༧དཔལ་རྒྱལ་དབང་ཀརྨ་པར་མཁས་དབང་གི་ཕྱག་ཁྱེར་ཕུལ་བ།

མི་གསོན་པོ།

༧དཔལ་རྒྱལ་དབང་ཀརྨ་པ་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེས་མཁས་དབང་གི་ཕྱག་ཁྱེར་བཞེས་གནང་བ།

དེ་རིང་ནི་ཆེས་བཀྲ་ཤིས་པའི་ཉིན་མོ་ཞིག་སྟེ། ༧དཔལ་རྒྱལ་བའི་དབང་པོ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་ཞེས་དུས་རབས་ཉེར་གཅིག་པའི་སྤྱི་ཚོགས་ཁྲོད་དུ་བླ་ན་མེད་པའི་གཟི་བརྗིད་ཀྱི་མཛད་རྗེས་མངའ་བའི་ཕུལ་བྱུང་གི་ན་གཞོན་བསམ་བློ་བ། འཛམ་གླིང་གོ་ལ་རིལ་པོར་སྙིང་རྗེ་དང་འབྲེལ་བའི་ཀུན་སྤྱོད་སྤེལ་བའི་ལམ་སྟོན་པ་ཆེན་པོ། རང་བྱུང་གི་ཁམས་དང་སྐྱེ་འགྲོའི་ཚེ་སྲོག་ལ་གཅེས་སྤྲས་བྱེད་པའི་འགྲོ་བ་མིའི་སྣེ་ཁྲིད་བྱེད་མཁན་ཡང་དག་པ། གངས་ཅན་ཁ་བའི་ལྗོངས་ཀྱི་མི་རིགས་ཀྱི་བདེ་སྡུག་ལ་སེམས་ཁུར་དང་ལྷག་བསམ་བྱེད་པའི་སྙིང་སྟོབས་ཀྱི་དཔེ་མཚོན། ལོ་རྒྱུས་ཀྱི་རྒྱུན་རིང་ཞིང་མཛད་རྗེས་ཀྱི་དཔངས་མཐོ་བའི་བོད་ཀྱི་སྤྲུལ་བརྒྱུད་ཡོངས་ཀྱི་རྒྱལ་པོ་རུ་གྲགས་པའི་ཆོས་ཀྱི་རྗེ་བོ། ༧རྒྱལ་མཆོག་བཅུ་བདུན་པ་གང་ཉིད་ཀྱིས་དུས་རབས་ཉེར་གཅིག་པའི་སྤྱི་ཚོགས་འདི་ལ་ཆེད་དུ་དམིགས་ཏེ་ཞལ་གསུང་བདུད་རྩི་ཟེགས་མ་ཡི་གེའི་གཟུགས་སུ་འཕོས་པའི་སྙིང་རྗེའི་ནུས་པ་ཞེས་པའི་ཕྱག་དེབ་དང་དུས་རབས་ཉེར་གཅིག་པའི་ཀུན་སྤྱོད་ཀྱི་ལམ་སྟོན་རྣམས་ལ་འཛམ་གླིང་སྐྱེ་བོ་མང་པོས་བསྔགས་བརྗོད་དང་གུས་བརྩི་ཞུས་པའི་ཆ་ཤས། ཨ་རི་ཀ་ལི་ཧྥོར་ནི་ཡ་རུ་ཡོད་པའི་གྲགས་ཅན་གྱི་གཙུག་ལག་སློབ་ཆེན་རེ་ཌི་ལན་ཌི་ཞེས་ལོ་ངོ་བརྒྱ་དང་ཉི་ཤུ་ལྷག་གིས་ལོ་རྒྱུས་ཀྱི་བྱུང་རིམ་ཡོད་པའི་སློབ་ཆེན་སྟེ། ཉིས་སྟོང་བཅུའི་ལོར་ནུབ་ཕྱོགས་ཀྱི་སློབ་ཆེན་རྩེ་ཕུད་ཨང་བདུན་པ་རུ་གདམས་ཐོན་བྱུང་བའི་སློབ་ཆེན་དེས་གོ་སྒྲིག་ཞུས་པ་ལྟར། ༧དཔལ་རྒྱལ་བའི་དབང་པོ་ཀརྨ་པ་བཅུ་བདུན་པ་མཆོག་གིས་ལོ་རྒྱུས་ཐོག་ཏུ་རང་བྱུང་རྡོ་རྗེ་དང་། མི་བསྐྱོད་རྡོ་རྗེ་སོགས་ཀར་རབས་མང་པོ་ཞིག་ལ་ཀུན་མཁྱེན་དང་མཁས་པའི་དབང་པོ་སོགས་ཀྱི་མཚན་སྙན་གྱི་ཅོད་པན་འཆང་བར་མཛད་པའི་རྣམ་ཐར་དང་རྗེས་སུ་མཐུན་པ་མཁས་དབང་འབུམ་རམས་པའི་མཚན་གནས་ཀྱི་ཕྱག་ཁྱེར་བཞེས་གནང་སོང་།

འདི་ནི་རྒྱལ་བ་བཀའ་བརྒྱུད་པའི་ལོ་རྒྱུས་ཀྱི་བྱུང་བ་ལ་གཟི་བརྗིད་ཀྱི་འོད་སྣང་འབར་བའི་ཟིན་ཐོ་གསར་པ་ཞིག་སླར་ཡང་བསྣན་པ་ཡིན་པས་ཁྱེད་ཀྱི་སློབ་འབངས་སུ་གཏོགས་པའི་ངེད་ཅག་ཡོངས་ཀྱིས་དགའ་དད་སྤྲོ་གསུམ་དང་ལྡན་པའི་ངང་ནས་ལག་ཟུང་ཐལ་མོ་སྤྱི་བོར་བཀོད་དེ་བཀྲ་ཤིས་བདེ་ལེགས་ཀྱི་ཤིས་ཚིག་གྲངས་མེད་མཆོད་སྤྲིན་གྱི་ཚུལ་དུ་ཕུལ་ཡོད། སྤྱིར་མཁས་དབང་འབུམ་རམས་པའི་མཚན་གནས་དང་ཕྱག་ཁྱེར་ཐོབ་མཁན་གྱི་བོད་པ་ཧ་ཅང་ཉུང་ལ་༧གོང་ས་སྐྱབས་མགོན་ཆེན་པོ་མཆོག་ལས་གཞན་ཆེ་མཐོང་དང་ལྡན་པའི་མཁས་དབང་འབུམ་རམས་པའི་མཚན་གནས་ཐོབ་མཁན་གྱི་བོད་པའི་བླ་མ་ཕལ་ཆེར་བྱུང་མེད་པ་ལྟ་བུར་འདུག ད་ལན་༧དཔལ་རྒྱལ་བའི་དབང་པོ་ཀརྨ་པ་ཨོ་རྒྱན་འཕྲིན་རྡོ་རྗེ་མཆོག་གིས་ཕྱག་དེབ་སྙིང་རྗེའི་ནུས་པ་དང་རེ་ཌི་ལན་ཌི་སློབ་ཕྲུག་མང་པོ་ཟླ་བ་གཉིས་ལྷག་གི་དུས་ཡུན་ནང་དུ་རྡ་སར་རྒྱུད་སྟོད་དུ་༧དཔལ་རྒྱལ་དབང་ཀརྨ་པའི་སྐུ་མདུན་ལ་ཆེད་བཅར་ཞུས་ཏེ། དུས་རབས་ཀྱི་འགྲོས་དང་མཐུན་པའི་ཀུན་སྤྱོད་དང་སེམས་ཁམས་རྣམས་སྙིང་རྗེ་དང་ཇི་ལྟར་འབྲེལ་བ་བྱེད་ཚུལ་སོགས་ཀྱིས་ལམ་སྟོན་གྱི་སློབ་ཁྲིད་གནང་བ་བཅས་ལ་སློབ་གྲྭའི་ངོས་ནས་ཚད་མཐོའི་གདེང་འཇོག་བྱས་ཏེ་མཁས་དབང་གི་མཚན་གནས་ཕྱག་ཁྱེར་འདི་འབུལ་ལམ་ཞུས་པ་རེད་འདུག

དེ་ཡང་སྤྱི་ཚེས་༢༣ཉིན་༧དཔལ་རྒྱལ་བའི་དབང་པོ་ཀརྨ་པ་སྐུ་འཁོར་ལྷན་རྒྱས་རེ་ཌི་ལན་ཌི་གཙུག་ལག་སློབ་ཆེན་དུ་ཆིབས་བསྒྱུར་གནང་སྐབས་སློབ་གྲྭའི་ཁོར་ཡུག་ཀུན་ཏུ་བོད་ལུགས་ཀྱི་ཁྱད་ཆོས་མཚོན་པའི་རླུང་རྟའམ་ཇོ་དར་གྱིས་མཛེས་པ་སྤྲས་ཤིང་། སློབ་ཆེན་གྱི་དབུ་འཛིན་མཁས་དབང་རལ་ཧྥི་ཀུན་སིལ་སྐུ་ངོ་མས་རྒྱང་རིང་ནས་ཕེབས་བསུ་ཞུས་ཏེ་དབུ་འཛིན་ལས་ཁང་དུ་གདན་འདྲེན་ཞུས་པ་དང་། དབུ་འཛིན་ཉིད་ཧ་ཅང་ཐུགས་དགྱེས་ཚོར་ཆེན་པོས་ཕྱག་རྟགས་སོགས་ཕུལ་ཏེ་༧རྒྱལ་དབང་ཀརྨ་པ་སློབ་ཆེན་དུ་ཕེབས་པར་དགའ་བསུ་དང་འཚམ་འདྲི་ཡང་ཞུས་གནང་སོང་། སློབ་ཆེན་གྱི་དགེ་སློབ་མང་པོས་དགའ་སྤྲོ་དང་གུས་འདུད་ལྡན་པའི་ཕེབས་བསུ་དང་མཇལ་ཁ་ཞུས་ཏེ་དཀར་ཟས་ཀྱི་གསོལ་ཚིགས་དང་གླུ་དབྱངས་ཀྱི་མཆོད་སྤྲིན་ཕུལ་བ་སོགས་ཀྱིས་ཧ་ཅང་ཚད་མཐོའི་སྣེ་ལེན་དང་གོ་སྒྲིག་ཞུས་སོང་།

སྤྱི་ཚེས་༢༤རེས་གཟའ་ལྷག་པ་ནི། ལྷག་དཀར་ཞེས༧གོང་ས་སྐྱབས་མགོན་ཆེན་པོ་མཆོག་དང་། རྒྱལ་མཆོག་བཅུ་དྲུག་པ་རིག་པའི་རྡོ་རྗེའི་བླ་གཟའ་དང་རྒྱལ་མཆོག་བཅུ་བདུན་པ་ཆེན་པོའི་སྲོག་གཟའ་ལ་ཁེལ་ཞིང་འཕྲོད་སྦྱོར་ཤིན་ཏུ་ལེགས་པ་སོགས་རྟེན་འབྲེལ་མ་སྒྲིག་ལྷུན་གྲུབ་ཏུ་གྱུར་པའི་བཀྲ་ཤིས་པའི་ཉིན་མོར་སློབ་ཆེན་གྱི་དབུ་འཛིན་དང་མཁས་དབང་མང་པོས་ཕེབས་བསུ་ལྷན་༧རྒྱལ་མཆོག་བཅུ་བདུན་པ་གང་ཉིད་སློབ་གྲྭའི་ལམ་ལུགས་སུ་གྱུར་པའི་མཁས་དབང་གི་སྐུ་ཆས་ཀྱིས་མཛེས་པར་སྤྲས་ཏེ་སློབ་གྲྭའི་ཚོགས་ཁང་ནང་དུ་འདུས་པ་ཉིས་སྟོང་ལ་ཉེ་བའི་ཚོགས་ཀྱི་གཙོ་བོར་གཟི་བརྗིད་ཀྱི་ཉམས་དང་ལྡན་པ་ཞབས་སོར་འཁོད་གྲུབ་པ་དང་། མདོ་འཛིན་པས་ཆེ་བསྟོད་དང་འབྲེལ་དགེ་སློབ་ཁག་ཅིག་གིས་སྲོལ་རྒྱུན་གྱི་རོལ་དབྱངས་རྣ་བའི་བཅུད་དུ་འཇེབས་པའི་སྙན་འགྱུར་གྱི་རོལ་མོ་རྒྱ་ཆེན་དཀྲོལ་ཞིང་། གཙུག་ལག་སློབ་གྲྭའི་ཉེ་བའི་རིགས་བདག་མཁས་དབང་རལ་ཧྥི་ཀུན་སིལ་གྱིས་༧དཔལ་རྒྱལ་དབང་ཀརྨ་པ་བཅུ་བདུན་པ་ཆེན་པོས་འཛམ་གླིང་སྤྱི་དང་བྱེ་བྲག་རེ་ཌི་ལན་ཌི་གཙུག་ལག་སློབ་ཆེན་ལ་ལམ་སྟོན་དང་སློབ་ཁྲིད་གནང་བར་བཀའ་དྲིན་གུས་འདུད་དང་འབྲེལ་བའི་སྒོ་ནས་སློབ་ཆེན་གྱི་ཆེས་ཚད་མཐོ་བའི་མཁས་དབང་འབུམ་རམས་པའི་ཕྱག་ཁྱེར་ཕུལ་སོང་།

ཚོགས་ཁང་ནང་གི་དགེ་སློབ་འདུས་པ་ཡོངས་ཀྱི་དགའ་སྤྲོ་དད་འདུན་ཆེན་པོས་སྐུ་བཞེངས་ཏེ་༧རྒྱལ་དབང་མཆོག་ལ་བཀྲ་ཤིས་བདེ་ལེགས་ཀྱི་ཤིས་ཚིག་ཞུས་ཟིན་རྗེས་སློབ་ཕྲུག་བཞི་ཡིས་༧རྒྱལ་མཆོག་བཅུ་བདུན་པས་གསར་རྩོམ་གནང་བའི་སྙིང་རྗེའི་ནུས་པ་ཞེས་པའི་ཕྱག་དེབ་ནང་གི་ལེ་ཚན་ཁ་ཤས་གྱེར་འདོན་ཡང་བྱས་སོང་། ཕྱག་ཁྱེར་བཞེས་པའི་མཛད་རིམ་ལེགས་པར་གྲུབ་རྗེས་༧དཔལ་རྒྱལ་བའི་དབང་པོ་ཀརྨ་པ་བཅུ་བདུན་པ་ཆེན་པོས་རྟེན་འབྲེལ་དང་ལྟོས་གྲུབ་ཀྱི་བཀའ་ཁྲིད་བཀའ་དྲིན་བསྐྱངས་གནང་བ་རྣམས་རྗེས་སུ་མུ་འགོད་ཞུ་ཆོག་པ་བཅས།
མི་གསོན་པོས་གུས་འདུད་བཅས།