རྔ་བ་རྒྱལ་ཁམས་པ།
མའོ་ཙེ་ཏུང་གིས་ཏྰ་ལའི་བླ་མར་དབུ་བསྐོར་བ་ནས། ཧོས་ཅིན་ཐའོའི་ད་ལྟའི་སྲིད་དབང་སྒེར་གཅོད་ཀྱི་ཡ་ང་བའི་གནས་སྟངས་འདིའི་བར། ཏག་ཏག་མི་ལོ་ལྔ་བཅུ་ལྷག་ཅིག་ཕྱིན་སོང་། བོད་ལ་ལྟོས་ན། མི་ལོ་དེ་དག་ནི་ན་ཟའི་དབང་འོག་གི་ལྗོས་རིགས་ལྟར། རང་གི་མིང་གནས་སྲོག་གསུམ་རྩ་མེད་དུ་གཏོང་བཞིན་པའི་ཆབ་སྲིད་ཀྱི་བཙན་འཛུལ་འཇིགས་སུ་རུང་བའི་ནམ་ཟླ་ཞིག་རེད་ལ། ང་ཚོའི་ཚེ་སྲོག་དང་། རིག་གཞུང་། འཚོ་གནས་སོགས་ལ་ཉམས་མྱོང་དང་། གོ་རྟོགས་རང་བཞིན་གྱི་བློ་སྦྱོང་རྩ་ཆེན་པོ་ཞིག་ཀྱང་ཡིན། གནའ་བོའི་རྒུ་རིག་གི་སློབ་དཔོན་ཆེན་མོ་སོ་ཁུར་ཁྲེ་སི་མཆོག་གིས། ༼ཤིང་ནགས་ལས་ཁོ་བོར་བསླབ་རྒྱུ་ཅིའང་མི་འདུག༽ཅེས་དང་། ཝེལ་ཡམ་ཤག་ཁུ་སི་པེ་ཨར་མཆོག་གིས། ༼རྒྱུ་རྐྱེན་སྟོབས་ཆེན་གྱིས་འགུལ་སྐྱོད་སྟོབས་ཆེན་བསྐྲུན་ཐུབ༽ཅེས་བཤད་མྱོང་བ་ལྟར། ང་ཚོར་ཕ་རོལ་བོའི་བརྙས་བཅོས་དང་། མཐོང་ཆུང་། བཙན་འཛུལ་སོགས་མེད་ན། ང་ཚོ་ད་དུང་བྱིས་སྒྲུང་སྐྱིད་པོ་ཞིག་གི་ནང་གཉིད་དུ་ཡུར་ནས་བསྡད་ཡོད་སྲིད་པ་རེད། ད་ང་ཚོ་དངོས་གནས་སད་ཡོང་གི་འདུག རྒྱ་ཆེ་ས་ཞིག་ནས་སད་ཡོང་གི་འདུག གཏིང་ཟབ་ས་ཞིག་ནས་སད་ཡོང་གི་འདུག ངོ་མཚར་ས་ཞིག་ནས་སད་ཡོང་གི་འདུག མི་སད་ཁ་མེད་ཅིག་ནས་སད་ཡོང་གི་འདུག མི་ལོ་ལྔ་བཅུ་ལྷག་གི་རིང་། བཙན་འཛུལ་རང་ལུགས་པས་ང་ཚོ་བྱིས་པ་ལོ་བརྒྱད་ཅིག་ཏུ་བལྟས་ནས། བཙན་རྒྱལ་རང་ལུགས་མཐར་སྤྲོད་དང་། དབོན་ཞིང་རོགས་སྐྱོར། ནུབ་རྒྱུད་འཛུགས་སྐྲུན། བོད་སྐྱོད་རོགས་ཚོགས། གྲངས་ཉུང་མི་རིགས་རང་སྐྱོང་སོགས། ཉན་ན་སྙན་ཞིང་བསམས་ན་སྙིང་ན་བའི་ཆབ་སྲིད་ཀྱི་རྫབ་དོང་སྐྱུག་བྲོ་བོ་དག གཅིག་རྗེས་གཉིས་མཐུད་དུ་ལག་བསྟར་བྱས་ཡོད། ཁྱད་པར་དུ་ཉེ་བའི་ལོ་ཁ་ཤས་ནང་། བོད་ཀྱི་ཡུལ་དེ་དེང་རབས་རྒྱ་ནག་གི་ཆེས་ཐོན་གསར་གྱི་མཚོན་ཆ་དང་། དམག་རྩལ་གྱི་དྲག་སྦྱོང་བྱེད་སའི་ས་ཁུལ་ཞིག་ཏུ་གྱུར་ནས། ཁ་ན་མཐོང་ཆུང་དང་བརྙས་བཅོས། ཁོག་ན་ཧམ་སེམས་དང་གདུག་སེམས། ལག་ན་མེ་མདའ་དང་དུག་མཚོན། རྒྱབ་ན་མེ་སྒྱོགས་ལྕགས་ཁྲབ་ཅན་འདྲུད་པའི་དམར་དམག་ཁྲི་ཚོ་མང་བོ་སླེབས་ནས། ཆོས་མཐུན་ཞི་བདེ་ལ་དགའ་བའི་བོད་མི་གཉོམ་ཆུང་ཚོར་དབང་ཡོད་འཇིགས་སྐུལ་དང་། བཙན་འཛུལ་བྱེད་པ། སྡུག་སྦྱོང་གཏོང་བ། ཉེས་མེད་གླེང་འགེལ། ཆོས་དད་རང་དབང་འཕྲོག་པ། སྲོལ་རྒྱུན་གྱི་ཡུལ་གོམས་གཤིས་སྤྱོད་ལ་ཐེ་གཏོགས་ཀྱིས་སྟངས་འཛིན་ནན་མོ་བྱས་ནས། བོད་མི་ཚོ་དམྱལ་བ་མི་ཡུལ་དུ་སླེབས་པ་ལྟ་བུའི་དཀའ་སྡུག་གི་ཁྲོད་ལྷུང་ཡོད་པ་རེད། མཁའ་ལམ་འཐེན་སོང་། ལྕགས་ལམ་བཟོས་སོང་། རླངས་འཁོར་གྱི་ལམ་བསྐྲུན་སོང་། དེའི་འབྲས་བུ་ཅི་འདྲ་རེད། ཚུར་ལ་ཡོང་བ་ནི་འཇིག་རྫས་ཀྱི་བཅའ་དངོས་དང་། དེའི་བདག་པོ་ལྟ་བུའི་རྒྱའི་མི་འབོར་ཆེན་པོ་རེད། ཕར་ལ་ཁུར་བ་ནི་ཤིང་ནགས། ཤ་མར། བལ་པགས། གཏེར་ཁ་སྣ་ཚོགས། རྩི་སྨན་སོགས་སླད་མེད་གསེར་རྡོག་ལྟ་བུའི་བོད་ཡུལ་གྱི་རང་བྱུང་རིན་པོ་ཆེའི་རིགས་རེད། ད་ངའི་ཁྱིམ་གྱི་འཕོང་སྟེགས་ཆུང་ཆུང་དེ་དང་། རྩམ་ཁུག་ཆུང་ངུ་དེ། ཤ་མར་ཕྱུར་བ་སོགས་སྲོལ་རྒྱུན་གྱི་འཚོ་ལམ་དེའང་འཕྲོག་བཞིན་ཡོད། དེ་ལས་ཀྱང་བོད་མི་རིགས་ཀྱི་སྙིང་ལ་གྲི་འཛེར་བ་ཞིག་ནི། སངས་རྒྱས་ཆོས་ལུགས་ཀྱི་སེམས་ཁམས་ཤེས་རིག་གི་ལྟ་སྟངས་ལས་བྱུང་བའི་རང་གི་རྩ་བའི་བླ་མར། བདུད་དང་། ལྕེ་སྤྱང་། དྲག་སྤྱོད་པ་ཞེས་འཇིག་རྟེན་ན་ཆེས་ངན་ཤོས་དང་། སྡུག་ཤོས་སུ་བསྒྲུབས་ནས་སྒྲོ་སྐུར་སྣ་ཚོགས་བྱེད། སྐུ་པར་དང་། ཕྱག་མདུད། དཔེ་ཆ་སོགས་རྐང་འོག་ཏུ་མནན། མེ་ལ་སྦྱངས། མེ་མདའི་རྩེ་གྲིར་བསྐྱོན་པ་སོགས་ཀླ་ཀློའི་གདུག་རྩུབ་ཀྱི་མ་རུང་བའི་བྱ་བཞག་སྣ་ཚོགས་ཤིག་སྤེལ་བཞིན་པ་དང་། རྗེས་འཇུག་ཚོས་ཀྱང་དེ་ལྟར་བྱ་དགོས་པར་བཙན་སྐུལ་གཏོང་གི་ཡོད། ལས་ཀ་དེ་དག་ནི་མི་རིགས་མཐུན་སྒྲིལ་དང་། རྒྱལ་ཁབ་བརྟན་བརླིང་ཞེས་ནམ་རྒྱུན་བརྗོད་ཀྱིན་པའི་ཁ་ཆ་དེ་ཚོ་མིང་ཙམ་ལས་འགན་ཁུར་རང་ངོས་ནས་མ་བླངས་པའི་ཆབ་སྲིད་ཀྱི་གཡོ་ཇུས་ཤིག་ཡིན་པ་མ་ཟད། རང་ཉིད་རྒྱལ་ཁབ་ཀྱི་ཆོས་ལུགས་དད་མོས་རང་དབང་གི་སྲིད་ཇུས་དང་རྩ་ཁྲིམས་ཀྱི་ར་བ་ལས་བརྒལ་ཏེ་གཞན་ལ་སློབ་གསོ་གཏོང་ཁུལ་གྱི་རྫུན་གཏམ་ཆེན་པོ་ཞིག་ཀྱང་རེད། དེར་བརྟེན་ང་ཚོ་བོད་མི་རིགས་ཀྱིས་ཁྱོད་ཚོས་བྱེད་བཞིན་པའི་ཆབ་སྲིད་ཀྱི་ནག་ཉེས་དེ་དག རང་གི་གཅེས་པའི་ལུས་སྲོག་མེ་ལ་སྤར་ནས་འཛམ་གླིང་ལ་གསལ་བཤད་བྱས་པ་ཞིག་རེད། བོད་ཀྱི་སྐད་ཡིག་གཉིས་ཀྱིས་ཤེས་བྱ་འཆུན་ཚད་བསམ་གྱིས་མི་ཁྱབ་པ་རེད། དེ་ལ་དབྱངས་གསལ་གྱི་ཡི་གེ་སོ་བཞི་མ་གཏོགས་ཡོད་པ་མ་རེད། བོད་ཀྱི་སྲོལ་རྒྱུན་དང་དེང་རབས་ཀྱི་རིག་གནས་གཉིས་ཆར། ཡི་གེ་དེ་དག་གི་ནང་འདུམ་མི་ཐུབ་པ་ཞིག་ཕལ་ཆེར་ཡོད་རྒྱུ་མ་རེད། རྒྱ་ཡིག་ལྟར་ཡིག་གསར་སྟོང་ཕྲག་མང་བོ་བཟོས་ནས་བརྗོད་བྱ་སྟོན་དགོས་པའི་དཀའ་ངལ་ཡོད་པ་མ་རེད། བོད་ཀྱི་སྐད་དང་ཡི་གེ་དེ་གཉིས་བོད་མི་རིགས་རང་གིས་བཟོས། རང་གིས་བེད་སྤྱེད་བཏང་སྟེ་བོད་གསུང་འབུམ་གྱི་ལུང་བར་ཆགས་པ་རེད། རང་རྐྱ་ཐུབ་པའི་སྐད་ཡིག་འདིས་བོད་ཀྱི་ཆོས་སྲིད་འཕྲལ་ཕུགས་འཚོ་ཐབས་དང་བཅས་པར་གཞན་གྱི་སྔོན་དུ་འགྲོ་མ་ཐུབ་ཀྱང་། རྗེས་སུ་ལྷག་མ་དགོས་པའི་བཀོལ་བདེའི་ནུས་ཚད་ཀྱི་རྨང་གཞི་ཡག་ཐག་ཆོད་ཡོད་པ་རེད། ད་རང་གི་སྐད་ཡིག་རང་གི་ལུང་བ་ནས་བེད་སྤྱོད་གཏོང་བའི་ཁོར་ཡུག་འཕྲོག ལས་གནས་བརྟན་པོ་ཞིག་ཕར་ཞོག ཐ་ན་ཡིག་འགྲུལ་ཙམ་ཡང་གཏོང་ཐུབ་ཀྱི་མི་འདུག འཛིན་བྱང་། སྒོ་བྱང་། ཡིག་བྱང་སོགས་ཚང་མ་བཀོད་སྤྱོད་གཏོང་སའི་ལམ་ཁ་ཕལ་ཆེར་འགག་འགྲོ་གི་ཡོད་པ་རེད། ལོ་ངོ་སྟོང་ཕྲག་མང་བོའི་རིང་། བོད་མི་མང་གིས་ལུས་སྲོག་ལོངས་སྤྱོད་མཐའ་དག་ཕང་མེད་དུ་བཏང་སྟེ། རང་གི་སྐད་ཡིག་རིག་གཞུང་འདི་དག་འཛུགས་སྐྲུན་བྱས་པའི་དཀའ་སྤྱད་སྙིང་རུས་དང་། དེའི་རྩ་ཆེའི་རང་བཞིན་གྱི་རིན་ཐང་། དེ་འཆར་གཞི་ལྡན་པའི་ཐོག་རྩ་མེད་དུ་གཏོང་བཞིན་པའི་ངང་ཚུལ་སོགས་ལ་བསམ་བློ་ཞིག་བཏང་བ་ཡིན་ན། ཆེན་པོ་ཞིག་སྲུང་སྐྱོབ་ཀྱི་ཆེད་དུ་ཆེན་པོ་ཞིག་གཏོང་འོས་པའི་རྒྱུ་མཚན་རྟོགས་གི་ཡོད་པ་རེད། དེར་བརྟེན་ཁོང་ཚོས་རང་གི་ལུས་སྲོག་མེ་རུ་སྤར་ནས་བདེན་དཔང་བྱས་པ་རེད། རྩྭ་ས་གཞུང་གིས་འཕྲོག་སོང་། རི་ཁྱིམ་ཀློང་དུ་ཕབ་སོང་། བོད་ཕྲུག་རྒྱ་ཁོག་ཏུ་ཁྲིད་སོང་། ཁང་བ་བསྐྲུན་སོང་། རྐུད་ལམ་དྲངས་སོང་། འདི་ཚོ་བོད་ཡར་རྒྱས་ལ་དམིགས་པའི་འཛུགས་སྐྲུན་ཅིའང་མ་རེད། བོད་རིགས་ཚོ་འཛིན་བཟུང་དང་སྟངས་འཛིན་སྟབས་བདེའི་ཆེད་དམིགས་པའི་ཆབ་སྲིད་ཀྱི་གཡོ་ཇུས་ཤིག་རེད། བོད་ཆོས་ལྡན་གྱི་རྒྱལ་ཁམས། གཞང་ཁང་དང་། ཆང་ཁང་། རྒྱན་ཁང་། རྐུན་ཁང་གིས་གང་སོང་། གྲོང་ཁྱེར་བཟོ་སྐྲུན། སྡོད་ཁྱིམ་བཟོ་སྐྲུན། ཡུལ་སྐོར་འཛུགས་སྐྲུན་སོགས། བོད་ཀྱི་ངོ་རྟགས་མཚོན་པའི་སྲོལ་རྒྱུན་རྩ་མེད་དུ་གཏོང་བའི་བྱ་འགུལ་ཆེད་དུ་དམིགས་ནས་སྐྲུན་བཞིན་ཡོད། བོད་རིགས་ལ་ཁ་དབང་མེད། ཐོབ་ཐང་མེད། གོ་ས་མེད། དཔོན་མིང་ཙམ་ཡོད་ཀྱང་། དེ་ནི་གསོམ་སྡོང་ལ་ཆས་གོས་ཤིག་གཡོགས་པ་ལས་གཞན་ཅིའང་མ་རེད། དེར་བརྟེན་ཁོང་ཚོས་ལུས་སྲོག་མེ་ལ་བསྒྲོན་ནས་བདེན་དཔང་བྱས་པ་རེད། ཕྱི་ནས་ལྕགས་ཚེར་གྱི་ར་བས་བསྐོར། ནང་ནས་དམར་དམག་གིས་དྲག་རྡུང་བྱེད། རྒྱལ་ཁབ་ཀྱི་རྩ་ཁྲིམས་དང་། མི་རིགས་རང་སྐྱོང་གི་རྩ་ཁྲིམས་ཚང་མ་བརྩི་མེད་རྡོག་རོལ་གྱིས། རང་གི་ཁ་ལྟོ་དང་རྫུན་རྒྱབ་སྦས་སྐུང་གིས་རྒྱལ་གཅེས་ཆོས་གཅེས་ཟེར་བའི་ལས་འགུལ། མཁས་པས་མཐོང་ན་ཁོང་རྒོད་འཆོར་བ། བླུན་པོས་རིག་ན་ཧང་སེང་བ། ཕྱི་རྒྱལ་གྱིས་མཐོང་ན་ཞེན་པ་ལོག་པ། ནང་རྒྱལ་གྱིས་མཐོང་ན་ཡིད་ཆེས་བརླག་པ། རང་སྣང་གང་དྲན་ཁྲིམས་མེད་ལུགས་མེད་ཀྱི་ལས་འགུལ་འདི་ཚོ་བོད་ཤེས་རབ་ཀྱི་ལུང་པ་ན་ཁུངས་འཁྱོལ་གི་མ་རེད། དེར་བརྟེན་ཁྱོད་ཚོ་གཡོན་ཐལ་ཆེ་སོང་། ཁྱེད་ཚོར་དྲང་བདེན་མི་འདུག ཁྱོད་ཚོས་བོད་ཀྱི་རིག་གཞུང་དང་། སེམས་ཁམས་ལ་བརྩི་བཀུར་བྱེད་ཀྱིན་མི་འདུག ཅེས་ཁོང་ཚོས་ལུས་པོ་མེར་སྲེག་ནས་སྡུག་ཡས་གནམ་ལ་བཏོན་པ་རེད། ང་ཚོར་དགོས་པའི་དངོས་པོ་ཁྱོད་ཚོས་སྤྲོད་ཀྱིན་མི་འདུག ང་ཚོར་མི་མཁོ་བའི་དངོས་པོ་ཁྱོད་ཚོས་ཆེད་དུ་གཉེར་ནས་སྤྲོད་བཞིན་འདུག ང་ཚོས་ནམ་ཡང་ང་ཚོར་ཁང་རྩེག་མཐོན་པོ་དེ་ཚོ་དང་། གཏེར་ཁ་སྔོག་འདོན་གྱི་ལས་གཞི་དེ་ཚོ། དྲག་པོའི་རྟེན་གཞི་འཛུགས་སྐྲུན་གྱི་དམག་སྒར་དེ་ཚོ། བོད་ཁུལ་རྒྱ་སྲང་དུ་སྒྱུར་བཞིན་པའི་བཅོས་སྒྱུར་དེ་ཚོ། རོང་འབྲོག་མང་ཚོགས་ཀྱི་ཐོབ་སྐལ་གཅོད་བཞིན་པའི་རྩ་འཛུགས་དེ་ཚོར། བོད་མི་མང་གིས་ནམ་ཡང་རེ་བ་ཞུ་མྱོང་ཡོད་པ་མ་རེད། ཁྱོད་ཚོས་དུས་རབས་ཕྱེད་ཀའི་རིང་། ད་དུང་བོད་མི་མང་གི་རེ་འབོད་དང་། དགོས་མཁོ་ཅི་ཡིན་ཧ་གོ་མི་འདུག དེ་ལ་བརྟེན་ནས་ཞི་བའི་གྱེན་ལོག་གི་ངོ་རྒོལ་དེ་ཚོ་བྱུང་བ་རེད་ལ། འབྱུང་ངེས་ཀྱང་རེད། རང་གི་འཚོ་གནས་ལ་རང་དབང་ཞིག རང་གི་སྐད་ཡིིག་ལ་ཁོར་ཡུག་ཅིག རང་གི་ཁོར་ཡུག་ལ་སྲུང་སྐྱོབ་ཅིག རང་གི་སྲོལ་རྒྱུན་ལ་བརྩི་མཐོང་ཞིག རང་གི་ཆོས་དད་ལ་རང་དབང་ཞིག ལྷག་པར་བོད་ཀྱི་བསམ་བློའི་ནང་། སངས་རྒྱས་ཤྰཀྱ་ཐུབ་པ་དང་གཉིས་སུ་མེད་པའི་ཏྰ་ལའི་བླ་མ་ཕྱིར་རང་ཡུལ་དུ་གདན་འདྲེན་རྒྱུ་དེ་ནི། བོད་མི་མང་གི་རེ་འདུན་གཙོ་བོ་དང་། རྒྱ་ནག་རྒྱལ་ཁབ་ཀྱི་བརྟན་བརླང་གཉིས་ཆ་ཡིན་པ་ཁྱོད་ཚོས་ཧ་གོ་བར་གྱིས་ཤིག ཁྱོད་ཚོས་དུས་རབས་ཕྱེད་ཀའི་རིང་། བོད་ལ་བཟུང་བའི་ཆབ་སྲིད་ཀྱི་དམིགས་ཚད་དང་། འཆར་རྩིས། བྱ་བཞག་ཚང་མ་འཁྲུགས་སོང་། ནོར་སོང་། དོན་མེད་བེད་མེད་དུ་གྱུར་སོང་། དགེ་མཚན་ཅིའང་ཐོན་ཐུབ་མ་སོང་། རྒྱུ་མཚན་ཅི་རེད། ཁྱོད་ཚོ་སྲིད་དབང་སྒེར་གཅོད་པའི་ཆབ་སྲིད་ཀྱི་དམིགས་འབེན་ཁོ་ན་ལས། བོད་མི་རིགས་ཀྱི་སེམས་ཁམས་ལ་རྒྱུས་ལོན་ཁྱོན་ནས་བྱས་མི་འདུག ཁྱོད་ཚོར་བོད་ཀྱི་མངོན་འདོད་ལ་བརྩི་བཀུར་ཆ་འཇོག་བྱས་ན། རྒྱ་ནག་རྒྱལ་ཁབ་ཀྱི་བརྟན་བརླང་དང་ཆེ་མཐོངས་ལ་དགེ་མཚན་ཆེན་པོ་འབྱུར་རྒྱུ་ཡིན་པའི་བསམ་བློའི་གོ་རྟོགས་སད་མི་འདུག ཁྱོད་ཚོར་འཛམ་གླིང་གི་ཆེ་མཐོངས། ཁྱོད་ཚོར་རྒྱལ་ཁབ་ཀྱི་བརྟན་བརླང་། ཁྱོད་ཚོར་མི་རིགས་ཀྱི་མཐུན་བསྒྲིལ། ཁྱོད་ཚོར་རྒྱ་ནག་དེ་མིང་དོན་མཚུངས་པའི་སྟོབས་ལྡན་གྱི་རྒྱལ་ཁབ་ཅིག་ཏུ་འགྱུར་དགོས་པའི་རྒྱལ་ཞེན་ཡོད་ན། བོད་ཐེ་བའི་གྲངས་ཉུང་མི་རིགས་དང་། དེ་དག་གི་རིག་གཞུང་། རང་དབང་སོགས་ལ་ལུགས་མཐུན་བརྩི་འཇོག་བྱེད་དགོས་པ་རེད། དེས་འཕྲལ་ཕུགས་གཉིས་ཀར་ཕན་གྱི་རེད། རྒྱ་ལ་ཕན་གྱི་རེད། བོད་ལ་ཕན་གྱི་རེད། རྒྱལ་ཁབ་ལ་ཕན་གྱི་རེད། དེ་མིན། ཁྱོད་ཚོ་ཅི་ཙམ་སྟོབས་ཆེ་རུང་། ཁྱོད་ཚོ་ཅི་ཙམ་འབྱོར་བ་ཆེའང་། ཁྱོད་ཚོ་ཇི་ལྟར་ཁ་དབང་ཆེ་རུང་། ཁྱོད་ཀྱིས་བོད་ལ་འཛིན་པའི་ཁྲིམས་འགལ་གྱི་སྲིད་ཇུས་དེ་ཚོ། ད་མུས་བཞིན་ནམ་ཡང་ལམ་འགྲོ་ཡོང་གི་མ་རེད། འདི་ནི༼སྡུག་བསྔལ་གྱི་མཐར་ཐུག སྙིང་སྟོབས་ཀྱི་རྩེ་མོ་དང་།༽༼བདེན་རྫུན་གཉིས་ནམ་ཡང་གཅིག་ཏུ་འདྲེས་མི་སྲིད་པའི་ཆོས་ཉིད༽༼རྒྱུ་རྐྱེན་སྟོབས་ཆེན་གྱིས་འགུལ་སྐྱོད་སྟོབས་ཆེན༽བསྐྲུན་ཐུབ་པའི་གནས་ལུགས་རེད།།
རྒྱ་ནག་ནི་ཞི་བདེ་དང་དམངས་གཙོ། རང་དབང་བཅས་ཀྱི་སྤྱི་དགྲ་ངོ་མ་རེད།
གང་ན་དྲགས་གནོན་ཡོད་ན། དེ་ལ་ངོ་རྒོལ་ཡོད།