༧གོང་ས་༧སྐྱབས་མགོན་ཆེན་པོ་མཆོག་སུད་སི་ཁུལ་དུ་ཆིབས་བསྒྱུར།

གནས་ཚུལ་མཁོ་གཏོང་བ། འཇིགས་བྲལ་བསྟན་འཛིན།

སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྔ་འགྱུར་རིག་འཛིན་ཐེག་མཆོག་གླིང་གི་དབུ་འཛིན་ནམ་མཁའ་རིན་པོ་ཆེས་གསོལ་འདེབས་ཞུས་པ་ལྟར་སུད་སི་ཁུལ་དུ་ཆོས་འབྲེལ་དང་། མི་མང་བཀའ་སློབ། གཙུག་ལག་སློབ་ཁང་། སུད་སི་གྲོས་ཚོགས་བཅས་སུ་ཆིབས་བསྒྱུར་བཀའ་སློབ་ལམ་སྟོན་གནང་ཡོད་པ་རེད།

དེ་ཡང་ཟླ་༤ ཚེས་༡༢ ཉིན་གྱི་སྔ་དྲོ་༧གོང་ས་༧སྐྱབས་མགོན་ཆེན་པོ་མཆོག་སུད་སི་ཕི་རི་བྷུག་ས་ཁུལ་གྱི་(Fribourg Forum) ཞེས་པའི་ཚོགས་ཁང་དུཆིབས་བསྒྱུར་དང་། དེ་ཉིན་༧གོང་ས་མཆོག་ནས་ཡུ་རོབ་བོད་བརྒྱུད་ནང་བསྟན་ལྷན་ཚོགས་ཐེངས་གཉིས་པའི་(Second Tibetan Buddhist Conference in Europe) ཐོག་ཕེབས་ཏེ་ལམ་སྟོན་བཀའ་སློབ་དང་། ཟླ་༤ ཚེས་༡༣ དང་ ༡༤ བཅས་ཉིན་གཉིས་རིང་ཐེངས་འདིའི་ཆིབས་བསྒྱུར་མཛད་འཕྲིན་གཙོ་བོ་རུ་(Fribourg Forum) ཞེས་པའི་ཚོགས་ཁང་དུ་སྲིད་སྐྱོང་བློ་བཟང་སེང་གེ་མཆོག་གིས་དབུས་ཕྱི་ནང་སེར་སྐྱ་༨༥༠༠ བརྒལ་བར་ཇོ་བོ་རྗེ་ཨ་ཏི་ཤ་ཡིས་མཛད་པའི་བྱང་ཆུབ་ལམ་སྒྲོན་གྱི་བཀའ་ཁྲིད་དང་། སྒྲོལ་དཀར་གྱི་རྗེས་གནང་། ཕྱི་ནང་དད་ལྡན་མི་མང་ལ་བཀའ་སློབ་བཅས་གནང་ཡོད་པ་དང་།
ཚེས་ ༡༤ ཉིན་གྱི་ཕྱི་དྲོ་༧གོང་ས་མཆོག་གིས་དང་སྲིད་སྐྱོང་བློ་བཟང་སེང་གེ་མཆོག་གིས་དབུས་བོད་རིགས་མི་མང་ ༨༠༠༠ བརྒལ་བར་ཟུར་དུ་བཀའ་སློབ་བཅས་གནང་དོན། ཕྱི་ལོ་ ༡༩༧༩ ལོ་ནས་རྒྱ་ནག་གཞུང་དང་ཐད་ཀར་འབྲེལ་བ་བྱུང་སྟེ་བོད་ལ་ལྟ་སྐོར་གཏོང་རྒྱུ་དེ་དག་བྱུང་བ་རེད། གང་ལྟར་དེ་དག་ལོ་ནས་ལོ་བསྟུད་དེ་འབད་བརྩོན་འགྱུར་བ་མེད་པ་བྱས་ཏེ་མཐའ་མའི་ཐབས་ལམ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་ལ་གཏུག་ནས་སྐད་ཆ་བཤད་ན་ཡག་ཤོས་རེད་འདུག་ཅེས་ནས་ཕྱིན་པ་རེད།

ང་ཚོའི་དབུ་མའི་ལམ་ཞེས་པ་དེ་འགོ་དེ་ལྟར་ཚུགས་པ་རེད་མ་གཏོགས་གློ་བུར་དུ་དབུ་མའི་ལམ་ཞེས་བརྗོད་པ་དེ་འདྲ་རྩ་བ་ནས་མ་རེད། དེ་ནས་བརྒྱད་ཅུའི་ལོ་འགོར་ཧུ་ཡའོ་པང་ཡོད་སྐབས་སུ་དངོས་གནས་རེ་བ་ཆེན་པོ་ཞིག་བྱུང་ཡོད། དེ་ནས་ཁོང་རང་ཚོ་ནང་ཁུལ་ལ་མང་གཙོའི་ལས་འགུལ་བྱུང་བས་རྐྱེན་གྱིས་ཧུ་ཡའོ་པང་གནས་དབྱུང་བཏང་ཡོད། དེ་རྗེས་རྒྱ་ནག་དབུས་གཞུང་གི་སྤྱི་ཡོངས་ཀྱི་སྲིད་བྱུས་མཁྲེགས་པོ་བྱས་པ་ལྟར། བོད་ལའང་དེ་བཞིན་བྱས་ཡོད། གང་ལྟར་དབུ་མའི་ལམ་ཞེས་པ་དེ་ཐོག་མར་འགོ་ཚུགས་སྟངས་ངོས་ཀྱི་སྐབས་སུ་བྱུང་བར་བརྟེན་ངོས་ཀྱིས་གསལ་བཤད་བྱེད་རྒྱུ་ནི་ངོས་ལ་ལས་འགན་ཡོད། ཅེས་བཀའ་སློབ་སྩལ་ཡོད། དེ་རྗེས་སྲིད་སྐྱོང་བློ་བཟང་སེང་གེ་མཆོག་གིས་བོད་རིགས་མི་མང་ལ་གསུང་བཤད་གནང་དོན་དུ། ཁོང་གི་བཀའ་ཤག་གི་ལས་ཡུན་རིང་གི་ལས་དོན་མདོར་བསྡུས་ངོ་སྤྲོད་དང་འབྲེལ། ཐོག་མར་བཀའ་ཁྲིའི་འོས་མིར་བཞེངས་སྐབས་ཀྱི་སེམས་ཤུགས་འགྱུར་བ་མེད་པར་གནས་ཡོད་པ་དང་། ཚང་མ་ཐུགས་བློ་བདེ་པོ་གནང་ཆོག་པའི་གསལ་བཤད་གསུང་བཤད་དང་བཀའ་འདྲིར་བཀའ་ལན་གནང་ཡོད་པ་རེད།

ཟླ་༤ ཚེས་༡༥ ཉིན་༸གོང་ས་མཆོག་(Lausanne)ལུ་སན་གཙུག་ལག་སློབ་གཉེར་ཁང་(University of Lausanne) དུ་གོ་སྒྲིག་ཞུས་པའི་སེམས་ཁམས་རིག་པའི་སྐོར་གྱི་ལྷན་ཚོགས་ཐོག་ཆིབས་སྒྱུར་གྱིས་ཚན་རིག་པ་དང་། སྨན་པ། འཕྲོད་བསྟེན་ཉམས་ཞིབ་པ། དངོས་ཁམས་རིག་པའི་དཔྱད་ཞིབ་པ། དགེ་རྒན་ཆེན་མོ། མཐོ་རིམ་སློབ་ཕྲུག་བཅས་ཁྱོན་མི་གྲངས་༡༠༠༠ ལྷག་ལ། ཤེས་པ་ཉམས་ཏེ་དྲན་པ་མི་གསལ་བའི་སྐབས་སེམས་ཀྱི་འཁྱེར་སོ་དང་། སེམས་ཀྱི་འཕྲོད་བསྟེན་གོང་འཕེལ། ཤེས་པ་ཕྲ་མོ་བཅས་ཀྱི་ཐད་དགོངས་འཆར་བརྗེ་ལེན་མཛད་ཡོད་པ་དང་། ཟླ་༤ ཚེས་༡༦ ཉིན་གྱི་སྔ་དྲོ་༸གོང་ས་མཆོག་གིས་སུད་སིའི་རྒྱལ་ས་གྲོང་ཁྱེར་(Bern) བྷན་གྱི་བྷན་གྱི་གཙུག་ལག་སློབ་གྲྭའི་(University of Bern)ཚོགས་ཁང་དུ་སློབ་སྤྱི་སྐུ་ཞབས་མར་ཊིན་ཊུ་བྷར་མཆོག་དབུས་དགེ་ལས་སློབ་ཕྲུག་ ༡༦༠༠༠ བརྒལ་བར་༼ཡུན་གནས་ཐུབ་པའི་འབྱུང་འགྱུར་གྱི་སྤྱི་ཚོགས་ཤིག་ཇི་ལྟར་བསྐྲུན་ཐུབ།༽ ཅེས་པའི་བརྗོད་གཞིའི་ཐོག་བཀའ་སློབ་དང་བཀའ་འདྲིར་བཀའ་ལན་བསྩལ་གནང་ཡོད་པ་རེད།

ཟླ་ ༤ ཚེས་ ༡༦ ཉིན་གྱི་ཉིན་གུང་༧གོང་ས་མཆོག་སུད་སི་རྒྱལ་ཡོངས་གྲོས་ཀྱི་ཚོགས་གཙོ་ལྕམ་མཱ་ཡ་གྷི་ར་ཧྥི་(Maya Graf)མཆོག་གིས་དབུས་འཐུས་མི་རྣམས་ཀྱིས་ཕེབས་བསུའི་ཁྲོད་སུད་སི་རྒྱལ་ས་བྷན་གྱི་(Bundeshaus)ཞེས་པའི་གྲོས་ཚོགས་ར་བའི་ནང་ཆིབས་བསྒྱུར་བསྐྱངས་ཏེ། གྲོས་ཚོགས་ཀྱི་གསར་འགོད་ཚོགས་ཁང་ནང་གྲོས་ཚོགས་འཐུས་མི་ཚོ་དང་བོད་དོན་ཐད་དྲི་བ་དྲིས་ལན་བཅས་གནང་ཡོད་པ་དང་། སུད་སི་གྲོས་ཚོགས་ཀྱི་ཚོགས་གཙོ་ལྕམ་མཱ་ཡ་གྷི་ར་ཧྥི་མཆོག་གིས་གསུངས་དོན། “༧གོང་ཏཱ་ལའི་བླ་མ་མཆོག་གྲོས་ཚོགས་ནང་གདན་ཞུ་གནང་ཐུབ་པ་ང་ཚོ་གྲོས་ཚོགས་ཀྱི་གཟི་བརྗིད་ཡིན་ཅེས་དང་། “ བོད་ནང་གི་གནས་སྟངས་ཛ་དྲག་པོ་ཡིན་པ་དང་། དམིགས་བསལ་ཆོས་དང་རིག་གཞུང་རྡོག་རོལ་གྱི་ཉེན་ཚབས་ཆེན་པོར་འཕྲད་ཀྱིན་པའི་དུས་སྐབས་འདིར། བོད་ནང་གི་བོད་པ་ཚོས་རེ་བ་ཡོད་ཚད་༧གོང་ས་མཆོག་དང་ཕྱི་ལོགས་སུ་ཡོད་པའི་བོད་པ་རྣམས་ལ་བརྒྱབ་ཡོད་པ་ང་ཚོས་ཤེས་ཀྱི་ཡོད” ཅེས་སོགས་གསུངས་འདུག ༧གོང་ས་མཆོག་སུད་སིའི་གྲོས་ཚོགས་ནང་གཞུང་འབྲེལ་ཐོག་གདན་འདྲེན་ཞུས་པ་ཐེངས་དང་པོ་ཡིན་པ་རེད།

ཕྱི་ཚེས་ ༡༧ ཉིན་སུད་སི་རི་ཀོན་དགོན་དུ་ཆིབས་བསྒྱུར་གནས་གཟིགས་གནང་སྟེ་རྗེས་ཐེངས་འདིའི་སུད་སི་ཁུལ་གྱི་མཛད་འཆར་ཁག་ལེགས་པར་གྲུབ་ཡོད་པ་རེད།
ཐེངས་འདིའི་༧གོང་ས་མཆོག་དང་སྲིད་སྐྱོང་མཆོག་རྣམ་གཉིས་སུད་སི་ཁུལ་དུ་ཆིབས་བསྒྱུར་གདན་ཞུའི་སྦྱིན་བདག་སྔ་འགྱུར་རིག་འཛིན་ཐེག་མཆོག་གླིང་གི་དབུ་འཛིན་ནམ་མཁའ་རིན་པོ་ཆེས་འགྲེལ་བརྗོད་གནང་དོན། ད་ལན་ཉིན་ལྔའི་རིང་གི་༧གོང་ས་སྐྱབས་མགོན་ཆེན་པོ་མཆོག་སྟོན་འཁོར་སུད་སི་ཁུལ་དུ་ཆིབས་བསྒྱུར་གྱི་མགྲོན་བདག་དང་། ཡུ་རོབ་བོད་བརྒྱུད་ནང་བསྟན་ལྷན་ཚོགས་ཐེངས་གཉིས་པའི་ཚོགས་ཁང་། ཉིན་གཉིས་ཀྱི་གསུང་ཆོས། བོད་རིགས་མི་མང་ལ་༧གོང་ས་མཆོག་དང་སྲིད་སྐྱོང་རྣམ་གཉིས་ནས་བཀའ་སློབ་དང་གསུང་བཤད་གནང་སྐབས་ཀྱི་ཚོགས་ཁང་། གཙུག་ལག་སློབ་ཁང་དུ་བཀའ་སློབ་གོ་སྒྲིག་སོགས་ཞབས་ཞུ་མི་དམན་ཙམ་ཞུ་ཐུབ་པ་བྱུང་སོང་ལ། ༧གོང་ས་མཆོག་ནས་ཀྱང་ཐུགས་དགྱེས་མཉེས་ཆེན་པོས་སླར་ཡང་ཕེབས་རྒྱུའི་བཀའ་བཟང་ཕེབས་བྱུང་བས་ཧ་ཅང་དགའ་བ་སྒོམ་བཞིན་ཡོད། ཅེས་གསུང་གི་འདུག