ཨེ་མ་ཧོ།
ན་མོ་གུ་རུ་ཨ་བྷྱ་ལཀྵྃ་ཀ་ར་ཡེ།
གཞི་དབྱིངས་གདོད་མའི་མགོན་པོ་ཀུན་ཏུ་བཟང་།།
ལམ་མཆོག་འཁྲུལ་རྟོག་ཀུན་སེལ་རྫོགས་པ་ཆེ།།
བཟང་པོ་སྤྱོད་པའི་སྨོན་ལམ་མཐར་ཕྱིན་པའི།།
ཆོས་རྗེ་ཡིད་བཞིན་ནོར་བུས་དགེ་ལེགས་སྩོལ།།
མཁན་སློབ་ཆོས་རྒྱལ་དམ་པའི་བཀའ་དྲིན་དང་།།
འཕགས་བོད་རིག་འཛིན་བརྒྱུད་པའི་ཐུགས་རྗེ་དང་།།
གངས་ཅན་དམ་ཆོས་སྤེལ་མཁས་ཆོས་ཀྱི་རྗེ།།
ཡིད་བཞིན་ནོར་བུའི་ཕྲིན་ལས་མཚུངས་ཟླ་བྲལ།།
འཇིགས་མེད་མཁྱེན་རབ་ཕུལ་བྱུང་རྒྱལ་བ་དངོས།།
ཕུན་ཚོགས་བརྩེ་ཆེན་སྤྱན་རས་གཟིགས་དབང་གར།།
མཐུ་སྟོབས་འབྱུང་གནས་གཏེར་ཆེན་ལས་རབ་གླིང་།།
ཀུན་འདུས་འགྲོ་བའི་མགོན་པོ་སྙིང་ནས་དྲན།།
བདེ་ཆེན་དབང་གི་ཕྲིན་ལས་མངའ་དབང་འབྱོར།།
རང་བཞིན་རྫོགས་པ་ཆེན་པོའི་སྟོན་པ་མཆོག།
འབྲེལ་ཚད་ཞིང་དུ་འདྲེན་པའི་ཐུགས་དམ་ཅན།།
ཡིད་བཞིན་ནོར་བུ་ཉིད་དང་དབྱེར་མེད་ཤོག།
ཅེས་པ་རབ་རྒྱན་ཤིང་རྟའི་མགོ་ཟླའི་ཡར་ངོའི་ཚེས་པ་བཅུའི་ཉིན་ཆོས་རྗེ་དམ་པ་ཡིད་བཞིན་ནོར་བུའི་འདས་མཆོད་ཀྱི་སྟ་གོན་གྱི་སྐབས་སུ་དབྱིན་ཡུལ་ཀུན་བཟང་ཆོས་གླིང་ནས་ཨེ་མ་ཧོས་སྙིང་ནས་གསོལ་བ་འདེབས་པར་དགེའོ།། །།
༄༅། །བླ་མའི་རྣལ་འབྱོར་བྱིན་རླབས་མྱུར་སྩོལ་བཞུགས་སོ།།
ཨ།
འཁོར་འདས་ཆོས་ཀུན་ཀ་དག་རིག་པའི་ངང་།།
རང་མདངས་མ་འགགས་ཡེ་ཤེས་འོད་ལྔའི་ཀློང་།།
ངོ་བོ་དཔལ་ལྡན་འཇམ་པའི་རྡོ་རྗེ་ལ།།
རྣམ་པ་སྐྱབས་གཅིག་ཡིད་བཞིན་ནོར་བུ་ཉིད།།
དཀར་གསལ་མཛེས་མཛུམ་པཎཌི་ཏ་ཡི་ཆས།།
ཆོས་འཆད་ཕྱག་རྒྱས་རལ་གྲི་གླེགས་བམ་བསྣམས།།
ཞབས་གཉིས་སྐྱིལ་ཀྲུང་འོད་ཟེར་མུ་མེད་འཕྲོ།།
རང་སྣང་དག་པའི་རྒྱན་ཏུ་ལམ་མེར་གསལ།།
གསོལ་བ་འདེབས་པ་ནི།
གནས་ཆེན་རི་བོ་རྩེ་ལྔའི་ཞིང་ཁམས་སུ།།
འཇམ་དཔལ་ཐུགས་ཀྱི་བྱིན་རླབས་ཡིད་ལ་སྨིན།།
འཇིགས་མེད་ཕུན་ཚོགས་ཞབས་ལ་གསོལ་བ་འདེབས།།
དགོངས་རྒྱུད་རྟོགས་པ་འཕོ་བར་བྱིན་གྱིས་རློབས།།
སོགས་ཅི་ནུས་བསགས།
མཐར་ནི་བླ་མ་འོད་ལྔའི་ཐིག་ལེར་གྱུར།།
རང་གི་སྤྱི་བོ་ནས་ཞུགས་སྙིང་དབུས་ཐིམ།།
རྒྱལ་ཀུན་ཡེ་ཤེས་གཅིག་འདུས་བླ་མ་དང་།།
སྐལ་བ་མཉམ་པའི་བྱིན་རླབས་ཐོབ་པར་བསམ།།
ཞེས་བློ་འདས་ཆོས་སྐུའི་ངང་དུ་མཉམ་པར་བཞག དེ་ལས་ལྡང་བ་ན་སྣང་སྲིད་བླ་མའི་ངོ་བོར་བལྟས་ཏེ་རྒྱུན་གྱི་སྤྱོད་ལམ་ལ་འཇུག་པར་བྱའོ།། ཞེས་རབ་བྱུང་བཅུ་བདུན་པའི་ཤིང་ཕག་ཟླ་༦་ཚེས་༢༥་དུས་སུ་གངས་ལྗོངས་སྨྲ་བའི་དབང་ཕྱུག་སྤྲུལ་པའི་སྐུ་མཆོག་བསྟན་འཛིན་རྒྱ་མཚོས་རང་དང་སློབ་ཚོགས་ཡོངས་ལ་ཕན་པའི་ཕྱིར་དུ་འདི་འདྲ་ཞིག་དགོས་ཞེས་སྐུལ་མ་མཛད་པའི་དེ་མ་ཐག་རིག་སྟོང་འཇམ་པའི་དབྱངས་ཀྱི་རང་སྒྲ་རྩོལ་མེད་དུ་ཤར་བ་བཞིན་མཁས་བཙུན་གྲུབ་པའི་དབང་ཕྱུག་སྤྲུལ་ལུང་རྟོགས་རྒྱ་མཚོས་ཡི་གེ་པ་བྱས་ཏེ་ངག་དབང་བློ་གྲོས་མཚུངས་མེད་ཀྱིས་མཁའ་དབྱིངས་འཇའ་སྤྲིན་འཁྱིལ་བའི་རི་ཁྲོད་ནས་སྤེལ་བ་དགེ། །།