྣང་བྱས་ཏེ། སོ་སོ་བོད་པའི་སྐད་ཡིག་ཐོག་སྐབས་རེར་ལྷོད་ཡང་འགྲོ་སྲིད་པ་རེད། དེ་འདྲ་མ་ཡོང་བ་ཞིང་ང་ཚོས་བྱེད་དགོས་པ་ཧ་ཅང་གལ་ཆེན་པོ་རེད། ཅེས་གསུངས་སོང་།
༸གོང་ས་མཆོག་གིས་མུ་མཐུད་གསུང་དོན། ང་ཚོ་བོད་པར་སེམས་པ་བཟང་པོ་དང་དྲང་པོ། རྒྱབ་མདུན་མངོན་ལྐོག་མེད་པ། གཞུང་བཟང་པོ་བྱེད་རྒྱུ་ང་ཚོ་བོད་པའི་གཤིས་ཀར་ཡོད་པ་རེད། འཛམ་གླིང་གང་སར་ཡོད་པའི་བོད་མི་བཙན་བྱོལ་བ་ཚོར་ཡུལ་དེ་དང་དེའི་ཡུལ་མིས་བསྔགས་བརྗོད་བྱེད་ཀྱི་འདུག རྒྱ་གར་ལ་མཚོན་ནའང་། བོད་མིའི་གཞིས་ཆགས་ཉེ་འཁོར་དུ་ཡོད་པའི་ཡུལ་པ་ཚོ་སྤྱི་ཡོངས་ཀྱི་ཆ་ནས་ཧ་ཅང་ཡག་པོ་རེད། ཚང་མས་བསྔགས་བརྗོད་བྱེད་ཀྱི་འདུག ལ་དྭགས་ཁུལ་ལ་མཚོན་ནའང་། སྔོན་འདིར་ང་ཇོ་ར་རིག་འཛིན་དང་བཀའ་མོལ་བྱུང་། ཁྱེད་རང་ཚོ་ཡུལ་མི་དང་བོད་མི་བཙན་བྱོལ་བའི་འབྲེལ་བ་གང་འདྲ་ཡོད་ཅེས་དྲིས་སྐབས། ཧ་ཅང་ཡག་པོ་ཡོད་གསུང་གི་འདུག ནམ་རྒྱུན་ནས་ང་ཚོས་མཐོང་བསྡད་པ་རེད། ང་རང་ཚོ་མི་ཡ་རབས་དང་དྲང་པོ། སྐྱག་རྫུན་མ་བཤད། མགོ་བདེ་དྲན་འཁྲུལ་མ་བྱས་ན་མི་སུ་ཡིན་ཡང་དགའ་བོ་བྱེད་ཀྱི་རེད། སོ་སོས་དྲང་པོ་དྲང་བཞག་དང་ལྷག་བསམ་རྣམ་དག་བྱས། ཚུར་ཐུབ་ཚོད་བྱེད་མཁན་བྱུང་ན་ང་ཚོས་མགྲིན་པར་ཞགས་རྩི་བྱུགས་ཆོག་གི་རེད། རྩ་བ་སོ་སོའི་ངོས་ནས་ལྷག་བསམ་རྣམ་དག མི་ཡ་རབས་སྤྱོད་བཟང་ཚད་ལོངས་པ་ཞིག་བྱེད་རྒྱུ་ཧ་ཅང་གལ་ཆེན་པོ་རེད། སངས་རྒྱས་པའི་ཆོས་གཞི་རྒྱ་ཆེན་པོ་ཤེས་མ་ཤེས་གང་ལྟར་ཡང་། བསླབ་བྱ་སྙིང་པོ་མི་བཟང་པོ་དང་མི་ལ་ཕན་སེམས་བྱས། དྲང་པོ་དེ་འདྲ་བྱས་ན་ཕྱི་གསལ་ནང་གསལ་ཡོང་ཐུབ་ཀྱི་རེད། ཕྱི་གསལ་ནང་གསལ་བྱས་ན་གྲོགས་པོ་མང་པོ་ཡོང་གི་རེད། སོ་སོར་དབང་དང་དཔལ་འབྱོར། ཤེས་ཡོན་ཡོད་ཀྱང་ཕྱི་གསལ་ནང་གསལ་མེད་པར་རྐྱང་སྐུམ་བྱས་ཏེ་ཆས་པ་ཡིན་ན་མིས་ཡིད་ཆེས་གནང་གི་མ་རེད། ང་ཚོ་མིའི་སྤྱི་ཚོགས་ནང་བསྡད་ཡོད་པ་རེད། ང་ཚོར་གྲོགས་པོ་དགོས་པ་རེད། གྲོགས་པོ་ཡོང་བར་ཡིད་ཆེས་དགོས་པ་རེད། ཡིད་ཆེས་ཡོང་བར་ཕྱི་གསལ་ནང་གསལ་དང་ལྷག་བསམ་རྣམ་དག་བྱས་ན་གྲོགས་པོ་ཡོང་གི་རེད། དེ་ཁྱེད་རང་ཚོས་སེམས་ལ་ཞོག ཅེས་གསུངས་སོང་།
མཇུག་ཏུ་རྒན་རྒོན་ཚོར་ ༸གོང་ས་མཆོག་གིས། དེ་རིང་འདིར་རྒན་རྒོན་མང་པོ་ཞིག་འདུག མི་ཚེ་རིང་པོར་བསྡད་དེ་གཞུག་དེར་རྒན་རྒོན་ཆགས་རྒྱུ་ཆོས་ཉིད་རེད། ང་རང་ལ་མཚོན་ན། ང་དགུ་ལོར་བཙན་བྱོལ་དུ་ཡོང་དུས་ལོ་ ༢༤ དང་ ༢༥ ཞིག་རེད། ད་ལྟ་ལོ་བརྒྱད་ཅུའི་མཚམས་ལ་བསླེབ་འགྲོ་གི་ཡོད་པ་རེད། ང་ཡང་རྒན་རྒོན་གྱི་གྲས་སུ་བསླེབ་འདུག ཡིན་ནའང་། ང་རང་ཚོའི་སངས་རྒྱས་པའི་ཆོས་རྒྱ་གར་གྱི་ཆོས་རྒྱུད་མང་པོ་ཞིག་གི་ཐོག་ནས་རྣམ་པར་ཕྱེ་བའི་རྒྱུན་ལ་ཐོག་མ་མེད་ཅེས་དང་། བདག་གཅིག་རང་དབང་འདོད་པའི་བདག་དེ་ཐོག་མ་མེད་པ་ནས་ཡོད་ཅེས་སྐྱེས་བ་སྔ་ཕྱི་བཤད་བསྡད་ཀྱི་ཡོད་པ་རེད། སངས་རྒྱས་ཆོས་ཀྱི་ངོས་ནས་ཀྱང་སྐྱེས་བ་སྔ་ཕྱི་བཤད་བསྡད་ཀྱི་ཡོད་པ་རེད། སྐྱེས་བ་སྔ་ཕྱིའི་རྟགས་མཚན་སྐྱེས་བ་སྔོན་མ་དྲན་མཁན་ཡོང་གི་ཡོད་པ་རེད། དེ་གསལ་བོ་རེད། ང་ཚོ་ཚེ་འདིར་བརྒལ་ཏེ་མི་ཚེ་རྫོགས་ལ་ཉེ་བ་ཡོད་ཀྱང་། སྐྱེས་བ་ཕྱི་མར་བསམ་བློ་གཏོང་རྒྱུ་ཡོད་པ་རེད། རྒན་རྒོན་ཚོས་གང་ཐུབ་ཀྱིས་སངས་རྒྱས་ཆོས་གསུམ་ལ་དད་པའི་གྱི་ནས་གང་ཐུབ་ཀྱིས་སྐྱབས་འགྲོ་དང་སེམས་སྐྱེད་བསམ་བློ་ཡག་པོ་བཏང་། དེ་འདྲའི་བསམ་བློའི་ཐོག་མ་ཎི་བགྲང་། ང་ཚོ་འཕགས་པ་སྤྱན་རས་གཟིགས་ཀྱི་གདུལ་ཞིང་གི་མི་རེད། དེ་འདྲའི་ཐོག་དམིགས་བསལ་གྱི་ལས་འབྲས་ཡོད་རེད། མ་ཎི་ཁ་ནས་བགྲང་བ་ལས་བསམ་བློ་གཏོང་རྒྱུ་མེད་ན་དེ་ཙམ་གྱིས་ནུས་པ་ཡོད་མ་རེད། དེར་བརྟེན། སངས་རྒྱས་ཆོས་གསུམ་ལ་དད་པའི་སྟེང་ནས་སྐྱབས་འགྲོ་སེམས་སྐྱེད་ཀྱི་བློ་དེ་སེམས་ལམ་གང་ཐུབ་ཀྱི་བཞག དེ་འདྲའི་བསམ་བློའི་ཐོག་ནས་མ་ཎི་ཡག་པོ་བསགས། སོ་སོའི་མི་ཚེ་བོད་ཁ་བ་གངས་ཅན་ཆོས་ལྡན་གྱི་ཞིང་ཁམས་སུ་སྐྱེས་པ་རེད། ག་ཚོད་མེད་ལབ་ཀྱང་ཞར་དང་ཞོར་ལ་དགེ་བ་བསྒྲུབ་རྒྱུ་ཞིག་བྱུང་ཡོད་པ་རེད། དགེ་བ་གང་བསྒྲུབ་པ་དེས་སྐྱེས་བ་རྗེས་མར་སྐྱེས་གནས་བཟང་པོ་ཞིག་ཡོང་ཐུབ་པ་དང་། ཁྱེད་རང་ཚོ་མང་ཆེ་བ་སོ་སོའི་མི་རིགས་ཀྱི་ལ་རྒྱ་ཞེན་ཁོག་ཡོད་སྟབས། ཕལ་ཆེར་བོད་པའི་ནང་སྐྱེས་མདོག་ཁ་བོ་རེད། མི་གསར་བ་ཞིག་གིས་ལུས་གསར་བ་ཞིག་བླངས་ཏེ་སངས་རྒྱས་ཀྱི་བསྟན་པ་དང་འགྲོ་བའི་བདེ་དོན་བསྒྲུབ་ཐུབ་པར་ཁྱེད་རང་ཚོས་སྨོན་ལམ་རྒྱོབས་སྐྱེ་བ་བསྔོ། དེ་བྱས་ན་ཡག་པོ་ཡོང་གི་རེད། ཅེས་གསུངས་སོང་།
གསར་འགོད་པ་དོན་གོས་ལ་དྭགས་རྒྱལ་ས་སླེ་ནས།
བོད་ཀྱི་གཞོན་ནུ་ལྷན་ཚོགས་ནང་ཁུལ་ལྟ་གྲུབ་དང་ལངས་ཕྱོགས་མ་མཐུན་པ་བྱུང་སྟེ། ལ་དྭགས་ས་གནས་གཞོན་ནུ་གཙོས་པའི་དབུ་མའི་ལམ་གྱི་ལྟ་གྲུབ་འཛིན་མཁན་གྱི་ས་གནས་ཁག་བརྒྱད་དང་། བུད་མེད་ལྷན་ཚོགས་དབུས་ས་གཉིས་བཅས་ཀྱིས་དུས་དབང་གོ་སྒྲིག་ཚོགས་ཆུང་ལ་མཉམ་རུབ་བྱས་ཏེ་སྤྱི་ཚོགས་ཞབས་ཞུ་བསྒྲུབ་ཀྱི་ཡོད་འདུག
སྔར་ཡིན་ན་གཞོན་ནུ་ཚོགས་པ་ནི། རང་ཚུགས་བརྟན་པོ་ཡོད་མཁན་དང་། ལྷག་པར་དུ་གཞོན་ནུ་ཤེས་ཡོན་ཅན་རྣམས་ཀྱིས་དགའ་ཞེན་བྱེད་ས་དང་། ཡིད་སྨོན་ཤོར་ས། མ་འོངས་པར་རེ་བ་བྱ་ས་གཅིག་པོ་དེ་ཡིན། ད་ནི་གཞོན་ནུ་ཚོགས་པ་དབུ་མ་ལམ་དུ་ཁ་ཕྱོགས་གྲབ་ཡོད་པར་བརྟེན། གཞོན་ནུ་ཚོགས་པར་ཡིད་ཆེ་བྱ་ས་གང་ཡང་ལྷག་མེད། ཚོགས་པ་འདྲ་མིན་མི་དགོས་པར་དབུ་མ་ལམ་དུ་མིང་བསྒྱུར་བྱེད་ན་བཟང་། དགའ་ལྡན་ཕོ་བྲང་གི་ཐབས་ཇུས་ནི། ཐོག་མར་རང་བཙན་སྒོ་བསྡམས། དེ་ནས་བོད་གཞུང་སྒོ་བཀག ད་གཞོན་ལྷན་སྒོ་བཀག ཆུ་བཞི་སྒང་དྲུག་དང་། ད་དུང་བོད་རང་དབང་སློབ་ཕྲུག་ཚོགས་པ་སོགས་ཚང་མ་རིམ་བཞིན་སྒོ་རྒྱགས།