༅། བོད་ལ་རིག་གཞུང་རང་བཙན་དང་བསམ་བློ་རང་བཙན་གཉིས་ཐོབ་ཡོད་ཟེར་དོན་ཅི།

ཡོས་ལོ་བ།

སྤྱིར་ན་ཉེ་རབས་ལོ་རྒྱུས་ནང་།།
ཆུ་གླང་རང་བཙན་རྩ་ཚིག་དེ།།
བསྒྲགས་པ་དགོས་དོན་འབུམ་གྱིས་ཕྱུག།
དཔེར་ན་བསྟན་འཛིན་མནོལ་གྲིབ་ཀྱིས།།
ཕོག་པ་སེལ་ཕྱིར་བཀྲུ་བྱབས་ཀྱི།།
ཆོ་ག་བཏོན་པ་ཇི་བཞིན་ནོ།།
འོན་ཀྱང་མ་ཤེས་ལོག་རྟོག་ལ།།
གྲིབ་ལ་བསྟན་འཛིན་དབང་འདོད་དམ།།
ཡང་ན་དེ་གཉིས་གཅིག་གམ་སོམས།།
རྒྱ་དང་བོད་གཉིས་སོ་སོ་བ།།
ཡིན་ཕྱིར་བཀྲུ་བྱབས་སྲུང་འཁོར་གནང་།།
དེས་ན་རྒྱ་འོག་ཟེར་མ་འོས།།
འཆལ་གཏམ་གང་བྱུང་མ་སྒྲོགས་ཀྱེ།།
རང་བཙན་དྲན་གསོ་དོན་ཆེ་བས།།
ལས་འགུལ་སྣ་ཚོགས་སྤེལ་ཅིག་དང་།།
བདེན་མཐའ་གསལ་བར་ཕན་རླབས་ཆེ།།
འོན་ཀྱང་ཚོགས་གཙོའི་གཏམ་བཤད་དུ།།
རིག་གཞུང་བསམ་བློ་གཉིས་རང་བཙན།།
ད་ལྟ་བོད་ལ་ཡོད་ཟེར་བྲིས།།
འདི་ནི་སྨྱོན་པའི་ལབ་བརྡོལ་སྟེ།།
གང་ན་ཡོད་ཅེས་ཐོག་མར་དྲི།།
ད་ལྟ་བོད་ཀྱི་རྒྱལ་ཁམས་ན།།
དབུས་སུ་རིག་གསར་ལས་འགུལ་དར།།
མདོ་ཁམས་དྲག་དམག་བཙན་འོག་ཏུ།།
ཕ་སྐད་སྲུང་སྐྱོབ་སྨྲེ་ངག་ཤོར།།
ལོ་རྒྱུས་ལོ་ངོ་སྟོང་ལྡན་གྱི།།
གྲ་ས་འགྲིམ་ལམ་བཙན་གྱིས་བཅད།།
རྒྱ་ཇག་གྲངས་མེད་ཤ་རུལ་ལ།།
སྦྲང་ནག་ཇི་བཞིན་བོད་དུ་འཚང་།།
ཆོས་ལྡན་ཞིང་ས་རྒྱ་ཡིས་འཕྲོག།
ཕ་སྐད་གཙང་མ་འདམ་ལ་ལྷུང་།།
སྐད་ཡིག་སྐྱོབ་ཕྱིར་གཅེས་ཕྲུག་རྣམས།།
འུ་ཐུག་ཐབས་ཟད་ངུ་བཞིན་དུ།།
མེ་མདའི་ཁ་ན་ཁྲོམ་སྐོར་བྱེད།།
རིག་གཞུང་རང་བཙན་རྨི་ལམ་རང་།།
དེ་ནས་བསམ་བློ་རང་བཙན་གླེང་།།
དགོན་པར་རྒྱལ་གཅེས་ཆོས་གཅེས་སྤེལ།།
དུས་དབང་ཞུས་མཁན་བཙན་ཁྲིད་ཀྱིས།།
བསམ་བློ་བཅོས་བསྒྱུར་སློབ་གསོ་སྤེལ།།
ཉེས་མེད་ལས་བྱེད་གནས་དབྱུང་གཏོང་།།
སོ་སོར་བདག་པའི་ལུས་ཕུང་དང་།།
དེ་ལ་བརྟེན་པའི་བསམ་བློ་ལའང་།།
གཤེད་མ་བརྒྱ་ཡིས་བརྙས་གཙེས་བཅས།།
བསམ་བློ་རང་བཙན་རྨི་ལམ་རང་།།
དེས་ན་བོད་དུ་རང་བཙན་མེད།།
བསྟན་བྱ་བཙན་བྱོལ་ཡིན་ཟེར་ན།།
ཐོག་མར་བོད་དུ་སྨྲས་པ་ནོར།།
དེ་ནས་བཙན་བྱོལ་ནང་དུ་ཡང་།།
༧གོང་བློན་ལྷན་རྒྱས་ཞལ་སྒོ་ནས།།
གཞན་དབང་སྟབས་བསྟུན་ལན་བརྒྱར་ཐོས།།
ཕ་སྐད་གཙང་མའི་ལས་འགུལ་རིགས།།
དེ་གར་སྤེལ་བ་གང་མང་མཐོང་།།
དེ་དག་རིག་གཞུང་རང་བཙན་གྱི།།
རྟགས་སུ་མ་མཐོང་བསམ་བློ་ཡང་།།
རང་བཙན་དངོས་མ་དེར་ཡོད་དམ།།
ཚོགས་སུ་གཏམ་བཤད་གལ་ཆེ་ཡང་།།
བདེན་པའི་ལོ་རྒྱུས་དེ་བས་གཙོ།།
ཤེས་ཤིང་ཉམས་འོག་ཆུད་གྱུར་བའི།།
བདེན་པ་སྨྲ་བའི་དབང་བོ་མཛོད།།
བཙན་བྱོལ་རང་དབང་ཙམ་པོ་ཡང་།།
རྒྱ་གར་གཞུང་གི་གནང་ཉེས་མིན།།
བཙན་བྱོལ་གཞུང་གི་བྱས་ཉེས་མིན།།
འཛམ་གླིང་བདེན་པས་ཕོངས་པ་ཡིན།།
གཞིས་བྱེས་གཉིས་ཀྱི་སྐལ་བ་ཡིན།།
སྐལ་བ་བཟང་ངན་ཀུན་གསལ་ཡིན།།
སྐལ་བ་བཟང་ཞིག་སྙེག་པ་ལ།།
སྔོན་གྱི་དགེ་སྐྱོན་ཤན་ཕྱེ་ནས།།
སྐྱོན་སྤོང་དགེ་སྒྲུབ་གནད་འགག་སྟེ།།
བསམ་བློ་གཅིག་གྱུར་གལ་བོ་ཆེ།།
མཐུན་སྒྲིལ་སྟོབས་ཤུགས་གཅིག་སྒྲིལ་དགོས།།
ཆོས་པས་ཆབ་སྲིད་མ་འཁྱོངས་པས།།
ཆབ་སྲིད་དབུ་ཁྲིད་སྟོབས་ལྡན་དགོས།།
དེ་ཡི་སྐུ་སྲུང་ཚད་ལྡན་དགོས།།
ཆོས་པས་སྲིད་ལ་མི་ཐེ་བར།།
ཆོས་ལུགས་ཆོས་བཞིན་སྐྱོང་བ་དང་།།
བསྟན་པ་ངོས་གཙང་རིང་གནས་ཕྱིར།།
ཀུན་གྱིས་རང་གཞུང་བཀུར་སྐྱོར་གཅེས།།
ཤིང་དགྲ་སྟ་རེ་ཡིན་མོད་ཀྱང་།།
དེ་ཡི་ཡུ་བ་ཤིང་གིས་བྱེད།།
བོད་སྲིད་རྒྱ་ཡིས་འཕྲོག་པ་ཡང་།།
མཐུན་རྐྱེན་བོད་ཀྱིས་བསྐྲུན་པར་མཐོང་།།
ད་དུང་སྐྲུན་མཁན་མང་དུ་སྣང་།།
དོལ་ཚོགས་མི་གཟུགས་རོ་ལངས་བཞིན།།
དེ་རིང་ཁ་ནས་དེ་ཙམ་ཞིག།
རྨ་ལྷོ་རིག་འབྱུང་ཞིང་ནས་ཤོར།།